शिवस्तोत्रम् (उपमन्युप्रोक्तं शिवपुराणान्तर्गतम् स्तोत्रं वक्ष्यामि ते कृष्ण पञ्चावरणमार्गतः) Upamanyuproktam Shiva Stotram

उपमन्युरुवाच ।स्तोत्रं वक्ष्यामि ते कृष्ण पञ्चावरणमार्गतः ।योगेश्वरमिदं पुण्यं कर्म येन समाप्यते ॥ १॥

upamanyuruvāca |stotraṃ vakṣyāmi te kṛṣṇa pañcāvaraṇamārgataḥ |yogeśvaramidaṃ puṇyaṃ karma yena samāpyate || 1||

जय जय जगदेकनाथ शम्भो प्रकृतिमनोहर नित्यचित्स्वभाव ।अतिगतकलुषप्रपञ्चवाचामपि मनसां पदवीमतीततत्त्वम् ॥ २॥

jaya jaya jagadekanātha śambho prakṛtimanohara nityacitsvabhāva |atigatakaluṣaprapañcavācāmapi manasāṃ padavīmatītatattvam || 2||

स्वभावनिर्मलाभोग जय सुन्दरचेष्टित ।स्वात्मतुल्यमहाशक्ते जय शुद्धगुणार्णव ॥ ३॥

svabhāvanirmalābhoga jaya sundaraceṣṭita |svātmatulyamahāśakte jaya śuddhaguṇārṇava || 3||

अनन्तकान्तिसम्पन्न जयासदृशविग्रह ।अतर्क्यमहिमाधार जयानाकुलमङ्गल ॥ ४॥

anantakāntisampanna jayāsadṛśavigraha |atarkyamahimādhāra jayānākulamaṅgala || 4||

निरञ्जन निराधार जय निष्कारणोदय ।निरन्तरपरानन्द जय निर्वृतिकारण ॥ ५॥

nirañjana nirādhāra jaya niṣkāraṇodaya |nirantaraparānanda jaya nirvṛtikāraṇa || 5||

जयातिपरमैश्वर्य जयातिकरुणास्पद ।जय स्वतन्त्रसर्वस्व जयासदृशवैभव ॥ ६॥

jayātiparamaiśvarya jayātikaruṇāspada |jaya svatantrasarvasva jayāsadṛśavaibhava || 6||

जयावृतमहाविश्व जयानावृत केनचित् ।जयोत्तर समस्तस्य जयात्यन्तनिरुत्तर ॥ ७॥

jayāvṛtamahāviśva jayānāvṛta kenacit |jayottara samastasya jayātyantaniruttara || 7||

जयाद्भुत जयाक्षुद्र जयाक्षत जयाव्यय ।जयामेय जयामाय जयाभाव जयामल ॥ ८॥

jayādbhuta jayākṣudra jayākṣata jayāvyaya |jayāmeya jayāmāya jayābhāva jayāmala || 8||

महाभुज महासार महागुण महाकथ ।महाबल महामाय महारस महारथ ॥ ९॥

mahābhuja mahāsāra mahāguṇa mahākatha |mahābala mahāmāya mahārasa mahāratha || 9||

नमः परमदेवाय नमः परमहेतवे ।नमश्शिवाय शान्ताय नमश्शिवतराय ते ॥ १०॥

namaḥ paramadevāya namaḥ paramahetave |namaśśivāya śāntāya namaśśivatarāya te || 10||

त्वदधीनमिदं कृत्स्नं जगद्धि ससुरासुरम् ।अतस्त्वद्विहितामाज्ञां क्षमते कोऽतिवर्तितुम् ॥ १२॥

tvadadhīnamidaṃ kṛtsnaṃ jagaddhi sasurāsuram |atastvadvihitāmājñāṃ kṣamate ko'tivartitum || 12||

अयं पुनर्जनो नित्यं भवदेकसमाश्रयः ।भवानतोऽनुगृह्यास्मै प्रार्थितं सम्प्रयच्छतु ॥ १३॥

ayaṃ punarjano nityaṃ bhavadekasamāśrayaḥ |bhavānato'nugṛhyāsmai prārthitaṃ samprayacchatu || 13||

जयाम्बिके जगन्मातर्जय सर्वजगन्मयि ।जयानवधिकैश्वर्ये जयानुपमविग्रहे ॥ १४॥

jayāmbike jaganmātarjaya sarvajaganmayi |jayānavadhikaiśvarye jayānupamavigrahe || 14||

जय वाङ्मनसातीते जयाचिद्ध्वान्तभञ्जिके ।जय जन्मजराहीने जय कालोत्तरोत्तरे ॥ १५॥

jaya vāṅmanasātīte jayāciddhvāntabhañjike |jaya janmajarāhīne jaya kālottarottare || 15||

जयानेकविधानस्थे जय विश्वेश्वरप्रिये ।जय विश्वसुराराध्ये जय विश्वविजृम्भिणि ॥ १६॥

jayānekavidhānasthe jaya viśveśvarapriye |jaya viśvasurārādhye jaya viśvavijṛmbhiṇi || 16||

जय मङ्गलदिव्याङ्गि जय मङ्गलदीपिके ।जय मङ्गलचारित्रे जय मङ्गलदायिनि ॥ १७॥

jaya maṅgaladivyāṅgi jaya maṅgaladīpike |jaya maṅgalacāritre jaya maṅgaladāyini || 17||

नमः परमकल्याणगुणसञ्चयमूर्तये ।त्वत्तः खलु समुत्पन्नं जगत्त्वय्येव लीयते ॥ १८॥

namaḥ paramakalyāṇaguṇasañcayamūrtaye |tvattaḥ khalu samutpannaṃ jagattvayyeva līyate || 18||

त्वद्विनातः फलं दातुमीश्वरोऽपि न शक्नुयात् ।जन्मप्रभृति देवेशि जनोऽयं त्वदुपाश्रितः ॥ १९॥

tvadvinātaḥ phalaṃ dātumīśvaro'pi na śaknuyāt |janmaprabhṛti deveśi jano'yaṃ tvadupāśritaḥ || 19||

अतोऽस्य तव भक्तस्य निर्वर्तय मनोरथम् ।पञ्चवक्त्रो दशभुजः शुद्धस्फटिकसन्निभः ॥ २०॥

ato'sya tava bhaktasya nirvartaya manoratham |pañcavaktro daśabhujaḥ śuddhasphaṭikasannibhaḥ || 20||

वर्णब्रह्मकलादेहो देवस्सकलनिष्कलः ।शिवभक्तिसमारूढः शान्त्यतीतस्सदाशिवः ॥ २१॥

varṇabrahmakalādeho devassakalaniṣkalaḥ |śivabhaktisamārūḍhaḥ śāntyatītassadāśivaḥ || 21||

भक्त्या मयार्चितो मह्यं प्रार्थितं शं प्रयच्छतु ॥ २१॥

bhaktyā mayārcito mahyaṃ prārthitaṃ śaṃ prayacchatu || 21||

सदाशिवाङ्कमारूढा शक्तिरिच्छा शिवाह्वया ।जननी सर्वलोकानां प्रयच्छतु मनोरथम् ॥ २२॥

sadāśivāṅkamārūḍhā śaktiricchā śivāhvayā |jananī sarvalokānāṃ prayacchatu manoratham || 22||

शिवयोर्दयिता पुत्रौ देवौ हेरम्बषण्मुखौ ।शिवानुभावौ सर्वज्ञौ शिवज्ञानामृताशिनौ ॥ २३॥

śivayordayitā putrau devau herambaṣaṇmukhau |śivānubhāvau sarvajñau śivajñānāmṛtāśinau || 23||

तृप्तौ परस्परं स्निग्धौ शिवाभ्यां नित्यसत्कृतौ ।सत्कृतौ च सदा देवौ ब्रह्माद्यैस्त्रिदशैरपि ॥ २४॥

tṛptau parasparaṃ snigdhau śivābhyāṃ nityasatkṛtau |satkṛtau ca sadā devau brahmādyaistridaśairapi || 24||

सर्वलोकपरित्राणं कर्तुमभ्युदितौ सदा ।स्वेच्छावतारं कुर्वन्तौ स्वांशभेदैरनेकशः ॥ २५॥

sarvalokaparitrāṇaṃ kartumabhyuditau sadā |svecchāvatāraṃ kurvantau svāṃśabhedairanekaśaḥ || 25||

ताविमौ शिवयोः पार्श्वे नित्यमित्थं मयार्चितौ ।तयोराज्ञां पुरस्कृत्य प्रार्थितं मे प्रयच्छताम् ॥ २६॥

tāvimau śivayoḥ pārśve nityamitthaṃ mayārcitau |tayorājñāṃ puraskṛtya prārthitaṃ me prayacchatām || 26||

शुद्धस्फटिकसङ्काशमीशानाख्यं सदाशिवम् ।मूर्धाभिमानिनी मूर्तिः शिवस्य परमात्मनः ॥ २७॥

śuddhasphaṭikasaṅkāśamīśānākhyaṃ sadāśivam |mūrdhābhimāninī mūrtiḥ śivasya paramātmanaḥ || 27||

शिवार्चनरतं शान्तं शान्त्यतीतं मखास्थितम् ।पञ्चाक्षरान्तिमं बीजं कलाभिः पञ्चभिर्युतम् ॥ २८॥

śivārcanarataṃ śāntaṃ śāntyatītaṃ makhāsthitam |pañcākṣarāntimaṃ bījaṃ kalābhiḥ pañcabhiryutam || 28||

प्रथमावरणे पूर्वं शक्त्या सह समर्चितम् ।पवित्रं परमं ब्रह्म प्रार्थितं मे प्रयच्छतु ॥ २९॥

prathamāvaraṇe pūrvaṃ śaktyā saha samarcitam |pavitraṃ paramaṃ brahma prārthitaṃ me prayacchatu || 29||

बालसूर्यप्रतीकाशं पुरुषाख्यं पुरातनम् ।पूर्ववक्त्राभिमानं च शिवस्य परमेष्ठिनः ॥ ३०॥

bālasūryapratīkāśaṃ puruṣākhyaṃ purātanam |pūrvavaktrābhimānaṃ ca śivasya parameṣṭhinaḥ || 30||

शान्त्यात्मकं मरुत्संस्थं शम्भोः पादार्चने रतम् ।प्रथमं शिवबीजेषु कलासु च चतुष्कलम् ॥ ३१॥

śāntyātmakaṃ marutsaṃsthaṃ śambhoḥ pādārcane ratam |prathamaṃ śivabījeṣu kalāsu ca catuṣkalam || 31||

पूर्वभागे मया भक्त्या शक्त्या सह समर्चितम् ।पवित्रं परमं ब्रह्म प्रार्थितं मे प्रयच्छतु ॥ ३२॥

pūrvabhāge mayā bhaktyā śaktyā saha samarcitam |pavitraṃ paramaṃ brahma prārthitaṃ me prayacchatu || 32||

अञ्जनादिप्रतीकाशमघोरं घोरविग्रहम् ।देवस्य दक्षिणं वक्त्रं देवदेवपदार्चकम् ॥ ३३॥

añjanādipratīkāśamaghoraṃ ghoravigraham |devasya dakṣiṇaṃ vaktraṃ devadevapadārcakam || 33||

विद्यापादं समारूढं वह्निमण्डलमध्यगम् ।द्वितीयं शिवबीजेषु कलास्वष्टकलान्वितम् ॥ ३४॥

vidyāpādaṃ samārūḍhaṃ vahnimaṇḍalamadhyagam |dvitīyaṃ śivabījeṣu kalāsvaṣṭakalānvitam || 34||

शम्भोर्दक्षिणदिग्भागे शक्त्या सह समर्चितम् ।पवित्रं मध्यमं ब्रह्म प्रार्थितं मे प्रयच्छतु ॥ ३५॥

śambhordakṣiṇadigbhāge śaktyā saha samarcitam |pavitraṃ madhyamaṃ brahma prārthitaṃ me prayacchatu || 35||

कुङ्कुमक्षोदसङ्काशं वामाख्यं वरवेषधृक् ।वक्त्रमुत्तरमीशस्य प्रतिष्ठायां प्रतिष्ठितम् ॥ ३६॥

kuṅkumakṣodasaṅkāśaṃ vāmākhyaṃ varaveṣadhṛk |vaktramuttaramīśasya pratiṣṭhāyāṃ pratiṣṭhitam || 36||

वारिमण्डलमध्यस्थं महादेवार्चने रतम् ।तुरीयं शिवबीजेषु त्रयोदशकलान्वितम् ॥ ३७॥

vārimaṇḍalamadhyasthaṃ mahādevārcane ratam |turīyaṃ śivabījeṣu trayodaśakalānvitam || 37||

देवस्योत्तरदिग्भागे शक्त्या सह समर्चितम् ।पवित्रं परमं ब्रह्म प्रार्थितं मे प्रयच्छतु ॥ ३८॥

devasyottaradigbhāge śaktyā saha samarcitam |pavitraṃ paramaṃ brahma prārthitaṃ me prayacchatu || 38||

शङ्खकुन्देन्दुधवलं सन्ध्याख्यं सौम्यलक्षणम् ।शिवस्य पश्चिमं वक्त्रं शिवपादार्चने रतम् ॥ ३९॥

śaṅkhakundendudhavalaṃ sandhyākhyaṃ saumyalakṣaṇam |śivasya paścimaṃ vaktraṃ śivapādārcane ratam || 39||

निवृत्तिपदनिष्ठं च पृथिव्यां समवस्थितम् ।तृतीयं शिवबीजेषु कलाभिश्चाष्टभिर्युतम् ॥ ४०॥

nivṛttipadaniṣṭhaṃ ca pṛthivyāṃ samavasthitam |tṛtīyaṃ śivabījeṣu kalābhiścāṣṭabhiryutam || 40||

देवस्य पश्चिमे भागे शक्त्या सह समर्चितम् ।पवित्रं परमं ब्रह्म प्रार्थितं मे प्रयच्छतु ॥ ४१॥

devasya paścime bhāge śaktyā saha samarcitam |pavitraṃ paramaṃ brahma prārthitaṃ me prayacchatu || 41||

शिवस्य तु शिवायाश्च हृन्मूर्तिशिवभाविते ।तयोराज्ञां पुरस्कृत्य ते मे कामं प्रयच्छताम् ॥ ४२॥

śivasya tu śivāyāśca hṛnmūrtiśivabhāvite |tayorājñāṃ puraskṛtya te me kāmaṃ prayacchatām || 42||

शिवस्य च शिवायाश्च शिखामूर्तिशिवाश्रिते ।सत्कृत्य शिवयोराज्ञां ते मे कामं प्रयच्छताम् ॥ ४३॥

śivasya ca śivāyāśca śikhāmūrtiśivāśrite |satkṛtya śivayorājñāṃ te me kāmaṃ prayacchatām || 43||

शिवस्य च शिवायाश्च वर्मणा शिवभाविते ।सत्कृत्य शिवयोराज्ञां ते मे कामं प्रयच्छताम् ॥ ४४॥

śivasya ca śivāyāśca varmaṇā śivabhāvite |satkṛtya śivayorājñāṃ te me kāmaṃ prayacchatām || 44||

शिवस्य च शिवायाश्च नेत्रमूर्तिशिवाश्रिते ।सत्कृत्य शिवयोराज्ञां ते मे कामं प्रयच्छताम् ॥ ४५॥

śivasya ca śivāyāśca netramūrtiśivāśrite |satkṛtya śivayorājñāṃ te me kāmaṃ prayacchatām || 45||

अस्त्रमूर्ती च शिवयोर्नित्यमर्चनतत्परे ।सत्कृत्य शिवयोराज्ञां ते मे कामं प्रयच्छताम् ॥ ४६॥

astramūrtī ca śivayornityamarcanatatpare |satkṛtya śivayorājñāṃ te me kāmaṃ prayacchatām || 46||

वामो ज्येष्ठस्तथा रुद्रः कालो विकरणस्तथा ।बलो विकरणश्चैव बलप्रमथनः परः ॥ ४७॥

vāmo jyeṣṭhastathā rudraḥ kālo vikaraṇastathā |balo vikaraṇaścaiva balapramathanaḥ paraḥ || 47||

सर्वभूतस्य दमनस्तादृशाश्चाष्टशक्तयः ।प्रार्थितं मे प्रयच्छन्तु शिवयोरेव शासनात् ॥ ४८॥

sarvabhūtasya damanastādṛśāścāṣṭaśaktayaḥ |prārthitaṃ me prayacchantu śivayoreva śāsanāt || 48||

अथानन्तश्च सूक्ष्मश्च शिवश्चाप्येकनेत्रकः ।एक रुद्राख्यमूर्तिश्च श्रीकण्ठश्च शिखण्डकः ॥ ४९॥

athānantaśca sūkṣmaśca śivaścāpyekanetrakaḥ |eka rudrākhyamūrtiśca śrīkaṇṭhaśca śikhaṇḍakaḥ || 49||

तथाष्टौ शक्तयस्तेषां द्वितीयावरणेऽर्चिताः ।ते मे कामं प्रयच्छन्तु शिवयोरेव शासनात् ॥ ५०॥

tathāṣṭau śaktayasteṣāṃ dvitīyāvaraṇe'rcitāḥ |te me kāmaṃ prayacchantu śivayoreva śāsanāt || 50||