रुद्रचण्डीकवचम् Shri Rudrachandi Kavacham

पूर्वपीठिकाश्रीकार्तिकेय उवाचकवचं चण्डिकादेव्याः श्रोतुमिच्छामि ते शिव! ।यदि तेऽस्ति कृपा नाथ! कथयस्व जगत्प्रभो ! ॥ १॥

pūrvapīṭhikāśrīkārtikeya uvācakavacaṃ caṇḍikādevyāḥ śrotumicchāmi te śiva! |yadi te'sti kṛpā nātha! kathayasva jagatprabho ! || 1||

श्रीशिव उवाचशृणु वत्स ! प्रवक्ष्यामि चण्डिकाकवचम् शुभम् ।भुक्तिमुक्तिप्रदातारमायुष्यं सर्वकामदम् ॥ २॥

śrīśiva uvācaśṛṇu vatsa ! pravakṣyāmi caṇḍikākavacam śubham |bhuktimuktipradātāramāyuṣyaṃ sarvakāmadam || 2||

दुर्लभं सर्वदेवानां सर्वपापनिवारणम् ।मन्त्रसिद्धिकरं पुंसां ज्ञानसिद्धिकरं परम् ॥ ३॥

durlabhaṃ sarvadevānāṃ sarvapāpanivāraṇam |mantrasiddhikaraṃ puṃsāṃ jñānasiddhikaraṃ param || 3||

विनियोगःश्रीरुद्र चण्डिकाकवचस्य श्रीभैरव ऋषिः\,अनुष्टुप्छन्दः\, श्रीचण्डिका देवता\,चतुर्वर्गफलप्राप्त्यर्थं पाठे विनियोगः ॥ऋष्यादि न्यासःश्रीभैरव ऋषये नमः शिरसि ।अनुष्टुप्छन्दसे नमः मुखे ।श्रीचण्डिकादेवतायै नमः हृदि ।चतुर्वर्गफलप्राप्त्यर्थं पाठे विनियोगाय नमः सर्वाङ्गे ॥अथ कवचस्तोत्रम् ।चण्डिका मेऽग्रतः पातु आग्नेय्यां भवसुन्दरी ।याम्यां पातु महादेवी नैरृत्यां पातु पार्वती ॥ १॥

viniyogaḥśrīrudra caṇḍikākavacasya śrībhairava ṛṣiḥ\,anuṣṭupchandaḥ\, śrīcaṇḍikā devatā\,caturvargaphalaprāptyarthaṃ pāṭhe viniyogaḥ ||ṛṣyādi nyāsaḥśrībhairava ṛṣaye namaḥ śirasi |anuṣṭupchandase namaḥ mukhe |śrīcaṇḍikādevatāyai namaḥ hṛdi |caturvargaphalaprāptyarthaṃ pāṭhe viniyogāya namaḥ sarvāṅge ||atha kavacastotram |caṇḍikā me'grataḥ pātu āgneyyāṃ bhavasundarī |yāmyāṃ pātu mahādevī nairṛtyāṃ pātu pārvatī || 1||

वारुणे चण्डिका पातु चामुण्डा पातु वायवे ।उत्तरे भैरवी पातु ईशाने पातु शङ्करी ॥ २॥

vāruṇe caṇḍikā pātu cāmuṇḍā pātu vāyave |uttare bhairavī pātu īśāne pātu śaṅkarī || 2||

पूर्वे पातु शिवा देवी ऊर्ध्वे पातु महेश्वरी ।अधः पातु सदाऽनन्ता मूलाधार निवासिनी ॥ ३॥

pūrve pātu śivā devī ūrdhve pātu maheśvarī |adhaḥ pātu sadā'nantā mūlādhāra nivāsinī || 3||

मूर्ध्नि पातु महादेवी ललाटे च महेश्वरी ।कण्ठे कोटीश्वरी पातु हृदये नलकूबरी ॥ ४॥

mūrdhni pātu mahādevī lalāṭe ca maheśvarī |kaṇṭhe koṭīśvarī pātu hṛdaye nalakūbarī || 4||

नाभौ कटिप्रदेशे च पायाल्लम्बोदरी सदा ।ऊर्वोर्जान्वोः सदा पायात् त्वचं मे मदलालसा ॥ ५॥

nābhau kaṭipradeśe ca pāyāllambodarī sadā |ūrvorjānvoḥ sadā pāyāt tvacaṃ me madalālasā || 5||

ऊर्ध्वे पार्श्वे सदा पातु भवानी भक्तवत्सला ।पादयोः पातु मामीशा सर्वाङ्गे विजया सदा ॥ ६॥

ūrdhve pārśve sadā pātu bhavānī bhaktavatsalā |pādayoḥ pātu māmīśā sarvāṅge vijayā sadā || 6||

रक्त मांसे महामाया त्वचि मां पातु लालसा ।शुक्रमज्जास्थिसङ्घेषु गुह्यं मे भुवनेश्वरी ॥ ७॥

rakta māṃse mahāmāyā tvaci māṃ pātu lālasā |śukramajjāsthisaṅgheṣu guhyaṃ me bhuvaneśvarī || 7||

ऊर्ध्वकेशी सदा पायान् नाडी सर्वाङ्गसन्धिषु ।ॐ ऐं ऐं ह्रीं ह्रीं चामुण्डे स्वाहामन्त्रस्वरूपिणी ॥ ८॥

ūrdhvakeśī sadā pāyān nāḍī sarvāṅgasandhiṣu |oṃ aiṃ aiṃ hrīṃ hrīṃ cāmuṇḍe svāhāmantrasvarūpiṇī || 8||

आत्मानं मे सदा पायात् सिद्धविद्या दशाक्षरी ।इत्येतत् कवचं देव्याश्चण्डिकायाः शुभावहम् ॥ ९॥

ātmānaṃ me sadā pāyāt siddhavidyā daśākṣarī |ityetat kavacaṃ devyāścaṇḍikāyāḥ śubhāvaham || 9||

॥ फलश्रुति ॥गोपनीयं प्रयत्नेन कवचं सर्वसिद्धिदम् ।सर्वरक्षाकरं धन्यं न देयं यस्य कस्यचित् ॥ १०॥

|| phalaśruti ||gopanīyaṃ prayatnena kavacaṃ sarvasiddhidam |sarvarakṣākaraṃ dhanyaṃ na deyaṃ yasya kasyacit || 10||

अज्ञात्वा कवचं देव्या यः पठेत् स्तवमुत्तमम् ।न तस्य जायते सिद्धिर्बहुधा पठनेन च ॥ ११॥

ajñātvā kavacaṃ devyā yaḥ paṭhet stavamuttamam |na tasya jāyate siddhirbahudhā paṭhanena ca || 11||

धृत्वैतत् कवचं देव्या दिव्यदेहधरो भवेत् ।अधिकारी भवेदेतच्चण्डीपाठेन साधकः ॥ १२॥

dhṛtvaitat kavacaṃ devyā divyadehadharo bhavet |adhikārī bhavedetaccaṇḍīpāṭhena sādhakaḥ || 12||

इति श्रीरुद्रयामलतन्त्रे श्रीशिवकार्तिकेयसंवादेरुद्रचण्डीकवचं सम्पूर्णं शिवं भूयात् ॥

iti śrīrudrayāmalatantre śrīśivakārtikeyasaṃvāderudracaṇḍīkavacaṃ sampūrṇaṃ śivaṃ bhūyāt ||