गोष्ठेश्वराष्टकम् Hymn to Kottai Ishvara

सत्यज्ञानमनन्तमद्वयसुखाकारं गुहान्तःस्थितश्रीचिद्व्योम्नि चिदर्करूपममलं यद् ब्रह्म तत्त्वं परम् ।निर्बीजस्थलमध्यभागविलसद्गोष्ठोत्थवल्मीकसम्भूतं सत् पुरतो विभात्यहह तद्गोष्ठेशलिङ्गात्मना ॥ १॥

satyajñānamanantamadvayasukhākāraṃ guhāntaḥsthitaśrīcidvyomni cidarkarūpamamalaṃ yad brahma tattvaṃ param |nirbījasthalamadhyabhāgavilasadgoṣṭhotthavalmīkasambhūtaṃ sat purato vibhātyahaha tadgoṣṭheśaliṅgātmanā || 1||

सर्वज्ञत्वनिदानभूतकरुणामूर्तिस्वरूपामलाचिच्छक्तिर्जडशक्तिकैतववशात् काञ्चीनदीत्वं गता ।वल्मीकाश्रयगोष्ठनायकपरब्रह्मैक्यकर्त्री मुहुःनृणां स्नानकृतां विभाति सततं श्रीपिप्पिलारण्यगा ॥ २॥

sarvajñatvanidānabhūtakaruṇāmūrtisvarūpāmalācicchaktirjaḍaśaktikaitavavaśāt kāñcīnadītvaṃ gatā |valmīkāśrayagoṣṭhanāyakaparabrahmaikyakartrī muhuḥnṛṇāṃ snānakṛtāṃ vibhāti satataṃ śrīpippilāraṇyagā || 2||

श्रीमद्राजतशैलशृङ्गविलसच्छ्रीमद्गुहायां महीवार्वह्न्याशुगखात्मिकी विजयते या पञ्चलिङ्गाकृतिः ।सैवाशक्तजनेषु भूरिकृपया श्रीपिप्पिलारण्यगेवल्मीके किल गोष्ठनायकमहालिङ्गात्मना भासते ॥ ३॥

śrīmadrājataśailaśṛṅgavilasacchrīmadguhāyāṃ mahīvārvahnyāśugakhātmikī vijayate yā pañcaliṅgākṛtiḥ |saivāśaktajaneṣu bhūrikṛpayā śrīpippilāraṇyagevalmīke kila goṣṭhanāyakamahāliṅgātmanā bhāsate || 3||

यत्राद्याप्यणिमादिसिद्धिनिपुणाः सिद्धेश्वराणां गणाःतत्तद्दिव्यगुहासु सन्ति यमिदृग्दृश्या महावैभवाः ।यत्रैव ध्वनिरर्धरात्रसमये पुण्यात्मभिः श्रूयतेपूजावाद्यसमुत्थितः सुमनसां तं राजताद्रिं भजे ॥ ४॥

yatrādyāpyaṇimādisiddhinipuṇāḥ siddheśvarāṇāṃ gaṇāḥtattaddivyaguhāsu santi yamidṛgdṛśyā mahāvaibhavāḥ |yatraiva dhvanirardharātrasamaye puṇyātmabhiḥ śrūyatepūjāvādyasamutthitaḥ sumanasāṃ taṃ rājatādriṃ bhaje || 4||

श्रीमद्राजतपर्वताकृतिधरस्यार्धेन्दुचूडामणेर्लोमैकं किल वामकर्णजनितं काञ्चीतरुत्वं गतम् ।तस्मादुत्तरवाहिनी भुवि भवान्याख्या ततः पूर्वगाकाञ्चीनद्यभिधा च पश्चिमगता निलानदी पावनी ॥ ५॥

śrīmadrājataparvatākṛtidharasyārdhenducūḍāmaṇerlomaikaṃ kila vāmakarṇajanitaṃ kāñcītarutvaṃ gatam |tasmāduttaravāhinī bhuvi bhavānyākhyā tataḥ pūrvagākāñcīnadyabhidhā ca paścimagatā nilānadī pāvanī || 5||

श्रीमद्भार्गवहस्तलग्नपरशुव्याघट्टनाद् दारितेक्षोणीध्रे सति वामदक्षिणगिरिद्वन्द्वात्मना भेदिते ।तन्मध्यप्रथिते विदारधरणीभागेतिनद्याश्रयेसा नीलातटिनी पुनाति हि सदा कल्पादिगान् प्राणिनः ॥ ६॥

śrīmadbhārgavahastalagnaparaśuvyāghaṭṭanād dāritekṣoṇīdhre sati vāmadakṣiṇagiridvandvātmanā bhedite |tanmadhyaprathite vidāradharaṇībhāgetinadyāśrayesā nīlātaṭinī punāti hi sadā kalpādigān prāṇinaḥ || 6||

कल्पादिस्थलमध्यभागनिलये श्रीविश्वनाथाभिधेलिङ्गे पिप्पिलकाननान्तरगतश्रीगोष्ठनाथाभिधः ।श्रीशम्भुः करुणानिधिः प्रकुरुते सांनिध्यमन्यादृशंतत्पत्नी च विराजतेऽत्र तु विशालाक्षीति नामाङ्किता ॥ ७॥

kalpādisthalamadhyabhāganilaye śrīviśvanāthābhidheliṅge pippilakānanāntaragataśrīgoṣṭhanāthābhidhaḥ |śrīśambhuḥ karuṇānidhiḥ prakurute sāṃnidhyamanyādṛśaṃtatpatnī ca virājate'tra tu viśālākṣīti nāmāṅkitā || 7||

श्रीकाञ्चीतरुमूलपावनतलं भ्राजत्त्रिवेण्युद्भवंत्यक्त्वान्यत्र विधातुमिच्छति मुहुर्यस्तीर्थयात्रादिकम् ।सोऽयं हस्तगतं विहाय कुधिया शाखाग्रलीनं वृथायष्ट्या ताडितुमीहते जडमतिर्निःसारतुच्छं फलम् ॥ ८॥

śrīkāñcītarumūlapāvanatalaṃ bhrājattriveṇyudbhavaṃtyaktvānyatra vidhātumicchati muhuryastīrthayātrādikam |so'yaṃ hastagataṃ vihāya kudhiyā śākhāgralīnaṃ vṛthāyaṣṭyā tāḍitumīhate jaḍamatirniḥsāratucchaṃ phalam || 8||

श्रीमद्राजतशैलोत्थत्रिवेणीमहिमाङ्कितम् ।गोष्ठेश्वराष्टकमिदं सारज्ञैरवलोक्यताम् ॥ ९॥

śrīmadrājataśailotthatriveṇīmahimāṅkitam |goṣṭheśvarāṣṭakamidaṃ sārajñairavalokyatām || 9||

इति गोष्ठेश्वराष्टकं सम्पूर्णम् ।

iti goṣṭheśvarāṣṭakaṃ sampūrṇam |