दत्तात्रेयप्रार्थना Shri Dattatreya Prarthana

ॐ नमस्ते भगवन् श्रीसद्गुरुदेवदत्तात्रेयाय नमो नमः ॥ १॥

oṃ namaste bhagavan śrīsadgurudevadattātreyāya namo namaḥ || 1||

त्वं ब्रह्ममयोऽसि । त्वं आनन्दमयोऽसि । त्वं विज्ञानमयोऽसि ।त्वं सत्यमयोऽसि । त्वं शान्तिमयोऽसि । त्वं प्रेममयोऽसि ।त्वं निराकारो निरालम्बो निर्विकल्पो निर्विषयो निरञ्जनो निरङ्कुशोनिरन्तरो निराशयो निरामयो निर्धूतकल्मषोऽसि ॥ २॥

tvaṃ brahmamayo'si | tvaṃ ānandamayo'si | tvaṃ vijñānamayo'si |tvaṃ satyamayo'si | tvaṃ śāntimayo'si | tvaṃ premamayo'si |tvaṃ nirākāro nirālambo nirvikalpo nirviṣayo nirañjano niraṅkuśonirantaro nirāśayo nirāmayo nirdhūtakalmaṣo'si || 2||

त्वदाज्ञया तपन्ति रविशशितारामण्डलाः ।त्वदाज्ञया विपुलधनधान्यवती वसुधा ।त्वदाज्ञया वहति वायुस्सन्दहत्यनलः । त्वदाज्ञयाऽऽकाशं सर्वं व्याप्नोति ।त्वदाज्ञया यथाकालं वर्षति पर्जन्यः । त्वदाज्ञया विकसन्ति कुसुमानि ।त्वदाज्ञया फलन्ति पादपाः । त्वदाज्ञया गायन्ति विहङ्गमः ।त्वदाज्ञया जीवन्ति चतुर्विधयोनयः ।त्वदाज्ञया देहे प्राणः सञ्चरति निर्गच्छति देहात् ॥ ३॥

tvadājñayā tapanti raviśaśitārāmaṇḍalāḥ |tvadājñayā vipuladhanadhānyavatī vasudhā |tvadājñayā vahati vāyussandahatyanalaḥ | tvadājñayā''kāśaṃ sarvaṃ vyāpnoti |tvadājñayā yathākālaṃ varṣati parjanyaḥ | tvadājñayā vikasanti kusumāni |tvadājñayā phalanti pādapāḥ | tvadājñayā gāyanti vihaṅgamaḥ |tvadājñayā jīvanti caturvidhayonayaḥ |tvadājñayā dehe prāṇaḥ sañcarati nirgacchati dehāt || 3||

त्वं मनश्चित्तान्तःकरणबुद्।ह्ध्यहङ्कारप्रेरकोऽसि ।त्वं शमदमतितिक्षावैराग्यभक्तिप्रदायकोऽसि ।त्वं द्वन्द्वदुःखतिमिरविध्वंसकोऽसि । त्वं मायापाशनिकृन्तकोऽसि ।त्वं संसारबन्धनच्छेदकोऽसि ।त्वं सर्वसद्गुणकर्ताऽसि । त्वं सर्वदुर्गुणहर्ताऽसि । त्वं शान्तिप्रदोऽसि ।त्वमानन्दप्रदोऽसि । त्वं प्रेमप्रदोऽसि । त्वं सकलविघ्नहरोऽसि ।त्वमभयकरोऽसि । त्वं वरदवरोऽसि । त्वं निजपदप्रदानकरोऽसि ॥ ४॥

tvaṃ manaścittāntaḥkaraṇabud|hdhyahaṅkāraprerako'si |tvaṃ śamadamatitikṣāvairāgyabhaktipradāyako'si |tvaṃ dvandvaduḥkhatimiravidhvaṃsako'si | tvaṃ māyāpāśanikṛntako'si |tvaṃ saṃsārabandhanacchedako'si |tvaṃ sarvasadguṇakartā'si | tvaṃ sarvadurguṇahartā'si | tvaṃ śāntiprado'si |tvamānandaprado'si | tvaṃ premaprado'si | tvaṃ sakalavighnaharo'si |tvamabhayakaro'si | tvaṃ varadavaro'si | tvaṃ nijapadapradānakaro'si || 4||

ऋते त्वत् कोऽपि नेतरो वदान्यः । ऋते त्वत् कोऽपि नेतरः समर्थः ।ऋते त्वत् कोऽपि नेतरो दयालुः । ऋते त्वत् कोऽपि नेतरः क्षमाशीलः ।ऋते त्वत् कोऽपि नेतरो भक्तपालकः ॥ ५॥

ṛte tvat ko'pi netaro vadānyaḥ | ṛte tvat ko'pi netaraḥ samarthaḥ |ṛte tvat ko'pi netaro dayāluḥ | ṛte tvat ko'pi netaraḥ kṣamāśīlaḥ |ṛte tvat ko'pi netaro bhaktapālakaḥ || 5||

त्वत्तः सकलैश्वर्यभोगक्षमत्वम् । त्वत्तः सकलवस्तुरमणीयत्वम् ।त्वत्तः कर्मज्ञानेन्द्रियगणसमर्थत्वम् । त्वत्तः सकलयोगशक्तिमत्त्वम् ।त्वत्तः परमवैराग्यपरबुद्धिमत्त्वम् ॥ ६॥

tvattaḥ sakalaiśvaryabhogakṣamatvam | tvattaḥ sakalavasturamaṇīyatvam |tvattaḥ karmajñānendriyagaṇasamarthatvam | tvattaḥ sakalayogaśaktimattvam |tvattaḥ paramavairāgyaparabuddhimattvam || 6||

त्वयि समुपस्थितं ब्रह्माण्डोत्पत्तिस्थितिलयबीजम् ।त्वयि सुप्रतिष्ठितं संसृतिनाशनाद्वैतभावनामूलम् ।त्वयि सन्निहितं जन्ममृत्युभयसंहननसामर्थ्यम् ॥ ७॥

tvayi samupasthitaṃ brahmāṇḍotpattisthitilayabījam |tvayi supratiṣṭhitaṃ saṃsṛtināśanādvaitabhāvanāmūlam |tvayi sannihitaṃ janmamṛtyubhayasaṃhananasāmarthyam || 7||

कनककामिनीकमनीयत्वात् त्राहि त्राहि माम् ।कामक्रोधमोहमदमत्सरकोलाहलात् त्राहि त्राहि माम् ।जन्मजरामरणत्रिदोषात् त्राहि त्राहि माम् ।संसृतिदावानलदह्यमानं पाहि पाहि माम् ।विषयकर्दमनिमज्जमानं पाहि पाहि माम् ।भयकरकालदण्डनिपीडयमानं पाहि पाहि माम् ।धर्माचरणदिङ्मूढोऽहं धैर्यं देहि देहि मे ।अहङ्कारमलिनचित्तोऽहमभयं वरं देहि देहि मे ।त्वत् पदपङ्कजशरणागतिं देहि देहि मे ॥ ८॥

kanakakāminīkamanīyatvāt trāhi trāhi mām |kāmakrodhamohamadamatsarakolāhalāt trāhi trāhi mām |janmajarāmaraṇatridoṣāt trāhi trāhi mām |saṃsṛtidāvānaladahyamānaṃ pāhi pāhi mām |viṣayakardamanimajjamānaṃ pāhi pāhi mām |bhayakarakāladaṇḍanipīḍayamānaṃ pāhi pāhi mām |dharmācaraṇadiṅmūḍho'haṃ dhairyaṃ dehi dehi me |ahaṅkāramalinacitto'hamabhayaṃ varaṃ dehi dehi me |tvat padapaṅkajaśaraṇāgatiṃ dehi dehi me || 8||

विना त्वया नास्ति कोऽप्यन्य आपत्तिनिवारकः । त्वं प्रियतमा माताऽसि मे ।त्वं प्रियतमः पिताऽसि मे । त्वं प्रियतमो बन्धुरसि मे ।त्वं प्रियतमं मित्रमसि मे । त्वं पूज्यतमः सद्गुरुवर्योऽसि मे ।ते कृपाहस्तं देहि मे शिरसि । ते पदतलकञ्जं देहि मे मनसि ।ते सुखकरवासोऽस्तु मे वपुषि ।अनन्तजन्मपर्यन्तं ते स्मरणं मे चित्तेऽस्तु ॥ ९॥

vinā tvayā nāsti ko'pyanya āpattinivārakaḥ | tvaṃ priyatamā mātā'si me |tvaṃ priyatamaḥ pitā'si me | tvaṃ priyatamo bandhurasi me |tvaṃ priyatamaṃ mitramasi me | tvaṃ pūjyatamaḥ sadguruvaryo'si me |te kṛpāhastaṃ dehi me śirasi | te padatalakañjaṃ dehi me manasi |te sukhakaravāso'stu me vapuṣi |anantajanmaparyantaṃ te smaraṇaṃ me citte'stu || 9||

ॐ नमस्ते अत्रिपुत्राय । ॐ नमस्ते अवधूताय । ॐ नमस्ते हंसदेवाय ।ॐ नमस्ते सद्गुरुनाथाय । ॐ नमस्ते यतिनाथाय । ॐ नमस्ते शक्तिनाथाय ।ॐ नमस्ते सिद्धिनाथाय । ॐ नमस्ते मुक्तिनाथाय । ॐ नमस्ते जगन्नाथाय ।ॐ नमस्ते भगवते दत्तात्रेयाय ।ॐ नमस्ते परब्रह्मणे सच्चिदानन्दमूर्तये मुनिवर्याय नमो नमः ॥ १०॥

oṃ namaste atriputrāya | oṃ namaste avadhūtāya | oṃ namaste haṃsadevāya |oṃ namaste sadgurunāthāya | oṃ namaste yatināthāya | oṃ namaste śaktināthāya |oṃ namaste siddhināthāya | oṃ namaste muktināthāya | oṃ namaste jagannāthāya |oṃ namaste bhagavate dattātreyāya |oṃ namaste parabrahmaṇe saccidānandamūrtaye munivaryāya namo namaḥ || 10||

इति श्रीदत्तात्रेयप्रार्थना सम्पूर्णा ।

iti śrīdattātreyaprārthanā sampūrṇā |