शिवस्तोत्रम् (ब्रह्मकृतं ०६ स्कन्दपुराणान्तर्गतम् देवदेव तवैश्वर्यं केन शक्येत वेदितुम्) Brahmakritam 06 Shiva Stotram

ब्रह्मोवाच ।देवदेव तवैश्वर्यं केन शक्येत वेदितुम् ।विना भाग्यैक्यसुलभं भवदीयमनुग्रहम् ॥ १॥

brahmovāca |devadeva tavaiśvaryaṃ kena śakyeta veditum |vinā bhāgyaikyasulabhaṃ bhavadīyamanugraham || 1||

अकर्तृकाणि वाक्यानि ऐश्वर्यं ते निरत्ययम् ।न स्तोतुं शक्यते किं तु नमस्कुर्वन्ति दूरतः ॥ २॥

akartṛkāṇi vākyāni aiśvaryaṃ te niratyayam |na stotuṃ śakyate kiṃ tu namaskurvanti dūrataḥ || 2||

को विष्णुः कोऽहमेते वा दिक्पाला वासवादयः ।त्वमेव देव कर्त्तासि जगत्सृजनरक्षयोः ॥ ३॥

ko viṣṇuḥ ko'hamete vā dikpālā vāsavādayaḥ |tvameva deva karttāsi jagatsṛjanarakṣayoḥ || 3||

पतिस्त्वं पार्वतीनाथ पशवो वयमप्यमी ।बद्धं पाशेन मोक्तुं वा त्वमेवास्मान्प्रगल्भसे ॥ ४॥

patistvaṃ pārvatīnātha paśavo vayamapyamī |baddhaṃ pāśena moktuṃ vā tvamevāsmānpragalbhase || 4||

षड्विंशत्तत्त्वरूपस्त्वमभितश्चाभिवर्त्तसे ।कोविदः को विनिर्णेतुं तव याथात्म्यमीश्वरः ॥ ५॥

ṣaḍviṃśattattvarūpastvamabhitaścābhivarttase |kovidaḥ ko vinirṇetuṃ tava yāthātmyamīśvaraḥ || 5||

किरातः किल देवस्त्वं सारमेयैः किलागमैः ।षड्वर्गहिंस्रान्संहर्तुं करोष्याखेटकौतुकम् ॥ ६॥

kirātaḥ kila devastvaṃ sārameyaiḥ kilāgamaiḥ |ṣaḍvargahiṃsrānsaṃhartuṃ karoṣyākheṭakautukam || 6||

देव दक्षाध्वरे पूर्वं वरिभद्रस्त्वदाज्ञया ।कां कां शिक्षामकार्षीन्न इति कापि विडम्बना ॥ ७॥

deva dakṣādhvare pūrvaṃ varibhadrastvadājñayā |kāṃ kāṃ śikṣāmakārṣīnna iti kāpi viḍambanā || 7||

तव कालाग्निरूपस्य सर्वब्रह्माण्डदाहिनः ।पोषणात्पुष्पचापस्य प्रायो जिह्वेति शेमुषी ॥ ८॥

tava kālāgnirūpasya sarvabrahmāṇḍadāhinaḥ |poṣaṇātpuṣpacāpasya prāyo jihveti śemuṣī || 8||

कृतापराधः शूलेन त्वया दीर्णो जलन्धरः ।अन्तकोन्धकदैत्यश्च प्रतिवीरश्च कोऽस्ति ते ॥ ९॥

kṛtāparādhaḥ śūlena tvayā dīrṇo jalandharaḥ |antakondhakadaityaśca prativīraśca ko'sti te || 9||

अधारयिष्यत्कण्ठेन कालकूटं न चेद्भवान् ।कथं च धारयिष्यामो वयं सर्वेऽपि जीवितम् ॥ ३\।२\।१६\।१०॥देवदारुवने पूर्वं मुनीन्केवलकर्मठान् ।प्रक्षोभ्य धूर्तवेषस्त्वं दययान्वग्रहीस्तथा ॥ ११॥

adhārayiṣyatkaṇṭhena kālakūṭaṃ na cedbhavān |kathaṃ ca dhārayiṣyāmo vayaṃ sarve'pi jīvitam || 3\|2\|16\|10||devadāruvane pūrvaṃ munīnkevalakarmaṭhān |prakṣobhya dhūrtaveṣastvaṃ dayayānvagrahīstathā || 11||

अङ्घ्रिणाक्रान्तवान्नो चेदत्युग्रां त्वमपस्मृतिम् ।तयाक्रान्तमिदं कृत्स्नमन्धकारायते जगत् ॥ १२॥

aṅghriṇākrāntavānno cedatyugrāṃ tvamapasmṛtim |tayākrāntamidaṃ kṛtsnamandhakārāyate jagat || 12||

अर्धनारीश्वरं रूपं त्वया चेन्न प्रकाशितम् ।प्रभवामि कथं स्रष्टुं जगदेतच्चराचरम् ॥ १३॥

ardhanārīśvaraṃ rūpaṃ tvayā cenna prakāśitam |prabhavāmi kathaṃ sraṣṭuṃ jagadetaccarācaram || 13||

भवता स्तम्भितः शम्भो संरम्भाज्जम्भजिद्भुजः ।कियन्तं हन्त कालं ते जयस्तम्भ इव स्थितः ॥ १४॥

bhavatā stambhitaḥ śambho saṃrambhājjambhajidbhujaḥ |kiyantaṃ hanta kālaṃ te jayastambha iva sthitaḥ || 14||

भिक्षोः कपालमापूर्य रुधिरेणात्मनो हरिः ।शूलेनोत्क्षिप्य मुमुहे ह्येतत्त्वमवधारय ॥ १५॥

bhikṣoḥ kapālamāpūrya rudhireṇātmano hariḥ |śūlenotkṣipya mumuhe hyetattvamavadhāraya || 15||

न चेदशिक्षयः सर्वशस्त्रास्त्राण्यनुकम्पया ।निर्वापयेत्कथं वैरं क्रुद्धोऽपि जमदग्निभूः ॥ १६॥

na cedaśikṣayaḥ sarvaśastrāstrāṇyanukampayā |nirvāpayetkathaṃ vairaṃ kruddho'pi jamadagnibhūḥ || 16||

नृहरिं शरभाकारः समहार्षीन्न चेद्भवान् ।स एव संहरेद्विश्वं हिरण्यकशिपोरपि ॥ १७॥

nṛhariṃ śarabhākāraḥ samahārṣīnna cedbhavān |sa eva saṃharedviśvaṃ hiraṇyakaśiporapi || 17||

त्वमाचकृक्षः कल्पाब्धौ कैवर्त्तो मत्स्यकच्छपौ ।हरिं बद्ध्वाहिराट्सूत्रैर्नृसिंहमथ सूकरम् ॥ १८॥

tvamācakṛkṣaḥ kalpābdhau kaivartto matsyakacchapau |hariṃ baddhvāhirāṭsūtrairnṛsiṃhamatha sūkaram || 18||

एकोने पद्मसाहस्रे स्वनेत्रेण कृतार्चनम् ।शूलिन्सुदर्शनं दत्त्वा दैत्यद्विषमतूतुषः ॥ १९॥

ekone padmasāhasre svanetreṇa kṛtārcanam |śūlinsudarśanaṃ dattvā daityadviṣamatūtuṣaḥ || 19||

इति श्रीस्कन्दपुराणे माहेश्वरखण्डेऽरुणाचलमाहात्म्येउत्तरार्धे षोडशाध्यायान्तर्गतं ब्रह्मकृतं शिवस्तोत्रंसमाप्तम् ।स्कन्दपुराण । माहेश्वरखण्ड । अरुणाखण्ड । उत्तरखण्ड । अध्याय १६/११९॥स्कन्दपुराण । माहेश्वरखण्ड । अरुणाखण्ड । उत्तरखण्ड । अध्याय १६/१-१९॥

iti śrīskandapurāṇe māheśvarakhaṇḍe'ruṇācalamāhātmyeuttarārdhe ṣoḍaśādhyāyāntargataṃ brahmakṛtaṃ śivastotraṃsamāptam |skandapurāṇa | māheśvarakhaṇḍa | aruṇākhaṇḍa | uttarakhaṇḍa | adhyāya 16/119||skandapurāṇa | māheśvarakhaṇḍa | aruṇākhaṇḍa | uttarakhaṇḍa | adhyāya 16/1-19||