विष्णुस्तुतिः (वादिराजकृता) Shrivishnustutih

श्रीगणेशाय नमः ॥बहुदुःखभरोदर्कस्तमसोग्रतमोऽधमः ।नरको नर को वा तं मतिमानतिवर्तते ॥ १॥

śrīgaṇeśāya namaḥ ||bahuduḥkhabharodarkastamasogratamo'dhamaḥ |narako nara ko vā taṃ matimānativartate || 1||

नरकान्तकपादाब्जपरिचर्यापरान्नरान् ।विना विनायकाद्यर्चापरोऽप्युच्चतरोरितः ॥ २॥

narakāntakapādābjaparicaryāparānnarān |vinā vināyakādyarcāparo'pyuccataroritaḥ || 2||

पतेत्तत्र न तत्त्राणं कुर्युस्ते पर्युपासिताः ।पश्य दृश्यपदद्वद्वस्यार्थं न व्यर्थधीर्भव ॥ ३॥

patettatra na tattrāṇaṃ kuryuste paryupāsitāḥ |paśya dṛśyapadadvadvasyārthaṃ na vyarthadhīrbhava || 3||

असुरो हि सुरक्लेशकरो नरकनामकः ।तस्य हन्ता सतां चिन्तासन्तापाद्यन्तकृन्न किम् ॥ ४॥

asuro hi surakleśakaro narakanāmakaḥ |tasya hantā satāṃ cintāsantāpādyantakṛnna kim || 4||

विशेषेण घ्नन्ति कायं विघ्नास्तेषामधीश्वरः ।आरब्धशुभकार्याणां विरुद्धस्य हि नायकाः ॥ ५॥

viśeṣeṇa ghnanti kāyaṃ vighnāsteṣāmadhīśvaraḥ |ārabdhaśubhakāryāṇāṃ viruddhasya hi nāyakāḥ || 5||

अजामिलो द्विजः पूर्वमतिचक्राम केन तान् ।ससुरा कस्य भजकाः कुतो वा तत्र चक्रमुः ॥ ६॥

ajāmilo dvijaḥ pūrvamaticakrāma kena tān |sasurā kasya bhajakāḥ kuto vā tatra cakramuḥ || 6||

इति चिन्तय तेनापि सन्देहं छिन्धि सन्मते ।गङ्गासेतू पापभङ्गकरौ कः कुरुते प्रभुः ॥ ७॥

iti cintaya tenāpi sandehaṃ chindhi sanmate |gaṅgāsetū pāpabhaṅgakarau kaḥ kurute prabhuḥ || 7||

हयाननस्य वाक्षेष्यो नाभिपुत्रः पदार्चकः ।गुरुर्हि तस्य भ्रूभङ्गः शिवाय स्यात्सतां सदा ॥ ८॥

hayānanasya vākṣeṣyo nābhiputraḥ padārcakaḥ |gururhi tasya bhrūbhaṅgaḥ śivāya syātsatāṃ sadā || 8||

वादिराजयतिप्रोक्तं स्तोत्रमेतत्पठन्सदा ।वादे विजयमाप्नोति नाधो याति कदाचन ॥ ९॥

vādirājayatiproktaṃ stotrametatpaṭhansadā |vāde vijayamāpnoti nādho yāti kadācana || 9||

इति श्रीवादिराजकृता विष्णुस्तुतिः समाप्ता ॥

iti śrīvādirājakṛtā viṣṇustutiḥ samāptā ||