बालास्तवराजः ३ Shri Bala Stavaraja 3

ॐ अस्य श्रीबालास्तवराजस्तोत्रस्य श्रीमृत्युञ्जय ऋषिः ।ककुप्छन्दः । श्रीबाला देवता । क्लीं बीजम् । सौः शक्तिः । ऐं कीलकम् ।भोगमोक्षार्थे जपे विनियोगः ।त्रिबीजभाजायुक्तेन कराङ्गौ न्यासमाचरेत् ।ध्यानं ततः शृणुष्वाशु सर्वैश्वर्यप्रदायकम् ॥ १॥

oṃ asya śrībālāstavarājastotrasya śrīmṛtyuñjaya ṛṣiḥ |kakupchandaḥ | śrībālā devatā | klīṃ bījam | sauḥ śaktiḥ | aiṃ kīlakam |bhogamokṣārthe jape viniyogaḥ |tribījabhājāyuktena karāṅgau nyāsamācaret |dhyānaṃ tataḥ śṛṇuṣvāśu sarvaiśvaryapradāyakam || 1||

अक्षपुस्तधरां रक्तां वराभयकराम्बुजाम् ।चन्द्रमुण्डां त्रिनेत्रां च ध्यायेद्बालां फलप्रदाम् ॥ २॥

akṣapustadharāṃ raktāṃ varābhayakarāmbujām |candramuṇḍāṃ trinetrāṃ ca dhyāyedbālāṃ phalapradām || 2||

ऐं त्रैलोक्यविजयायै हुँ फट् । क्लीं त्रिगुणरहितायै हुँ फट् ।सौः सर्वैश्वर्यदायिन्यै हुँ फट् ।नातः परतरा सिद्धिर्नातः परतरा गतिः ।नातः परतरो मन्त्रस्सत्यं सत्यं वदाम्यहम् ॥ ३॥

aiṃ trailokyavijayāyai hum̐ phaṭ | klīṃ triguṇarahitāyai hum̐ phaṭ |sauḥ sarvaiśvaryadāyinyai hum̐ phaṭ |nātaḥ paratarā siddhirnātaḥ paratarā gatiḥ |nātaḥ parataro mantrassatyaṃ satyaṃ vadāmyaham || 3||

रक्तां रक्तच्छदां तीक्ष्णां रक्तपां रक्तवाससीम् ।स्वरूपां रत्नभूषां च ललज्जिह्वां परां भजे ॥ ४॥

raktāṃ raktacchadāṃ tīkṣṇāṃ raktapāṃ raktavāsasīm |svarūpāṃ ratnabhūṣāṃ ca lalajjihvāṃ parāṃ bhaje || 4||

त्रैलोक्यजननीं सिद्धां त्रिकोणस्थां त्रिलोचनाम् ।त्रिवर्गफलदां शान्तां वन्दे बीजत्रयात्मिकाम् ॥ ५॥

trailokyajananīṃ siddhāṃ trikoṇasthāṃ trilocanām |trivargaphaladāṃ śāntāṃ vande bījatrayātmikām || 5||

श्रीबालां वारुणीप्रीतां बालार्ककोटिद्योतिनीम् ।वरदां बुद्धिदां श्रेष्ठां वामाचारप्रियां भजे ॥ ५॥

śrībālāṃ vāruṇīprītāṃ bālārkakoṭidyotinīm |varadāṃ buddhidāṃ śreṣṭhāṃ vāmācārapriyāṃ bhaje || 5||

चतुर्भुजां चारुनेत्रां चन्द्रमौलिं कपालिनीम् ।चतुःषष्टियोगिनीशां वीरवन्द्यां भजाम्यहम् ॥ ६॥

caturbhujāṃ cārunetrāṃ candramauliṃ kapālinīm |catuḥṣaṣṭiyoginīśāṃ vīravandyāṃ bhajāmyaham || 6||

कौलिकां कलतत्त्वस्थां कौलावाराङ्कवाहनाम् ।कौसुम्भवर्णां कौमारीं कवर्मधारिणीं भजे ॥ ७॥

kaulikāṃ kalatattvasthāṃ kaulāvārāṅkavāhanām |kausumbhavarṇāṃ kaumārīṃ kavarmadhāriṇīṃ bhaje || 7||

द्वादशस्वररूपायै नमस्तेऽस्तु नमो नमः ।नमो नमस्ते बालायै कारुण्यायै नमो नमः ॥ ८॥

dvādaśasvararūpāyai namaste'stu namo namaḥ |namo namaste bālāyai kāruṇyāyai namo namaḥ || 8||

विद्याविद्याद्यविद्यायै नमस्तेऽस्तु नमो नमः ।विद्याराज्ञ्यै महादेव्यै शिवायै सततं नमः ॥ ९॥

vidyāvidyādyavidyāyai namaste'stu namo namaḥ |vidyārājñyai mahādevyai śivāyai satataṃ namaḥ || 9||

ऐं बालायै विद्महे क्लीं त्रिभुवनेश्वर्यै धीमहि ।सौः तन्नो देवी प्रचोदयात् । ऐं बालायै स्वाहा ॥ १०॥

aiṃ bālāyai vidmahe klīṃ tribhuvaneśvaryai dhīmahi |sauḥ tanno devī pracodayāt | aiṃ bālāyai svāhā || 10||

द्वादशान्तालयां श्रेष्ठां षोडशाधारगां शिवाम् ।पञ्चेन्द्रियस्वरूपाख्यां भूयो भूयो नमाम्यहम् ॥ ११॥

dvādaśāntālayāṃ śreṣṭhāṃ ṣoḍaśādhāragāṃ śivām |pañcendriyasvarūpākhyāṃ bhūyo bhūyo namāmyaham || 11||

ब्रह्मविद्यां ब्रह्मरूपां ब्रह्मज्ञानप्रदायिनीम् ।वसुप्रदां वेदरूपां वन्दे बालां शुभाननाम् ॥ १२॥

brahmavidyāṃ brahmarūpāṃ brahmajñānapradāyinīm |vasupradāṃ vedarūpāṃ vande bālāṃ śubhānanām || 12||

अघोरां भीषणामाद्यामनन्तोपरिसंस्थिताम् ।देवदेवेश्वरीं भद्रां श्रीबालां प्रणमाम्यहम् ॥ १३॥

aghorāṃ bhīṣaṇāmādyāmanantoparisaṃsthitām |devadeveśvarīṃ bhadrāṃ śrībālāṃ praṇamāmyaham || 13||

भवप्रियां भवाधारां भगरूपां भगप्रियाम् ।भयानकां भूतधात्रीं भूदेवपूजितां भजे ॥ १४॥

bhavapriyāṃ bhavādhārāṃ bhagarūpāṃ bhagapriyām |bhayānakāṃ bhūtadhātrīṃ bhūdevapūjitāṃ bhaje || 14||

अकारादिक्षकारान्तां क्लीबाक्षरात्मिकां पराम् ।वन्दे वन्दे महामायां भवभव्यभयापहाम् ॥ १५॥

akārādikṣakārāntāṃ klībākṣarātmikāṃ parām |vande vande mahāmāyāṃ bhavabhavyabhayāpahām || 15||

नाडीरूप्यै नमस्तेऽस्तु धातुरूप्यै नमो नमः ।जीवरूप्यै नमस्यामि ब्रह्मरूप्यै नमो नमः ॥ १६॥

nāḍīrūpyai namaste'stu dhāturūpyai namo namaḥ |jīvarūpyai namasyāmi brahmarūpyai namo namaḥ || 16||

नमस्ते मन्त्ररूपायै पीठगायै नमो नमः ।सिंहासनेश्वरि तुभ्यं सिद्धिरूप्यै नमो नमः ॥ १७॥

namaste mantrarūpāyai pīṭhagāyai namo namaḥ |siṃhāsaneśvari tubhyaṃ siddhirūpyai namo namaḥ || 17||

नमस्ते मातृरूपिण्यै नमस्ते भैरवप्रिये ।नमस्ते चोपपीठायै बालायै सततं नमः ॥ १८॥

namaste mātṛrūpiṇyai namaste bhairavapriye |namaste copapīṭhāyai bālāyai satataṃ namaḥ || 18||

योगेश्वर्यै नमस्तेऽस्तु योगदायै नमो नमः ।योगनिद्रास्वरूपिण्यै बालादेव्यै नमो नमः ॥ १९॥

yogeśvaryai namaste'stu yogadāyai namo namaḥ |yoganidrāsvarūpiṇyai bālādevyai namo namaḥ || 19||

सुपुण्यायै नमस्तेऽस्तु सुशुद्धायै नमो नमः ।सुगुह्यायै नमस्तेऽस्तु बालादेव्यै नमो नमः ॥ २०॥

supuṇyāyai namaste'stu suśuddhāyai namo namaḥ |suguhyāyai namaste'stu bālādevyai namo namaḥ || 20||

इतीदं स्तवराजाख्यं सर्वस्तोत्रोत्तमोत्तमम् ।ये पठन्ति महेशानि पुनर्जन्म न विद्यते ॥ २१॥

itīdaṃ stavarājākhyaṃ sarvastotrottamottamam |ye paṭhanti maheśāni punarjanma na vidyate || 21||

सर्वपापहरं पुण्यं सर्वस्फोटविनाशकम् ।सर्वसिद्धिप्रदं श्रेष्ठं भोगैश्वर्यप्रदायकम् ॥ २२॥

sarvapāpaharaṃ puṇyaṃ sarvasphoṭavināśakam |sarvasiddhipradaṃ śreṣṭhaṃ bhogaiśvaryapradāyakam || 22||

इति श्रीबालास्तवराजः (३) सम्पूर्णः ।

iti śrībālāstavarājaḥ (3) sampūrṇaḥ |