प्रपन्नसर्वस्वं Prapannasarvasvam

सीतानाथसमारम्भां व्यासबोधायनान्विताम् ।अस्मदाचार्यपर्यन्तां वन्दे गुरुपरम्पराम् ॥ १॥

sītānāthasamārambhāṃ vyāsabodhāyanānvitām |asmadācāryaparyantāṃ vande guruparamparām || 1||

श्रियानन्दं गुरुं नत्वा कृत्वा श्रीरामवन्दनम् ।प्रपन्नसर्वस्वं हि कुर्वे सर्वार्थसाधकम् ॥ २॥

śriyānandaṃ guruṃ natvā kṛtvā śrīrāmavandanam |prapannasarvasvaṃ hi kurve sarvārthasādhakam || 2||

पुत्रे च रक्षकत्वस्य विश्वासो नैव जायते ।स्वपितुः प्रतिकूले हि रुद्रादौ व्यभिचारतः ॥ ३॥

putre ca rakṣakatvasya viśvāso naiva jāyate |svapituḥ pratikūle hi rudrādau vyabhicārataḥ || 3||

भ्रातृणां रक्षकत्वेऽपि सन्देहो विद्यते खलु ।भ्रातरि रावणादेश्च रक्षकत्वाविलोकनात् ॥ ४॥

bhrātṛṇāṃ rakṣakatve'pi sandeho vidyate khalu |bhrātari rāvaṇādeśca rakṣakatvāvilokanāt || 4||

प्रह्लादजनके यस्माद् व्यभिचारः प्रदृश्यते ।पुत्रस्य जनके तस्मात् सन्दिग्धं रक्षणं मतम् ॥ ५॥

prahlādajanake yasmād vyabhicāraḥ pradṛśyate |putrasya janake tasmāt sandigdhaṃ rakṣaṇaṃ matam || 5||

जनन्यां भरतस्याथ दृष्टं न पुत्ररक्षणम् ।सन्दिग्धा पुत्ररक्षा तत् मातुश्चापि मता बुधैः ॥ ६॥

jananyāṃ bharatasyātha dṛṣṭaṃ na putrarakṣaṇam |sandigdhā putrarakṣā tat mātuścāpi matā budhaiḥ || 6||

दमयन्त्यादिरक्षाया नलादौ व्यभिचारिता ।पत्नीरक्षापि पत्यौ तत् सन्दिग्धत्वमुपैति हि ॥ ७॥

damayantyādirakṣāyā nalādau vyabhicāritā |patnīrakṣāpi patyau tat sandigdhatvamupaiti hi || 7||

रक्षा न निश्चिता तस्माद् विद्यते सूर्यचन्द्रयोः ।ईशस्य रावणादेश्च तयोर्यद् वशवर्तिता ॥ ८॥

rakṣā na niścitā tasmād vidyate sūryacandrayoḥ |īśasya rāvaṇādeśca tayoryad vaśavartitā || 8||

ब्रह्महत्याभिभूतत्वाच्छप्तत्वाद् भीतितोऽपि च ।याति सन्देहमिन्द्रस्य रक्षणं सुररक्षिणः ॥ ९॥

brahmahatyābhibhūtatvācchaptatvād bhītito'pi ca |yāti sandehamindrasya rakṣaṇaṃ surarakṣiṇaḥ || 9||

स्वपितुश्च शिरश्छेदाद् रुद्रस्य क्रूरकर्मणः ।रक्षणे न हि विश्वासो जायतेऽथ कथञ्चन ॥ १०॥

svapituśca śiraśchedād rudrasya krūrakarmaṇaḥ |rakṣaṇe na hi viśvāso jāyate'tha kathañcana || 10||

रुद्रेण छिन्नशीर्षत्वाद् दैत्याभ्यां क्लेशनादथ ।परमं संशयं यातं ब्रह्मणश्चापि रक्षणम् ॥ ११॥

rudreṇa chinnaśīrṣatvād daityābhyāṃ kleśanādatha |paramaṃ saṃśayaṃ yātaṃ brahmaṇaścāpi rakṣaṇam || 11||

तस्करैरपहार्यत्वाद् रक्षणं न मतं घने ।व्याधिभिश्चाभिनाश्यत्वाद् बलं चापि न रक्षकम् ॥ १२॥

taskarairapahāryatvād rakṣaṇaṃ na mataṃ ghane |vyādhibhiścābhināśyatvād balaṃ cāpi na rakṣakam || 12||

प्रह्लादमुनिसीतासु सुग्रीवे च विभीषणे ।अन्यत्रापि च दृष्टं ते रक्षणं राम निश्चतम् ॥ १३॥

prahlādamunisītāsu sugrīve ca vibhīṣaṇe |anyatrāpi ca dṛṣṭaṃ te rakṣaṇaṃ rāma niścatam || 13||

ज्ञानं नास्ति न कर्मास्ति भक्तिश्चापि न विद्यते ।भाजनं चास्मि दोषाणां पाहि मां रघुनन्दन ॥ १४॥

jñānaṃ nāsti na karmāsti bhaktiścāpi na vidyate |bhājanaṃ cāsmi doṣāṇāṃ pāhi māṃ raghunandana || 14||

त्वां विना मे गतिर्नास्ति राम ! दुःखविघातक ।प्रपद्याहं स्थितो नाथ यथेच्छसि तथा कुरु ॥ १५॥

tvāṃ vinā me gatirnāsti rāma ! duḥkhavighātaka |prapadyāhaṃ sthito nātha yathecchasi tathā kuru || 15||

श्रियानन्दार्यशिष्यश्रीहर्यानन्दार्यनिर्मितम् ।इदं प्रपन्नसर्वस्वं भूयात् सर्वस्वदायकम् ॥ १६॥

śriyānandāryaśiṣyaśrīharyānandāryanirmitam |idaṃ prapannasarvasvaṃ bhūyāt sarvasvadāyakam || 16||

इति प्रतिपक्षिभयङ्कर जगद्गुरु श्रीहर्यानन्दाचार्यसिद्धशिरोमणि प्रणीतं प्रपन्नसर्वस्वं सम्पूर्णम् ।

iti pratipakṣibhayaṅkara jagadguru śrīharyānandācāryasiddhaśiromaṇi praṇītaṃ prapannasarvasvaṃ sampūrṇam |