विष्णुस्तोत्रम् (देवादिभिःकृतं लक्ष्मीनारायणीयसंहितान्तर्गतम् तुष्टुवुस्ते हरिं लक्ष्मीनारायणं प्रजेश्वराः) Devadibhih Kritam Vishnu Stotram

तुष्टुवुस्ते हरिं लक्ष्मीनारायणं प्रजेश्वराः ।सुररक्षक शान्तात्मन् दैत्यनाशक ते नमः ॥ ७३॥

tuṣṭuvuste hariṃ lakṣmīnārāyaṇaṃ prajeśvarāḥ |surarakṣaka śāntātman daityanāśaka te namaḥ || 73||

मत्स्यात्मने च ते विष्णो वेदान्नीतवते नमः ।अमृतमन्थनेऽद्रिं बिभ्रते कूर्माय ते नमः ॥ ७४॥

matsyātmane ca te viṣṇo vedānnītavate namaḥ |amṛtamanthane'driṃ bibhrate kūrmāya te namaḥ || 74||

पृथ्वीं दन्ते बिभ्रते ते वराहाय नमो नमः ।बलिं छलायते विप्रवामनाय च ते नमः ॥ ७५॥

pṛthvīṃ dante bibhrate te varāhāya namo namaḥ |baliṃ chalāyate vipravāmanāya ca te namaḥ || 75||

नमः परशुरामाय कापथक्षत्रनाशिने ।रावणान्तकरायाऽऽशु रामचन्द्राय ते नमः ॥ ७६॥

namaḥ paraśurāmāya kāpathakṣatranāśine |rāvaṇāntakarāyā''śu rāmacandrāya te namaḥ || 76||

कृष्णनारायणराधारमाश्रीपतये नमः ।नमो बुद्धस्वरूपाय दैत्यमोहकराय ते ॥ ७७॥

kṛṣṇanārāyaṇarādhāramāśrīpataye namaḥ |namo buddhasvarūpāya daityamohakarāya te || 77||

नमः कपिलरूपाय तत्त्वज्ञानप्रदाय ते ।नमो हंसस्वरूपाय विधात्रे ज्ञानदाय ते ॥ ७८॥

namaḥ kapilarūpāya tattvajñānapradāya te |namo haṃsasvarūpāya vidhātre jñānadāya te || 78||

वेदव्यासस्वरूपाय विद्याश्रवाय ते नमः ।कलिदोषविनाशकृत्कल्किरूपाय ते नमः ॥ ७९॥

vedavyāsasvarūpāya vidyāśravāya te namaḥ |kalidoṣavināśakṛtkalkirūpāya te namaḥ || 79||

पार्वत्याश्च प्रभायाश्च माणिक्याः पतये नमः ।कम्भरायाः सुपुत्राय गोपालसूनवे नमः ॥ ८०॥

pārvatyāśca prabhāyāśca māṇikyāḥ pataye namaḥ |kambharāyāḥ suputrāya gopālasūnave namaḥ || 80||

शरण्याय सुररक्षाकर्त्रे विद्यावते नमः ।साधुरूपाय कृष्णाय वल्लभाय च ते नमः ॥ ८१॥

śaraṇyāya surarakṣākartre vidyāvate namaḥ |sādhurūpāya kṛṣṇāya vallabhāya ca te namaḥ || 81||

ज्ञानाचार्याय दैवाय दासत्रात्रे च ते नमः ।दैत्यदुःखितभक्तादिरक्षकाय नमो नमः ॥ ८२॥

jñānācāryāya daivāya dāsatrātre ca te namaḥ |daityaduḥkhitabhaktādirakṣakāya namo namaḥ || 82||

सर्वनेत्राय हृत्स्थाय रमानाथाय ते नमः ।ध्वजपद्माङ्कुशवज्रयवचिह्नवते नमः ॥ ८३॥

sarvanetrāya hṛtsthāya ramānāthāya te namaḥ |dhvajapadmāṅkuśavajrayavacihnavate namaḥ || 83||

स्वस्तिकजाम्ब्वष्टकोणोर्ध्वरेखाधारिणे नमः ।धनुस्त्रिकोणकलशाऽर्धचन्द्रधारिणे नमः ॥ ८४॥

svastikajāmbvaṣṭakoṇordhvarekhādhāriṇe namaḥ |dhanustrikoṇakalaśā'rdhacandradhāriṇe namaḥ || 84||

गोष्पदव्योममत्स्यादिधारिणे पत्तले नमः ।दक्षपाणौ ध्वजचक्रधनुस्त्रिशूलस्वस्तिकाः ॥ ८५॥

goṣpadavyomamatsyādidhāriṇe pattale namaḥ |dakṣapāṇau dhvajacakradhanustriśūlasvastikāḥ || 85||

मीनदण्डयवरेखा यस्य तस्मै नमो नमः ।बाहू नेत्रे जानुनी च नासिका च स्तनान्तरम् ॥ ८६॥

mīnadaṇḍayavarekhā yasya tasmai namo namaḥ |bāhū netre jānunī ca nāsikā ca stanāntaram || 86||

दीर्घाणि सन्ति ते पञ्च तस्मै कृष्णाय ते नमः ।सुहृस्वजघनपृष्ठग्रीवाजङ्घावते नमः ॥ ८७॥

dīrghāṇi santi te pañca tasmai kṛṣṇāya te namaḥ |suhṛsvajaghanapṛṣṭhagrīvājaṅghāvate namaḥ || 87||

सूक्ष्मकेशाऽङ्गुलिपर्वरदाऽस्थिधारिणे नमः ।कक्षा कुक्षिश्च वक्षश्च घ्राणं स्कन्धो ललाटकम् ॥ ८८॥

sūkṣmakeśā'ṅguliparvaradā'sthidhāriṇe namaḥ |kakṣā kukṣiśca vakṣaśca ghrāṇaṃ skandho lalāṭakam || 88||

यस्योन्नतानि षट् सन्ति तस्मै श्रीहरये नमः ।नेत्रप्रान्तौ नखास्तालु जिह्वोष्ठौ पादयोस्तले ॥ ८९॥

yasyonnatāni ṣaṭ santi tasmai śrīharaye namaḥ |netraprāntau nakhāstālu jihvoṣṭhau pādayostale || 89||

पाणितले च रक्तानि यस्य सन्ति च ते नमः ।उरः शिरो ललाटं च यस्य ततानि ते नमः ॥ ९०॥

pāṇitale ca raktāni yasya santi ca te namaḥ |uraḥ śiro lalāṭaṃ ca yasya tatāni te namaḥ || 90||

स्वरः सत्त्वं च नाभिश्च गम्भीरं यस्य ते नमः ।वामसक्थ्नि रमाचिह्नं यस्यास्ति ते नमो नमः ॥ ९१॥

svaraḥ sattvaṃ ca nābhiśca gambhīraṃ yasya te namaḥ |vāmasakthni ramācihnaṃ yasyāsti te namo namaḥ || 91||

हृदये दक्षिणावर्तवते कृष्णाय ते नमः ।सत्रिवलयशोभाढ्यनाभियुक्ताय ते नमः ॥ ९२॥

hṛdaye dakṣiṇāvartavate kṛṣṇāya te namaḥ |satrivalayaśobhāḍhyanābhiyuktāya te namaḥ || 92||

शीतभास्वररूपायाऽमृतप्रदाय ते नमः ।अक्षरायाऽव्याकृतनाम्ने गोलोकाय ते नमः ॥ ९३॥

śītabhāsvararūpāyā'mṛtapradāya te namaḥ |akṣarāyā'vyākṛtanāmne golokāya te namaḥ || 93||

वैकुण्ठाय बद्रीशाय श्वेतद्वीपाय ते नमः ।क्षीरस्थानाय जीवाय जीवातवे च ते नमः ॥ ९४॥

vaikuṇṭhāya badrīśāya śvetadvīpāya te namaḥ |kṣīrasthānāya jīvāya jīvātave ca te namaḥ || 94||

आत्मने च तदात्मने सर्वात्मने नमो नमः ।वह्निस्थाय रविस्थाय हिरण्यस्थाय ते नमः ॥ ९५॥

ātmane ca tadātmane sarvātmane namo namaḥ |vahnisthāya ravisthāya hiraṇyasthāya te namaḥ || 95||

सुराऽसुरनिवासाय भक्तार्तिहारिणे नमः ।अपक्षाय विपक्षाय भक्तपक्षाय ते नमः ॥ ९६॥

surā'suranivāsāya bhaktārtihāriṇe namaḥ |apakṣāya vipakṣāya bhaktapakṣāya te namaḥ || 96||

भगवँस्ते कथाधाम्ने वार्ताधाम्ने च ते नमः ।सर्वविद्यानिवासाय ब्रह्मणे ते नमो नमः ॥ ९७॥

bhagavam̐ste kathādhāmne vārtādhāmne ca te namaḥ |sarvavidyānivāsāya brahmaṇe te namo namaḥ || 97||

भगवन् देवदेवेश पाहि नः शरणागतान् ।जलन्धरेण वै स्वर्गं निराकृत्य सुराँस्ततः ॥ ९८॥

bhagavan devadeveśa pāhi naḥ śaraṇāgatān |jalandhareṇa vai svargaṃ nirākṛtya surām̐stataḥ || 98||

स्वायत्तीकृतमेवेति कथं त्वं सहसे प्रभो ।सूर्यश्चन्द्रश्च वह्निश्च शेषो धर्मो निराकृताः ॥ ९९॥

svāyattīkṛtameveti kathaṃ tvaṃ sahase prabho |sūryaścandraśca vahniśca śeṣo dharmo nirākṛtāḥ || 99||

शरणं ते वयं प्राप्ता वधस्तस्य विचिन्त्यताम् ।वयं क्षुद्रा इव नाथ विचरामोऽटवीस्थलम् ॥ १००॥

śaraṇaṃ te vayaṃ prāptā vadhastasya vicintyatām |vayaṃ kṣudrā iva nātha vicarāmo'ṭavīsthalam || 100||

इति श्रीलक्ष्मीनारायणीयसंहितायां प्रथमे कृतयुगसन्ताने ३२५अध्यायान्तर्गतंदेवादिभिः कृतं विष्णुस्तोत्रं सम्पूर्णम् ।लक्ष्मीनारायणीयसंहिता । खण्ड १। अध्याय ३२५/७३१००॥लक्ष्मीनारायणीयसंहिता । खण्ड १। अध्याय ३२५/७३-१००॥

iti śrīlakṣmīnārāyaṇīyasaṃhitāyāṃ prathame kṛtayugasantāne 325adhyāyāntargataṃdevādibhiḥ kṛtaṃ viṣṇustotraṃ sampūrṇam |lakṣmīnārāyaṇīyasaṃhitā | khaṇḍa 1| adhyāya 325/73100||lakṣmīnārāyaṇīyasaṃhitā | khaṇḍa 1| adhyāya 325/73-100||