आयुर्देवीस्तोत्रम् Ayurdevi Stotram

ध्यायेद्धेमाम्बुजारूढां वरदाभयपाणिकाम् ।आयुष्यदेवतां नित्यामाश्रिताभीष्टसिद्धिदाम् ॥ १॥

dhyāyeddhemāmbujārūḍhāṃ varadābhayapāṇikām |āyuṣyadevatāṃ nityāmāśritābhīṣṭasiddhidām || 1||

आयुर्देवि महाप्राज्ञे सूतिकागृहवासिनि ।पूजिता परया भक्त्या दीर्घमायुः प्रयच्छ मे ॥ २॥

āyurdevi mahāprājñe sūtikāgṛhavāsini |pūjitā parayā bhaktyā dīrghamāyuḥ prayaccha me || 2||

सिंहस्कन्धगतां देवीं चतुर्हस्तां त्रिलोचनाम् ।शक्तिशूलगदापद्मधारिणीं चन्द्रमौलिकाम् ॥ ३॥

siṃhaskandhagatāṃ devīṃ caturhastāṃ trilocanām |śaktiśūlagadāpadmadhāriṇīṃ candramaulikām || 3||

विचित्रवस्त्रसंयुक्तां स्वर्णाभरणभूषिताम् ।सिंहस्कन्धगतां देवीं चतुर्हस्तां त्रिलोचनाम् ॥ ४॥

vicitravastrasaṃyuktāṃ svarṇābharaṇabhūṣitām |siṃhaskandhagatāṃ devīṃ caturhastāṃ trilocanām || 4||

सिंहस्कन्धगते देवि सुरासुरसुपूजिते ।प्रभवात्यब्दके सङ्घे आयुर्देवि नमोऽस्तु ते ॥ ५॥

siṃhaskandhagate devi surāsurasupūjite |prabhavātyabdake saṅghe āyurdevi namo'stu te || 5||

आयुर्देवि नमस्तुभ्यं वर्षदेवि नमोऽस्तु ते ।आयुर्देहि बलं देहि सर्वारिष्टं व्यपोहय ॥ ६॥

āyurdevi namastubhyaṃ varṣadevi namo'stu te |āyurdehi balaṃ dehi sarvāriṣṭaṃ vyapohaya || 6||

आयुष्मदात्मिकां देवीं करालवदनोज्ज्वलाम् ।घोररूपां सदा ध्यायेदायुष्यं याचयाम्यहम् ॥ ७॥

āyuṣmadātmikāṃ devīṃ karālavadanojjvalām |ghorarūpāṃ sadā dhyāyedāyuṣyaṃ yācayāmyaham || 7||

शुभं भवतु कल्याणि आयुरारोग्यसम्पदाम् ।सर्वशत्रुविनाशाय आयुर्देवि नमोऽस्तु ते ॥ ८॥

śubhaṃ bhavatu kalyāṇi āyurārogyasampadām |sarvaśatruvināśāya āyurdevi namo'stu te || 8||

षष्ठांशां प्रकृतैस्सिद्धां प्रतिष्ठाप्य च सुप्रभाम् ।सुप्रदां चापि शुभदां दयारूपां जगत्प्रसूम् ॥ ९॥

ṣaṣṭhāṃśāṃ prakṛtaissiddhāṃ pratiṣṭhāpya ca suprabhām |supradāṃ cāpi śubhadāṃ dayārūpāṃ jagatprasūm || 9||

देवीं षोडशवर्षां तां शाश्वतस्थिरयौवनाम् ।बिम्बोष्ठीं सुदतीं शुद्धां शरच्चन्द्रनिभाननाम् ॥ १०॥

devīṃ ṣoḍaśavarṣāṃ tāṃ śāśvatasthirayauvanām |bimboṣṭhīṃ sudatīṃ śuddhāṃ śaraccandranibhānanām || 10||

नमो देव्यै महादेव्यै सिद्।ह्ध्यै शान्त्यै नमो नमः ।शुभायै देवसेनायै आयुर्देव्यै नमो नमः ॥ ११॥

namo devyai mahādevyai sid|hdhyai śāntyai namo namaḥ |śubhāyai devasenāyai āyurdevyai namo namaḥ || 11||

वरदायै पुत्रदायै धनदायै नमो नमः ।सृष्ट्यै षष्ठांशरूपायै सिद्धायै च नमो नमः ॥ १२॥

varadāyai putradāyai dhanadāyai namo namaḥ |sṛṣṭyai ṣaṣṭhāṃśarūpāyai siddhāyai ca namo namaḥ || 12||

मायायै सिद्धयोगिन्यै आयुर्देव्यै नमो नमः ।सारायै शारदायै च परादेव्यै नमो नमः ॥ १३॥

māyāyai siddhayoginyai āyurdevyai namo namaḥ |sārāyai śāradāyai ca parādevyai namo namaḥ || 13||

बालारिष्टहरे देवि आयुर्देव्यै नमो नमः ।कल्याणदायै कल्याण्यै फलदायै च कर्मणाम् ॥ १४॥

bālāriṣṭahare devi āyurdevyai namo namaḥ |kalyāṇadāyai kalyāṇyai phaladāyai ca karmaṇām || 14||

प्रत्यक्षायै स्वभक्तानामायुर्देव्यै नमो नमः ।देवरक्षणकारिण्यै आयुर्देव्यै नमो नमः ॥ १५॥

pratyakṣāyai svabhaktānāmāyurdevyai namo namaḥ |devarakṣaṇakāriṇyai āyurdevyai namo namaḥ || 15||

शुद्धसत्त्वस्वरूपायै वन्दितायै नृणां सदा ।वर्जितक्रोधहिंसायै आयुर्देव्यै नमो नमः ॥ १६॥

śuddhasattvasvarūpāyai vanditāyai nṛṇāṃ sadā |varjitakrodhahiṃsāyai āyurdevyai namo namaḥ || 16||

इति आयुर्देवी स्तोत्रं सम्पूर्णम् ।

iti āyurdevī stotraṃ sampūrṇam |