गिरीशाष्टकम् Shri Girisha Ashtakam

क्षीराम्भोराशितूणं धृतपरशुधनुःशूलदीव्यत्कृपाणंगौरीकान्ताभिरामं निटिलहुतवहज्वालनिर्दग्धकामम् ।तारक्ष्माभृद्विहारं सकलभुवनभृन्नागराट्कण्ठहारंवीरं रौद्राधिदैवं शरणशिवकरं श्रीगिरीशं भजेऽहम् ॥ १॥

kṣīrāmbhorāśitūṇaṃ dhṛtaparaśudhanuḥśūladīvyatkṛpāṇaṃgaurīkāntābhirāmaṃ niṭilahutavahajvālanirdagdhakāmam |tārakṣmābhṛdvihāraṃ sakalabhuvanabhṛnnāgarāṭkaṇṭhahāraṃvīraṃ raudrādhidaivaṃ śaraṇaśivakaraṃ śrīgirīśaṃ bhaje'ham || 1||

सत्यानन्दस्वरूपं कनकमणिगणप्रस्फुरन्मेरुचापंकृत्याकृत्यादिदूरं चिदमृतसरसीवीचिकान्तर्विहारम् ।श्रुत्यन्तस्तूयमानं नतजनसदनासन्नचञ्चन्निधानंप्रत्यद्रि क्रीडमानं प्रणवमयरथं श्रीगिरीशं भजेऽहम् ॥ २॥

satyānandasvarūpaṃ kanakamaṇigaṇaprasphuranmerucāpaṃkṛtyākṛtyādidūraṃ cidamṛtasarasīvīcikāntarvihāram |śrutyantastūyamānaṃ natajanasadanāsannacañcannidhānaṃpratyadri krīḍamānaṃ praṇavamayarathaṃ śrīgirīśaṃ bhaje'ham || 2||

कैलासग्रावतुल्योज्ज्वलवृषभकुलाध्यक्षसन्नद्धकेतुंलोलद्दुग्धप्रवाहार्गलमकुटतटीवेष्टिताहीन्द्रसेतुम् ।पञ्चाशद्वर्णधातुं हरिकमलभवोत्पत्तिनिष्पत्तिहेतुंपञ्चास्यं श्रुत्युपास्यं निरवधियशसं श्रीगिरीशं भजेऽहम् ॥ ३॥

kailāsagrāvatulyojjvalavṛṣabhakulādhyakṣasannaddhaketuṃloladdugdhapravāhārgalamakuṭataṭīveṣṭitāhīndrasetum |pañcāśadvarṇadhātuṃ harikamalabhavotpattiniṣpattihetuṃpañcāsyaṃ śrutyupāsyaṃ niravadhiyaśasaṃ śrīgirīśaṃ bhaje'ham || 3||

भीमं सोमं शिवं शङ्करमभवमजं विश्वलोकैकबीजंरुद्रं मुद्रीकृताघं पशुपतिगमनं वीरभद्रं विनिद्रम् ।शर्वं सर्वंसहामण्डलमहितरथं सत्पथं निर्विरोधंनादं वेदाविभेदं वरदमभयदं श्रीगिरीशं भजेऽहम् ॥ ४॥

bhīmaṃ somaṃ śivaṃ śaṅkaramabhavamajaṃ viśvalokaikabījaṃrudraṃ mudrīkṛtāghaṃ paśupatigamanaṃ vīrabhadraṃ vinidram |śarvaṃ sarvaṃsahāmaṇḍalamahitarathaṃ satpathaṃ nirvirodhaṃnādaṃ vedāvibhedaṃ varadamabhayadaṃ śrīgirīśaṃ bhaje'ham || 4||

ज्योतीरूपं दुरापं विलयजलधरोद्दण्डचण्डाट्टहासंविद्युद्वल्लीमतल्लीरुचिरपटुजटानद्धमुग्धेन्दुखण्डम् ।प्राग्द्वारे भृङ्गिलासं(लास्य) प्रतिदिशगणकोलाहलापूर्णकर्णंवर्णप्राकारमध्यस्थितमणिसदनं श्रीगिरीशं भजेऽहम् ॥ ५॥

jyotīrūpaṃ durāpaṃ vilayajaladharoddaṇḍacaṇḍāṭṭahāsaṃvidyudvallīmatallīrucirapaṭujaṭānaddhamugdhendukhaṇḍam |prāgdvāre bhṛṅgilāsaṃ(lāsya) pratidiśagaṇakolāhalāpūrṇakarṇaṃvarṇaprākāramadhyasthitamaṇisadanaṃ śrīgirīśaṃ bhaje'ham || 5||

चिद्विद्यामूलकन्दं रदनरुचिपरिष्कासितारण्यकुन्दंमृद्वीगोक्षीरपूरामृतरसमधुराम्नायगेयं यजेय ।विद्वत्पालीसदापूजितपदकमलं निर्मलं निर्विकल्पंव्यालाकल्पं चिरायुर्मुनिसुतविनुतं श्रीगिरीशं भजेऽहम् ॥ ६॥

cidvidyāmūlakandaṃ radanarucipariṣkāsitāraṇyakundaṃmṛdvīgokṣīrapūrāmṛtarasamadhurāmnāyageyaṃ yajeya |vidvatpālīsadāpūjitapadakamalaṃ nirmalaṃ nirvikalpaṃvyālākalpaṃ cirāyurmunisutavinutaṃ śrīgirīśaṃ bhaje'ham || 6||

षट्त्रिंशत्तत्त्वशृङ्गोत्तरपदविचरत्सूक्ष्मचित्स्थाणुरूपंसप्ताधोलोकबाह्यान्तरकुहरतमः खण्डनोद्दण्डहासम् ।सौम्यं गम्यादिगम्यं शरणजनमनोहारिशय्यान्तरस्थंसम्यक्सौभाग्यरेखाञ्चितपदयुगलं श्रीगिरीशं भजेऽहम् ॥ ७॥

ṣaṭtriṃśattattvaśṛṅgottarapadavicaratsūkṣmacitsthāṇurūpaṃsaptādholokabāhyāntarakuharatamaḥ khaṇḍanoddaṇḍahāsam |saumyaṃ gamyādigamyaṃ śaraṇajanamanohāriśayyāntarasthaṃsamyaksaubhāgyarekhāñcitapadayugalaṃ śrīgirīśaṃ bhaje'ham || 7||

न्यग्रोधक्ष्माजमूले स्फटिकमणिमयस्वच्छपीठाधिवासंसर्वज्ञं भक्तबन्धुं प्रविमलकरुणासारवद्दुग्धसिन्धुम् ।प्रत्यक्षादृष्टमूर्तिं दशदिगधिपतिं विश्वकृद्दिव्यमूर्तिंज्योतिर्लिङ्गं निरङ्गं निरवधिमपरं श्रीगिरीशं भजेऽहम् ॥ ८॥

nyagrodhakṣmājamūle sphaṭikamaṇimayasvacchapīṭhādhivāsaṃsarvajñaṃ bhaktabandhuṃ pravimalakaruṇāsāravaddugdhasindhum |pratyakṣādṛṣṭamūrtiṃ daśadigadhipatiṃ viśvakṛddivyamūrtiṃjyotirliṅgaṃ niraṅgaṃ niravadhimaparaṃ śrīgirīśaṃ bhaje'ham || 8||

गिर्यष्टकमिदं पुण्यं यः पठेत्सततं नरः ।शिवलोकमवाप्नोति शिवेन सह मोदते ॥ ९॥

giryaṣṭakamidaṃ puṇyaṃ yaḥ paṭhetsatataṃ naraḥ |śivalokamavāpnoti śivena saha modate || 9||

॥ इति श्रीगिरीशाष्टकं सम्पूर्णम् ॥

|| iti śrīgirīśāṣṭakaṃ sampūrṇam ||