वेङ्कटेशविजयार्यासप्तविभक्तिस्तोत्रम् Shri Venkateshavijayaryasaptavibhaktistotram

श्रीवेङ्कटाद्रिधामा भूमा भूमाप्रियः कृपासीमा ।निरवधिकनित्यमहिमा भवतु जयी प्रणतदर्शितप्रेमा ॥ १॥

śrīveṅkaṭādridhāmā bhūmā bhūmāpriyaḥ kṛpāsīmā |niravadhikanityamahimā bhavatu jayī praṇatadarśitapremā || 1||

जय जनता विमळीकृतिसफलीकृतसकलमङ्गलाकार ।विजयी भव विजयी भव विजयी भव वेङ्कटाचलाधीश ॥ २॥

jaya janatā vimaḷīkṛtisaphalīkṛtasakalamaṅgalākāra |vijayī bhava vijayī bhava vijayī bhava veṅkaṭācalādhīśa || 2||

कनीयमन्दहसितं कञ्चन कन्दर्पकोटिलावण्यम् ।पश्येयमञ्जनाद्रौ पुंसां पूर्वतनपुण्यपरिपाकम् ॥ ३॥

kanīyamandahasitaṃ kañcana kandarpakoṭilāvaṇyam |paśyeyamañjanādrau puṃsāṃ pūrvatanapuṇyaparipākam || 3||

मरतकमेचकरुचिना मदनाज्ञागन्धिमध्यहृदयेन ।वृषशैलमौलिसुहृदा महसा केनापि वासितं ज्ञेयम् ॥ ४॥

maratakamecakarucinā madanājñāgandhimadhyahṛdayena |vṛṣaśailamaulisuhṛdā mahasā kenāpi vāsitaṃ jñeyam || 4||

पत्यै नमो वृषाद्रेः करयुगपरिकर्मशङ्खचक्राय ।इतरकरकमलयुगलीदर्शितकटिबन्धदानमुद्राय ॥ ५॥

patyai namo vṛṣādreḥ karayugaparikarmaśaṅkhacakrāya |itarakarakamalayugalīdarśitakaṭibandhadānamudrāya || 5||

साम्राज्यपिशुनमकुटीसुघटललाटात् सुमङ्गला पाङ्गात् ।स्मितरुचिफुल्लकपोलादपरो न परोऽस्ति वेङ्कटाद्रीशात् ॥ ६॥

sāmrājyapiśunamakuṭīsughaṭalalāṭāt sumaṅgalā pāṅgāt |smitaruciphullakapolādaparo na paro'sti veṅkaṭādrīśāt || 6||

सर्वाभरणविभूषितदिव्यावयवस्य वेङ्कटाद्रिपतेः ।पल्लवपुष्पविभूषितकल्पतरोश्चापि का भिदा दृष्टा ॥ ७॥

sarvābharaṇavibhūṣitadivyāvayavasya veṅkaṭādripateḥ |pallavapuṣpavibhūṣitakalpataroścāpi kā bhidā dṛṣṭā || 7||

लक्ष्मीललितपदाम्बुजलाक्षारसरञ्जितायतोरस्के ।श्रीवेङ्कटाद्रिनाथे नाथे मम नित्यमर्पितो भारः ॥ ८॥

lakṣmīlalitapadāmbujalākṣārasarañjitāyatoraske |śrīveṅkaṭādrināthe nāthe mama nityamarpito bhāraḥ || 8||

आर्यावृत्तसमेता सप्तविभक्तिर्वृषाद्रिनाथस्य ।वादीन्द्रभीकृदाख्यैरार्यै रचिता जयत्वियं सततम् ॥ ९॥

āryāvṛttasametā saptavibhaktirvṛṣādrināthasya |vādīndrabhīkṛdākhyairāryai racitā jayatviyaṃ satatam || 9||

॥ इति श्रीवेङ्कटेशविजयार्यासप्तविभक्तिस्तोत्रं संपूर्णम् ॥

|| iti śrīveṅkaṭeśavijayāryāsaptavibhaktistotraṃ saṃpūrṇam ||