शारदामहिम्नस्तवः Shri Sharadamahimnastava

शृङ्गाद्रिवासाय विधिप्रियाय कारुण्यवाराम्बुधये नताय ।विज्ञानदायाखिलभोगदाय श्रीशारदाख्याय नमो महिम्ने ॥ १॥

śṛṅgādrivāsāya vidhipriyāya kāruṇyavārāmbudhaye natāya |vijñānadāyākhilabhogadāya śrīśāradākhyāya namo mahimne || 1||

तुङ्गातटावासकृतादराय भृङ्गालिविद्वेषिकचोज्ज्वलाय ।अङ्गाधरीभूतमनोज्ञहेम्ने शृङ्गारसीम्नेऽस्तु नमो महिम्ने ॥ २॥

tuṅgātaṭāvāsakṛtādarāya bhṛṅgālividveṣikacojjvalāya |aṅgādharībhūtamanojñahemne śṛṅgārasīmne'stu namo mahimne || 2||

वीणालसत्पाणिसरोरुहाय शोणाधरायाखिलभाग्यदाय ।काणादशास्त्रप्रमुखेषु चण्डप्रज्ञाप्रदायास्तु नमो महिम्ने ॥ ३॥

vīṇālasatpāṇisaroruhāya śoṇādharāyākhilabhāgyadāya |kāṇādaśāstrapramukheṣu caṇḍaprajñāpradāyāstu namo mahimne || 3||

चन्द्रप्रभायेशसहोदराय चन्द्रार्भकालङ्कृतमस्तकाय ।इन्द्रादिदेवोत्तमपूजिताय कारुण्यसान्द्राय नमो महिम्ने ॥ ४॥

candraprabhāyeśasahodarāya candrārbhakālaṅkṛtamastakāya |indrādidevottamapūjitāya kāruṇyasāndrāya namo mahimne || 4||

इति श्रीसच्चिदानन्दशिवाभिनवनृसिंहभारतीस्वामिभिःविरचितः श्रीशारदामहिम्नस्तवः ।

iti śrīsaccidānandaśivābhinavanṛsiṃhabhāratīsvāmibhiḥviracitaḥ śrīśāradāmahimnastavaḥ |