उमाष्टोत्तरशतनामस्तोत्रम् Umashtottarashatanamastotram

श्रीगणेशाय नमः ।श्रीउमामहेश्वराभ्यां नमः ।पातु नः पार्वती दुर्गा हैमवत्यम्बिका शुभा ।शिवा भवानी रुद्राणी शङ्करार्धशरीरिणी ॥ १॥

śrīgaṇeśāya namaḥ |śrīumāmaheśvarābhyāṃ namaḥ |pātu naḥ pārvatī durgā haimavatyambikā śubhā |śivā bhavānī rudrāṇī śaṅkarārdhaśarīriṇī || 1||

ॐ उमा कात्यायनी गौरी काली हैमवतीश्वरी ।शिवा भवानी रुद्राणी शर्वाणी सर्वमङ्गला ॥ २॥

oṃ umā kātyāyanī gaurī kālī haimavatīśvarī |śivā bhavānī rudrāṇī śarvāṇī sarvamaṅgalā || 2||

अपर्णा पार्वती दुर्गा मृडानी चण्डिकाऽम्बिका ।आर्या दाक्षायणी चैव गिरिजा मेनकात्मजा ॥ ३॥

aparṇā pārvatī durgā mṛḍānī caṇḍikā'mbikā |āryā dākṣāyaṇī caiva girijā menakātmajā || 3||

स्कन्दामाता दयाशीलासुन्दरी भक्तरक्षका ।भक्तवश्या च लावण्यनिधिः सर्वसुखप्रदा ॥ ४॥

skandāmātā dayāśīlāsundarī bhaktarakṣakā |bhaktavaśyā ca lāvaṇyanidhiḥ sarvasukhapradā || 4||

महादेवी भक्तमनोह्वलादिनी कठिनस्तनी ।कमलाक्षी दयासारा कामाक्षी नित्ययौवना ॥ ५॥

mahādevī bhaktamanohvalādinī kaṭhinastanī |kamalākṣī dayāsārā kāmākṣī nityayauvanā || 5||

सर्वसम्पत्प्रदा कान्ता सर्वसंमोहिनी मही ।शुभप्रिया कम्बुकण्ठी कल्याणी कमलप्रिया ॥ ६॥

sarvasampatpradā kāntā sarvasaṃmohinī mahī |śubhapriyā kambukaṇṭhī kalyāṇī kamalapriyā || 6||

सर्वेश्वरी च कमलहस्ताविष्णुसहोदरी ।वीणावादप्रिया सर्वदेवसम्पूजिताङ्घ्रिका ॥ ७॥

sarveśvarī ca kamalahastāviṣṇusahodarī |vīṇāvādapriyā sarvadevasampūjitāṅghrikā || 7||

कदम्बारण्यनिलया विन्ध्याचलनिवासिनी ।हरप्रिया कामकोटिपीठस्था वाञ्छितार्थदा ॥ ८॥

kadambāraṇyanilayā vindhyācalanivāsinī |harapriyā kāmakoṭipīṭhasthā vāñchitārthadā || 8||

श्यामाङ्गा चन्द्रवदना सर्ववेदस्वरूपिणी ।सर्वशास्त्रस्वरूपाच सर्वदेवमयी तथा ॥ ९॥

śyāmāṅgā candravadanā sarvavedasvarūpiṇī |sarvaśāstrasvarūpāca sarvadevamayī tathā || 9||

पुरुहूतस्तुता देवी सर्ववेद्या गुणप्रिया ।पुण्यस्वरूपिणी वेद्या पुरुहूतस्वरूपिणी ॥ १०॥

puruhūtastutā devī sarvavedyā guṇapriyā |puṇyasvarūpiṇī vedyā puruhūtasvarūpiṇī || 10||

पुण्योदया निराधारा शुनासीरादिपूजिता ।नित्यपूर्णा मनोगम्या निर्मलाऽऽनन्दपूरिता ॥ ११॥

puṇyodayā nirādhārā śunāsīrādipūjitā |nityapūrṇā manogamyā nirmalā''nandapūritā || 11||

वागीश्वरी नीतिमती मञ्जुला मङ्गलप्रदा ।वाग्मिनी वञ्जुला वन्द्या वयोऽवस्थाविवर्जिता ॥ १२॥

vāgīśvarī nītimatī mañjulā maṅgalapradā |vāgminī vañjulā vandyā vayo'vasthāvivarjitā || 12||

वाचस्पतिर्महालक्ष्मीर्महामङ्गलनायिका ।सिंहासनमयी सृष्टिस्थितिसंहारकारिणी ॥ १३॥

vācaspatirmahālakṣmīrmahāmaṅgalanāyikā |siṃhāsanamayī sṛṣṭisthitisaṃhārakāriṇī || 13||

महायज्ञानेत्ररूपा सावित्री ज्ञानरूपिणी ।वररूपधरायोगा मनोवाचामगोचरा ॥ १४॥

mahāyajñānetrarūpā sāvitrī jñānarūpiṇī |vararūpadharāyogā manovācāmagocarā || 14||

दयारूपा च कालज्ञा शिवधर्मपरायणा ।वज्रशक्तिधरा चैव सूक्ष्माङ्गी प्राणधारिणी ॥ १५॥

dayārūpā ca kālajñā śivadharmaparāyaṇā |vajraśaktidharā caiva sūkṣmāṅgī prāṇadhāriṇī || 15||

हिमशैलकुमारी च शरणागतरक्षिणी ।सर्वागमस्वरूपा च दक्षिणा शङ्करप्रिया ॥ १६॥

himaśailakumārī ca śaraṇāgatarakṣiṇī |sarvāgamasvarūpā ca dakṣiṇā śaṅkarapriyā || 16||

दयाधारा महानागधारिणी त्रिपुरभैरवी ।नवीनचन्द्रचूडस्य प्रिया त्रिपुरसुन्दरी ॥ १७॥

dayādhārā mahānāgadhāriṇī tripurabhairavī |navīnacandracūḍasya priyā tripurasundarī || 17||

नाम्नामष्टोत्तरशतं उमायाः कीर्तितं सकृत् ।शान्तिदं कीर्तिदं लक्ष्मीयशोमेधाप्रदायकम् ॥ १८॥

nāmnāmaṣṭottaraśataṃ umāyāḥ kīrtitaṃ sakṛt |śāntidaṃ kīrtidaṃ lakṣmīyaśomedhāpradāyakam || 18||

॥ इति श्रीउमाऽष्टोत्तरशतनामस्तोत्रं सम्पूर्णम् ॥

|| iti śrīumā'ṣṭottaraśatanāmastotraṃ sampūrṇam ||