कूर्मस्तुतिः २ Kurmastutih 2

निरवधि च निराश्रयं च यस्य स्थितमनिवर्तितकौतुकप्रपञ्चम् ।प्रथम इह भवान्स कूर्ममूर्तिर्जयति चतुर्दशलोकवल्लिकन्दः ॥ १॥

niravadhi ca nirāśrayaṃ ca yasya sthitamanivartitakautukaprapañcam |prathama iha bhavānsa kūrmamūrtirjayati caturdaśalokavallikandaḥ || 1||

भ्राम्यन्महागिरिनिघर्षणलब्धपृष्ठकण्डूयनक्षणसुखायितगाढनिद्रः ।सुष्वाप दीर्घतरघर्घरघोरघोषःश्वासाभिभूतजलधेः कमठः स वोऽव्यात् ॥ २॥

bhrāmyanmahāgirinigharṣaṇalabdhapṛṣṭhakaṇḍūyanakṣaṇasukhāyitagāḍhanidraḥ |suṣvāpa dīrghataraghargharaghoraghoṣaḥśvāsābhibhūtajaladheḥ kamaṭhaḥ sa vo'vyāt || 2||

नमस्कुर्मः कूर्मं नमदमरकोटीरनिकरप्रसर्पन्माणिक्यच्छविमिलितमाञ्जिष्ठवपुषम् ।जरीजृम्भड्डिम्भद्युमणिरमणीयांशुलहरीपरीरम्भस्फूर्जद्बलभिदुपलाद्रिप्रतिभटम् ॥ ३॥

namaskurmaḥ kūrmaṃ namadamarakoṭīranikaraprasarpanmāṇikyacchavimilitamāñjiṣṭhavapuṣam |jarījṛmbhaḍḍimbhadyumaṇiramaṇīyāṃśulaharīparīrambhasphūrjadbalabhidupalādripratibhaṭam || 3||

निष्प्रत्यूहमनल्पकल्पचरितस्त्रैलोक्यरक्षागुरुःक्रीडाकूर्मकलेवरः स भगवान्दिश्यादमन्दां मुदम् ।कल्पान्तोदधिमध्यमज्जनवशाद्व्यासर्पतः संलुठत्पृष्ठे यस्य बभूव सैकतकणच्छायं धरित्रीतलम् ॥ ४॥

niṣpratyūhamanalpakalpacaritastrailokyarakṣāguruḥkrīḍākūrmakalevaraḥ sa bhagavāndiśyādamandāṃ mudam |kalpāntodadhimadhyamajjanavaśādvyāsarpataḥ saṃluṭhatpṛṣṭhe yasya babhūva saikatakaṇacchāyaṃ dharitrītalam || 4||

इति कूर्मस्तुतिः २ समाप्ता ।

iti kūrmastutiḥ 2 samāptā |