शिवस्तवः ३ देवीकृतः Devikrita Shivastavah

श्री देव्युवाचदीनबन्धो ! दयासिन्धो ! प्रभो ! शङ्कर ! भो हर ! ।श्रोतुमिच्छामि ! देवेश ज्ञानदः शङ्करो यतः ॥ १॥

śrī devyuvācadīnabandho ! dayāsindho ! prabho ! śaṅkara ! bho hara ! |śrotumicchāmi ! deveśa jñānadaḥ śaṅkaro yataḥ || 1||

देवदेव ! महादेव ! नमस्तुभ्यं सदाशिव ! ।नमस्तुभ्यं नमस्तुभ्यं नमस्तुभ्यं महेश्वर ! ॥ २॥

devadeva ! mahādeva ! namastubhyaṃ sadāśiva ! |namastubhyaṃ namastubhyaṃ namastubhyaṃ maheśvara ! || 2||

विश्वेश्वर ! जगद्बन्धो ! नीलकण्ठ ! नमोऽस्तु ते ।ज्ञानेश ! ज्ञानदानन्ददायक ! ज्ञानवर्द्धक ! ॥ ३॥

viśveśvara ! jagadbandho ! nīlakaṇṭha ! namo'stu te |jñāneśa ! jñānadānandadāyaka ! jñānavarddhaka ! || 3||

ज्ञानाधीश ! ज्ञानपते ! नमः कोचवधूपते ! ।नमस्ते परमानन्द ! नमस्ते भक्तवत्सल ! ॥ ४॥

jñānādhīśa ! jñānapate ! namaḥ kocavadhūpate ! |namaste paramānanda ! namaste bhaktavatsala ! || 4||

नमस्ते पार्वतीनाथ ! गङ्गाधर ! नमोऽस्तु ते ।विश्वेश्वर ! जगद्बन्धो ! जगदीश ! सदाशिव ! ॥ ५॥

namaste pārvatīnātha ! gaṅgādhara ! namo'stu te |viśveśvara ! jagadbandho ! jagadīśa ! sadāśiva ! || 5||

नमस्तेऽस्तु महादेव ! त्रिलोकेश ! महेश्वर ! ।नमस्ते योगतन्त्रज्ञ ! नमः कालीपते नमः ॥ ६॥

namaste'stu mahādeva ! trilokeśa ! maheśvara ! |namaste yogatantrajña ! namaḥ kālīpate namaḥ || 6||

नमस्तारापते ! तुभ्यं नमस्ते भैरवीपते ! ।गौरीपते ! जगन्नाथ ! नमस्ते चण्डिकापते ! ॥ ७॥

namastārāpate ! tubhyaṃ namaste bhairavīpate ! |gaurīpate ! jagannātha ! namaste caṇḍikāpate ! || 7||

गुरुरूपतरोर्बीजफलरूप ! फलप्रद ! ।नमस्ते सर्वबीजज्ञ ! बीजाधार ! नमोऽस्तु ते ॥ ८॥

gururūpatarorbījaphalarūpa ! phalaprada ! |namaste sarvabījajña ! bījādhāra ! namo'stu te || 8||

उमापते ! नमस्तुभ्यं नमस्तुभ्यं त्रिलोचन ! ।पञ्चानन ! नमस्तुभ्यं नमस्ते शशिशेखर ! ॥ ९॥

umāpate ! namastubhyaṃ namastubhyaṃ trilocana ! |pañcānana ! namastubhyaṃ namaste śaśiśekhara ! || 9||

शम्भो ! महेश्वर ! विभो ! विरूपाक्ष ! चतुर्भुज ! ।नमस्ते पर्वतात्मजापते ! चण्डीपते ! नमः ॥ १०॥

śambho ! maheśvara ! vibho ! virūpākṣa ! caturbhuja ! |namaste parvatātmajāpate ! caṇḍīpate ! namaḥ || 10||

त्रिलोकेश ! दयासिन्धो ! करुणामय ! शङ्कर ! ।भक्तवत्सल ! देवेश ! नीलकण्ठ ! सदाशिव ! ॥ ११॥

trilokeśa ! dayāsindho ! karuṇāmaya ! śaṅkara ! |bhaktavatsala ! deveśa ! nīlakaṇṭha ! sadāśiva ! || 11||

नमः काशीपते ! तुभ्यं नमस्ते चन्द्रशेखर ! ।नमश्चण्डीपते तुभ्यं नमस्ते मुक्तिद ! प्रभो ! ॥ १२॥

namaḥ kāśīpate ! tubhyaṃ namaste candraśekhara ! |namaścaṇḍīpate tubhyaṃ namaste muktida ! prabho ! || 12||

नमस्ते जगदाधार! चतुरानन ! वत्सल ! ।नमः क्रियापते ! तुभ्यं नमस्ते मुक्तिद ! प्रभो ! ॥ १३॥

namaste jagadādhāra! caturānana ! vatsala ! |namaḥ kriyāpate ! tubhyaṃ namaste muktida ! prabho ! || 13||

अहमेवाऽबला बाला कथं जानामि ! शङ्कर ! ।निर्गुणं सगुणं ज्ञातुं न समर्था कथञ्चन ॥ १४॥

ahamevā'balā bālā kathaṃ jānāmi ! śaṅkara ! |nirguṇaṃ saguṇaṃ jñātuṃ na samarthā kathañcana || 14||

श्री शिव उवाचनिर्गुणा प्रकृतिः सत्यमहमेव च निर्गुणः ।यदैव सगुणा त्वं हि सुगुणो हि सदाशिवः ॥ १५॥

śrī śiva uvācanirguṇā prakṛtiḥ satyamahameva ca nirguṇaḥ |yadaiva saguṇā tvaṃ hi suguṇo hi sadāśivaḥ || 15||

सत्यञ्च निर्गुणा देवी सत्यं सत्यं हि निर्गुणः ।उपासकानां सिद्।ह्ध्यर्थं सगुणा सगुणो मतः ॥ १६॥

satyañca nirguṇā devī satyaṃ satyaṃ hi nirguṇaḥ |upāsakānāṃ sid|hdhyarthaṃ saguṇā saguṇo mataḥ || 16||

नानातन्त्रमतं देवि ! नानायत्नात् प्रकाशितम् ।ब्रह्मस्वरूपं विज्ञातुं कः समर्थो महीतले ॥ १७॥

nānātantramataṃ devi ! nānāyatnāt prakāśitam |brahmasvarūpaṃ vijñātuṃ kaḥ samartho mahītale || 17||

नानामार्गे विधावन्ति पशवो हतबुद्धयः ।श्रीदुर्गाचरणाम्भोजं हित्वा यान्ति रसातलम् ॥ १८॥

nānāmārge vidhāvanti paśavo hatabuddhayaḥ |śrīdurgācaraṇāmbhojaṃ hitvā yānti rasātalam || 18||

सत्यं वाच्मि दृढ वच्मि हितं पथ्यं पुनः पुनः ।न भुक्तिश्च न मुक्तिश्च विना दुर्गानिषेवनात् ॥ १९॥

satyaṃ vācmi dṛḍha vacmi hitaṃ pathyaṃ punaḥ punaḥ |na bhuktiśca na muktiśca vinā durgāniṣevanāt || 19||

देवि ! दुर्गा परं ब्रह्म श्रुतं कालीश्रुतौ त्वया ।ताराश्रुतौ श्रुतं देवि! श्रुता ब्रह्मविचारणा ॥ २०॥

devi ! durgā paraṃ brahma śrutaṃ kālīśrutau tvayā |tārāśrutau śrutaṃ devi! śrutā brahmavicāraṇā || 20||

ब्रह्मा विष्णुश्च रुद्रश्च वासवश्च दिवौकसः ।त्वत्पादसेवनाद् देवि ! वयं वै साधकोत्तमाः ॥ २१॥

brahmā viṣṇuśca rudraśca vāsavaśca divaukasaḥ |tvatpādasevanād devi ! vayaṃ vai sādhakottamāḥ || 21||

न देवेशो गणपतिर्नो ब्रह्मा नो हरो हरिः ।हरिर्हरिरहं देवि! सर्वे पादाब्जभावुकाः ॥ २२॥

na deveśo gaṇapatirno brahmā no haro hariḥ |harirharirahaṃ devi! sarve pādābjabhāvukāḥ || 22||

त्वत्प्रसादान्महेशानि ! ब्रह्मा सृष्टिं करोत्यसौ ।तत्प्रसादाद्धरिः पाता हरो हर्ता महीतले ॥ २३॥

tvatprasādānmaheśāni ! brahmā sṛṣṭiṃ karotyasau |tatprasādāddhariḥ pātā haro hartā mahītale || 23||

वासवश्चामराधीशोऽमरा देवताः स्मृताः ।ते सर्वे निर्जरा देवि ! त्वत्प्रसादान्महेश्वरि ! ॥ २४॥

vāsavaścāmarādhīśo'marā devatāḥ smṛtāḥ |te sarve nirjarā devi ! tvatprasādānmaheśvari ! || 24||

त्वत्पादपद्मसम्पर्का देव देवोऽपि शङ्करः ।अतस्त्वं जगदीशानदयिता ! भक्तवत्सले ! ॥ २५॥

tvatpādapadmasamparkā deva devo'pi śaṅkaraḥ |atastvaṃ jagadīśānadayitā ! bhaktavatsale ! || 25||

दृष्टिं कुरु महामाये ! नमस्तेस्यै नमो नमः ।त्वञ्च काली त्वञ्च तारा षोडशी त्वं वरानने ! ॥ २६॥

dṛṣṭiṃ kuru mahāmāye ! namastesyai namo namaḥ |tvañca kālī tvañca tārā ṣoḍaśī tvaṃ varānane ! || 26||

त्वं देवि ! भुवना बाला छिन्ना धूमा महेश्वरि ! ।त्वं देवि बगला भीमा कमला त्वं महेश्वरि ! ॥ २७॥

tvaṃ devi ! bhuvanā bālā chinnā dhūmā maheśvari ! |tvaṃ devi bagalā bhīmā kamalā tvaṃ maheśvari ! || 27||

मातङ्गी त्वन्नपूर्णा त्वं धनदा त्वं शिव प्रिये ! ।दुर्गा त्वं विश्वजननी दशाष्टादशरूपिणी ॥ २८॥

mātaṅgī tvannapūrṇā tvaṃ dhanadā tvaṃ śiva priye ! |durgā tvaṃ viśvajananī daśāṣṭādaśarūpiṇī || 28||

सप्तकोटिमहाविद्या उपविद्यास्वरूपिणी ।कुमारी रमणीरूपा सुरूपा नगनन्दिनी ॥ २९॥

saptakoṭimahāvidyā upavidyāsvarūpiṇī |kumārī ramaṇīrūpā surūpā naganandinī || 29||

शिवपूज्या शिवाराध्या ब्रह्मपूज्या सुरेश्वरी ।शिवो भिन्नः शिवाभिन्ना न जीवो वामलोचना ।इति जानामि विश्वेशि ! सत्यं सत्यं न संशयः ॥ ३०॥

śivapūjyā śivārādhyā brahmapūjyā sureśvarī |śivo bhinnaḥ śivābhinnā na jīvo vāmalocanā |iti jānāmi viśveśi ! satyaṃ satyaṃ na saṃśayaḥ || 30||

श्री पार्वत्युवाचसत्यं मे कथितं नाथ नित्यरूपोऽसि शङ्कर !।अहञ्च त्रिषु लोकेषु पार्वतीश्वरी शङ्कर !।विशेषं देवदेवेश! सर्वज्ञ! कथयस्व मे ॥ ३१॥

śrī pārvatyuvācasatyaṃ me kathitaṃ nātha nityarūpo'si śaṅkara !|ahañca triṣu lokeṣu pārvatīśvarī śaṅkara !|viśeṣaṃ devadeveśa! sarvajña! kathayasva me || 31||

श्री शिव उवाचविशेषं न च जानामि कथयस्व वरानने ! ।सर्वज्ञासि महेशानि ! यतः सर्वज्ञ वल्लभा ॥ ३२॥

śrī śiva uvācaviśeṣaṃ na ca jānāmi kathayasva varānane ! |sarvajñāsi maheśāni ! yataḥ sarvajña vallabhā || 32||

श्री पार्वत्युवाचगोलोके चैव राधाऽहं वैकुण्ठे कमलात्मिका ।ब्रह्मलोके च सावित्री भारती वाक्स्वरूपिणी ॥ ३३॥

śrī pārvatyuvācagoloke caiva rādhā'haṃ vaikuṇṭhe kamalātmikā |brahmaloke ca sāvitrī bhāratī vāksvarūpiṇī || 33||

कैलासे पार्वती देवी मिथिलायाञ्च जानकी ।द्वारकायां रूक्मिणी च द्रौपदी पाण्डवालये ॥ ३४॥

kailāse pārvatī devī mithilāyāñca jānakī |dvārakāyāṃ rūkmiṇī ca draupadī pāṇḍavālaye || 34||

गायत्री वेदजननी सन्ध्याऽहञ्च द्विजन्मनाम् ।ज्योतिर्मध्ये पुषाऽहञ्च पुष्पे कृष्णा पराजिता ॥ ३५॥

gāyatrī vedajananī sandhyā'hañca dvijanmanām |jyotirmadhye puṣā'hañca puṣpe kṛṣṇā parājitā || 35||

पत्रे मालूरपत्रं हि पीठे योनिस्वरूपिणी ।हरिहरात्मिका विद्या ब्रह्मविष्णुशिवार्चिता ॥ ३६॥

patre mālūrapatraṃ hi pīṭhe yonisvarūpiṇī |hariharātmikā vidyā brahmaviṣṇuśivārcitā || 36||

विशेषानुग्रहेणैव विज्ञेया शङ्कर ! प्रभो ! ।यत्र कुत्र स्थले नाथ ! शक्तिस्तिष्ठति गच्छति ।तत्रैवाऽहं महादेव ! निश्चितं मतमुत्तमम् ॥ ३७॥

viśeṣānugraheṇaiva vijñeyā śaṅkara ! prabho ! |yatra kutra sthale nātha ! śaktistiṣṭhati gacchati |tatraivā'haṃ mahādeva ! niścitaṃ matamuttamam || 37||

शक्तिमार्गं परित्यज्य योऽन्यमार्गं विधावति ।करस्थं स मणिं त्यक्त्वा भूतिभावं विधावति ॥ ३८॥

śaktimārgaṃ parityajya yo'nyamārgaṃ vidhāvati |karasthaṃ sa maṇiṃ tyaktvā bhūtibhāvaṃ vidhāvati || 38||

इत्येवञ्च महादेव ! मयोक्तं जगदीश्वर ! ।अतः परतरं नास्ति नास्ति नास्ति सदाशिव ! ॥ ३९॥

ityevañca mahādeva ! mayoktaṃ jagadīśvara ! |ataḥ parataraṃ nāsti nāsti nāsti sadāśiva ! || 39||

इति मुण्डमालातन्त्रे पार्वतीश्वरसंवादे सप्तमः पटलान्तर्गतःदेवीकृतशिवस्तवः सम्पूर्णः ॥ ७॥

iti muṇḍamālātantre pārvatīśvarasaṃvāde saptamaḥ paṭalāntargataḥdevīkṛtaśivastavaḥ sampūrṇaḥ || 7||

श्लोकानि ४२८०

ślokāni 4280