बालानिर्गुणमानसपूजापराभावनास्तोत्रम् Shri Bala Nirguna Manasapuja Parabhavana Stotram

ध्यायामि कथमिव त्वां धीवर्त्मविदूरदिव्यमहिमवतीम् ।आवाहनं विभोस्ते देवेशि कथं कुतः स्थानात् ॥ १॥

dhyāyāmi kathamiva tvāṃ dhīvartmavidūradivyamahimavatīm |āvāhanaṃ vibhoste deveśi kathaṃ kutaḥ sthānāt || 1||

कियदासनं प्रकल्प्यं कृतासनायाश्च सर्वतोऽपि शिवे ।पाद्यं कुतोऽर्घ्यमपि वाऽऽपाद्यं सर्वत्रपाणिपादायाः ॥ २॥

kiyadāsanaṃ prakalpyaṃ kṛtāsanāyāśca sarvato'pi śive |pādyaṃ kuto'rghyamapi vā''pādyaṃ sarvatrapāṇipādāyāḥ || 2||

आचमनं ते स्यादपि भगवति ननु सर्वतोमुखीनायाः ।मधुपर्को वा कथमिह मधुवैरिणि दर्शितप्रसादायाः ॥ ३॥

ācamanaṃ te syādapi bhagavati nanu sarvatomukhīnāyāḥ |madhuparko vā kathamiha madhuvairiṇi darśitaprasādāyāḥ || 3||

स्नानेन किं विधेयं सलिलकृतेनेह नित्यशुद्धायाः ।वस्त्रेणापि न कार्यं कार्पासीयेन हेमवस्त्रायाः ॥ ४॥

snānena kiṃ vidheyaṃ salilakṛteneha nityaśuddhāyāḥ |vastreṇāpi na kāryaṃ kārpāsīyena hemavastrāyāḥ || 4||

हैमैराभरणैर्वा चमत्कृतिः का हिरण्यवर्णायाः ।रत्नाचलवासिन्याः चिन्तामणिगेहगायास्ते ॥ ५॥

haimairābharaṇairvā camatkṛtiḥ kā hiraṇyavarṇāyāḥ |ratnācalavāsinyāḥ cintāmaṇigehagāyāste || 5||

गन्धवती हि तनुस्ते गन्धाः किं नेशि पौनरुक्त्याय ।पुष्करफलदानोत्कां पुष्करकुसुमेन पूजये किं त्वाम् ॥ ६॥

gandhavatī hi tanuste gandhāḥ kiṃ neśi paunaruktyāya |puṣkaraphaladānotkāṃ puṣkarakusumena pūjaye kiṃ tvām || 6||

शमधनमूलधनं त्वं सकलेश्वरी भवसि धूपिता केन ।दीपः कथं शिखावान् दीप्येत पुरः स्वयम्प्रकाशायाः ॥ ७॥

śamadhanamūladhanaṃ tvaṃ sakaleśvarī bhavasi dhūpitā kena |dīpaḥ kathaṃ śikhāvān dīpyeta puraḥ svayamprakāśāyāḥ || 7||

अमृतात्मकं निवेदितमशनं किं नाम नित्यतृप्तायाः ।त्वय्याम्रेडितमेतत्ताम्बूलं यदिह सुमुखरागायाः ॥ ८॥

amṛtātmakaṃ niveditamaśanaṃ kiṃ nāma nityatṛptāyāḥ |tvayyāmreḍitametattāmbūlaṃ yadiha sumukharāgāyāḥ || 8||

उपहारीभूयादिदमुमेऽद्य यन्मे विचेष्टितमशेषम् ।नीराजयामि विद्युन्निभां कथं वा चिदाभासाम् ॥ ९॥

upahārībhūyādidamume'dya yanme viceṣṭitamaśeṣam |nīrājayāmi vidyunnibhāṃ kathaṃ vā cidābhāsām || 9||

पुष्पाञ्जलिः कुतस्ते मूलप्रकृतिस्वरूपायाः ।छत्रं नभोऽतिगायाः चामरमप्यविदितश्रमायास्ते ॥ १०॥

puṣpāñjaliḥ kutaste mūlaprakṛtisvarūpāyāḥ |chatraṃ nabho'tigāyāḥ cāmaramapyaviditaśramāyāste || 10||

नृत्यं प्रथतां कथमिव चित्रं भायान्महानटपुरन्घ्र्याः ।गीतं किं कलभाषणजितवाणीमधुरवीणायाः ॥ ११॥

nṛtyaṃ prathatāṃ kathamiva citraṃ bhāyānmahānaṭapuranghryāḥ |gītaṃ kiṃ kalabhāṣaṇajitavāṇīmadhuravīṇāyāḥ || 11||

वाद्यं डमरुभृदीशे वादयितुं तव पुरोऽस्ति का शक्तिः ।अपरिच्छिन्नायास्ते जगदीश्वरि कः प्रदक्षिणविधिर्वा ॥ १२॥

vādyaṃ ḍamarubhṛdīśe vādayituṃ tava puro'sti kā śaktiḥ |aparicchinnāyāste jagadīśvari kaḥ pradakṣiṇavidhirvā || 12||

स्युस्ते नमांसि कथमिव शङ्करि परितोऽपि विद्यमानायाः ।वाचामगोचरीं त्वां वाचः प्रसरैः प्रसादयेयं वा ॥ १३॥

syuste namāṃsi kathamiva śaṅkari parito'pi vidyamānāyāḥ |vācāmagocarīṃ tvāṃ vācaḥ prasaraiḥ prasādayeyaṃ vā || 13||

कस्मै वच्मि दशां मे कस्येदुग्घृदयमस्ति शक्तिर्वा ।कस्य बलं चोद्धर्तुं क्लेशात्त्वामन्तरा दयासिन्धो ॥ १४॥

kasmai vacmi daśāṃ me kasyedugghṛdayamasti śaktirvā |kasya balaṃ coddhartuṃ kleśāttvāmantarā dayāsindho || 14||

याचे नाभिनवं ते चन्द्रापीडे मदम्ब किञ्चिदपि ।मह्यं प्रदेहि भगवति मदीयमेव स्वरूपमानन्दम् ॥ १५॥

yāce nābhinavaṃ te candrāpīḍe madamba kiñcidapi |mahyaṃ pradehi bhagavati madīyameva svarūpamānandam || 15||

भगवति बालतया वाऽभक्त्या वाप्यापदाकुलितया वा ।मोहाविष्टतया वा मास्तु च ते मनसि यद्दुरुक्तं मे ॥ १६॥

bhagavati bālatayā vā'bhaktyā vāpyāpadākulitayā vā |mohāviṣṭatayā vā māstu ca te manasi yadduruktaṃ me || 16||

श्रीबालानिर्गुणमानसपूजा पराभावनास्तोत्रं सम्पूर्णम् ।

śrībālānirguṇamānasapūjā parābhāvanāstotraṃ sampūrṇam |