बालापञ्चचामरस्तवः Shri Bala Panchachamara Stava

गिरीन्द्रराजबालिकां दिनेशतुल्यरूपिकाम् ।प्रवालजाप्यमालिकां भजामि दैत्यमर्दिकाम् ॥ १॥

girīndrarājabālikāṃ dineśatulyarūpikām |pravālajāpyamālikāṃ bhajāmi daityamardikām || 1||

निशेशमौलिधारिकां नृमुण्डपङ्क्तिशोभिकाम् ।नवीनयौवनाख्यकां स्मरामि पापनाशिकाम् ॥ २॥

niśeśamaulidhārikāṃ nṛmuṇḍapaṅktiśobhikām |navīnayauvanākhyakāṃ smarāmi pāpanāśikām || 2||

भवार्णवात्तु तारिकां भवेन सार्धखेलिकाम् ।कुतर्ककर्मभञ्जिकां नमामि प्रौढरूपिकाम् ॥ ३॥

bhavārṇavāttu tārikāṃ bhavena sārdhakhelikām |kutarkakarmabhañjikāṃ namāmi prauḍharūpikām || 3||

स्वरूपरूपकालिकां स्वयं स्वयम्भुस्वात्मिकाम् ।खगेशराजदण्डिकां अईकरां सुबीजकाम् ॥ ४॥

svarūparūpakālikāṃ svayaṃ svayambhusvātmikām |khageśarājadaṇḍikāṃ aīkarāṃ subījakām || 4||

श्मशानभूमिशायिकां विशालभीतिवारिणीम् ।तुषारतुल्यवाचिकां सनिम्नतुङ्गनाभिकाम् ॥ ५॥

śmaśānabhūmiśāyikāṃ viśālabhītivāriṇīm |tuṣāratulyavācikāṃ sanimnatuṅganābhikām || 5||

सुपट्टवस्त्रसाजिकां सुकिङ्किणीविराजिताम् ।सुबुद्धिबुद्धिदायिकां सुरा सदा सुपीयकाम् ॥ ६॥

supaṭṭavastrasājikāṃ sukiṅkiṇīvirājitām |subuddhibuddhidāyikāṃ surā sadā supīyakām || 6||

सक्लीं ससौः ससर्गकां सनातनेश चाम्बिकाम् ।ससृष्टिपालनाशिकां प्रणौमि दीर्घकेशकाम् ॥ ७॥

saklīṃ sasauḥ sasargakāṃ sanātaneśa cāmbikām |sasṛṣṭipālanāśikāṃ praṇaumi dīrghakeśakām || 7||

सहस्रमार्गपालिका परापरात्मभव्यका ।सुचारुचारुवक्त्रका शिवं ददातु भद्रिका ॥ ८॥

sahasramārgapālikā parāparātmabhavyakā |sucārucāruvaktrakā śivaṃ dadātu bhadrikā || 8||

इत्येतत्परमं गुह्यं पञ्चचामरसंज्ञकम् ।बालाग्रे यः पठति च तस्य सिद्धिर्भवेद्ध्रुवम् ॥ ९॥

ityetatparamaṃ guhyaṃ pañcacāmarasaṃjñakam |bālāgre yaḥ paṭhati ca tasya siddhirbhaveddhruvam || 9||

यं यं चिन्तयते कामं तं तं प्राप्नोति साधकः ।सिद्धिः करतले तस्य मृते मोक्षमवाप्नुयात् ॥ १०॥

yaṃ yaṃ cintayate kāmaṃ taṃ taṃ prāpnoti sādhakaḥ |siddhiḥ karatale tasya mṛte mokṣamavāpnuyāt || 10||

इति चन्द्रद्वीपावतारे श्रीबालापञ्चचामरस्तवः सम्पूर्णः ।

iti candradvīpāvatāre śrībālāpañcacāmarastavaḥ sampūrṇaḥ |