तुलसीकवचम् १ Tulasi Kavacham 1

श्रीगणेशाय नमः ।अस्य श्रीतुलसीकवचस्तोत्रमन्त्रस्य श्रीमहादेव ऋषिः ।अनुष्टुप्छन्दः । श्रीतुलसी देवता ।मम ईप्सितकामनासिद्ध्यर्थं जपे विनियोगः ।तुलसी श्रीमहादेवि नमः पङ्कजधारिणि ।शिरो मे तुलसी पातु भालं पातु यशस्विनी ॥ १॥

śrīgaṇeśāya namaḥ |asya śrītulasīkavacastotramantrasya śrīmahādeva ṛṣiḥ |anuṣṭupchandaḥ | śrītulasī devatā |mama īpsitakāmanāsiddhyarthaṃ jape viniyogaḥ |tulasī śrīmahādevi namaḥ paṅkajadhāriṇi |śiro me tulasī pātu bhālaṃ pātu yaśasvinī || 1||

दृशौ मे पद्मनयना श्रीसखी श्रवणे मम ।घ्राणं पातु सुगन्धा मे मुखं च सुमुखी मम ॥ २॥

dṛśau me padmanayanā śrīsakhī śravaṇe mama |ghrāṇaṃ pātu sugandhā me mukhaṃ ca sumukhī mama || 2||

जिह्वां मे पातु शुभदा कण्ठं विद्यामयी मम ।स्कन्धौ कह्लारिणी पातु हृदयं विष्णुवल्लभा ॥ ३॥

jihvāṃ me pātu śubhadā kaṇṭhaṃ vidyāmayī mama |skandhau kahlāriṇī pātu hṛdayaṃ viṣṇuvallabhā || 3||

पुण्यदा मे पातु मध्यं नाभिं सौभाग्यदायिनी ।कटिं कुण्डलिनिं पातु ऊरू नारदवन्दिता ॥ ४॥

puṇyadā me pātu madhyaṃ nābhiṃ saubhāgyadāyinī |kaṭiṃ kuṇḍaliniṃ pātu ūrū nāradavanditā || 4||

जननी जानुनी पातु जङ्घे सकलवन्दिता ।नारायणप्रिया पादौ सर्वाङ्गं सर्वरक्षिणी ॥ ५॥

jananī jānunī pātu jaṅghe sakalavanditā |nārāyaṇapriyā pādau sarvāṅgaṃ sarvarakṣiṇī || 5||

सङ्कटे विषमे दुर्गे भये वादे महाहवे ।नित्यं हि सन्ध्ययोः पातु तुलसी सर्वतः सदा ॥ ६॥

saṅkaṭe viṣame durge bhaye vāde mahāhave |nityaṃ hi sandhyayoḥ pātu tulasī sarvataḥ sadā || 6||

इतीदं परमं गुह्यं तुलस्याः कवचामृतम् ।मर्त्यानाममृतार्थाय भीतानामभयाय च ॥ ७॥

itīdaṃ paramaṃ guhyaṃ tulasyāḥ kavacāmṛtam |martyānāmamṛtārthāya bhītānāmabhayāya ca || 7||

मोक्षाय च मुमुक्षूणां ध्यायिनां ध्यानयोगकृत् ।वशाय वश्यकामानां विद्यायै वेदवादिनाम् ॥ ८॥

mokṣāya ca mumukṣūṇāṃ dhyāyināṃ dhyānayogakṛt |vaśāya vaśyakāmānāṃ vidyāyai vedavādinām || 8||

द्रविणाय दरिद्राणां पापिनां पापशान्तये ॥ ९॥

draviṇāya daridrāṇāṃ pāpināṃ pāpaśāntaye || 9||

अन्नाय क्षुधितानां च स्वर्गाय स्वर्गमिच्छिताम् ।पशव्यं पशुकामानां पुत्रदं पुत्रकाङ्क्षिणाम् ॥ १०॥

annāya kṣudhitānāṃ ca svargāya svargamicchitām |paśavyaṃ paśukāmānāṃ putradaṃ putrakāṅkṣiṇām || 10||

राज्याय भ्रष्टराज्यानामशान्तानां च शान्तये ।भक्त्यर्थं विष्णुभक्तानां विष्णौ सर्वान्तरात्मनि ॥ ११॥

rājyāya bhraṣṭarājyānāmaśāntānāṃ ca śāntaye |bhaktyarthaṃ viṣṇubhaktānāṃ viṣṇau sarvāntarātmani || 11||

जाप्यं त्रिवर्गसिद्ध्यर्थं गृहस्थेन विशेषतः ।उद्यन्तं चण्डकिरणमुपस्थाय कृताञ्जलिः ॥ १२॥

jāpyaṃ trivargasiddhyarthaṃ gṛhasthena viśeṣataḥ |udyantaṃ caṇḍakiraṇamupasthāya kṛtāñjaliḥ || 12||

तुलसीकानने तिष्ठन्नासीनो वा जपेदिदम् ।सर्वान्कामानवाप्नोति तथैव मम सन्निधिम् ॥ १३॥

tulasīkānane tiṣṭhannāsīno vā japedidam |sarvānkāmānavāpnoti tathaiva mama sannidhim || 13||

मम प्रियकरं नित्यं हरिभक्तिविवर्धनम् ।या स्यान्मृतप्रजा नारी तस्या अङ्गं प्रमार्जयेत् ॥ १४॥

mama priyakaraṃ nityaṃ haribhaktivivardhanam |yā syānmṛtaprajā nārī tasyā aṅgaṃ pramārjayet || 14||

सा पुत्रं लभते दीर्घजीविनं चाप्यरोगिणम् ।वन्ध्याया मार्जयेदङ्गं कुशैर्मन्त्रेण साधकः ॥ १५॥

sā putraṃ labhate dīrghajīvinaṃ cāpyarogiṇam |vandhyāyā mārjayedaṅgaṃ kuśairmantreṇa sādhakaḥ || 15||

साऽपि संवत्सरादेव गर्भं धत्ते मनोहरम् ।अश्वत्थे राजवश्यार्थी जपेदग्नेः सुरूपभाक् ॥ १६॥

sā'pi saṃvatsarādeva garbhaṃ dhatte manoharam |aśvatthe rājavaśyārthī japedagneḥ surūpabhāk || 16||

पलाशमूले विद्यार्थी तेजोऽर्थ्यभिमुखो रवेः ।कन्यार्थी चण्डिकागेहे शत्रुहत्यै गृहे मम ॥ १७॥

palāśamūle vidyārthī tejo'rthyabhimukho raveḥ |kanyārthī caṇḍikāgehe śatruhatyai gṛhe mama || 17||

श्रीकामो विष्णुगेहे च उद्याने स्त्रीवशा भवेत् ।किमत्र बहुनोक्तेन शृणु सैन्येश तत्त्वतः ॥ १८॥

śrīkāmo viṣṇugehe ca udyāne strīvaśā bhavet |kimatra bahunoktena śṛṇu sainyeśa tattvataḥ || 18||

यं यं काममभिध्यायेत्तं तं प्राप्नोत्यसंशयम् ।मम गेहगतस्त्वं तु तारकस्य वधेच्छया ॥ १९॥

yaṃ yaṃ kāmamabhidhyāyettaṃ taṃ prāpnotyasaṃśayam |mama gehagatastvaṃ tu tārakasya vadhecchayā || 19||

जपन् स्तोत्रं च कवचं तुलसीगतमानसः ।मण्डलात्तारकं हन्ता भविष्यसि न संशयः ॥ २०॥

japan stotraṃ ca kavacaṃ tulasīgatamānasaḥ |maṇḍalāttārakaṃ hantā bhaviṣyasi na saṃśayaḥ || 20||

इति श्रीब्रह्माण्डपुराणे तुलसीमाहात्म्ये तुलसीकवचं सम्पूर्णम् ॥

iti śrībrahmāṇḍapurāṇe tulasīmāhātmye tulasīkavacaṃ sampūrṇam ||