विष्णुपञ्जरस्तोत्रम् (ब्रह्माण्डपुराणान्तर्गतम्) Shrivishnupanjarastotram

श्रीगणेशाय नमः ।ॐ अस्य श्रीविष्णुपञ्जरस्तोत्रमन्त्रस्य नारद ऋषिः । अनुष्टुप् छन्दः ।श्रीविष्णुः परमात्मा देवता । अहं बीजम् । सोऽहं शक्तिः । ॐ ह्रीं कीलकम् ।मम सर्वदेहरक्षणार्थं जपे विनियोगः ।नारद ऋषये नमः मुखे । श्रीविष्णुपरमात्मदेवतायै नमः हृदये ।अहं बीजं गुह्ये । सोऽहं शक्तिः पादयोः । ॐ ह्रीं कीलकं पादाग्रे ।ॐ ह्रांह्रींह्रूंह्रैंह्रौंह्रः इति मन्त्रः ।ॐ ह्रां अङ्गुष्ठाभ्यां नमः । ॐ ह्रीं तर्जनीभ्यां नमः ।ॐ ह्रूं मध्यमाभ्यां नमः । ॐ ह्रैं अनामिकाभ्यां नमः ।ॐ ह्रौं कनिष्ठिकाभ्यां नमः । ॐ ह्रः करतलकरपृष्ठाभ्यां नमः ।इति करन्यासः ।अथ हृदयादिन्यासः । ॐ ह्रां हृदयाय नमः । ॐ ह्रीं शिरसे स्वाहा ।ॐ ह्रूं शिखायै वषट् । ॐ ह्रैं कवचाय हुम् ।ॐ ह्रौं नेत्रत्रयाय वौषट् । ॐ ह्रः अस्त्राय फट् । इति अङ्गन्यासः ।अहंबीजप्राणायामं मन्त्रत्रयेण कुर्यात् ।अथ ध्यानम् ।परं परस्मात्प्रकृतेरनादिमेकं निविष्टं बहुधा गुहायाम् ।सर्वालयं सर्वचराचरस्थं नमामि विष्णुं जगदेकनाथम् ॥ १॥

śrīgaṇeśāya namaḥ |oṃ asya śrīviṣṇupañjarastotramantrasya nārada ṛṣiḥ | anuṣṭup chandaḥ |śrīviṣṇuḥ paramātmā devatā | ahaṃ bījam | so'haṃ śaktiḥ | oṃ hrīṃ kīlakam |mama sarvadeharakṣaṇārthaṃ jape viniyogaḥ |nārada ṛṣaye namaḥ mukhe | śrīviṣṇuparamātmadevatāyai namaḥ hṛdaye |ahaṃ bījaṃ guhye | so'haṃ śaktiḥ pādayoḥ | oṃ hrīṃ kīlakaṃ pādāgre |oṃ hrāṃhrīṃhrūṃhraiṃhrauṃhraḥ iti mantraḥ |oṃ hrāṃ aṅguṣṭhābhyāṃ namaḥ | oṃ hrīṃ tarjanībhyāṃ namaḥ |oṃ hrūṃ madhyamābhyāṃ namaḥ | oṃ hraiṃ anāmikābhyāṃ namaḥ |oṃ hrauṃ kaniṣṭhikābhyāṃ namaḥ | oṃ hraḥ karatalakarapṛṣṭhābhyāṃ namaḥ |iti karanyāsaḥ |atha hṛdayādinyāsaḥ | oṃ hrāṃ hṛdayāya namaḥ | oṃ hrīṃ śirase svāhā |oṃ hrūṃ śikhāyai vaṣaṭ | oṃ hraiṃ kavacāya hum |oṃ hrauṃ netratrayāya vauṣaṭ | oṃ hraḥ astrāya phaṭ | iti aṅganyāsaḥ |ahaṃbījaprāṇāyāmaṃ mantratrayeṇa kuryāt |atha dhyānam |paraṃ parasmātprakṛteranādimekaṃ niviṣṭaṃ bahudhā guhāyām |sarvālayaṃ sarvacarācarasthaṃ namāmi viṣṇuṃ jagadekanātham || 1||

ॐ विष्णुपञ्जरकं दिव्यं सर्वदुष्टनिवारणम् ।उग्रतेजो महावीर्यं सर्वशत्रुनिकृन्तनम् ॥ २॥

oṃ viṣṇupañjarakaṃ divyaṃ sarvaduṣṭanivāraṇam |ugratejo mahāvīryaṃ sarvaśatrunikṛntanam || 2||

त्रिपुरं दहमानस्य हरस्य ब्रह्मणोदितम् ।तदहं सम्प्रवक्ष्यामि आत्मरक्षाकरं नृणाम् ॥ ३॥

tripuraṃ dahamānasya harasya brahmaṇoditam |tadahaṃ sampravakṣyāmi ātmarakṣākaraṃ nṛṇām || 3||

पादौ रक्षतु गोविन्दो जङ्घे चैव त्रिविक्रमः ।ऊरू मे केशवः पातु कटिं चैव जनार्दनः ॥ ४॥

pādau rakṣatu govindo jaṅghe caiva trivikramaḥ |ūrū me keśavaḥ pātu kaṭiṃ caiva janārdanaḥ || 4||

नाभिं चैवाच्युतः पातु गुह्यं चैव तु वामनः ।उदरं पद्मनाभश्च पृष्ठं चैव तु माधवः ॥ ५॥

nābhiṃ caivācyutaḥ pātu guhyaṃ caiva tu vāmanaḥ |udaraṃ padmanābhaśca pṛṣṭhaṃ caiva tu mādhavaḥ || 5||

वामपार्श्वं तथा विष्णुर्दक्षिणं मधुसूदनः ।बाहू वै वासुदेवश्च हृदि दामोदरस्तथा ॥ ६॥

vāmapārśvaṃ tathā viṣṇurdakṣiṇaṃ madhusūdanaḥ |bāhū vai vāsudevaśca hṛdi dāmodarastathā || 6||

कण्ठं रक्षतु वाराहः कृष्णश्च मुखमण्डलम् ।माधवः कर्णमूले तु हृषीकेशश्च नासिके ॥ ७॥

kaṇṭhaṃ rakṣatu vārāhaḥ kṛṣṇaśca mukhamaṇḍalam |mādhavaḥ karṇamūle tu hṛṣīkeśaśca nāsike || 7||

नेत्रे नारायणो रक्षेल्ललाटं गरुडध्वजः ।कपोलौ केशवो रक्षेद्वैकुण्ठः सर्वतोदिशम् ॥ ८॥

netre nārāyaṇo rakṣellalāṭaṃ garuḍadhvajaḥ |kapolau keśavo rakṣedvaikuṇṭhaḥ sarvatodiśam || 8||

श्रीवत्साङ्कश्च सर्वेषामङ्गानां रक्षको भवेत् ।पूर्वस्यां पुण्डरीकाक्ष आग्नेय्यां श्रीधरस्तथा ॥ ९॥

śrīvatsāṅkaśca sarveṣāmaṅgānāṃ rakṣako bhavet |pūrvasyāṃ puṇḍarīkākṣa āgneyyāṃ śrīdharastathā || 9||

दक्षिणे नारसिंहश्च नैरृत्यां माधवोऽवतु ।पुरुषोत्तमो मे वारुण्यां वायव्यां च जनार्दनः ॥ १०॥

dakṣiṇe nārasiṃhaśca nairṛtyāṃ mādhavo'vatu |puruṣottamo me vāruṇyāṃ vāyavyāṃ ca janārdanaḥ || 10||

गदाधरस्तु कौबेर्यामीशान्यां पातु केशवः ।आकाशे च गदा पातु पाताले च सुदर्शनम् ॥ ११॥

gadādharastu kauberyāmīśānyāṃ pātu keśavaḥ |ākāśe ca gadā pātu pātāle ca sudarśanam || 11||

सन्नद्धः सर्वगात्रेषु प्रविष्टो विष्णुपञ्जरः ।विष्णुपञ्जरविष्टोऽहं विचरामि महीतले ॥ १२॥

sannaddhaḥ sarvagātreṣu praviṣṭo viṣṇupañjaraḥ |viṣṇupañjaraviṣṭo'haṃ vicarāmi mahītale || 12||

राजद्वारेऽपथे घोरे सङ्ग्रामे शत्रुसङ्कटे ।नदीषु च रणे चैव चोरव्याघ्रभयेषु च ॥ १३॥

rājadvāre'pathe ghore saṅgrāme śatrusaṅkaṭe |nadīṣu ca raṇe caiva coravyāghrabhayeṣu ca || 13||

डाकिनीप्रेतभूतेषु भयं तस्य न जायते ।रक्ष रक्ष महादेव रक्ष रक्ष जनेश्वर ॥ १४॥

ḍākinīpretabhūteṣu bhayaṃ tasya na jāyate |rakṣa rakṣa mahādeva rakṣa rakṣa janeśvara || 14||

रक्षन्तु देवताः सर्वा ब्रह्मविष्णुमहेश्वराः ।जले रक्षतु वाराहः स्थले रक्षतु वामनः ॥ १५॥

rakṣantu devatāḥ sarvā brahmaviṣṇumaheśvarāḥ |jale rakṣatu vārāhaḥ sthale rakṣatu vāmanaḥ || 15||

अटव्यां नारसिंहश्च सर्वतः पातु केशवः ॥दिवा रक्षतु मां सूर्यो रात्रौ रक्षतु चन्द्रमाः ॥ १६॥

aṭavyāṃ nārasiṃhaśca sarvataḥ pātu keśavaḥ ||divā rakṣatu māṃ sūryo rātrau rakṣatu candramāḥ || 16||

पन्थानं दुर्गमं रक्षेत्सर्वमेव जनार्दनः ।रोगविघ्नहतश्चैव ब्रह्महा गुरुतल्पगः ॥ १७॥

panthānaṃ durgamaṃ rakṣetsarvameva janārdanaḥ |rogavighnahataścaiva brahmahā gurutalpagaḥ || 17||

स्त्रीहन्ता बालघाती च सुरापो वृषलीपतिः ।मुच्यते सर्वपापेभ्यो यः पठेन्नात्र संशयः ॥ १८॥

strīhantā bālaghātī ca surāpo vṛṣalīpatiḥ |mucyate sarvapāpebhyo yaḥ paṭhennātra saṃśayaḥ || 18||

अपुत्रो लभते पुत्रं धनार्थी लभते धनम् ।विद्यार्थी लभते विद्यां मोक्षार्थी लभते गतिम् ॥ १९॥

aputro labhate putraṃ dhanārthī labhate dhanam |vidyārthī labhate vidyāṃ mokṣārthī labhate gatim || 19||

आपदो हरते नित्यं विष्णुस्तोत्रार्थसम्पदा ।यस्त्विदं पठते स्तोत्रं विष्णुपञ्जरमुत्तमम् ॥ २०॥

āpado harate nityaṃ viṣṇustotrārthasampadā |yastvidaṃ paṭhate stotraṃ viṣṇupañjaramuttamam || 20||

मुच्यते सर्वपापेभ्यो विष्णुलोकं स गच्छति ।गोसहस्रफलं तस्य वाजपेयशतस्य च ॥ २१॥

mucyate sarvapāpebhyo viṣṇulokaṃ sa gacchati |gosahasraphalaṃ tasya vājapeyaśatasya ca || 21||

अश्वमेधसहस्रस्य फलं प्राप्नोति मानवः ।सर्वकामं लभेदस्य पठनान्नात्र संशयः ॥ २२॥

aśvamedhasahasrasya phalaṃ prāpnoti mānavaḥ |sarvakāmaṃ labhedasya paṭhanānnātra saṃśayaḥ || 22||

जले विष्णुः स्थले विष्णुर्विष्णुः पर्वतमस्तके ।ज्वालामालाकुले विष्णुः सर्वं विष्णुमयं जगत् ॥ २३॥

jale viṣṇuḥ sthale viṣṇurviṣṇuḥ parvatamastake |jvālāmālākule viṣṇuḥ sarvaṃ viṣṇumayaṃ jagat || 23||

इति श्रीब्रह्माण्डपुराणे इन्द्रनारदसंवादे श्रीविष्णुपञ्जरस्तोत्रं सम्पूर्णम् ॥

iti śrībrahmāṇḍapurāṇe indranāradasaṃvāde śrīviṣṇupañjarastotraṃ sampūrṇam ||