विष्णुस्तोत्रम् (कश्यपादितिकृतं लक्ष्मीनारायणीयसंहितान्तर्गतम् कश्यपोऽपि सुतं त्विन्द्रं) Kashyapaditikritam Vishnu Stotram

कश्यपोऽपि सुतं त्विन्द्रं भ्रष्टराज्यं विलोक्य च ।आदित्या सह सौराष्ट्रे तपस्तेपे पयोवृतम् ॥ ६४॥

kaśyapo'pi sutaṃ tvindraṃ bhraṣṭarājyaṃ vilokya ca |ādityā saha saurāṣṭre tapastepe payovṛtam || 64||

अर्चयामास देवेशं पद्मनाभं जनार्दनम् ।शरीरे तु तयोस्तत्र पिपीलिकाभिरावृते ॥ ६५॥

arcayāmāsa deveśaṃ padmanābhaṃ janārdanam |śarīre tu tayostatra pipīlikābhirāvṛte || 65||

तेजो महत्तयोर्व्याप्तं सौराष्ट्रे परितस्तदा ।लोकास्तु विस्मितास्तेन तौ स्तुवन्ति पुनः पुनः ॥ ६६॥

tejo mahattayorvyāptaṃ saurāṣṭre paritastadā |lokāstu vismitāstena tau stuvanti punaḥ punaḥ || 66||

हरिर्वर्षसहस्रान्ते प्रसन्नस्तपसा तयोः ।तत्रैवाविरभूत्तस्य देव्या सह सनातनः ॥ ६७॥

harirvarṣasahasrānte prasannastapasā tayoḥ |tatraivāvirabhūttasya devyā saha sanātanaḥ || 67||

तं दृष्ट्वा पुण्डरीकाक्षं शङ्खचक्रगदाधरम् ।इन्दीवरदलश्यामं सर्वाभरणशोभितम् ॥ ६८॥

taṃ dṛṣṭvā puṇḍarīkākṣaṃ śaṅkhacakragadādharam |indīvaradalaśyāmaṃ sarvābharaṇaśobhitam || 68||

किरीटहारकेयूरकुण्डलशृङ्खलान्वितम् ।पीताम्बरं श्रीवत्साङ्ककौस्तुभहारवक्षसम् ॥ ६९॥

kirīṭahārakeyūrakuṇḍalaśṛṅkhalānvitam |pītāmbaraṃ śrīvatsāṅkakaustubhahāravakṣasam || 69||

लक्ष्मीयुक्तं गरुडस्थं प्रसन्नं जगदीश्वरम् ।हर्षनिर्भरहृदयस्तुष्टाव कश्यपो हरिम् ॥ ७०॥

lakṣmīyuktaṃ garuḍasthaṃ prasannaṃ jagadīśvaram |harṣanirbharahṛdayastuṣṭāva kaśyapo harim || 70||

नमो नमस्ते लक्ष्मीश सर्वेश भुवनेश्वर ।स्वाश्रितानां सुखदात्रे भक्तकार्यकृते नमः ॥ ७१॥

namo namaste lakṣmīśa sarveśa bhuvaneśvara |svāśritānāṃ sukhadātre bhaktakāryakṛte namaḥ || 71||

आदिमध्यान्तरहितनित्यरूपाय ते नमः ।नमः सर्वत्राणकृते वेदवेदाङ्गचक्षुषे ॥ ७२॥

ādimadhyāntarahitanityarūpāya te namaḥ |namaḥ sarvatrāṇakṛte vedavedāṅgacakṣuṣe || 72||

सूक्ष्माय स्थूलरूपाय नारायणाय ते नमः ।कल्याणगुणपूर्णाय परात्मने च ते नमः ॥ ७३॥

sūkṣmāya sthūlarūpāya nārāyaṇāya te namaḥ |kalyāṇaguṇapūrṇāya parātmane ca te namaḥ || 73||

नमस्ते योगिगम्याय भक्तेच्छापूरकाय ते ।नित्यमुक्तैकभोगाय परधामेश्वराय च ॥ ७४॥

namaste yogigamyāya bhaktecchāpūrakāya te |nityamuktaikabhogāya paradhāmeśvarāya ca || 74||

चतुरात्मन्नमस्तुभ्यं व्यूहात्मने च ते नमः ।पञ्चपञ्चस्वरूपाय पञ्चसंस्कारिणे नमः ॥ ७५॥

caturātmannamastubhyaṃ vyūhātmane ca te namaḥ |pañcapañcasvarūpāya pañcasaṃskāriṇe namaḥ || 75||

नारायणाय कृष्णाय वासुदेवाय ते नमः ।शार्ङ्गिणे विश्वरूपाय धात्रे त्रात्रे च ते नमः ॥ ७६९॥

nārāyaṇāya kṛṣṇāya vāsudevāya te namaḥ |śārṅgiṇe viśvarūpāya dhātre trātre ca te namaḥ || 769||

विष्णवे जिष्णवे तुभ्यं शुद्धसत्त्वाय ते नमः ।बलेर्बलं महज्जातं तन्निषूदय माधव ॥ ७७॥

viṣṇave jiṣṇave tubhyaṃ śuddhasattvāya te namaḥ |balerbalaṃ mahajjātaṃ tanniṣūdaya mādhava || 77||

देवास्तदा सुखिनः स्युरिति चाभ्यर्थनाऽस्ति मे ।यद्यपि बलिराजोऽसौ भक्तोऽस्ति सुरमेलनः ॥ ७८॥

devāstadā sukhinaḥ syuriti cābhyarthanā'sti me |yadyapi balirājo'sau bhakto'sti suramelanaḥ || 78||

किन्तु सुरातिक्रमणं मास्तु दैत्यस्य माधव ।तस्मात्त्रिलोकगं राज्यं त्विन्द्रस्यैव सदाऽस्तु वै ॥ ७९॥

kintu surātikramaṇaṃ māstu daityasya mādhava |tasmāttrilokagaṃ rājyaṃ tvindrasyaiva sadā'stu vai || 79||

बलेस्त्वासुरराज्यं च पातालादौ यथास्तु च ।तथाऽस्त्यभ्यर्थनीयं मे यथेच्छसि तथा कुरु ॥ ८०॥

balestvāsurarājyaṃ ca pātālādau yathāstu ca |tathā'styabhyarthanīyaṃ me yathecchasi tathā kuru || 80||

उक्त्वा तु कश्यपस्तत्र विरराम हरेः पुरः ।अदितिः प्राह देवेशं नत्वा स्तुत्वा जगत्प्रभुम् ॥ ८१॥

uktvā tu kaśyapastatra virarāma hareḥ puraḥ |aditiḥ prāha deveśaṃ natvā stutvā jagatprabhum || 81||

हे नाथ यदि देवानां शास्तृत्वं चासुरे भवेत् ।तदाऽस्मत्पुत्रबाहुल्ये नास्ति किञ्चित्प्रयोजनम् ॥ ८२॥

he nātha yadi devānāṃ śāstṛtvaṃ cāsure bhavet |tadā'smatputrabāhulye nāsti kiñcitprayojanam || 82||

यदि शृगालाः काकाश्च स्युर्देवस्य विभूतयः ।किं सिंहेन च हंसेन तदा वै महिमा तव ॥ ८३॥

yadi śṛgālāḥ kākāśca syurdevasya vibhūtayaḥ |kiṃ siṃhena ca haṃsena tadā vai mahimā tava || 83||

यदि दैत्याः सार्वभौमा भ्रातरस्ते च किङ्कराः ।अलं तर्हि जीवितेन त्वदित्या रमया श्रिया ॥ ८४॥

yadi daityāḥ sārvabhaumā bhrātaraste ca kiṅkarāḥ |alaṃ tarhi jīvitena tvadityā ramayā śriyā || 84||

यदि भवान्महैश्वर्यो दैत्योऽपि तादृशो भवेत् ।अलं भगवता तर्हि दैत्यो वै माधवो भवेत् ॥ ८५॥

yadi bhavānmahaiśvaryo daityo'pi tādṛśo bhavet |alaṃ bhagavatā tarhi daityo vai mādhavo bhavet || 85||

तस्मात्पात्राधिकारेण देया स्मृद्धिर्हि नाऽन्यथा ।यदि लौहं गले न्यस्तं शोभते रूपभासुरम् ॥ ८६॥

tasmātpātrādhikāreṇa deyā smṛddhirhi nā'nyathā |yadi lauhaṃ gale nyastaṃ śobhate rūpabhāsuram || 86||

कृतं तर्हि सुवर्णेन व्यर्थसृष्टं हि हाटकम् ।यदि दैत्यो भवेदिन्द्रो व्यर्था ह्यप्सरसस्तथा ॥ ८७॥

kṛtaṃ tarhi suvarṇena vyarthasṛṣṭaṃ hi hāṭakam |yadi daityo bhavedindro vyarthā hyapsarasastathā || 87||

राजमातरो राक्षस्यश्चेदिन्द्राण्या ह्यलं तदा ।किम्बहूक्तेन मे नाथ व्यवस्थां कुरु केशव ॥ ८८॥

rājamātaro rākṣasyaścedindrāṇyā hyalaṃ tadā |kimbahūktena me nātha vyavasthāṃ kuru keśava || 88||

इति श्रीलक्ष्मीनारायणीयसंहितायां प्रथमे कृतयुगसन्ताने १४४अध्यायान्तर्गतंकश्यपादितिकृतं विष्णुस्तोत्रं सम्पूर्णम् ।लक्ष्मीनारायणीयसंहिता । खण्ड १। अध्याय १४४/६४८८॥लक्ष्मीनारायणीयसंहिता । खण्ड १। अध्याय १४४/६४-८८॥

iti śrīlakṣmīnārāyaṇīyasaṃhitāyāṃ prathame kṛtayugasantāne 144adhyāyāntargataṃkaśyapāditikṛtaṃ viṣṇustotraṃ sampūrṇam |lakṣmīnārāyaṇīyasaṃhitā | khaṇḍa 1| adhyāya 144/6488||lakṣmīnārāyaṇīyasaṃhitā | khaṇḍa 1| adhyāya 144/64-88||