कल्याणीकमलाव्रतनिरूपणम् Kalyanikamalavratanirupanam

अथाऽन्यत्ते शुभं लक्ष्मि कल्याणीकमलाव्रतम् ।अशेषयज्ञफलदमशेषाघविनाशनम् ॥ ७६॥

athā'nyatte śubhaṃ lakṣmi kalyāṇīkamalāvratam |aśeṣayajñaphaladamaśeṣāghavināśanam || 76||

अशेषदुष्टशमनमशेषसुरपूजितम् ।पवित्राणां पवित्रं च मङ्गलानां सुमङ्गलम् ॥ ७७॥

aśeṣaduṣṭaśamanamaśeṣasurapūjitam |pavitrāṇāṃ pavitraṃ ca maṅgalānāṃ sumaṅgalam || 77||

दैवतं दैवतानां च पुराणानां पुरातनम् ।माघशुक्लैकादशिकाव्रतं कल्याणदं शुभम् ॥ ७८॥

daivataṃ daivatānāṃ ca purāṇānāṃ purātanam |māghaśuklaikādaśikāvrataṃ kalyāṇadaṃ śubham || 78||

घृतेनाऽभ्यञ्जनं कृत्वा दशम्यां च तिलैर्जलैः ।स्नात्वा प्रातर्हरिकृष्णं पूजयेत् सर्ववस्तुभिः ॥ ७९॥

ghṛtenā'bhyañjanaṃ kṛtvā daśamyāṃ ca tilairjalaiḥ |snātvā prātarharikṛṣṇaṃ pūjayet sarvavastubhiḥ || 79||

नमोऽनादिकृष्णनारायणाय पादयोर्नमः ।सर्वात्मने नमः के च वैकुण्ठाय नमो मुखे ॥ ८०॥

namo'nādikṛṣṇanārāyaṇāya pādayornamaḥ |sarvātmane namaḥ ke ca vaikuṇṭhāya namo mukhe || 80||

श्रीवत्सधारिणे वक्षःस्थले नमो मुहुर्मुहुः ।शङ्खचक्रगदापद्मवरदानप्रधारिणे ॥ ८१॥

śrīvatsadhāriṇe vakṣaḥsthale namo muhurmuhuḥ |śaṅkhacakragadāpadmavaradānapradhāriṇe || 81||

नमो बाहुषु सर्वेषूदरे दामोदराय च ।मेढ्रे नमः सुखदाय ऊर्वोः सौभाग्यदाय च ॥ ८२॥

namo bāhuṣu sarveṣūdare dāmodarāya ca |meḍhre namaḥ sukhadāya ūrvoḥ saubhāgyadāya ca || 82||

जान्वोर्नमो भूतध्राय जङ्घयोर्मोक्षदाय च ।पादयोः पापनाशाय श्रीकृष्णाय नमो नमः ॥ ८३॥

jānvornamo bhūtadhrāya jaṅghayormokṣadāya ca |pādayoḥ pāpanāśāya śrīkṛṣṇāya namo namaḥ || 83||

नमः कल्याणकारिण्यै कमलायै नमो नमः ।नमः श्रीललितालक्ष्म्यै जयालक्ष्म्यै नमो नमः ॥ ८४॥

namaḥ kalyāṇakāriṇyai kamalāyai namo namaḥ |namaḥ śrīlalitālakṣmyai jayālakṣmyai namo namaḥ || 84||

नमः श्रीमाणिकीलक्ष्म्यै नारायणीश्रियै नमः ।नमः श्रीसुखदालक्ष्म्यै शिवराज्ञीश्रियै नमः ॥ ८५॥

namaḥ śrīmāṇikīlakṣmyai nārāyaṇīśriyai namaḥ |namaḥ śrīsukhadālakṣmyai śivarājñīśriyai namaḥ || 85||

नमः श्रीपार्वतीलक्ष्म्यै कान्ताप्रमाश्रियै नमः ।नमः श्रीकम्भरालक्ष्म्यै महालक्ष्मीश्रियै नमः ॥ ८६॥

namaḥ śrīpārvatīlakṣmyai kāntāpramāśriyai namaḥ |namaḥ śrīkambharālakṣmyai mahālakṣmīśriyai namaḥ || 86||

नमः श्रीसन्तुष्टिलक्ष्म्यै कार्ष्णीश्रियै नमो नमः ।नमः श्रीराधिकालक्ष्म्यै रमालक्ष्म्यै नमो नमः ॥ ८७॥

namaḥ śrīsantuṣṭilakṣmyai kārṣṇīśriyai namo namaḥ |namaḥ śrīrādhikālakṣmyai ramālakṣmyai namo namaḥ || 87||

एवं नत्वा च गोविन्दं श्रियं नत्वा पुनः पुनः ।सर्वोपचारकैश्चोभौ कल्याणदौ प्रपूजयेत् ॥ ८८॥

evaṃ natvā ca govindaṃ śriyaṃ natvā punaḥ punaḥ |sarvopacārakaiścobhau kalyāṇadau prapūjayet || 88||

गन्धैर्माल्यैर्धूपदीपैर्भक्ष्यैर्नानाविधैरपि ।जलैस्ताम्बूलकैश्चारार्त्रिकैः पुष्पार्पणैस्तथा ॥ ८९॥

gandhairmālyairdhūpadīpairbhakṣyairnānāvidhairapi |jalaistāmbūlakaiścārārtrikaiḥ puṣpārpaṇaistathā || 89||

प्रीयतां मम गोपालः श्रीपतिः पुरुषोत्तमः ।प्रीयतां मम कल्याणीमहालक्ष्मीनरायणी ॥ ९०॥

prīyatāṃ mama gopālaḥ śrīpatiḥ puruṣottamaḥ |prīyatāṃ mama kalyāṇīmahālakṣmīnarāyaṇī || 90||

एवमुच्चार्य शयने स्थापयेत् परमेश्वरीम् ।मध्याह्ने पूजयेच्चापि भोजयेच्च निशामुखे ॥ ९१॥

evamuccārya śayane sthāpayet parameśvarīm |madhyāhne pūjayeccāpi bhojayecca niśāmukhe || 91||

सोत्सवं पूजयेच्चापि भोजयेत् पायसादिकम् ।सुप्त्वा चैकादशीप्रातरुत्थाय स्नानमाचरेत् ॥ ९२॥

sotsavaṃ pūjayeccāpi bhojayet pāyasādikam |suptvā caikādaśīprātarutthāya snānamācaret || 92||

पूजयेद्विधिना लक्ष्मीं कल्याणीं मण्डपे शुभे ।सर्वतोभद्रके रम्ये मण्डले विष्णुना सह ॥ ९३॥

pūjayedvidhinā lakṣmīṃ kalyāṇīṃ maṇḍape śubhe |sarvatobhadrake ramye maṇḍale viṣṇunā saha || 93||

पूजयित्वा च गोदाने शय्यादानं घटार्पणम् ।लक्ष्म्यर्पणं रत्नभूषाम्बरपात्रधनार्पणम् ॥ ९४॥

pūjayitvā ca godāne śayyādānaṃ ghaṭārpaṇam |lakṣmyarpaṇaṃ ratnabhūṣāmbarapātradhanārpaṇam || 94||

धान्यभोजनभोग्याद्यर्पणं कुर्याद्व्रती प्रगे ।भोजयेछ्रीमहालक्ष्मीं दुग्धं फलादिकं शुभम् ॥ ९५॥

dhānyabhojanabhogyādyarpaṇaṃ kuryādvratī prage |bhojayechrīmahālakṣmīṃ dugdhaṃ phalādikaṃ śubham || 95||

मध्याह्ने पूजयेच्चापि भोजयेत् पायसादिकम् ।सायं सम्पूजयेच्चापि रात्रौ जागरणं चरेत् ॥ ९६॥

madhyāhne pūjayeccāpi bhojayet pāyasādikam |sāyaṃ sampūjayeccāpi rātrau jāgaraṇaṃ caret || 96||

द्वादश्यां प्रातरेवाऽपि प्रपूज्य विधिना दिशेत् ।गुरवे साधवे साध्व्यै दानानि च द्विजातये ॥ ९७॥

dvādaśyāṃ prātarevā'pi prapūjya vidhinā diśet |gurave sādhave sādhvyai dānāni ca dvijātaye || 97||

भोजयेत्सुमृष्टमिष्टान्नानि विप्रान् सतस्तथा ।बालकान् बालिका नारीः साधून् सम्भोजयेत्तथा ॥ ९८॥

bhojayetsumṛṣṭamiṣṭānnāni viprān satastathā |bālakān bālikā nārīḥ sādhūn sambhojayettathā || 98||

दद्याद्दानानि बहूनि परिहारं ततश्चरेत् ।लक्ष्मीनारायणसंहितायाः कथामिमां वदेत् ॥ ९९॥

dadyāddānāni bahūni parihāraṃ tataścaret |lakṣmīnārāyaṇasaṃhitāyāḥ kathāmimāṃ vadet || 99||

पठनाच्छ्रवणादस्य स्मरणाच्चानुमोदनात् ।भुक्तिर्मुक्तिर्भवेच्चापि कल्याणानि बहूनि च ॥ १००॥

paṭhanācchravaṇādasya smaraṇāccānumodanāt |bhuktirmuktirbhaveccāpi kalyāṇāni bahūni ca || 100||

पुराजन्मनि चाभीरीकन्या कल्याणिनीव्रतम् ।कृत्वा नारायणपुत्री ऊर्वशी समजायत ॥ १०१॥

purājanmani cābhīrīkanyā kalyāṇinīvratam |kṛtvā nārāyaṇaputrī ūrvaśī samajāyata || 101||

पुरा वैश्यकुटुम्बोत्था पुलोमकन्यका त्विदम् ।व्रतं कृत्वा महेन्द्राणी व्यजायत दिवेश्वरी ॥ १०२॥

purā vaiśyakuṭumbotthā pulomakanyakā tvidam |vrataṃ kṛtvā mahendrāṇī vyajāyata diveśvarī || 102||

पुरा कृत्वा व्रतं चैतत् सुरपुत्रो द्विजस्ततः ।सूर्यो बभूव स्वर्गेशः सहस्ररश्मिवान् प्रभुः ॥ १०३॥

purā kṛtvā vrataṃ caitat suraputro dvijastataḥ |sūryo babhūva svargeśaḥ sahasraraśmivān prabhuḥ || 103||

तस्मात् कल्याणिकालक्ष्मीव्रतं स्वेष्टोत्तमप्रदम् ।माघे दिनत्रयं कार्यं सर्वकल्याणसम्प्रदम् ॥ १०४॥

tasmāt kalyāṇikālakṣmīvrataṃ sveṣṭottamapradam |māghe dinatrayaṃ kāryaṃ sarvakalyāṇasampradam || 104||

इति श्रीलक्ष्मीनारायणीयसंहितायाः द्वापरयुगसन्तानात्मकस्य तृतीयखण्डे१३८अध्यायान्तर्गतं कल्याणीकमलाव्रतनिरूपणं सम्पूर्णम् ।लक्ष्मीनारायणीयसंहिता । खण्ड ३। अध्याय १३८/७६१०४॥लक्ष्मीनारायणीयसंहिता । खण्ड ३। अध्याय १३८/७६-१०४॥

iti śrīlakṣmīnārāyaṇīyasaṃhitāyāḥ dvāparayugasantānātmakasya tṛtīyakhaṇḍe138adhyāyāntargataṃ kalyāṇīkamalāvratanirūpaṇaṃ sampūrṇam |lakṣmīnārāyaṇīyasaṃhitā | khaṇḍa 3| adhyāya 138/76104||lakṣmīnārāyaṇīyasaṃhitā | khaṇḍa 3| adhyāya 138/76-104||