शिवस्तोत्रम् (ब्रह्मकृतं ०५ स्कन्दपुराणान्तर्गतम् अथाहमुच्चरन्वेदानशेषैर्वदनैः शिवम्) Brahmakritam 05 Shiva Stotram

ब्रह्मोवाच ।अथाहमुच्चरन्वेदानशेषैर्वदनैः शिवम् ।अस्तौषं भक्तिसम्पूर्णं कृत्वा मानसमर्चनम् ॥ १॥

brahmovāca |athāhamuccaranvedānaśeṣairvadanaiḥ śivam |astauṣaṃ bhaktisampūrṇaṃ kṛtvā mānasamarcanam || 1||

नमः शिवाय महते सर्वलोकैकहेतवे ।येन प्रकाश्यते सर्वं ध्रियते सततं नमः ॥ २॥

namaḥ śivāya mahate sarvalokaikahetave |yena prakāśyate sarvaṃ dhriyate satataṃ namaḥ || 2||

विश्वव्याप्तमिदं तेजः प्रकाशयति सन्ततम् ।नेक्षन्ते त्वद्दयाहीना जात्यन्धा भास्करं यथा ॥ ३॥

viśvavyāptamidaṃ tejaḥ prakāśayati santatam |nekṣante tvaddayāhīnā jātyandhā bhāskaraṃ yathā || 3||

भूलिङ्गममलं ह्येतद्दृश्यमध्यात्मचक्षुषा ।अन्तस्स्थं वा बहिस्स्थं वा त्वद्भक्तैरनुभूयते ॥ ४॥

bhūliṅgamamalaṃ hyetaddṛśyamadhyātmacakṣuṣā |antassthaṃ vā bahissthaṃ vā tvadbhaktairanubhūyate || 4||

अपरिच्छेद्यमाकारमन्तरात्मनि योगिनः ।तदेतत्तव देवेश ज्वलितं दर्पणो यथा ॥ ५॥

aparicchedyamākāramantarātmani yoginaḥ |tadetattava deveśa jvalitaṃ darpaṇo yathā || 5||

अथवा शाङ्करी शक्तिः सत्याऽणोरप्यणीयसी ।मत्तो नान्यतरः कश्चिद्यन्मय्यपि विलीयते ॥ ६॥

athavā śāṅkarī śaktiḥ satyā'ṇorapyaṇīyasī |matto nānyataraḥ kaścidyanmayyapi vilīyate || 6||

अणुस्ते करुणापात्रं महत्त्वं ध्रुवमश्नुते ।नाधिकोऽस्ति परस्त्वत्तो न मत्तोऽपि तदाश्रयात् ॥ ७॥

aṇuste karuṇāpātraṃ mahattvaṃ dhruvamaśnute |nādhiko'sti parastvatto na matto'pi tadāśrayāt || 7||

त्वय्यर्पितं मनस्त्वतो न वियोगमपेक्षते ।वाचः कथं प्रवृत्तिः स्यात्तव वैभवकीर्त्तने ॥ ६॥

tvayyarpitaṃ manastvato na viyogamapekṣate |vācaḥ kathaṃ pravṛttiḥ syāttava vaibhavakīrttane || 6||

स्वयमीश महादेव प्रसीद भुवनाधिक ।आदिश प्रयतं भक्तमपेक्षितनियुक्तिषु ॥ ९॥

svayamīśa mahādeva prasīda bhuvanādhika |ādiśa prayataṃ bhaktamapekṣitaniyuktiṣu || 9||

इदं विज्ञाप्य विनयान्नमस्कृत्वा पुनःपुनः ।प्राञ्जलिर्देवदेवेशं न्यषीदं सविधे विभो ॥ ३\।१\।२\।१०॥इति श्रीस्कन्दपुराणे माहेश्वरखण्डे, अरुणाचलमाहात्म्ये, पूर्वार्धे,द्वितीयाध्यायान्तर्गतं ब्रह्मकृतं शिवस्तोत्रं समाप्तम् ।स्कन्दपुराण । माहेश्वरखण्ड । अरुणाखण्ड । पूर्वखण्ड । अध्याय २/११०॥स्कन्दपुराण । माहेश्वरखण्ड । अरुणाखण्ड । पूर्वखण्ड । अध्याय २/१-१०॥

idaṃ vijñāpya vinayānnamaskṛtvā punaḥpunaḥ |prāñjalirdevadeveśaṃ nyaṣīdaṃ savidhe vibho || 3\|1\|2\|10||iti śrīskandapurāṇe māheśvarakhaṇḍe, aruṇācalamāhātmye, pūrvārdhe,dvitīyādhyāyāntargataṃ brahmakṛtaṃ śivastotraṃ samāptam |skandapurāṇa | māheśvarakhaṇḍa | aruṇākhaṇḍa | pūrvakhaṇḍa | adhyāya 2/110||skandapurāṇa | māheśvarakhaṇḍa | aruṇākhaṇḍa | pūrvakhaṇḍa | adhyāya 2/1-10||