कालीस्तवः ब्रह्मकृतम् Kali Stava Brahmakritam

नमामि कृष्णरूपिणीं कृष्णाङ्गयष्टिधारिणीम् ।समग्रतत्त्वसागरमपारपारगह्वराम् ॥ १॥

namāmi kṛṣṇarūpiṇīṃ kṛṣṇāṅgayaṣṭidhāriṇīm |samagratattvasāgaramapārapāragahvarām || 1||

शिवाप्रभां समुज्ज्वलां स्फुरच्छशाङ्कशेखराम् ।ललाटरत्नभास्करां जगत्प्रदीप्तिभास्कराम् ॥ २॥

śivāprabhāṃ samujjvalāṃ sphuracchaśāṅkaśekharām |lalāṭaratnabhāskarāṃ jagatpradīptibhāskarām || 2||

महेन्द्र कश्यपार्चितां सनत्कुमारसंस्तुताम् ।सुरासुरेन्द्रवन्दितां यथार्थनिर्मलाद्भुताम् ॥ ३॥

mahendra kaśyapārcitāṃ sanatkumārasaṃstutām |surāsurendravanditāṃ yathārthanirmalādbhutām || 3||

अतर्क्यरोचिरूर्जितां विकारदोषवर्जिताम् ।मुमुक्षुभिर्विचिन्तितां विशेषतत्त्वसूचिताम् ॥ ४॥

atarkyarocirūrjitāṃ vikāradoṣavarjitām |mumukṣubhirvicintitāṃ viśeṣatattvasūcitām || 4||

मृतास्थिनिर्मितस्रजां मृगेन्द्रवाहनाग्रजाऽम् ।सुशुद्धतत्त्वतोषणां त्रिवेदपारभूषणाम् ॥ ५॥

mṛtāsthinirmitasrajāṃ mṛgendravāhanāgrajā'm |suśuddhatattvatoṣaṇāṃ trivedapārabhūṣaṇām || 5||

भुजङ्गहारहारिणीं कपालखण्डधारिणीम् ।सुधोर्मिकोपकारिणीं सुरेन्द्रवैरिघातिनीम् ॥ ६॥

bhujaṅgahārahāriṇīṃ kapālakhaṇḍadhāriṇīm |sudhormikopakāriṇīṃ surendravairighātinīm || 6||

कुठारपाशचापिनीं कृतान्तकामभेदिनीम् ।शुभां कपालमालिनीं सुवर्णकल्पशाखिनीम् ॥ ७॥

kuṭhārapāśacāpinīṃ kṛtāntakāmabhedinīm |śubhāṃ kapālamālinīṃ suvarṇakalpaśākhinīm || 7||

श्मशानभूमिवासिनीं द्विजेन्द्रमौलिभाविनीम् ।तमोऽन्धकारयामिनीं शिवस्वभावकामिनीम् ॥ ८॥

śmaśānabhūmivāsinīṃ dvijendramaulibhāvinīm |tamo'ndhakārayāminīṃ śivasvabhāvakāminīm || 8||

सहस्रसूर्य्यराजिकां धनञ्जयोग्रकारिकाम् ।सुशुद्धकालकन्दलां सुभृङ्गवृन्दमञ्जुलाम् ॥ ९॥

sahasrasūryyarājikāṃ dhanañjayograkārikām |suśuddhakālakandalāṃ subhṛṅgavṛndamañjulām || 9||

प्रजापिनीं प्रजावतीं नमामि मातरं सतीम् ।स्वकर्मकारणे गतिं हरप्रियाञ्च पार्वतीम् ॥ १०॥

prajāpinīṃ prajāvatīṃ namāmi mātaraṃ satīm |svakarmakāraṇe gatiṃ harapriyāñca pārvatīm || 10||

अनन्तशक्तिकान्तिदां यशोऽर्थम्भुक्तिमुक्तिदाम् ।पुनः पुनर्जगद्धितां नमाम्यहं सुरार्चिताम् ॥ ११॥

anantaśaktikāntidāṃ yaśo'rthambhuktimuktidām |punaḥ punarjagaddhitāṃ namāmyahaṃ surārcitām || 11||

जयेश्वरि ! त्रिलोचने ! प्रसीद देवि ! पाहिमाम् ।जयन्ति ते स्तुवन्ति ये शुभं लभन्त्यमोक्षतः ॥ १२॥

jayeśvari ! trilocane ! prasīda devi ! pāhimām |jayanti te stuvanti ye śubhaṃ labhantyamokṣataḥ || 12||

सदैव ते हतद्विषः परं भवन्ति सज्जुषः ।नराः परे शिवेऽधुना प्रसाधि मां करोमि किम् ॥ १३॥

sadaiva te hatadviṣaḥ paraṃ bhavanti sajjuṣaḥ |narāḥ pare śive'dhunā prasādhi māṃ karomi kim || 13||

अतीव मोहितात्मनो वृथा विचेष्टितस्य मे ।कुरु प्रसादितं मनो यथास्मि जन्मभञ्जनः ॥ १४॥

atīva mohitātmano vṛthā viceṣṭitasya me |kuru prasāditaṃ mano yathāsmi janmabhañjanaḥ || 14||

तथा भवन्तु तावका यथैव घोषितालकाः ।इमां स्तुतिं ममेरितां पठन्ति कालिसाधकाः ।न ते पुनः सुदुस्तरे पतन्ति मोहगह्वरे ॥ १५॥

tathā bhavantu tāvakā yathaiva ghoṣitālakāḥ |imāṃ stutiṃ mameritāṃ paṭhanti kālisādhakāḥ |na te punaḥ sudustare patanti mohagahvare || 15||

इति श्यामारहस्ये श्रीब्रह्मकृतकालीस्तवः सम्पूर्णः ।॥ श्यामारहस्यम् । पञ्चदशः परिच्छेदः ॥– ॥ श्यामारहस्यम् । पन्चदशः परिच्छेदः ॥

iti śyāmārahasye śrībrahmakṛtakālīstavaḥ sampūrṇaḥ ||| śyāmārahasyam | pañcadaśaḥ paricchedaḥ ||– || śyāmārahasyam | pancadaśaḥ paricchedaḥ ||