विष्णुस्तोत्रम् (देवैः कृतं २१ हरिवंशान्तर्गतम् त्वत्प्रसादेन भगवंस्तव बाहुबलेन च) Devaih Kritam 21 Vishnu Stotram

देवा ऊचुः ।त्वत्प्रसादेन भगवंस्तव बाहुबलेन च ।नताः स्मो देवदेवेश त्वां वयं शरणं गताः ॥ १॥

devā ūcuḥ |tvatprasādena bhagavaṃstava bāhubalena ca |natāḥ smo devadeveśa tvāṃ vayaṃ śaraṇaṃ gatāḥ || 1||

नताः स्मो विष्णुं सकलं निष्कलं भूतभावनम् ।नताः स्मो विष्णुं देवेशं शङ्खचक्रगदाधरम् ॥ २॥

natāḥ smo viṣṇuṃ sakalaṃ niṣkalaṃ bhūtabhāvanam |natāḥ smo viṣṇuṃ deveśaṃ śaṅkhacakragadādharam || 2||

नताः स्मो भूतभव्येशमीड्यमदिगुरुं हरिम् ।नताः स्मो वरुणं देवमर्चितं भुवनेश्वरम् ॥ ३॥

natāḥ smo bhūtabhavyeśamīḍyamadiguruṃ harim |natāḥ smo varuṇaṃ devamarcitaṃ bhuvaneśvaram || 3||

नताः स्मः प्रेताधिपतिं कुबेरं देवसत्तमम् ।नमस्तुभ्यं जगन्नाथ सनातन जगत्पते ॥ ४॥

natāḥ smaḥ pretādhipatiṃ kuberaṃ devasattamam |namastubhyaṃ jagannātha sanātana jagatpate || 4||

नमः सर्वात्मने तुभ्यं सर्वकर्त्रे नमो नमः ।नम आद्याय बीजाय प्रधानाय जगत्पते ॥ ५॥

namaḥ sarvātmane tubhyaṃ sarvakartre namo namaḥ |nama ādyāya bījāya pradhānāya jagatpate || 5||

नमः स्रष्टे नमो हर्त्रे नमः कर्त्रे जगत्पते ।नमो गोप्त्रे जगन्नाथ नमः स्थात्रे नमो नमः ॥ ६॥

namaḥ sraṣṭe namo hartre namaḥ kartre jagatpate |namo goptre jagannātha namaḥ sthātre namo namaḥ || 6||

यं प्राप्य न निवर्तन्ते योगिनो यतचेतसः ।तस्मै तुभ्यं प्रधानात्मन् सर्वाय जगतः पते ॥ ७॥

yaṃ prāpya na nivartante yogino yatacetasaḥ |tasmai tubhyaṃ pradhānātman sarvāya jagataḥ pate || 7||

सर्वेश भूतभव्येश सर्वलोकनमस्कृत ।प्रासीद देवदेवेश भक्तानामभयंकर ॥ ८॥

sarveśa bhūtabhavyeśa sarvalokanamaskṛta |prāsīda devadeveśa bhaktānāmabhayaṃkara || 8||

जीवामोऽद्य महाबाहो निष्क्रान्ताश्चन्तकाननात् ।त्वच्छासनाद्धि भगवन् किं कुर्वन्त्वदितेः सुताः ।इच्छामः पादशुश्रूषां तव कर्तुं सनातन ॥ ९॥

jīvāmo'dya mahābāho niṣkrāntāścantakānanāt |tvacchāsanāddhi bhagavan kiṃ kurvantvaditeḥ sutāḥ |icchāmaḥ pādaśuśrūṣāṃ tava kartuṃ sanātana || 9||

इति हरिवंशान्तर्गतं देवैः कृतं विष्णुस्तोत्रं सम्पूर्णम् ।हरिवंश । अनुबन्ध परिशिष्ट । अध्याय अ४२\।६१३॥हरिवंश । अनुबन्ध – परिशिष्ट । अध्याय अ४२।६१३॥

iti harivaṃśāntargataṃ devaiḥ kṛtaṃ viṣṇustotraṃ sampūrṇam |harivaṃśa | anubandha pariśiṣṭa | adhyāya a42\|613||harivaṃśa | anubandha – pariśiṣṭa | adhyāya a42|613||