विद्यार्यास्तोत्रम् Shri Vidyarya Stotram

ॐ श्रीगणेशाय नमः ।कामितकल्पतरुभ्यः कुर्मः प्रणतिं कुमारनामभ्यः ।कुलगिरिजाकुतुकेभ्यः केभ्यश्चित्केकिराजकेतुभ्यः ॥ १॥

oṃ śrīgaṇeśāya namaḥ |kāmitakalpatarubhyaḥ kurmaḥ praṇatiṃ kumāranāmabhyaḥ |kulagirijākutukebhyaḥ kebhyaścitkekirājaketubhyaḥ || 1||

अस्तु मनस्तुष्टयै मे वस्तु मुनिस्तुत्यमस्तमिततूस्तम् ।ध्वस्तसमस्तसपत्नं हस्तलसच्छक्ति निस्तुलैश्वर्यम् ॥ २॥

astu manastuṣṭayai me vastu munistutyamastamitatūstam |dhvastasamastasapatnaṃ hastalasacchakti nistulaiśvaryam || 2||

एकं प्रशमितशोकं श्रीकण्ठस्याश्रये त्रियं तोकम् ।आकम्पितरिपुलोकं मा कञ्चन लेखमन्यमविवेकम् ॥ ३॥

ekaṃ praśamitaśokaṃ śrīkaṇṭhasyāśraye triyaṃ tokam |ākampitaripulokaṃ mā kañcana lekhamanyamavivekam || 3||

ईक्षामहे कदाग्रे साक्षाल्लाक्षाझरीसदृक्षाभम् ।रूक्षासुरकुलशिक्षादीक्षाधरमक्षयोक्षरथभाग्यम् । ४॥

īkṣāmahe kadāgre sākṣāllākṣājharīsadṛkṣābham |rūkṣāsurakulaśikṣādīkṣādharamakṣayokṣarathabhāgyam | 4||

लम्बोदरसहजेभ्यो बिम्बोकेभ्यो ब्रुवे नमोवाकम् ।बिम्बोपमाधरेभ्यः कम्बोरातङ्कदायिकण्ठेभ्यः ॥ ५॥

lambodarasahajebhyo bimbokebhyo bruve namovākam |bimbopamādharebhyaḥ kamborātaṅkadāyikaṇṭhebhyaḥ || 5||

अर्भकमद्भुतमेकं निर्भरमन्तर्भजामि भव्यार्थम् ।यो हि गिरीशात्मभवो भजति गिरीशात्मजात्मभवभावम् ॥ ६॥

arbhakamadbhutamekaṃ nirbharamantarbhajāmi bhavyārtham |yo hi girīśātmabhavo bhajati girīśātmajātmabhavabhāvam || 6||

हन्त निरन्तरमन्तः सन्तनु देवं तमापदन्तकरम् ।किं तपसान्येन फलं चिन्तयतामन्तकान्तकतनूजम् ॥ ७॥

hanta nirantaramantaḥ santanu devaṃ tamāpadantakaram |kiṃ tapasānyena phalaṃ cintayatāmantakāntakatanūjam || 7||

राकाशशधरसुषमानीकाशमृदुस्मितार्द्रमुखकमलम् ।श्रीकान्तभागिनेयं शोकान्तकरं भजेऽहमेकान्तम् ॥ ८॥

rākāśaśadharasuṣamānīkāśamṛdusmitārdramukhakamalam |śrīkāntabhāgineyaṃ śokāntakaraṃ bhaje'hamekāntam || 8||

ईडे हृतभवपाशं सुरपृतनेशं कृतासुरविनाशम् ।उद्धतराजसदेशं वेशं वेशं वृथैवमानेशम् ॥ ९॥

īḍe hṛtabhavapāśaṃ surapṛtaneśaṃ kṛtāsuravināśam |uddhatarājasadeśaṃ veśaṃ veśaṃ vṛthaivamāneśam || 9||

मनसा वचसा शिरसा चिन्तय सङ्कीर्तयानम कुमारम् ।झटिति स विमतान्हत्वा भगवान्कुर्यादभीष्टघटनां ते ॥ १०॥

manasā vacasā śirasā cintaya saṅkīrtayānama kumāram |jhaṭiti sa vimatānhatvā bhagavānkuryādabhīṣṭaghaṭanāṃ te || 10||

हरिहयमुख्यसुराणामरिभयशान्तिप्रदाननिष्णातः ।गिरितनयाऽऽत्मभवो मां भरितदयापाङ्गगोचरीकुर्यात् । ११।

harihayamukhyasurāṇāmaribhayaśāntipradānaniṣṇātaḥ |giritanayā''tmabhavo māṃ bharitadayāpāṅgagocarīkuryāt | 11|

अभिमतफलदो देवैरभिनुतमहिमा ममास्तु स कुमारः ।यस्य शिखी जिष्णुर्भजति प्रकृतित्वमपि च पत्रत्वम् ॥ १२॥

abhimataphalado devairabhinutamahimā mamāstu sa kumāraḥ |yasya śikhī jiṣṇurbhajati prakṛtitvamapi ca patratvam || 12||

स जयति विचित्रचरित्रः शाक्तीकाग्रेसरो महावीरः ।शंसन्ति यं महान्तः पुत्रं च पतिं च देववाहिन्याः ॥ १३॥

sa jayati vicitracaritraḥ śāktīkāgresaro mahāvīraḥ |śaṃsanti yaṃ mahāntaḥ putraṃ ca patiṃ ca devavāhinyāḥ || 13||

अमरनिरामयकन्दं समरपराभृतशक्ररिपुवृन्दम् ।भ्रमरमिवाध्यरविन्दं श्रमरहितं कुरुत चेतसि स्कन्दम् ॥ १४॥

amaranirāmayakandaṃ samaraparābhṛtaśakraripuvṛndam |bhramaramivādhyaravindaṃ śramarahitaṃ kuruta cetasi skandam || 14||

काञ्चन कौतुकलहरीं क्रौञ्चनगच्छेदिनीं पनीपद्ये ।काञ्चनमणिगणविलसत्काञ्चिकया लाञ्छितामलदुकूलाम् ॥ १५॥

kāñcana kautukalaharīṃ krauñcanagacchedinīṃ panīpadye |kāñcanamaṇigaṇavilasatkāñcikayā lāñchitāmaladukūlām || 15||

अवलोकयेऽन्तरनिशं शिवलोकस्यैकमुज्ज्वलाभरणम् ।नवलोहितप्रकाशं भवलोपविधाननिपुणमग्निभुवम् ॥ १६॥

avalokaye'ntaraniśaṃ śivalokasyaikamujjvalābharaṇam |navalohitaprakāśaṃ bhavalopavidhānanipuṇamagnibhuvam || 16||

हरतु रिपूनस्माकं शरवणजो भवतु चेष्टसङ्घटकः ।हरतु हिमाचलतनयानिरतिशयप्रेमरत्नसम्पुटकः । १७।

haratu ripūnasmākaṃ śaravaṇajo bhavatu ceṣṭasaṅghaṭakaḥ |haratu himācalatanayāniratiśayapremaratnasampuṭakaḥ | 17|

अरुणं निरवधिकरुणं शरणागतरक्षणे सजागरणम् ।शरणं भजामि तरुणं हरिणाङ्काभरणहार्दपरिणामम् ॥ १८॥

aruṇaṃ niravadhikaruṇaṃ śaraṇāgatarakṣaṇe sajāgaraṇam |śaraṇaṃ bhajāmi taruṇaṃ hariṇāṅkābharaṇahārdapariṇāmam || 18||

ललिते वल्लीमिलिते लीयेमहि महसि बाहुलेयाख्ये ।एकं यदपादानीचक्रे प्रकृतीस्तु षडपि जनिकर्तृ । १९॥

lalite vallīmilite līyemahi mahasi bāhuleyākhye |ekaṃ yadapādānīcakre prakṛtīstu ṣaḍapi janikartṛ | 19||

अरविन्दवैरिवदनं कुरुविन्दमदापहाररदनम् ।शरदिन्दीवरनयनं स्मर वृन्दारकविरोधिनिर्मथनम् ॥ २०।

aravindavairivadanaṃ kuruvindamadāpahāraradanam |śaradindīvaranayanaṃ smara vṛndārakavirodhinirmathanam || 20|

हस्ते यस्य सदाऽऽस्ते शक्तिर्या काचिदप्रतिमशक्तिः ।भूभृद्भेदनचुञ्चुस्तं चुम्बतु मानसं चिराय मम । २१।

haste yasya sadā''ste śaktiryā kācidapratimaśaktiḥ |bhūbhṛdbhedanacuñcustaṃ cumbatu mānasaṃ cirāya mama | 21|

रमणीयाननषट्कं रभसविदीर्णासुरोत्करपृषत्कम् ।भजतानतभरणोत्कं भगवन्तं कार्तिकेयमपकलकम् ॥ २२॥

ramaṇīyānanaṣaṭkaṃ rabhasavidīrṇāsurotkarapṛṣatkam |bhajatānatabharaṇotkaṃ bhagavantaṃ kārtikeyamapakalakam || 22||

ईशानात्मजमीडे क्लेशानन्तं नयेत्स मम सर्वान् ।बन्धूकाभः सायंसन्ध्यासमयो यथातपोद्गारान् ॥ २३॥

īśānātmajamīḍe kleśānantaṃ nayetsa mama sarvān |bandhūkābhaḥ sāyaṃsandhyāsamayo yathātapodgārān || 23||

मन्मथमथनतनूजे मन्मनसो रतिरनारतं भवतु ।उन्मदखलजनभयदे सन्मतिराजीविनीदिनाधीशे ॥ २४॥

manmathamathanatanūje manmanaso ratiranārataṃ bhavatu |unmadakhalajanabhayade sanmatirājīvinīdinādhīśe || 24||

सहसा निहतसपत्ना महसां निधयो महामहानन्दाः ।इह साम्राज्यमखण्डं गुह सानतयो जनाःप्रपद्यन्ते ॥ २५॥

sahasā nihatasapatnā mahasāṃ nidhayo mahāmahānandāḥ |iha sāmrājyamakhaṇḍaṃ guha sānatayo janāḥprapadyante || 25||

अङ्गानम गाङ्गयं भङ्गाकटभङ्गदायकाङ्गाभम् ।भृङ्गाभिरामकेशं शृङ्गाराद्वैतचारुमुखचन्द्रम् ॥ २६॥

aṅgānama gāṅgayaṃ bhaṅgākaṭabhaṅgadāyakāṅgābham |bhṛṅgābhirāmakeśaṃ śṛṅgārādvaitacārumukhacandram || 26||

कलये कपालिपुत्रं करुणापात्रं कलापिवरपत्रम् ।कलिमलदारुलवित्रं कमलसुनेत्रं कलाधरसुवक्त्रम् ॥ २७॥

kalaye kapāliputraṃ karuṇāpātraṃ kalāpivarapatram |kalimaladārulavitraṃ kamalasunetraṃ kalādharasuvaktram || 27||

अस्मि निलीये तस्मिन् सुस्मितमुखसारसे सुराभयदे ।असुरसमूहासुरसप्रसृमरतर्षप्रचण्डभुजभुजगे ॥ २८॥

asmi nilīye tasmin susmitamukhasārase surābhayade |asurasamūhāsurasaprasṛmaratarṣapracaṇḍabhujabhujage || 28||

लोकोत्तरमवलोके लोहितरुचि मनसि किमपि तद्धाम ।शोकोत्तरलोऽपि जनो यत्स्मृतिमात्रेण भवति निर्वृतधीः ॥ २९॥

lokottaramavaloke lohitaruci manasi kimapi taddhāma |śokottaralo'pi jano yatsmṛtimātreṇa bhavati nirvṛtadhīḥ || 29||

अनुपमसुषमशरीरं भजत कुमारं भवस्य सुकुमारम् ।दनुजविनाशविहारं जलधिगभीरं जगद्धितविचारम् । ३०।

anupamasuṣamaśarīraṃ bhajata kumāraṃ bhavasya sukumāram |danujavināśavihāraṃ jaladhigabhīraṃ jagaddhitavicāram | 30|

हतविमतावितलेखे निटिलतटश्रीनिरस्तशशिलेखे ।मम रतिरस्तु विशाखे शमलतमस्समुदयाहिममयूखे । ३१।

hatavimatāvitalekhe niṭilataṭaśrīnirastaśaśilekhe |mama ratirastu viśākhe śamalatamassamudayāhimamayūkhe | 31|

रे मानस विसृजेमां सीमां शोकस्य तावदुद्दामाम् ।कौमारं स्मर चरणं भूमानं भज सुखस्य चामानम् । ३२।

re mānasa visṛjemāṃ sīmāṃ śokasya tāvaduddāmām |kaumāraṃ smara caraṇaṃ bhūmānaṃ bhaja sukhasya cāmānam | 32|

ईशात्पितुरतिशयितं पञ्चमुखात्षण्मुखं नमस्कुर्मः ।योऽयमधःकुर्वाणो जयतितरां नीलकण्ठमुरगभुजम् ॥ ३३॥

īśātpituratiśayitaṃ pañcamukhātṣaṇmukhaṃ namaskurmaḥ |yo'yamadhaḥkurvāṇo jayatitarāṃ nīlakaṇṭhamuragabhujam || 33||

महितदयाभरितमतिं विहितनतानन्दममितवीर्यनिधिम् ।विमथितविमतसमूहं नमत महात्रिपुरसुन्दरीसूनुम् ॥ ३४॥

mahitadayābharitamatiṃ vihitanatānandamamitavīryanidhim |vimathitavimatasamūhaṃ namata mahātripurasundarīsūnum || 34||

इति श्रीविद्यार्यास्तोत्रं सम्पूर्णम् ।

iti śrīvidyāryāstotraṃ sampūrṇam |