कार्कोटकम् Shri Karkotakam

त्रिभुवनजयविहारी विहरतु हृदि वो महाकालः ।गिरिवरतनयाकुचतटविलुठितनयनत्रयीसुभगः ॥ १॥

tribhuvanajayavihārī viharatu hṛdi vo mahākālaḥ |girivaratanayākucataṭaviluṭhitanayanatrayīsubhagaḥ || 1||

कार्कोटकेश्वरो जीयादर्ककोटिनिभप्रभः ।कर्कशेतरसौभाग्यतर्कदुर्ग्रहविग्रहः ॥ २॥

kārkoṭakeśvaro jīyādarkakoṭinibhaprabhaḥ |karkaśetarasaubhāgyatarkadurgrahavigrahaḥ || 2||

कार्कोटकेश्वरस्यास्तु स्वस्ति तस्यै वपुःश्रियै ।कर्कोटकादयो यस्यै शेषेण सह शेरते ॥ ३॥

kārkoṭakeśvarasyāstu svasti tasyai vapuḥśriyai |karkoṭakādayo yasyai śeṣeṇa saha śerate || 3||

कार्कोटकेश्वरं पश्य करुणावरुणालयम् ।लक्ष्मीविलोकिते यस्य विषं कण्ठे विजृम्भते ॥ ४॥

kārkoṭakeśvaraṃ paśya karuṇāvaruṇālayam |lakṣmīvilokite yasya viṣaṃ kaṇṭhe vijṛmbhate || 4||

कार्कोटकेश्वरो देवः कामान् कस्य न वर्षति ।कामदाहमनुस्मृत्य पश्चात्तापवशादिव ॥ ५॥

kārkoṭakeśvaro devaḥ kāmān kasya na varṣati |kāmadāhamanusmṛtya paścāttāpavaśādiva || 5||

कार्कोटकेश्वरं नाम कल्पकद्रुममाद्रिये ।कनं किसलयं यस्य कराङ्घ्रिदशनच्छदम् ॥ ६॥

kārkoṭakeśvaraṃ nāma kalpakadrumamādriye |kanaṃ kisalayaṃ yasya karāṅghridaśanacchadam || 6||

कार्कोटकेश्वरं वन्दे कन्दं कमपि जन्मिनाम् ।धन्या यमुपजीवन्ति तपसा क्लान्तमानसाः ॥ ७॥

kārkoṭakeśvaraṃ vande kandaṃ kamapi janminām |dhanyā yamupajīvanti tapasā klāntamānasāḥ || 7||

कार्कोटकेश्वरं देवं के वा कैवल्यवर्षिणम् ।कामदेहिनमालम्ब्य कृतार्थपदलङ्घिताः ॥ ८॥

kārkoṭakeśvaraṃ devaṃ ke vā kaivalyavarṣiṇam |kāmadehinamālambya kṛtārthapadalaṅghitāḥ || 8||

कार्कोटकेश्वरं चेतः कदा नु मम गाहते ।यस्मिन् विस्मयमापन्ना यतयः श्रुतयोऽपि च ॥ ९॥

kārkoṭakeśvaraṃ cetaḥ kadā nu mama gāhate |yasmin vismayamāpannā yatayaḥ śrutayo'pi ca || 9||

कार्कोटकेश्वरं धीरा गाहन्ते हन्त चेतसा ।नादिर्यस्य न चाप्यन्तो नापि मध्यं सुखाम्बुधेः ॥ १०॥

kārkoṭakeśvaraṃ dhīrā gāhante hanta cetasā |nādiryasya na cāpyanto nāpi madhyaṃ sukhāmbudheḥ || 10||

कार्कोटकेश्वरभवं नवरत्नमेतत्इष्टामभीष्टमभिवर्षतु चाश्रितानाम् ।किञ्च प्रपञ्चपरिलङ्घिमहासुखोर्मिमात्मीयमुक्तिमुपदर्शय मोक्षलक्ष्मीम् ॥ ११॥

kārkoṭakeśvarabhavaṃ navaratnametatiṣṭāmabhīṣṭamabhivarṣatu cāśritānām |kiñca prapañcaparilaṅghimahāsukhormimātmīyamuktimupadarśaya mokṣalakṣmīm || 11||

इति श्रीकृष्णलीलाशुकमहाकविमुनिविरचितं श्रीकार्कोटकं सम्पूर्णम् ।

iti śrīkṛṣṇalīlāśukamahākavimuniviracitaṃ śrīkārkoṭakaṃ sampūrṇam |