गणेशकीलकस्तोत्रम् Shri Ganeshakilaka Stotram

॥ श्रीगणेशाय नमः ॥दक्ष उवाच ।गणेशकीलकं ब्रह्मन् वद सर्वार्थदायकम् ।मन्त्रादीनां विशेषेण सिद्धिदं पूर्णभावतः ॥ १॥

|| śrīgaṇeśāya namaḥ ||dakṣa uvāca |gaṇeśakīlakaṃ brahman vada sarvārthadāyakam |mantrādīnāṃ viśeṣeṇa siddhidaṃ pūrṇabhāvataḥ || 1||

मुद्गल उवाच ।कीलकेन विहीनाश्च मन्त्रा नैव सुखप्रदाः ।आदौ कीलकमेवं वै पठित्वा जपमाचरेत् ॥ २॥

mudgala uvāca |kīlakena vihīnāśca mantrā naiva sukhapradāḥ |ādau kīlakamevaṃ vai paṭhitvā japamācaret || 2||

तदा वीर्ययुता मन्त्रा नानासिद्धिप्रदायकाः ।भवन्ति नात्र सन्देहः कथयामि यथाश्रुतम् ॥ ३॥

tadā vīryayutā mantrā nānāsiddhipradāyakāḥ |bhavanti nātra sandehaḥ kathayāmi yathāśrutam || 3||

समादिष्टं चाङ्गिरसा मह्यं गुह्यतमं परम् ।सिद्धिदं वै गणेशस्य कीलकं शृणु मानद ॥ ४॥

samādiṣṭaṃ cāṅgirasā mahyaṃ guhyatamaṃ param |siddhidaṃ vai gaṇeśasya kīlakaṃ śṛṇu mānada || 4||

अस्य श्रीगणेशकीलकस्य शिव ऋषिः । अनुष्टुप्छन्दः ।श्रीगणपतिर्देवता । ॐ गं योगाय स्वाहा । ॐ गं बीजम् ।विद्याविद्याशक्तिगणपतिप्रीत्यर्थे जपे विनियोगः ॥छन्दऋष्यादिन्यासांश्च कुर्यादादौ तथा परान् ।एकाक्षरस्यैव दक्ष षडङ्गानाचरेत् सुधीः ॥ ५॥

asya śrīgaṇeśakīlakasya śiva ṛṣiḥ | anuṣṭupchandaḥ |śrīgaṇapatirdevatā | oṃ gaṃ yogāya svāhā | oṃ gaṃ bījam |vidyāvidyāśaktigaṇapatiprītyarthe jape viniyogaḥ ||chandaṛṣyādinyāsāṃśca kuryādādau tathā parān |ekākṣarasyaiva dakṣa ṣaḍaṅgānācaret sudhīḥ || 5||

ततो ध्यायेद्गणेशानं ज्योतिरूपधरं परम् ।मनोवाणीविहीनं च चतुर्भुजविराजितम् ॥ ६॥

tato dhyāyedgaṇeśānaṃ jyotirūpadharaṃ param |manovāṇīvihīnaṃ ca caturbhujavirājitam || 6||

शुण्डादण्डमुखं पूर्णं द्रष्टुं नैव प्रशक्यते ।विद्याऽविद्यासमायुक्तं विभूतिभिरुपासितम् ॥ ७॥

śuṇḍādaṇḍamukhaṃ pūrṇaṃ draṣṭuṃ naiva praśakyate |vidyā'vidyāsamāyuktaṃ vibhūtibhirupāsitam || 7||

एवं ध्यात्वा गणेशानं मानसैः पूजयेत्पृथक् ।पञ्चोपचारकैर्दक्ष ततो जपं समाचरेत् ॥ ८॥

evaṃ dhyātvā gaṇeśānaṃ mānasaiḥ pūjayetpṛthak |pañcopacārakairdakṣa tato japaṃ samācaret || 8||

एकविंशतिवारं तु जपं कुर्यात्प्रजापते ।ततः स्तोत्रं समुच्चार्य पश्चात्सर्वं समाचरेत् ॥ ९॥

ekaviṃśativāraṃ tu japaṃ kuryātprajāpate |tataḥ stotraṃ samuccārya paścātsarvaṃ samācaret || 9||

रूपं बलं श्रियं देहि यशो वीर्यं गजानन ।मेधां प्रज्ञां तथा कीर्तिं विघ्नराज नमोऽस्तु ते ॥ १०॥

rūpaṃ balaṃ śriyaṃ dehi yaśo vīryaṃ gajānana |medhāṃ prajñāṃ tathā kīrtiṃ vighnarāja namo'stu te || 10||

यदा देवादयः सर्वे कुण्ठिता दैत्यपैः कृताः ।तदा त्वं तान्निहत्य स्म करोषि वीर्यसंयुतान् ॥ ११॥

yadā devādayaḥ sarve kuṇṭhitā daityapaiḥ kṛtāḥ |tadā tvaṃ tānnihatya sma karoṣi vīryasaṃyutān || 11||

तथा मन्त्रा गणेशान कुण्ठिताश्च दुरात्मभिः ।शापैश्च तान्सवीर्यांस्ते कुरुष्व त्वं नमो नमः ॥ १२॥

tathā mantrā gaṇeśāna kuṇṭhitāśca durātmabhiḥ |śāpaiśca tānsavīryāṃste kuruṣva tvaṃ namo namaḥ || 12||

शक्तयः कुण्ठिताः सर्वाः स्मरणेन त्वया प्रभो ।ज्ञानयुक्ताः सवीर्याश्च कृता विघ्नेश ते नमः ॥ १३॥

śaktayaḥ kuṇṭhitāḥ sarvāḥ smaraṇena tvayā prabho |jñānayuktāḥ savīryāśca kṛtā vighneśa te namaḥ || 13||

चराचरं जगत्सर्वं सत्ताहीनं यदा भवेत् ।त्वया सत्तायुतं ढुण्ढे स्मरणेन कृतं च ते ॥ १४॥

carācaraṃ jagatsarvaṃ sattāhīnaṃ yadā bhavet |tvayā sattāyutaṃ ḍhuṇḍhe smaraṇena kṛtaṃ ca te || 14||

तत्त्वानि वीर्यहीनानि यदा जातानि विघ्नप ।स्मृत्या ते वीर्ययुक्तानि पुनर्जातानि ते नमः ॥ १५॥

tattvāni vīryahīnāni yadā jātāni vighnapa |smṛtyā te vīryayuktāni punarjātāni te namaḥ || 15||

ब्रह्माणि योगहीनानि जातानि स्मरणेन ते ।यदा पुनर्गणेशान योगयुक्तानि ते नमः ॥ १६॥

brahmāṇi yogahīnāni jātāni smaraṇena te |yadā punargaṇeśāna yogayuktāni te namaḥ || 16||

इत्यादि विविधं सर्वं स्मरणेन च ते प्रभो ।सत्तायुक्तं बभूवैव विघ्नेशाय नमो नमः ॥ १७॥

ityādi vividhaṃ sarvaṃ smaraṇena ca te prabho |sattāyuktaṃ babhūvaiva vighneśāya namo namaḥ || 17||

तथा मन्त्रा गणेशान वीर्यहीना बभूविरे ।स्मरणेन पुनर्ढुण्ढे वीर्ययुक्तान्कुरुष्व ते ॥ १८॥

tathā mantrā gaṇeśāna vīryahīnā babhūvire |smaraṇena punarḍhuṇḍhe vīryayuktānkuruṣva te || 18||

सर्वं सत्तासमायुक्तं मन्त्रपूजादिकं प्रभो ।मम नाम्ना भवतु ते वक्रतुण्डाय ते नमः ॥ १९॥

sarvaṃ sattāsamāyuktaṃ mantrapūjādikaṃ prabho |mama nāmnā bhavatu te vakratuṇḍāya te namaḥ || 19||

उत्कीलय महामन्त्रान् जपेन स्तोत्रपाठतः ।सर्वसिद्धिप्रदा मन्त्रा भवन्तु त्वत्प्रसादतः ॥ २०॥

utkīlaya mahāmantrān japena stotrapāṭhataḥ |sarvasiddhipradā mantrā bhavantu tvatprasādataḥ || 20||

गणेशाय नमस्तुभ्यं हेरम्बायैकदन्तिने ।स्वानन्दवासिने तुभ्यं ब्रह्मणस्पतये नमः ॥ २१॥

gaṇeśāya namastubhyaṃ herambāyaikadantine |svānandavāsine tubhyaṃ brahmaṇaspataye namaḥ || 21||

गणेशकीलकमिदं कथितं ते प्रजापते ।शिवप्रोक्तं तु मन्त्राणामुत्कीलनकरं परम् ॥ २२॥

gaṇeśakīlakamidaṃ kathitaṃ te prajāpate |śivaproktaṃ tu mantrāṇāmutkīlanakaraṃ param || 22||

यः पठिष्यति भावेन जप्त्वा ते मन्त्रमुत्तमम् ।स सर्वसिद्धिमाप्नोति नानामन्त्रसमुद्भवाम् ॥ २३॥

yaḥ paṭhiṣyati bhāvena japtvā te mantramuttamam |sa sarvasiddhimāpnoti nānāmantrasamudbhavām || 23||

एनं त्यक्त्वा गणेशस्य मन्त्रं जपति नित्यदा ।स सर्वफलहीनश्च जायते नात्र संशयः ॥ २४॥

enaṃ tyaktvā gaṇeśasya mantraṃ japati nityadā |sa sarvaphalahīnaśca jāyate nātra saṃśayaḥ || 24||

सर्वसिद्धिकरं प्रोक्तं कीलकं परमाद्भुतम् ।पुरानेन स्वयं शम्भुर्मन्त्रजां सिद्धिमालभत् ॥ २५॥

sarvasiddhikaraṃ proktaṃ kīlakaṃ paramādbhutam |purānena svayaṃ śambhurmantrajāṃ siddhimālabhat || 25||

विष्णुर्ब्रह्मादयो देवा मुनयो योगिनः परे ।अनेन मन्त्रसिद्धिं ते लेभिरे च प्रजापते ॥ २६॥

viṣṇurbrahmādayo devā munayo yoginaḥ pare |anena mantrasiddhiṃ te lebhire ca prajāpate || 26||

ऐलः कीलकमाद्यं वै कृत्वा मन्त्रपरायणः ।गतः स्वानन्दपूर्यां स भक्तराजो बभूव ह ॥ २७॥

ailaḥ kīlakamādyaṃ vai kṛtvā mantraparāyaṇaḥ |gataḥ svānandapūryāṃ sa bhaktarājo babhūva ha || 27||

सस्त्रीको जडदेहेन ब्रह्माण्डमवलोक्य तु ।गणेशदर्शनेनैव ज्योतीरूपो बभूव ह ॥ २८॥

sastrīko jaḍadehena brahmāṇḍamavalokya tu |gaṇeśadarśanenaiva jyotīrūpo babhūva ha || 28||

दक्ष उवाच ।ऐलो जडशरीरस्थः कथं देवादिकैर्युतम् ।ब्रह्माण्डं स ददर्शैव तन्मे वद कुतूहलम् ॥ २९॥

dakṣa uvāca |ailo jaḍaśarīrasthaḥ kathaṃ devādikairyutam |brahmāṇḍaṃ sa dadarśaiva tanme vada kutūhalam || 29||

पुण्यराशिः स्वयं साक्षान्नरकादीन् महामते ।अपश्यच्च कथं सोऽपि पापिदर्शनयोग्यकान् ॥ ३०॥

puṇyarāśiḥ svayaṃ sākṣānnarakādīn mahāmate |apaśyacca kathaṃ so'pi pāpidarśanayogyakān || 30||

मुद्गलवाच ।विमानस्थः स्वयं राजा कृपया तान् ददर्श ह ।गाणेशानां जडस्थश्च शिवविष्णुमुखान् प्रभो ॥ ३१॥

mudgalavāca |vimānasthaḥ svayaṃ rājā kṛpayā tān dadarśa ha |gāṇeśānāṃ jaḍasthaśca śivaviṣṇumukhān prabho || 31||

स्वानन्दगे विमाने ये संस्थितास्ते शुभाशुभे ।योगरूपतया सर्वे दक्ष पश्यन्ति चाञ्जसा ॥ ३२॥

svānandage vimāne ye saṃsthitāste śubhāśubhe |yogarūpatayā sarve dakṣa paśyanti cāñjasā || 32||

एतत्ते कथितं सर्वमैलस्य चरितं शुभम् ।यः शृणोति स वै मर्त्यः भुक्तिं मुक्तिं लभेद्ध्रुवम् ॥ ३३॥

etatte kathitaṃ sarvamailasya caritaṃ śubham |yaḥ śṛṇoti sa vai martyaḥ bhuktiṃ muktiṃ labheddhruvam || 33||

इति श्रीमुद्गलमहापुराणे पङ्चमे खण्डे लम्बोदरचरितेश्रवणमाहात्म्यवर्णनं नाम पञ्चचत्वारिंशत्तमोऽध्यायेश्रीगणेशकीलकस्तोत्रं सम्पूर्णम् ।॥ मुद्गलपुराणं पञ्चमः खण्डः । अध्यायः ४५ । ५\।४५। २३३॥– ॥ मुद्गलपुराणं पञ्चमः खण्डः । अध्यायः ४५ । ५।४५। २-३३॥

iti śrīmudgalamahāpurāṇe paṅcame khaṇḍe lambodaracariteśravaṇamāhātmyavarṇanaṃ nāma pañcacatvāriṃśattamo'dhyāyeśrīgaṇeśakīlakastotraṃ sampūrṇam ||| mudgalapurāṇaṃ pañcamaḥ khaṇḍaḥ | adhyāyaḥ 45 | 5\|45| 233||– || mudgalapurāṇaṃ pañcamaḥ khaṇḍaḥ | adhyāyaḥ 45 | 5|45| 2-33||