महागणपतिस्तोत्रम् १ Mahaganapati Stotram

योगं योगविदां विधूतविविधव्यासंगशुद्धाशयप्रादुर्भूतसुधारसप्रसृमरध्यानास्पदाध्यासिनाम् ।आनन्दप्लवमानबोधमधुराऽऽमोदच्छटामेदुरंतं भूमानमुपास्महे परिणतं दन्तावलास्यात्मना ॥ १॥

yogaṃ yogavidāṃ vidhūtavividhavyāsaṃgaśuddhāśayaprādurbhūtasudhārasaprasṛmaradhyānāspadādhyāsinām |ānandaplavamānabodhamadhurā''modacchaṭāmeduraṃtaṃ bhūmānamupāsmahe pariṇataṃ dantāvalāsyātmanā || 1||

तारश्रीपरशक्तिकामवसुधारूपानुगं यं विदुस्तस्मैस्तात्प्रणतिर्गणाधिपतये यो रागिणाऽभ्यर्थ्यते ।आमन्त्र्य प्रथमं वरेति वरदेत्यार्तेन सर्वं जनंस्वामिन् मे वशमानयेति सततं स्वाहादिभिः पूजितः ॥ २॥

tāraśrīparaśaktikāmavasudhārūpānugaṃ yaṃ vidustasmaistātpraṇatirgaṇādhipataye yo rāgiṇā'bhyarthyate |āmantrya prathamaṃ vareti varadetyārtena sarvaṃ janaṃsvāmin me vaśamānayeti satataṃ svāhādibhiḥ pūjitaḥ || 2||

कल्लोलांचलचुम्बिताम्बुदतताविक्षुद्रवाम्भोनिधौद्वीपे रत्नमये सुरद्रुमवनामोदैकमेदस्विनि ।मूले कल्पतरोर्महामणिमये पीठेऽक्षराम्भोरूहेषट्कोणा कलितत्रिकोणरचनासत्कर्णिकेऽमुं भजे ॥ ३॥

kallolāṃcalacumbitāmbudatatāvikṣudravāmbhonidhaudvīpe ratnamaye suradrumavanāmodaikamedasvini |mūle kalpatarormahāmaṇimaye pīṭhe'kṣarāmbhorūheṣaṭkoṇā kalitatrikoṇaracanāsatkarṇike'muṃ bhaje || 3||

चक्रप्रासरसालकार्मुकगदासद्बीजपूरद्विजव्रीह्यग्रोत्पलपाशपंकजकरं शुण्डाग्रजाग्रद्घटम् ।आश्लिष्टं प्रियया सरोजकरया रत्नस्फुरद् भूषयामाणिक्यप्रतिमं महागणपतिं विश्वेशमाशास्महे ॥ ४॥

cakraprāsarasālakārmukagadāsadbījapūradvijavrīhyagrotpalapāśapaṃkajakaraṃ śuṇḍāgrajāgradghaṭam |āśliṣṭaṃ priyayā sarojakarayā ratnasphurad bhūṣayāmāṇikyapratimaṃ mahāgaṇapatiṃ viśveśamāśāsmahe || 4||

दानाम्भःपरिमेदुरप्रसृमरव्यालम्बिरोलम्बभृत्सिन्दूरारूणगण्डमण्डलयुगव्याजात् प्रशस्तिद्वयम् ।त्रैलोक्येष्ट विधानवर्णसुभगं यः पद्मरागोपमंधत्ते स श्रियमातनोतु सततं देवो गणानां पतिः ॥ ५॥

dānāmbhaḥparimeduraprasṛmaravyālambirolambabhṛtsindūrārūṇagaṇḍamaṇḍalayugavyājāt praśastidvayam |trailokyeṣṭa vidhānavarṇasubhagaṃ yaḥ padmarāgopamaṃdhatte sa śriyamātanotu satataṃ devo gaṇānāṃ patiḥ || 5||

भ्राम्यन् मन्दरघूर्णनापरवशक्षीराब्धिवीचिच्छटासच्छायाश्चलचामरव्यतिकरश्रीगर्वसर्वङ्कषाः ।दिक्कान्ताघनसारचन्दनरसासाराःश्रयन्तां मनःस्वच्छन्दप्रसरप्रलिप्तवियतो हेरम्बदन्तत्विषः ॥ ६॥

bhrāmyan mandaraghūrṇanāparavaśakṣīrābdhivīcicchaṭāsacchāyāścalacāmaravyatikaraśrīgarvasarvaṅkaṣāḥ |dikkāntāghanasāracandanarasāsārāḥśrayantāṃ manaḥsvacchandaprasarapraliptaviyato herambadantatviṣaḥ || 6||

मुक्ताजालकरम्बितप्रविकसन्माणिक्यपुंजच्छटाकान्ताः कम्बुकदम्बचुम्बितघनाम्भोजप्रवालोपमाः ।ज्योत्स्नापूरतरंगमन्थरतरत्सन्ध्यावयस्याश्चिरंहेरम्बस्य जयन्ति दन्तकिरणाकीर्णाः शरीरत्विषः ॥ ७॥

muktājālakarambitapravikasanmāṇikyapuṃjacchaṭākāntāḥ kambukadambacumbitaghanāmbhojapravālopamāḥ |jyotsnāpūrataraṃgamantharataratsandhyāvayasyāściraṃherambasya jayanti dantakiraṇākīrṇāḥ śarīratviṣaḥ || 7||

शुण्डाग्राकलितेन हेमकलशेनावर्जितेन क्षरन्नानारत्नचयेन साधकजनान् सम्भावयन् कोटिशः ।दानामोदविनोदलुब्धमधुपप्रोत्सारणाविर्भवत्कर्णान्दोलनखेलनो विजयते देवो गणग्रामणीः ॥ ८॥

śuṇḍāgrākalitena hemakalaśenāvarjitena kṣarannānāratnacayena sādhakajanān sambhāvayan koṭiśaḥ |dānāmodavinodalubdhamadhupaprotsāraṇāvirbhavatkarṇāndolanakhelano vijayate devo gaṇagrāmaṇīḥ || 8||

हेरम्बं प्रणमामि यस्य पुरतः शाण्डिल्यमूले श्रियाबिभ्रत्याम्बुरूहे समं मधुरिपुस्ते शङ्खचक्रे वहन् ।न्यग्रोधस्य तले सहाद्रिसुतया शम्भुस्तथा दक्षिणेबिभ्राणः परशुं त्रिशूलमितया पाशाङ्कुशाभ्यां सह ॥ ९॥

herambaṃ praṇamāmi yasya purataḥ śāṇḍilyamūle śriyābibhratyāmburūhe samaṃ madhuripuste śaṅkhacakre vahan |nyagrodhasya tale sahādrisutayā śambhustathā dakṣiṇebibhrāṇaḥ paraśuṃ triśūlamitayā pāśāṅkuśābhyāṃ saha || 9||

पश्चात् पिप्पलमाश्रितो रतिपतिर्देवस्य रत्योत्पलेबिभ्रत्या सममैक्षवं धनुरिषून् पौष्पान् वहन् पञ्च च ।वामे चक्रगदाधरः स भगवान्क्रोडः प्रियङ्गोस्तलेहस्तोद्यच्छुकशालिमंजरिकया देव्या धरण्या सह ॥ १०॥

paścāt pippalamāśrito ratipatirdevasya ratyotpalebibhratyā samamaikṣavaṃ dhanuriṣūn pauṣpān vahan pañca ca |vāme cakragadādharaḥ sa bhagavānkroḍaḥ priyaṅgostalehastodyacchukaśālimaṃjarikayā devyā dharaṇyā saha || 10||

षट्कोणाश्रिषु षट्सु षड्गजमुखाः पाशाङ्कुशाभीवरान्बिभ्राणाः प्रमदासखाः पृथुमहाशोणाश्मपुञ्जत्विषः ।आमोदः पुरतः प्रमोदसुमुखौ तं चाभितो दुर्मुखःपश्चात् पार्श्वगतोऽस्य विघ्न इति यो यो विघ्नकर्तेति च ॥ ११॥

ṣaṭkoṇāśriṣu ṣaṭsu ṣaḍgajamukhāḥ pāśāṅkuśābhīvarānbibhrāṇāḥ pramadāsakhāḥ pṛthumahāśoṇāśmapuñjatviṣaḥ |āmodaḥ purataḥ pramodasumukhau taṃ cābhito durmukhaḥpaścāt pārśvagato'sya vighna iti yo yo vighnakarteti ca || 11||

आमोदादिगणेश्वरप्रियतमास्तत्रैव नित्यं स्थिताःकान्ताश्लेषरसज्ञमन्थरदृशः सिद्धिः समृद्धिस्ततः ।कान्तिर्या मदनावतीत्यपि तथा कल्पेषु या गीयतेसाऽन्या यापि मदद्रवा तदपरा द्राविण्यमूः पूजिताः ॥ १२॥

āmodādigaṇeśvarapriyatamāstatraiva nityaṃ sthitāḥkāntāśleṣarasajñamantharadṛśaḥ siddhiḥ samṛddhistataḥ |kāntiryā madanāvatītyapi tathā kalpeṣu yā gīyatesā'nyā yāpi madadravā tadaparā drāviṇyamūḥ pūjitāḥ || 12||

आश्लिष्टौ वसुधेत्यथो वसुमती ताभ्यां सितालोहितौवर्षन्तौ वसुपार्श्वयोर्विलसतस्तौ शंखपद्मौ निधी ।अंगान्यन्वथ मातरश्च परितः शक्रादयोऽब्जाश्रयास्तद्बाह्येः कुलिशादयः परिपतत्काला नलज्योतिषः ॥ १३॥

āśliṣṭau vasudhetyatho vasumatī tābhyāṃ sitālohitauvarṣantau vasupārśvayorvilasatastau śaṃkhapadmau nidhī |aṃgānyanvatha mātaraśca paritaḥ śakrādayo'bjāśrayāstadbāhyeḥ kuliśādayaḥ paripatatkālā nalajyotiṣaḥ || 13||

इत्थं विष्णुशिवादितत्वतनवे श्रीवक्रतुण्डायहुंकाराक्षिप्तसमस्तदैत्य पृतनाव्राताय दीप्तत्विषे ।आनन्दैकरसावबोधलहरी विध्वस्तसर्वोर्मयेसर्वत्र प्रथमानमुग्धमहसे तस्मै परस्मै नमः ॥ १४॥

itthaṃ viṣṇuśivāditatvatanave śrīvakratuṇḍāyahuṃkārākṣiptasamastadaitya pṛtanāvrātāya dīptatviṣe |ānandaikarasāvabodhalaharī vidhvastasarvormayesarvatra prathamānamugdhamahase tasmai parasmai namaḥ || 14||

सेवा हेवाकिदेवासुरनरनिकरस्फारकोटीरकोटिकाटिव्याटीकमानद्युमणिसममणिश्रेणिभावेणिकानाम् ।राजन्नीराजनश्रीसखचरणनखद्योतविद्योतमानःश्रेयः स्थेयः स देयान् मम विमलदृशोबन्धुरं सिन्धुरास्यः ॥ १५॥

sevā hevākidevāsuranaranikarasphārakoṭīrakoṭikāṭivyāṭīkamānadyumaṇisamamaṇiśreṇibhāveṇikānām |rājannīrājanaśrīsakhacaraṇanakhadyotavidyotamānaḥśreyaḥ stheyaḥ sa deyān mama vimaladṛśobandhuraṃ sindhurāsyaḥ || 15||

एतेन प्रकटरहस्यमन्त्रमालागर्भेणस्फुटतरसंविदा स्तवेन ।यः स्तौति प्रचुरतरं महागणेशं तस्येयंभवति वशंवदा त्रिलोकी ॥ १६॥

etena prakaṭarahasyamantramālāgarbheṇasphuṭatarasaṃvidā stavena |yaḥ stauti pracurataraṃ mahāgaṇeśaṃ tasyeyaṃbhavati vaśaṃvadā trilokī || 16||

॥ इति श्रीमत्परमहंसपरिव्राजकाचार्यवर्यश्रीराघवचैतन्यविरचितं महागणपतिस्तोत्रं समाप्तम् ॥

|| iti śrīmatparamahaṃsaparivrājakācāryavaryaśrīrāghavacaitanyaviracitaṃ mahāgaṇapatistotraṃ samāptam ||