सूर्यमाहात्म्यम् Surya Mahatmyam

यस्योदयास्तसमये शिवाद्या अपि चाञ्जलिम् ।बध्नन्ति विश्वसाक्षी स प्रत्यक्षः श्रूयते रविः ॥ १॥

yasyodayāstasamaye śivādyā api cāñjalim |badhnanti viśvasākṣī sa pratyakṣaḥ śrūyate raviḥ || 1||

यदधीना कालगतिर्यदधीनाः क्रियाः समाः ।यन्मन्त्रेण द्विजत्वाप्तिर्यन्मन्त्रेण कृतार्थता ॥ २॥

yadadhīnā kālagatiryadadhīnāḥ kriyāḥ samāḥ |yanmantreṇa dvijatvāptiryanmantreṇa kṛtārthatā || 2||

लौकिक्यपि व्यवहृतिर्यत्प्रसादात्प्रवर्तते ।स्मर्यतेऽस्माद्विश्वसृष्टिः सवितुः श्रूयतेऽपि च ॥ ३॥

laukikyapi vyavahṛtiryatprasādātpravartate |smaryate'smādviśvasṛṣṭiḥ savituḥ śrūyate'pi ca || 3||

जगतस्तस्थुषश्चात्मा सूर्यस्तं बहुधा जगुः ।मूर्तामूर्तं जगत्सर्वं प्राणापानात्मकं श्रुतम् ॥ ४॥

jagatastasthuṣaścātmā sūryastaṃ bahudhā jaguḥ |mūrtāmūrtaṃ jagatsarvaṃ prāṇāpānātmakaṃ śrutam || 4||

प्राणः सूर्योऽपरश्चन्द्रस्तयोः सर्वं प्रतिष्ठितम् ।श्रीसूर्यकिरणावेशाच्चन्द्रस्यापि च चन्द्रता ॥ ५॥

prāṇaḥ sūryo'paraścandrastayoḥ sarvaṃ pratiṣṭhitam |śrīsūryakiraṇāveśāccandrasyāpi ca candratā || 5||

अतश्चन्द्रो न भिन्नोऽस्मात्स सूर्यः सकलात्मकः ।यं विना जगदान्ध्यं हि स देवः कैर्न पूज्यते ॥ ६॥

ataścandro na bhinno'smātsa sūryaḥ sakalātmakaḥ |yaṃ vinā jagadāndhyaṃ hi sa devaḥ kairna pūjyate || 6||

तमोऽमुं ग्रसतीत्येष दृष्टवादो न तात्त्विकः ।तस्माद्भक्तेष्टदो देवो वरोऽर्कश्चापराजितः ॥ ७॥

tamo'muṃ grasatītyeṣa dṛṣṭavādo na tāttvikaḥ |tasmādbhakteṣṭado devo varo'rkaścāparājitaḥ || 7||

इति श्रीवासुदेवानन्दसरस्वतीविरचितं सूर्यमाहात्म्यं सम्पूर्णम् ।

iti śrīvāsudevānandasarasvatīviracitaṃ sūryamāhātmyaṃ sampūrṇam |