शिवस्थाननिदेशः सुन्दराय Sundaraya Shivasthananideshah

(शिवरहस्यान्तर्गते सदाशिवाख्ये)सुन्दरः उवाच ।देव देव महादेव शरणागत वत्सल ॥ २५॥

(śivarahasyāntargate sadāśivākhye)sundaraḥ uvāca |deva deva mahādeva śaraṇāgata vatsala || 25||

यत्र यत्र भजे जन्म तस्मिन्भक्तिः पदे तव ।भवताद्भवपादाब्जे भवोद्भव सदावयोः ॥ २६॥

yatra yatra bhaje janma tasminbhaktiḥ pade tava |bhavatādbhavapādābje bhavodbhava sadāvayoḥ || 26||

कस्मिन् क्षेत्रे महादेव तव सान्निध्यमुत्तमम् ।पुण्ये सह्यापगातीरे शिवक्षेत्रविराजिते ॥ २७॥

kasmin kṣetre mahādeva tava sānnidhyamuttamam |puṇye sahyāpagātīre śivakṣetravirājite || 27||

नानाशैवजनाधारे द्विजग्रामसमावृते ।तद्वदाद्य महादेव त्वद्भक्त्या पृच्छतो मम ॥ २८॥

nānāśaivajanādhāre dvijagrāmasamāvṛte |tadvadādya mahādeva tvadbhaktyā pṛcchato mama || 28||

स्कन्दः उवाच ।इति सुन्दरवाक्येन जातहर्षो महेश्वरः ।उवाच सुन्दरं वीक्ष्य तदा कमलिनीमपि ॥ २९॥

skandaḥ uvāca |iti sundaravākyena jātaharṣo maheśvaraḥ |uvāca sundaraṃ vīkṣya tadā kamalinīmapi || 29||

ईश्वर उवाच ।भुवोमण्डलमेतद्धि सप्ताब्धिपरिवेष्टितम् ।वर्षेष्वपि च सर्वेषु भारतं पुण्यमुत्तमम् ॥ ३०॥

īśvara uvāca |bhuvomaṇḍalametaddhi saptābdhipariveṣṭitam |varṣeṣvapi ca sarveṣu bhārataṃ puṇyamuttamam || 30||

द्वीपेषुच गणश्रेष्ठ जम्बूद्वीपोऽयमुत्तमः ।देशेष्वपिच सर्वेषु चोलोऽयं पुण्यकृत्तमः ॥ ३१॥

dvīpeṣuca gaṇaśreṣṭha jambūdvīpo'yamuttamaḥ |deśeṣvapica sarveṣu colo'yaṃ puṇyakṛttamaḥ || 31||

तस्मिन् सा सरितां श्रेष्ठा कावेरी पुण्यनिम्नगा ।दिग्भ्यो दशभ्यो गणप दक्षिणा दिग्विशिष्यते ॥ ३२॥

tasmin sā saritāṃ śreṣṭhā kāverī puṇyanimnagā |digbhyo daśabhyo gaṇapa dakṣiṇā digviśiṣyate || 32||

घटोद्भवो मुनिर्यत्र विन्ध्यहृत् संस्थितः पुरा ।व्याघ्रापादमुनेर्यत्र सन्न्यधत्त महेश्वरः ॥ ३३॥

ghaṭodbhavo muniryatra vindhyahṛt saṃsthitaḥ purā |vyāghrāpādamuneryatra sannyadhatta maheśvaraḥ || 33||

पुण्डरीकपुरं यत्र धाम तत्र कपर्दिनः ।त्वयाहं नित्यसान्निध्यात्सायं ताण्डवतत्परः ॥ ३४॥

puṇḍarīkapuraṃ yatra dhāma tatra kapardinaḥ |tvayāhaṃ nityasānnidhyātsāyaṃ tāṇḍavatatparaḥ || 34||

सर्वैर्देवैश्च मुनिभिः गणवृन्दैः सदा नतः ।तत्र स्थितोऽहं देवेशि गणेन्द्र शृणु तत्सदा ॥ ३५॥

sarvairdevaiśca munibhiḥ gaṇavṛndaiḥ sadā nataḥ |tatra sthito'haṃ deveśi gaṇendra śṛṇu tatsadā || 35||

श्रीमद्दक्षिणकैलासे विलासो मम सर्वदा ।यत्र दन्तावलः पूर्वं पूजयामास मां तदा ॥ ३६॥

śrīmaddakṣiṇakailāse vilāso mama sarvadā |yatra dantāvalaḥ pūrvaṃ pūjayāmāsa māṃ tadā || 36||

विरिञ्चिनारायणयोर्हंसक्रोडशरीरयोः ।अदृष्टमौलिपदयोर्निसर्गागतगर्वयोः ॥ ३७॥

viriñcinārāyaṇayorhaṃsakroḍaśarīrayoḥ |adṛṣṭamaulipadayornisargāgatagarvayoḥ || 37||

अरुणाचलरूपोऽहं तरुणेन्दुशिखामणिः ।अचलेन्द्रं सदा पश्य प्रदक्षिणपुरःसरम् ॥ ३८॥

aruṇācalarūpo'haṃ taruṇenduśikhāmaṇiḥ |acalendraṃ sadā paśya pradakṣiṇapuraḥsaram || 38||

अहं चिरगिरिस्तत्र देव्या वृद्धाम्बया त्वया ।सन्निधास्याम्यहं तत्र तथा गोपर्वते द्विज ॥ ३९॥

ahaṃ ciragiristatra devyā vṛddhāmbayā tvayā |sannidhāsyāmyahaṃ tatra tathā goparvate dvija || 39||

कम्पातीरे गणश्रेष्ठ स्मराक्ष्याहं त्वया शिवे ।एकाम्रमूलनिलयः सन्निधास्याम्हं सदा ॥ ४०॥

kampātīre gaṇaśreṣṭha smarākṣyāhaṃ tvayā śive |ekāmramūlanilayaḥ sannidhāsyāmhaṃ sadā || 40||

सह्यापगाया मूरे तु श्रीकण्ठेश्वरसंज्ञितः ।साक्षाद्रत्नगिरीशोऽहं तृणज्योतीश्वरोऽप्यहम् ॥ ४१॥

sahyāpagāyā mūre tu śrīkaṇṭheśvarasaṃjñitaḥ |sākṣādratnagirīśo'haṃ tṛṇajyotīśvaro'pyaham || 41||

तथा मातृगिरौ पुण्ये सिन्धुरारण्यसंस्थितः ।धृतस्थाने तथा पुण्ये तथा जप्येश्वरे गण ॥ ४२॥

tathā mātṛgirau puṇye sindhurāraṇyasaṃsthitaḥ |dhṛtasthāne tathā puṇye tathā japyeśvare gaṇa || 42||

तथाहं सुन्दरगिरौ क्षीरिणीविपिनेऽपि च ।दक्षिणावर्तके स्थाने कुम्भघोणेऽर्जुनेऽपि च ॥ ४३॥

tathāhaṃ sundaragirau kṣīriṇīvipine'pi ca |dakṣiṇāvartake sthāne kumbhaghoṇe'rjune'pi ca || 43||

ब्रह्मारण्ये बिल्ववने श्वेतारण्ये गणोत्तम ।छायावने च श्रीवाञ्छ्ये तेजिनीविपिनेऽपि च ॥ ४४॥

brahmāraṇye bilvavane śvetāraṇye gaṇottama |chāyāvane ca śrīvāñchye tejinīvipine'pi ca || 44||

दुर्गेश्वरे मङ्गले च त्रिकोटौ च महेश्वरि ।तथैवाम्रवणे देवि वेदारण्ये तथैव च ॥ ४५॥

durgeśvare maṅgale ca trikoṭau ca maheśvari |tathaivāmravaṇe devi vedāraṇye tathaiva ca || 45||

कमलालयसंज्ञे च वल्मीकेश्वरसंज्ञितः ।श्रिया यत्र तपस्तप्तं बहुवर्षगणं गण ॥ ४६॥

kamalālayasaṃjñe ca valmīkeśvarasaṃjñitaḥ |śriyā yatra tapastaptaṃ bahuvarṣagaṇaṃ gaṇa || 46||

तत्र संवस सेवाशु (सेवस्व) कमलिन्याऽनया गण ।तत्राहं तव भक्तिं च परीक्ष्य सुचिरं गण ॥ ४७॥

tatra saṃvasa sevāśu (sevasva) kamalinyā'nayā gaṇa |tatrāhaṃ tava bhaktiṃ ca parīkṣya suciraṃ gaṇa || 47||

कमलिन्या विवाहं ते कारयामि समाहितः ।सेतुबन्धेऽहममलो हालास्येऽप्यहमास्थितः ॥ ४८॥

kamalinyā vivāhaṃ te kārayāmi samāhitaḥ |setubandhe'hamamalo hālāsye'pyahamāsthitaḥ || 48||

ताम्रपर्ण्यास्तटे पुण्ये शिवक्षेत्रेषु संस्थितः ।अन्यानि पुण्यस्थानानि ममैव गणपोत्तम ॥ ४९॥

tāmraparṇyāstaṭe puṇye śivakṣetreṣu saṃsthitaḥ |anyāni puṇyasthānāni mamaiva gaṇapottama || 49||

एषु स्थानेषु नियतं संवसन् गानधारया ।स्तुत्वा मां नियतौ गौर्या कमलिन्याऽनया सह ॥ ५०॥

eṣu sthāneṣu niyataṃ saṃvasan gānadhārayā |stutvā māṃ niyatau gauryā kamalinyā'nayā saha || 50||

भक्त्या मां त्वं समभ्यर्च्य केलासं त्वं सदा मम ।समायाहि मुनिश्रेष्ठैः शैवैः सर्वजनार्चितैः ॥ ५१॥

bhaktyā māṃ tvaṃ samabhyarcya kelāsaṃ tvaṃ sadā mama |samāyāhi muniśreṣṭhaiḥ śaivaiḥ sarvajanārcitaiḥ || 51||

चोळद्रविडभूपालैः सेविते देशसत्तमे ॥ ५२॥

coḷadraviḍabhūpālaiḥ sevite deśasattame || 52||

कमलालयसंस्थितोऽस्मि नित्यंमुचुकुन्दाद्यभिसेव्य पादपद्मः ।हरिणा शतमन्युना च तत्रगणवृन्दैर्मुनिभिश्च सेवितोऽस्मि ॥ ५३॥

kamalālayasaṃsthito'smi nityaṃmucukundādyabhisevya pādapadmaḥ |hariṇā śatamanyunā ca tatragaṇavṛndairmunibhiśca sevito'smi || 53||

तत्र त्वं गणपाग्रणेऽनया त्वंसंसेव्यामरवृन्दपूज्यपादम् ।परितुष्टः सततं वसैव भक्त्यामम भक्तैः कमलाविलासलोलः ॥ ५४॥

tatra tvaṃ gaṇapāgraṇe'nayā tvaṃsaṃsevyāmaravṛndapūjyapādam |parituṣṭaḥ satataṃ vasaiva bhaktyāmama bhaktaiḥ kamalāvilāsalolaḥ || 54||

॥ इति शिवरहस्यान्तर्गते सुन्दराय शिवस्थाननिदेशः सम्पूर्णम् ॥॥ श्रीशिवरहस्यम् । सदाशिवाख्यः नवमांशः । अध्यायः १९ सुन्दराय शिवस्थाननिदेशः । २५५४॥

|| iti śivarahasyāntargate sundarāya śivasthānanideśaḥ sampūrṇam |||| śrīśivarahasyam | sadāśivākhyaḥ navamāṃśaḥ | adhyāyaḥ 19 sundarāya śivasthānanideśaḥ | 2554||

– ॥ श्रीशिवरहस्यम् ।सदाशिवाख्यः नवमांशः ।अध्यायः १९ सुन्दराय शिवस्थाननिदेशः ।२५-५४॥

– || śrīśivarahasyam |sadāśivākhyaḥ navamāṃśaḥ |adhyāyaḥ 19 sundarāya śivasthānanideśaḥ | 25-54||