दशावतारस्तोत्रम् १० Dashavatara Stotram 10

मत्स्योब्धिविहारः पूर्वो ह्यवतारः ।जातः श्रुतिहारः पूज्यो मनुतारः ॥ १॥

matsyobdhivihāraḥ pūrvo hyavatāraḥ |jātaḥ śrutihāraḥ pūjyo manutāraḥ || 1||

नष्टामरबाधः कूर्मोऽथ धराधः ।गत्वा वहतीशः क्ष्मां योऽप्यमृतेशः ॥ २॥

naṣṭāmarabādhaḥ kūrmo'tha dharādhaḥ |gatvā vahatīśaḥ kṣmāṃ yo'pyamṛteśaḥ || 2||

भूभृत्स हिरण्याक्षघ्नोऽत्र तृतीयः ।भूदार उदारो यज्ञो भजनीयः ॥ ३॥

bhūbhṛtsa hiraṇyākṣaghno'tra tṛtīyaḥ |bhūdāra udāro yajño bhajanīyaḥ || 3||

भृत्योक्त्यनुसारी पूर्वोऽसुरवैरी ।नाम्नापि नृसिंहः साक्षाच्च नृसिंहः ॥ ४॥

bhṛtyoktyanusārī pūrvo'suravairī |nāmnāpi nṛsiṃhaḥ sākṣācca nṛsiṃhaḥ || 4||

यो वामनवेषः सन् पञ्चम एषः ।याञ्चोपधिबद्धस्तेनो बलिरद्धा ॥ ५॥

yo vāmanaveṣaḥ san pañcama eṣaḥ |yāñcopadhibaddhasteno baliraddhā || 5||

दूराट्क्षयकामः स्याद्भार्गवरामः ।क्ष्मादो गुरुदासः षष्ठोऽब्धनिवासः ॥ ६॥

dūrāṭkṣayakāmaḥ syādbhārgavarāmaḥ |kṣmādo gurudāsaḥ ṣaṣṭho'bdhanivāsaḥ || 6||

राट्सप्तम आसीद्रामो वनवासी ।पित्र्युक्त्यनुसारी रक्षोलयकारी ॥ ७॥

rāṭsaptama āsīdrāmo vanavāsī |pitryuktyanusārī rakṣolayakārī || 7||

वर्ण्यष्टम इष्टः कृष्णो हतदुष्टः ।यः षोडशनारीसाहस्रविहारी ॥ ८॥

varṇyaṣṭama iṣṭaḥ kṛṣṇo hataduṣṭaḥ |yaḥ ṣoḍaśanārīsāhasravihārī || 8||

बुद्धो नवमोऽयं विस्तारितमायम् ।यं कोऽपि न वेद सोऽप्यावृतिमर्दः ॥ ९॥

buddho navamo'yaṃ vistāritamāyam |yaṃ ko'pi na veda so'pyāvṛtimardaḥ || 9||

म्लेच्छक्षयकर्ता कल्की वृषभर्ता ।विप्रो भवितार्थ्यः शूरो दशमोऽर्च्यः ॥ १०॥

mlecchakṣayakartā kalkī vṛṣabhartā |vipro bhavitārthyaḥ śūro daśamo'rcyaḥ || 10||

इति श्रीवासुदेवानन्दसरस्वतीविरचितं दशावतारस्तोत्रं सम्पूर्णम् ।

iti śrīvāsudevānandasarasvatīviracitaṃ daśāvatārastotraṃ sampūrṇam |