शिवस्तुतिः (सामवेदकृता शिवरहस्यान्तर्गता) Samavedakrita Shiva Stuti

(शिवरहस्यान्तर्गते ईशाख्ये)सामवेद उवाच ।अग्निरूपो महादेवो मामायातु स वीतये ।हव्यदातारमीशानं हव्यभोक्तारमीश्वरम् ॥ ३॥

(śivarahasyāntargate īśākhye)sāmaveda uvāca |agnirūpo mahādevo māmāyātu sa vītaye |havyadātāramīśānaṃ havyabhoktāramīśvaram || 3||

गृभ्णामि वचसा साम्ना मनसैव महेश्वरम् ।सवितुर्भासकं तेजो भर्गमेवमुपास्महे ॥ ४॥

gṛbhṇāmi vacasā sāmnā manasaiva maheśvaram |saviturbhāsakaṃ tejo bhargamevamupāsmahe || 4||

स धियो सर्वजन्तूनां यो वः समयक्प्रचोदयात् ।भूर्भुवःस्वस्तथा सत्यं स एव परमेश्वरः ॥ ५॥

sa dhiyo sarvajantūnāṃ yo vaḥ samayakpracodayāt |bhūrbhuvaḥsvastathā satyaṃ sa eva parameśvaraḥ || 5||

तद्वो गायामि देवेशं पुरुषं परमेश्वरम् ।आवोराजानमेवेशमध्वरस्य महेश्वरम् ॥ ६॥

tadvo gāyāmi deveśaṃ puruṣaṃ parameśvaram |āvorājānameveśamadhvarasya maheśvaram || 6||

होतारं सत्यजं देवं रोदस्योरीश्वरं परम् ।अग्निमेवं विरूपाक्षं मरणात्पूर्वमीश्वरम् ॥ ७॥

hotāraṃ satyajaṃ devaṃ rodasyorīśvaraṃ param |agnimevaṃ virūpākṣaṃ maraṇātpūrvamīśvaram || 7||

हिरण्यरूपं देवेशं वृणुध्वमवशं सुराः ।अर्थपतिर्मित्रपतिः शिवः क्षेत्रपतिः सुराः ॥ ८॥

hiraṇyarūpaṃ deveśaṃ vṛṇudhvamavaśaṃ surāḥ |arthapatirmitrapatiḥ śivaḥ kṣetrapatiḥ surāḥ || 8||

शिवो धनपतिः शम्भुः सुवः पतिरपीश्वरः ।नमस्तस्मै महेशाय नमस्तस्मै कपर्दिने ॥ ९॥

śivo dhanapatiḥ śambhuḥ suvaḥ patirapīśvaraḥ |namastasmai maheśāya namastasmai kapardine || 9||

त्र्यम्बकाय नमस्तस्मै क्रव्येभ्यश्च नमो नमः ।अन्नाय च नमो नित्यमन्नाधिपतये नमः ॥ १०॥

tryambakāya namastasmai kravyebhyaśca namo namaḥ |annāya ca namo nityamannādhipataye namaḥ || 10||

संवृते विवृते चैव प्रत्यश्राव्ये नमो नमः ।क्रव्येभ्यश्च विरीकेभ्यो मृडाय च नमो नमः ॥ ११॥

saṃvṛte vivṛte caiva pratyaśrāvye namo namaḥ |kravyebhyaśca virīkebhyo mṛḍāya ca namo namaḥ || 11||

मयि मन्युं क्षमस्वेश दोहं गायामि शङ्कर ।त्वामर्चयामि विश्वेशं परमात्मानमीश्वरम् ॥ १२॥

mayi manyuṃ kṣamasveśa dohaṃ gāyāmi śaṅkara |tvāmarcayāmi viśveśaṃ paramātmānamīśvaram || 12||

यदिदं विश्वभूतं च त्वय्येव लयमेष्यति ।नमो नमस्ते देवाय नमस्तेऽस्तु सदा मम ॥ १३॥

yadidaṃ viśvabhūtaṃ ca tvayyeva layameṣyati |namo namaste devāya namaste'stu sadā mama || 13||

चन्द्ररूपाय च नमः शुक्ररूपाय ते नमः ।मखाय च नमस्तुभ्यं ओजसे ते नमो नमः ॥ १४॥

candrarūpāya ca namaḥ śukrarūpāya te namaḥ |makhāya ca namastubhyaṃ ojase te namo namaḥ || 14||

सहसे ते नमस्तुभ्यं ऋतवे ते नमो नमः ।बृहते नमस्तुभ्यं सुखाय च नमो नमः ॥ १५॥

sahase te namastubhyaṃ ṛtave te namo namaḥ |bṛhate namastubhyaṃ sukhāya ca namo namaḥ || 15||

ज्योतिषे ते नमस्तुभ्यं त्वां दधे हृदये सदा ।एभिर्नामभिरेवेशं स्तोभैर्गायामि शङ्कर ॥ १६॥

jyotiṣe te namastubhyaṃ tvāṃ dadhe hṛdaye sadā |ebhirnāmabhireveśaṃ stobhairgāyāmi śaṅkara || 16||

औष्णैरित्वा महादेवं हवामि परमेश्वरम् ।ॐ वाग्भा तव देवेश सर्वभासकरी प्रभो ॥ १७॥

auṣṇairitvā mahādevaṃ havāmi parameśvaram |oṃ vāgbhā tava deveśa sarvabhāsakarī prabho || 17||

सोमोऽयं जनिता देवः पवते शङ्करः स्वयम् ।सोमोऽयं जनिता देवो मतीनां परमेश्वरः ॥ १८॥

somo'yaṃ janitā devaḥ pavate śaṅkaraḥ svayam |somo'yaṃ janitā devo matīnāṃ parameśvaraḥ || 18||

सोमोऽयं जनिता देवो दिवः शङ्कर ईश्वरः ।सोमोऽयं जनिता देवः पृथिव्याः परमेश्वरः ॥ १९॥

somo'yaṃ janitā devo divaḥ śaṅkara īśvaraḥ |somo'yaṃ janitā devaḥ pṛthivyāḥ parameśvaraḥ || 19||

सोमोऽयं जनिता देवो अग्नेः साक्षान्महेश्वरः ।सोमोऽयं जनिता देवः सूर्यस्य भव ईश्वरः ॥ २०॥

somo'yaṃ janitā devo agneḥ sākṣānmaheśvaraḥ |somo'yaṃ janitā devaḥ sūryasya bhava īśvaraḥ || 20||

सोमोऽयं जनिता देवो विष्णोश्चापि त्रियम्बकः ।एषोऽन्तरा महादेव आदित्ये श्रूयते विभुः ॥ २१॥

somo'yaṃ janitā devo viṣṇoścāpi triyambakaḥ |eṣo'ntarā mahādeva āditye śrūyate vibhuḥ || 21||

हिरण्यश्मश्रुरीशानो हिरण्मयसुकेशवान् ।सर्व एव सुवर्णोऽयं शिवो ह्याप्रणखात्सुराः ॥ २२॥

hiraṇyaśmaśrurīśāno hiraṇmayasukeśavān |sarva eva suvarṇo'yaṃ śivo hyāpraṇakhātsurāḥ || 22||

सीमा भूमा महानात्मा विश्वरूपो महेश्वरः ।कं खं ब्रह्मेश्वरो ह्येष महादेवः प्रकाशते ॥ २३॥

sīmā bhūmā mahānātmā viśvarūpo maheśvaraḥ |kaṃ khaṃ brahmeśvaro hyeṣa mahādevaḥ prakāśate || 23||

वैश्वानरात्मा त्रिमधुस्त्रिसुपर्णोह्यतीन्द्रियः ।अपावृतं च तद्द्वारं सदा पश्यन्ति सूरयः ॥ २४॥

vaiśvānarātmā trimadhustrisuparṇohyatīndriyaḥ |apāvṛtaṃ ca taddvāraṃ sadā paśyanti sūrayaḥ || 24||

विराट् स्वराट् तथा संराट् भगवान् रुद्र एव हि ।युजोत्वात्यादयो वाचं गायेत्त्वाशतवर्तनम् ॥ २५॥

virāṭ svarāṭ tathā saṃrāṭ bhagavān rudra eva hi |yujotvātyādayo vācaṃ gāyettvāśatavartanam || 25||

महेन्द्रात्मा वामदेव्यो ज्येष्ठेराजानहिं कृतः ।वैरूप वैश्वरूपात्मा सर्वात्मा परमेश्वरः ॥ २६॥

mahendrātmā vāmadevyo jyeṣṭherājānahiṃ kṛtaḥ |vairūpa vaiśvarūpātmā sarvātmā parameśvaraḥ || 26||

महावैराज सुप्रीतो वैश्वामित्रस्तुतः शिवः ।अष्टदंष्ट्रारवप्रीत एक एव महेश्वरः ॥ २७॥

mahāvairāja suprīto vaiśvāmitrastutaḥ śivaḥ |aṣṭadaṃṣṭrāravaprīta eka eva maheśvaraḥ || 27||

यजध्वं श्रीमहादेवं लभध्वं मुक्तिमुत्तमाम् । २८\।१॥ इति शिवरहस्यान्तर्गते सामवेदकृता शिवस्तुतिः सम्पूर्णा ॥॥ श्रीशिवरहस्यम् । ईशाख्यः द्वादशमांशः । अध्यायः ४ सामवेदाथर्ववेदकृतस्तुतिः । ३२८\।१ ॥– ॥ श्रीशिवरहस्यम् । ईशाख्यः द्वादशमांशः । अध्यायः ४ सामवेदाथर्ववेदकृतस्तुतिः । ३-२८।१ ॥

yajadhvaṃ śrīmahādevaṃ labhadhvaṃ muktimuttamām | 28\|1|| iti śivarahasyāntargate sāmavedakṛtā śivastutiḥ sampūrṇā |||| śrīśivarahasyam | īśākhyaḥ dvādaśamāṃśaḥ | adhyāyaḥ 4 sāmavedātharvavedakṛtastutiḥ | 328\|1 ||– || śrīśivarahasyam | īśākhyaḥ dvādaśamāṃśaḥ | adhyāyaḥ 4 sāmavedātharvavedakṛtastutiḥ | 3-28|1 ||