दशावतारस्तोत्रम् ०४ Dashavatara Stotram 4

श्रीमते निगमान्तमहादेशिकाय नमः ।श्रीमान् वेङ्कटनाथार्यः कवितार्किककेसरी ।वेदान्ताचार्यवर्यो मे सन्निधत्तां सदा हृदि ॥देवो नः शुभमातनोतु दशधा निर्वर्तयन् भूमिकांरङ्गे धामनि लब्धनिर्भररसैरध्यक्षितो भावुकैः ।यद्भावेषु पृथग्विधेष्वनुगुणान् भावान् स्वयं बिभ्रतीयद्धर्मैरिह धर्मिणी विहरते नानाकृतिर्नायिका ॥ १॥

śrīmate nigamāntamahādeśikāya namaḥ |śrīmān veṅkaṭanāthāryaḥ kavitārkikakesarī |vedāntācāryavaryo me sannidhattāṃ sadā hṛdi ||devo naḥ śubhamātanotu daśadhā nirvartayan bhūmikāṃraṅge dhāmani labdhanirbhararasairadhyakṣito bhāvukaiḥ |yadbhāveṣu pṛthagvidheṣvanuguṇān bhāvān svayaṃ bibhratīyaddharmairiha dharmiṇī viharate nānākṛtirnāyikā || 1||

निर्मग्नः श्रुतिजालमार्गणदशादत्तक्षणैर्वीक्षणैरन्तस्तन्वदिवारविन्दगहनान्यौदन्वतीनामपाम् ।निष्प्रत्यूहतरङ्गरिङ्गणमिथः प्रत्यूढपाथश्छटाडोलारोहसदोहलं भगवतो मात्स्यं वपुः पातु नः ॥ २॥ (दोला)

nirmagnaḥ śrutijālamārgaṇadaśādattakṣaṇairvīkṣaṇairantastanvadivāravindagahanānyaudanvatīnāmapām |niṣpratyūhataraṅgariṅgaṇamithaḥ pratyūḍhapāthaśchaṭāḍolārohasadohalaṃ bhagavato mātsyaṃ vapuḥ pātu naḥ || 2|| (dolā)

अव्यासुर्भुवनत्रयीमनिभृतं कण्डूयनैरद्रिणानिद्राणस्य परस्य कूर्मवपुषो निःश्वासवातोर्मयः ।यद्विक्षेपणसंस्कृतोदधिपयः प्रेङ्खोलपर्यङ्किकानित्यारोहणनिर्वृतो विहरते देवः सहैव श्रिया ॥ ३॥

avyāsurbhuvanatrayīmanibhṛtaṃ kaṇḍūyanairadriṇānidrāṇasya parasya kūrmavapuṣo niḥśvāsavātormayaḥ |yadvikṣepaṇasaṃskṛtodadhipayaḥ preṅkholaparyaṅkikānityārohaṇanirvṛto viharate devaḥ sahaiva śriyā || 3||

गोपायेदनिशं जगन्ति कुहनापोत्री पवित्रीकृतब्रह्माण्डः प्रलयोर्मिघोषगुरुभिर्घोणारवैर्घुर्घुरैः ।यद्दंष्ट्राङ्कुरकोटिगाढघटनानिष्कम्पनित्यस्थितिर्ब्रह्मस्तम्बमसौदसौ भगवती मुस्तेव विश्वम्भरा ॥ ४॥

gopāyedaniśaṃ jaganti kuhanāpotrī pavitrīkṛtabrahmāṇḍaḥ pralayormighoṣagurubhirghoṇāravairghurghuraiḥ |yaddaṃṣṭrāṅkurakoṭigāḍhaghaṭanāniṣkampanityasthitirbrahmastambamasaudasau bhagavatī musteva viśvambharā || 4||

प्रत्यादिष्टपुरातनप्रहरणग्रामः क्षणं पाणिजैरव्यात्त्रीणि जगन्त्यकुण्ठमहिमा वैकुण्ठकण्ठीरवः ।यत्प्रादुर्भवनादवन्ध्यजठरा यादृच्छिकाद्वेधसांया काचित्सहसा महासुरगृहस्थूणा पितामह्यभूत् ॥ ५॥

pratyādiṣṭapurātanapraharaṇagrāmaḥ kṣaṇaṃ pāṇijairavyāttrīṇi jagantyakuṇṭhamahimā vaikuṇṭhakaṇṭhīravaḥ |yatprādurbhavanādavandhyajaṭharā yādṛcchikādvedhasāṃyā kācitsahasā mahāsuragṛhasthūṇā pitāmahyabhūt || 5||

व्रीडाविद्धवदान्यदानवयशोनासीरघाटीभटस्त्रैयक्षं मकुटं पुनन्नवतु नस्त्रैविक्रमो विक्रमः ।यत्प्रस्तावसमुच्छ्रितध्वजपटीवृत्तान्तसिद्धान्तिभिस्स्रोतोभिः सुरसिन्धुरष्टसु दिशासौधेषु दोधूयते ॥ ६॥

vrīḍāviddhavadānyadānavayaśonāsīraghāṭībhaṭastraiyakṣaṃ makuṭaṃ punannavatu nastraivikramo vikramaḥ |yatprastāvasamucchritadhvajapaṭīvṛttāntasiddhāntibhissrotobhiḥ surasindhuraṣṭasu diśāsaudheṣu dodhūyate || 6||

क्रोधाग्निं जमदग्निपीडनभवं सन्तर्पयिष्यन् क्रमाद्अक्षत्रामपि सन्ततक्षय इमां त्रिःसप्तकृत्वः क्षितिम् ।दत्त्वा कर्मणि दक्षिणां क्वचन तामास्कन्द्य सिन्धुं वसनब्रह्मण्यमपाकरोतु भगवानाब्रह्मकीटं मुनिः ॥ ७॥

krodhāgniṃ jamadagnipīḍanabhavaṃ santarpayiṣyan kramādakṣatrāmapi santatakṣaya imāṃ triḥsaptakṛtvaḥ kṣitim |dattvā karmaṇi dakṣiṇāṃ kvacana tāmāskandya sindhuṃ vasanabrahmaṇyamapākarotu bhagavānābrahmakīṭaṃ muniḥ || 7||

पारावारपयोविशोषणकलापारीणकालानलज्वालाजालविहारहारिविशिखव्यापारघोरक्रमः ।सर्वावस्थसकृत्प्रपन्नजनतासंरक्षणैकव्रतीधर्मो विग्रहवानधर्मविरतिं धन्वी स धन्वीत नः ॥ ८॥

pārāvārapayoviśoṣaṇakalāpārīṇakālānalajvālājālavihārahāriviśikhavyāpāraghorakramaḥ |sarvāvasthasakṛtprapannajanatāsaṃrakṣaṇaikavratīdharmo vigrahavānadharmaviratiṃ dhanvī sa dhanvīta naḥ || 8||

फक्कत्कौरवपट्टणप्रभृतयः प्रास्तप्रलम्बादयस्तालाङ्कास्य तथाविधा विहृतयस्तन्वन्तु भद्राणि नः ।क्षीरं शर्करयेव याभिरपृथग्भूताः प्रभूतैर्गुणैराकौमारकमस्वदन्त जगते कृष्णस्य ताः केलयः ॥ ९॥

phakkatkauravapaṭṭaṇaprabhṛtayaḥ prāstapralambādayastālāṅkāsya tathāvidhā vihṛtayastanvantu bhadrāṇi naḥ |kṣīraṃ śarkarayeva yābhirapṛthagbhūtāḥ prabhūtairguṇairākaumārakamasvadanta jagate kṛṣṇasya tāḥ kelayaḥ || 9||

नाथायैव नमः पदं भवतु नश्चित्रैश्चरित्रक्रमैर्भूयोभिर्भुवनान्यभूनि कुहनागोपाय गोपायते ।कालिन्दीरसिकाय कालियफणिस्फारस्फटावाटिकारङ्गोत्सङ्गविशङ्कचक्रमधुरापर्यायचर्याय ते ॥ १०॥

nāthāyaiva namaḥ padaṃ bhavatu naścitraiścaritrakramairbhūyobhirbhuvanānyabhūni kuhanāgopāya gopāyate |kālindīrasikāya kāliyaphaṇisphārasphaṭāvāṭikāraṅgotsaṅgaviśaṅkacakramadhurāparyāyacaryāya te || 10||

भाविन्या दशया भवन्निह भवध्वंसाय नः कल्पतांकल्की विष्णुयशस्सुतः कलिकथाकालुष्यकूलङ्कषः ।निःशेषक्षतकण्टके क्षितितले धाराजलौघैर्ध्रुवंधर्मं कार्तयुगं प्ररोहयति यन्निस्त्रिंशधाराधरः ॥ ११॥

bhāvinyā daśayā bhavanniha bhavadhvaṃsāya naḥ kalpatāṃkalkī viṣṇuyaśassutaḥ kalikathākāluṣyakūlaṅkaṣaḥ |niḥśeṣakṣatakaṇṭake kṣititale dhārājalaughairdhruvaṃdharmaṃ kārtayugaṃ prarohayati yannistriṃśadhārādharaḥ || 11||

इच्छामीन विहारकच्छप महापोत्रिन् यदृच्छाहरेरक्षावामन रोषराम करुणाकाकुत्स्थ हेलाहलिन् ।क्रीडावल्लव कल्कवाहन दशाकल्किन्निति प्रत्यहंजल्पन्तः पुरुषाः पुनन्ति भुवनं पुण्यौघपण्यापणाः ॥ १२॥

icchāmīna vihārakacchapa mahāpotrin yadṛcchāharerakṣāvāmana roṣarāma karuṇākākutstha helāhalin |krīḍāvallava kalkavāhana daśākalkinniti pratyahaṃjalpantaḥ puruṣāḥ punanti bhuvanaṃ puṇyaughapaṇyāpaṇāḥ || 12||

विद्योदन्वति वेङ्कटेश्वरकवौ जातं जगन्मङ्गलंदेवेशस्य दशावतारविषयं स्तोत्रं विवक्षेत यः ।वक्त्रे तस्य सरस्वती बहुमुखी भक्तिः परा मानसेशुद्धिः कापि तनौ दिशासु दशसु ख्यातिः शुभा जृम्भते ॥ १३॥

vidyodanvati veṅkaṭeśvarakavau jātaṃ jaganmaṅgalaṃdeveśasya daśāvatāraviṣayaṃ stotraṃ vivakṣeta yaḥ |vaktre tasya sarasvatī bahumukhī bhaktiḥ parā mānaseśuddhiḥ kāpi tanau diśāsu daśasu khyātiḥ śubhā jṛmbhate || 13||

कवितार्किकसिंहाय कल्याणगुणशालिने ।श्रीमते वेङ्कटेशाय वेदान्तगुरवे नमः ॥इति वेदान्तदेशिककृतं दशावतारस्तोत्रं सम्पूर्णम् ।

kavitārkikasiṃhāya kalyāṇaguṇaśāline |śrīmate veṅkaṭeśāya vedāntagurave namaḥ ||iti vedāntadeśikakṛtaṃ daśāvatārastotraṃ sampūrṇam |