दक्षिणकालिकाकवचम् २ Dakshinakalika Kavacham 2

(श्यामारहस्ये)विरूपाक्ष उवाच ।नमामि गुरुमक्षोभ्यं मन्त्रशक्तिसमन्वितम् ।प्रसन्नं ज्ञानमज्ञानं हेतुं बुद्धिप्रकाशकम् ॥ १॥

(śyāmārahasye)virūpākṣa uvāca |namāmi gurumakṣobhyaṃ mantraśaktisamanvitam |prasannaṃ jñānamajñānaṃ hetuṃ buddhiprakāśakam || 1||

गजेन्द्रवदनं नौमि रक्तं विघ्नविदारकम् ।पाशाङ्कुशवराभीति लसद्भुजचतुष्टयम् ॥ २॥

gajendravadanaṃ naumi raktaṃ vighnavidārakam |pāśāṅkuśavarābhīti lasadbhujacatuṣṭayam || 2||

भैरवः सर्वदा पातु ऋषिर्मे शिरसोपरि ।मुखे छन्दः सदा पातु त्रिष्टुप् च विजयात्मकम् ॥ ३॥

bhairavaḥ sarvadā pātu ṛṣirme śirasopari |mukhe chandaḥ sadā pātu triṣṭup ca vijayātmakam || 3||

गुणत्रयमयी शक्तिः परशक्तिस्तु ईडिता ।ब्रह्मस्वरूपिणी पातु हृदये मम कालिका ॥ ४॥

guṇatrayamayī śaktiḥ paraśaktistu īḍitā |brahmasvarūpiṇī pātu hṛdaye mama kālikā || 4||

बीजस्वरूपिणी पातु क्रीङ्कारी शक्तिरूपिणी ।हूं शक्ति सर्वदा पातु सर्वरक्षास्वरूपिणी ॥ ५॥

bījasvarūpiṇī pātu krīṅkārī śaktirūpiṇī |hūṃ śakti sarvadā pātu sarvarakṣāsvarūpiṇī || 5||

महाकालः सदा पातु महाभीमपराक्रमः ।ददातु मम कामानि सर्वसिद्धीश्वरो यतः ॥ ६॥

mahākālaḥ sadā pātu mahābhīmaparākramaḥ |dadātu mama kāmāni sarvasiddhīśvaro yataḥ || 6||

आदि ॡवर्णपर्यन्ताः हृदये मममातृकाः ।एघान्ते ङादि चान्ताश्च रक्षन्तु बाहुयुग्मके ॥ ७॥

ādi ḹvarṇaparyantāḥ hṛdaye mamamātṛkāḥ |eghānte ṅādi cāntāśca rakṣantu bāhuyugmake || 7||

नभोमध्यगता वर्णा मादिक्षान्तास्तथैव च ।सविन्दवः सदा पान्तु जङ्घयोरुभयोर्मम ॥ ८॥

nabhomadhyagatā varṇā mādikṣāntāstathaiva ca |savindavaḥ sadā pāntu jaṅghayorubhayormama || 8||

भूतप्रेतपिशाचाद्या विघ्नदेहास्तथा पुनः ।पृथग्भावाः समध्याश्च वर्णा रक्षन्तु मां सदा ॥ ९॥

bhūtapretapiśācādyā vighnadehāstathā punaḥ |pṛthagbhāvāḥ samadhyāśca varṇā rakṣantu māṃ sadā || 9||

समस्तरोमकूपेषु मर्मस्थानिषु सन्धिषु ।नाडीधातुविकारेषु रक्षन्तु मम मातृकाः ॥ १०॥

samastaromakūpeṣu marmasthāniṣu sandhiṣu |nāḍīdhātuvikāreṣu rakṣantu mama mātṛkāḥ || 10||

शक्तिराधाररूपा या सा पातु परमेश्वरी ।अवर्णः सर्वदा पातु सर्वदेवमयः स्वयम् ॥ ११॥

śaktirādhārarūpā yā sā pātu parameśvarī |avarṇaḥ sarvadā pātu sarvadevamayaḥ svayam || 11||

फणागताऽवनिः पातु समुद्रः पातु मां सदा ।रत्नद्वीपः सदा पातु रक्षन्तु कल्पपादपाः ॥ १२॥

phaṇāgatā'vaniḥ pātu samudraḥ pātu māṃ sadā |ratnadvīpaḥ sadā pātu rakṣantu kalpapādapāḥ || 12||

श्मशानपीठकः पातु पातु मां मानवेदिका ।सदाशिव महाप्रेत शवो मां परिरक्षतु ॥ १३॥

śmaśānapīṭhakaḥ pātu pātu māṃ mānavedikā |sadāśiva mahāpreta śavo māṃ parirakṣatu || 13||

द्वारदेशे द्वारपाला योगिन्यः पान्तु मां सदा ।सिद्धयोऽष्टौ सदा पान्तु पूर्वादि वसुदिग्गताः ॥ १४॥

dvāradeśe dvārapālā yoginyaḥ pāntu māṃ sadā |siddhayo'ṣṭau sadā pāntu pūrvādi vasudiggatāḥ || 14||

कालीं कपालिणीं कुल्लां कुरुकुल्लां तथैव च ।विरोधिनीं विप्रचित्तां नमामि सर्वसिद्धये ॥ १५॥

kālīṃ kapāliṇīṃ kullāṃ kurukullāṃ tathaiva ca |virodhinīṃ vipracittāṃ namāmi sarvasiddhaye || 15||

एतास्तु वशयोगिन्यो बहिः षट्कोणकेस्थिताः ।रक्षन्तु मां सदा देव्यो मातरो भक्तवत्सलाः ॥ १६॥

etāstu vaśayoginyo bahiḥ ṣaṭkoṇakesthitāḥ |rakṣantu māṃ sadā devyo mātaro bhaktavatsalāḥ || 16||

उग्रामुग्रप्रभां दीप्तां नमाम्यात्मविभूतये ।सर्वसिद्धिं प्रयच्छन्तु पान्तु मां पुत्रवत् सदा ॥ १७॥

ugrāmugraprabhāṃ dīptāṃ namāmyātmavibhūtaye |sarvasiddhiṃ prayacchantu pāntu māṃ putravat sadā || 17||

नीलां घनां वलाकाञ्च प्रणमामि समुत्सुकः ।सर्वविघ्नान् समुत्सार्य्य रचन्तु कलुषार्णवात् ॥ १८॥

nīlāṃ ghanāṃ valākāñca praṇamāmi samutsukaḥ |sarvavighnān samutsāryya racantu kaluṣārṇavāt || 18||

मात्रामुद्रामितानाञ्च नमामि चरणाम्बुजम् ।देवीप्रेमसखीनाञ्च शरणं यामि सिद्धये ॥ १९॥

mātrāmudrāmitānāñca namāmi caraṇāmbujam |devīpremasakhīnāñca śaraṇaṃ yāmi siddhaye || 19||

एताः पञ्चदशे कोणे एकैका वरदा सदा ।तर्जनीं वामहस्तेन खड्गं दक्षिणपाणिना ॥ २०॥

etāḥ pañcadaśe koṇe ekaikā varadā sadā |tarjanīṃ vāmahastena khaḍgaṃ dakṣiṇapāṇinā || 20||

मुण्डमालाधराः शीर्षे नीलाञ्जनचयोपमाः ।शत्रुभ्यः सिद्धिदाश्चण्डाः पान्तु मां कालिकाप्रियाः ॥ २१॥

muṇḍamālādharāḥ śīrṣe nīlāñjanacayopamāḥ |śatrubhyaḥ siddhidāścaṇḍāḥ pāntu māṃ kālikāpriyāḥ || 21||

बहिःपद्मदलान्ते तु ब्रह्माण्याद्यष्टशक्तयः ।रक्षन्तु मे प्रयच्छन्तु सर्वसिद्धिं दयान्विताम् ॥ २२॥

bahiḥpadmadalānte tu brahmāṇyādyaṣṭaśaktayaḥ |rakṣantu me prayacchantu sarvasiddhiṃ dayānvitām || 22||

ब्रह्माणी पातु मां पूर्वे सर्वाः शिववरप्रदाः ।वह्नौ नारायणी पातु सर्वकामार्थसिद्धिदा ॥ २३॥

brahmāṇī pātu māṃ pūrve sarvāḥ śivavarapradāḥ |vahnau nārāyaṇī pātu sarvakāmārthasiddhidā || 23||

माहेशी दक्षिणे पातु सर्वमङ्गलकारिणी ।चामुण्डा नैरॄते पातु सर्वशत्रुप्रमर्दिनी ॥ २४॥

māheśī dakṣiṇe pātu sarvamaṅgalakāriṇī |cāmuṇḍā nairṝte pātu sarvaśatrupramardinī || 24||

कौमारी पश्चिमे पातु शक्तिहस्ता विसूदिनीम् ।अपराजिता च वायव्या पातु मां जयदा शुभा ॥ २५॥

kaumārī paścime pātu śaktihastā visūdinīm |aparājitā ca vāyavyā pātu māṃ jayadā śubhā || 25||

उत्तरे पातु वाराही वरदा घोररूपिणी ।नारसिंही सदा पातु ऐशान्यां भयनाशिनी ॥ २६॥

uttare pātu vārāhī varadā ghorarūpiṇī |nārasiṃhī sadā pātu aiśānyāṃ bhayanāśinī || 26||

एतास्तु वरविद्यायाः शक्तयश्चाष्टदेवताः ।ब्रह्मविष्णुशिवादीनां तेजोभिन्नकलेवरा ॥ २७॥

etāstu varavidyāyāḥ śaktayaścāṣṭadevatāḥ |brahmaviṣṇuśivādīnāṃ tejobhinnakalevarā || 27||

सूर्य्येन्दुवह्निपीठे तु बैन्दवे परमेश्वरी ।नमामि दक्षिणामूर्त्तिं कालिकां परभैरवीम् ॥ २८॥

sūryyenduvahnipīṭhe tu baindave parameśvarī |namāmi dakṣiṇāmūrttiṃ kālikāṃ parabhairavīm || 28||

भिन्नाञ्जनचयप्रख्यां प्रवीनशवसंस्थिताम् ।गलच्छोणितधाराभिः स्मेराननसरोरुहाम् ॥ २९॥

bhinnāñjanacayaprakhyāṃ pravīnaśavasaṃsthitām |galacchoṇitadhārābhiḥ smerānanasaroruhām || 29||

पीनोन्नतकुचद्वन्द्वां पीनवक्षोनितम्बिनीम् ।दक्षिणे मुक्तकेशां च दिगम्बरविनोदिनीम् ॥ ३०॥

pīnonnatakucadvandvāṃ pīnavakṣonitambinīm |dakṣiṇe muktakeśāṃ ca digambaravinodinīm || 30||

महाकालसमाविष्टां स्ममेरानन्दोपरि स्थिताम् ।सुखसान्द्रस्मितामोदमोदिनीं मदविह्वलाम् ॥ ३१॥

mahākālasamāviṣṭāṃ smamerānandopari sthitām |sukhasāndrasmitāmodamodinīṃ madavihvalām || 31||

आरक्तसुखसान्द्रादिनेत्रालीभिर्विराजिताम् ।शवद्वयकृतोत्तंसां सिन्दूरतिलकोज्ज्वलाम् ॥ ३२॥

āraktasukhasāndrādinetrālībhirvirājitām |śavadvayakṛtottaṃsāṃ sindūratilakojjvalām || 32||

पञ्चाशन्मूर्त्तिघटितमालां शोणितलोहिताम् ।नानामणिविशोभाढ्यां नानालङ्कारशोभिताम् ॥ ३३॥

pañcāśanmūrttighaṭitamālāṃ śoṇitalohitām |nānāmaṇiviśobhāḍhyāṃ nānālaṅkāraśobhitām || 33||

शवास्थिकृतकेयूरशङ्खकङ्कणमण्डिताम् ।शववक्षः समारूढां लेलिहानां शवं क्वचित् ॥ ३४॥

śavāsthikṛtakeyūraśaṅkhakaṅkaṇamaṇḍitām |śavavakṣaḥ samārūḍhāṃ lelihānāṃ śavaṃ kvacit || 34||

शवमांसकृतग्रासां साट्टहासां मुहुर्मुहुः ।खड्गमुण्डधरां वामे सव्येऽभयवरप्रदाम् ॥ ३५॥

śavamāṃsakṛtagrāsāṃ sāṭṭahāsāṃ muhurmuhuḥ |khaḍgamuṇḍadharāṃ vāme savye'bhayavarapradām || 35||

दन्तुराञ्च महारौद्रीं चण्डनादातिभीषणाम् ।शिवाभिर्घोररावाभिर्वेष्टितां भयनाशिनीम् ॥ ३६॥

danturāñca mahāraudrīṃ caṇḍanādātibhīṣaṇām |śivābhirghorarāvābhirveṣṭitāṃ bhayanāśinīm || 36||

माभैर्माभैः स्वभक्तेषु जल्पन्तीं घोरनिस्वने ।यूयं किमिच्छथ ब्रूथ ददामीतिप्रभाषिणीम् ॥ ३७॥

mābhairmābhaiḥ svabhakteṣu jalpantīṃ ghoranisvane |yūyaṃ kimicchatha brūtha dadāmītiprabhāṣiṇīm || 37||

त्वं गतिः शरणं देवि ! त्वं माता परमेश्वरि ! ।पाहि मां करुणासान्द्रे ! नमस्ते परमेश्वररि ! ॥ ३८॥

tvaṃ gatiḥ śaraṇaṃ devi ! tvaṃ mātā parameśvari ! |pāhi māṃ karuṇāsāndre ! namaste parameśvarari ! || 38||

नमस्ते कालिके ! देवि ! नमस्ते भक्तवत्सले ! ।मूर्खतां हर मे देवि ! प्रतिभाप्रतिदायिके ! ॥ ३९॥

namaste kālike ! devi ! namaste bhaktavatsale ! |mūrkhatāṃ hara me devi ! pratibhāpratidāyike ! || 39||

गद्यपद्यमयीं वाणीं तर्कव्याकरणादिकाम् ।अनधीतगतां विद्यां देहि दक्षिणकालिके ! ॥ ४०॥

gadyapadyamayīṃ vāṇīṃ tarkavyākaraṇādikām |anadhītagatāṃ vidyāṃ dehi dakṣiṇakālike ! || 40||

जयं देहि सभामध्ये धनं देहि धनागमे ।देहि मे चिरजीवित्वं कालिके ! रक्ष दक्षिणे ! ॥ ४१॥

jayaṃ dehi sabhāmadhye dhanaṃ dehi dhanāgame |dehi me cirajīvitvaṃ kālike ! rakṣa dakṣiṇe ! || 41||

राज्यं देहि यशो देहि पुत्रान् दारान्धनं तथा ।देहान्ते देहि मे मुक्तिं जगन्मातर्नमोऽस्तु ते ॥ ४२॥

rājyaṃ dehi yaśo dehi putrān dārāndhanaṃ tathā |dehānte dehi me muktiṃ jaganmātarnamo'stu te || 42||

मङ्गला भैरवी दुर्गा कालिका त्रिदशेश्वरी ।उमा हैमवती कन्या कल्याणी भैरवेश्वरी ॥ ४३॥

maṅgalā bhairavī durgā kālikā tridaśeśvarī |umā haimavatī kanyā kalyāṇī bhairaveśvarī || 43||

काली ब्राह्मी च माहेशी कौमारी माधुसूदनी ।वाराही वासनी चण्डा त्वां जगुर्मुनयो मुदा ॥ ४४॥

kālī brāhmī ca māheśī kaumārī mādhusūdanī |vārāhī vāsanī caṇḍā tvāṃ jagurmunayo mudā || 44||

उग्रतारेति तारेति शिवेत्यकजटेति च ।लोकोत्तरेति बालेति गीयते कृतिभिः सदा ॥ ४५॥

ugratāreti tāreti śivetyakajaṭeti ca |lokottareti bāleti gīyate kṛtibhiḥ sadā || 45||

यथा काली तथा तारा तथा छिन्ना च कुल्लुका ।एकमूर्त्तिश्चतुर्भिश्च देवि ! त्वं कालिकापरा ॥ ४६॥

yathā kālī tathā tārā tathā chinnā ca kullukā |ekamūrttiścaturbhiśca devi ! tvaṃ kālikāparā || 46||

एकद्वित्रिविधा देवि ! कोटिधाऽनन्तरूपिणी ।अङ्गाङ्गकैर्नामभेदैः कालिकेति प्रगीयते ॥ ४७॥

ekadvitrividhā devi ! koṭidhā'nantarūpiṇī |aṅgāṅgakairnāmabhedaiḥ kāliketi pragīyate || 47||

शम्भुः पञ्चमुखेनैव गुणान् वक्तुं क्षमो न ते ।चापलं यत् कृतं सर्वं क्षमस्व शुभदा भव ॥ ४८॥

śambhuḥ pañcamukhenaiva guṇān vaktuṃ kṣamo na te |cāpalaṃ yat kṛtaṃ sarvaṃ kṣamasva śubhadā bhava || 48||

प्राणान् रक्ष यशो रक्ष पुत्रदारधनं तथा ।सर्वकाले सर्वदेशे पाहि दक्षिणकालिके ! ॥ ४९॥

prāṇān rakṣa yaśo rakṣa putradāradhanaṃ tathā |sarvakāle sarvadeśe pāhi dakṣiṇakālike ! || 49||

यः सम्पूज्य पठेद्रक्षां दिवा वा सन्ध्ययोस्तथा ।अवाप्य महतीं प्रज्ञां सर्वकामांस्ततो लभेत् ॥ ५०॥

yaḥ sampūjya paṭhedrakṣāṃ divā vā sandhyayostathā |avāpya mahatīṃ prajñāṃ sarvakāmāṃstato labhet || 50||

यद्यत्प्रार्थयते चित्ते तत्तदाप्नोति का कथा ।स्वयं लक्ष्मीर्वसेद्देहे मुक्तिः करगता पुनः ॥इति श्यामारहस्यवर्णितं रुद्रयामले उत्तरतन्त्रे दक्षिणकालिकाकवचं सम्पूर्णम् ।॥ श्यामारहस्यम् । चतुर्थः परिच्छेदः ॥– ॥ श्यामारहस्यम् । चतुर्थः परिच्छेदः ॥

yadyatprārthayate citte tattadāpnoti kā kathā |svayaṃ lakṣmīrvaseddehe muktiḥ karagatā punaḥ ||iti śyāmārahasyavarṇitaṃ rudrayāmale uttaratantre dakṣiṇakālikākavacaṃ sampūrṇam ||| śyāmārahasyam | caturthaḥ paricchedaḥ ||– || śyāmārahasyam | caturthaḥ paricchedaḥ ||