रामाष्टकम् २ Shriramashtakam 2

(प्रमाणिका छन्दः)कृतार्तदेववन्दनं दिनेशवंशनन्दनम् ।सुशोभिभालचन्दनं नमामि राममीश्वरम् ॥ १॥

(pramāṇikā chandaḥ)kṛtārtadevavandanaṃ dineśavaṃśanandanam |suśobhibhālacandanaṃ namāmi rāmamīśvaram || 1||

मुनीन्द्रयज्ञकारकं शिलाविपत्तिहारकम् ।महाधनुर्विदारकं नमामि राममीश्वरम् ॥ २॥

munīndrayajñakārakaṃ śilāvipattihārakam |mahādhanurvidārakaṃ namāmi rāmamīśvaram || 2||

स्वतातवाक्यकारिणं तपोवने विहारिणम् ।करे सुचापधारिणं नमामि राममीश्वरम् ॥ ३॥

svatātavākyakāriṇaṃ tapovane vihāriṇam |kare sucāpadhāriṇaṃ namāmi rāmamīśvaram || 3||

कुरङ्गमुक्तसायकं जटायुमोक्षदायकम् ।प्रविद्धकीशनायकं नमामि राममीश्वरम् ॥ ४॥

kuraṅgamuktasāyakaṃ jaṭāyumokṣadāyakam |praviddhakīśanāyakaṃ namāmi rāmamīśvaram || 4||

प्लवङ्गसङ्गसम्मतिं निबद्धनिम्नगापतिम् ।दशास्यवंशसङ्क्षतिं नमामि राममीश्वरम् ॥ ५॥

plavaṅgasaṅgasammatiṃ nibaddhanimnagāpatim |daśāsyavaṃśasaṅkṣatiṃ namāmi rāmamīśvaram || 5||

विदीनदेवहर्षणं कपीप्सितार्थवर्षणम् ।स्वबन्धुशोककर्षणं नमामि राममीश्वरम् ॥ ६॥

vidīnadevaharṣaṇaṃ kapīpsitārthavarṣaṇam |svabandhuśokakarṣaṇaṃ namāmi rāmamīśvaram || 6||

गतारिराज्यरक्षणं प्रजाजनार्तिभक्षणम् ।कृतास्तमोहलक्षणं नमामि राममीश्वरम् ॥ ७॥

gatārirājyarakṣaṇaṃ prajājanārtibhakṣaṇam |kṛtāstamohalakṣaṇaṃ namāmi rāmamīśvaram || 7||

हृताखिलाचलाभरं स्वधामनीतनागरम् ।जगत्तमोदिवाकरं नमामि राममीश्वरम् ॥ ८॥

hṛtākhilācalābharaṃ svadhāmanītanāgaram |jagattamodivākaraṃ namāmi rāmamīśvaram || 8||

इदं समाहितात्मना नरो रघूत्तमाष्टकम् ।पठन्निरन्तरं भयं भवोद्भवं न विन्दते ॥ ९॥

idaṃ samāhitātmanā naro raghūttamāṣṭakam |paṭhannirantaraṃ bhayaṃ bhavodbhavaṃ na vindate || 9||

॥ इति श्रीपरमहंसस्वामिब्रह्मानन्दविरचितं श्रीरामाष्टकं सम्पूर्णम् ॥

|| iti śrīparamahaṃsasvāmibrahmānandaviracitaṃ śrīrāmāṣṭakaṃ sampūrṇam ||