शिवस्तुतिः (ब्रह्माविष्ण्वादिदेवैः कृता २ शिवरहस्यान्तर्गता) Brahmavishnvadidevaih Krita Shiva Stuti 2

(शिवरहस्यान्तर्गते ईश्वराख्ये)देवाः ऊचुः ।देव देव महादेव शरणागतवत्सल ।मन्दार सुन्दर सुममरन्दस्राविपत्प्रभ ॥ १॥

(śivarahasyāntargate īśvarākhye)devāḥ ūcuḥ |deva deva mahādeva śaraṇāgatavatsala |mandāra sundara sumamarandasrāvipatprabha || 1||

महाहिकटकद्योन्तिविद्योताङ्ग महेश्वर ।गरधृक्कण्ठकण्ठीर कुटीभूतजगत्त्रय ॥ २॥

mahāhikaṭakadyontividyotāṅga maheśvara |garadhṛkkaṇṭhakaṇṭhīra kuṭībhūtajagattraya || 2||

विश्वाधिकाशावसन सनातन नमोऽस्तु ते ।गिरीन्द्रजाकुचाश्लेषपुलकाञ्चितविग्रह ॥ ३॥

viśvādhikāśāvasana sanātana namo'stu te |girīndrajākucāśleṣapulakāñcitavigraha || 3||

पतङ्गशिखिसोमादिविलोकन गरादन ।(सूर्याग्निसोमनयनविलोकन गरादन) ।इभवक्त्राब्जलोकार्कविलोकनयनाव्यय ॥ ४॥

pataṅgaśikhisomādivilokana garādana |(sūryāgnisomanayanavilokana garādana) |ibhavaktrābjalokārkavilokanayanāvyaya || 4||

उग्र भीम भवामेय पाहि पाहि महेश्वर ।गजान्धकासुरहर मत्तानङ्गाङ्गनाशक ॥ ५॥

ugra bhīma bhavāmeya pāhi pāhi maheśvara |gajāndhakāsurahara mattānaṅgāṅganāśaka || 5||

महाकैलासनिलय जगद्विलयशङ्कर ।किङ्कराञ्छरणापन्नानापन्नान् पाहि शङ्कर ॥ ६॥

mahākailāsanilaya jagadvilayaśaṅkara |kiṅkarāñcharaṇāpannānāpannān pāhi śaṅkara || 6||

महोक्षध्वज कामारे मां सदा पाहि शङ्कर ।पिनाकपाणे खट्वाङ्गिन् खण्डपर्शो शिवप्रभो ॥ ७॥

mahokṣadhvaja kāmāre māṃ sadā pāhi śaṅkara |pinākapāṇe khaṭvāṅgin khaṇḍaparśo śivaprabho || 7||

व्योमकेश भवामेय दक्षाध्वरनिवारक ।कपालपाणे भगवन् रुद्रानन्त प्रभो हर ॥ ८॥

vyomakeśa bhavāmeya dakṣādhvaranivāraka |kapālapāṇe bhagavan rudrānanta prabho hara || 8||

फणिभूषण शान्तात्मन् कृत्तिवासो महेश्वर ।हिरण्यबाहो देवेश कुण्डलीशविभूषण ॥ ९॥

phaṇibhūṣaṇa śāntātman kṛttivāso maheśvara |hiraṇyabāho deveśa kuṇḍalīśavibhūṣaṇa || 9||

शूलपाणे विश्वमूर्ते वेदवेदान्तबोधित ।कर्पूरगौर गौरीश गङ्गापूरजटाधर ॥ १०॥

śūlapāṇe viśvamūrte vedavedāntabodhita |karpūragaura gaurīśa gaṅgāpūrajaṭādhara || 10||

कृपासागर भावात्मन् शम्भो साम्ब सदाशिव ।त्रिपुरासुरसन्त्रस्तानस्मान् पाहि जगत्प्रभो ॥ ११॥

kṛpāsāgara bhāvātman śambho sāmba sadāśiva |tripurāsurasantrastānasmān pāhi jagatprabho || 11||

॥ इति शिवरहस्यान्तर्गते ब्रह्माविष्ण्वादिदेवैः कृता शिवस्तुतिः २ सम्पूर्णा ॥॥ श्रीशिवरहस्यम् । ईश्वराख्यः दशमांशः । अध्यायः १९ । १११॥

|| iti śivarahasyāntargate brahmāviṣṇvādidevaiḥ kṛtā śivastutiḥ 2 sampūrṇā |||| śrīśivarahasyam | īśvarākhyaḥ daśamāṃśaḥ | adhyāyaḥ 19 | 111||

– ॥ श्रीशिवरहस्यम् ।ईश्वराख्यः दशमांशः ।अध्यायः १९ ।१-११॥

– || śrīśivarahasyam |īśvarākhyaḥ daśamāṃśaḥ |adhyāyaḥ 19 | 1-11||