महालक्ष्मीस्तवकवचपूजा Shri Mahalakshmi stavakavachapuja

श्रीगणेशाय नमः ।नारद उवाच ।आविर्भूय हरिस्तस्मै किं स्तोत्रं कवचं ददौ ।महालक्ष्म्याश्च लक्ष्मीशस्तन्मे ब्रूहि तपोधन ॥ १॥

śrīgaṇeśāya namaḥ |nārada uvāca |āvirbhūya haristasmai kiṃ stotraṃ kavacaṃ dadau |mahālakṣmyāśca lakṣmīśastanme brūhi tapodhana || 1||

नारायण उवाच ।पुष्करे च तपस्तप्त्वा विरराम सुरेश्वरः ।आविर्बभूव तत्रैव क्लिष्टं दृष्ट्वा हरिः स्वयम् ॥ २॥

nārāyaṇa uvāca |puṣkare ca tapastaptvā virarāma sureśvaraḥ |āvirbabhūva tatraiva kliṣṭaṃ dṛṣṭvā hariḥ svayam || 2||

तमुवाच हृषीकेशो वरं वृणु यथेप्सितम् ।स च वव्रे वरं लक्ष्मीमीशस्तस्मै ददौ मुदा ॥ ३॥

tamuvāca hṛṣīkeśo varaṃ vṛṇu yathepsitam |sa ca vavre varaṃ lakṣmīmīśastasmai dadau mudā || 3||

वरं दत्त्वा हृषीकेशः प्रवक्तुमुपचक्रमे ।हितं सत्यं च सारं च परिणामसुखावहम् ॥ ४॥

varaṃ dattvā hṛṣīkeśaḥ pravaktumupacakrame |hitaṃ satyaṃ ca sāraṃ ca pariṇāmasukhāvaham || 4||

मधुसूदन उवाच ।गृहाण कवचं शक्र सर्वदुःखविनाशनम् ।परमैश्वर्यजनकं सर्वशत्रुविमर्दनम् ॥ ५॥

madhusūdana uvāca |gṛhāṇa kavacaṃ śakra sarvaduḥkhavināśanam |paramaiśvaryajanakaṃ sarvaśatruvimardanam || 5||

ब्रह्मणे च पुरा दत्तं विष्टपे च जलप्लुते ।यद्धृत्वा जगतां श्रेष्ठः सर्वैश्वर्ययुतो विधिः ॥ ६॥

brahmaṇe ca purā dattaṃ viṣṭape ca jalaplute |yaddhṛtvā jagatāṃ śreṣṭhaḥ sarvaiśvaryayuto vidhiḥ || 6||

बभूवुर्मनवः सर्वे सर्वैश्वर्ययुता यतः ।सर्वैश्वर्यप्रदस्यास्य कवचस्य ऋषिर्विधिः ॥ ७॥

babhūvurmanavaḥ sarve sarvaiśvaryayutā yataḥ |sarvaiśvaryapradasyāsya kavacasya ṛṣirvidhiḥ || 7||

पङ्क्तिश्छन्दश्च सा देवी स्वयं पद्मालया वरा ।सिद्ध्यैश्वर्यसुखेष्वेव विनियोगः प्रकीर्तितः ॥ ८॥

paṅktiśchandaśca sā devī svayaṃ padmālayā varā |siddhyaiśvaryasukheṣveva viniyogaḥ prakīrtitaḥ || 8||

यद्धृत्वा कवचं लोकः सर्वत्र विजयी भवेत् ।मस्तकं पातु मे पद्मा कण्ठं पातु हरिप्रिया ॥ ९॥

yaddhṛtvā kavacaṃ lokaḥ sarvatra vijayī bhavet |mastakaṃ pātu me padmā kaṇṭhaṃ pātu haripriyā || 9||

नासिकां पातु मे लक्ष्मीः कमला पातु लोचने ।केशान्केशवकान्ता च कपालं कमलालया ॥ १०॥

nāsikāṃ pātu me lakṣmīḥ kamalā pātu locane |keśānkeśavakāntā ca kapālaṃ kamalālayā || 10||

जगत्प्रसूर्गण्डयुग्मं स्कन्धं सम्पत्प्रदा सदा ।ॐ श्रीं कमलवासिन्यै स्वाहा पृष्ठं सदाऽवतु ॥ ११॥

jagatprasūrgaṇḍayugmaṃ skandhaṃ sampatpradā sadā |oṃ śrīṃ kamalavāsinyai svāhā pṛṣṭhaṃ sadā'vatu || 11||

ॐ ह्रीं श्रीं पद्मालयायै स्वाहा वक्षः सदाऽवतु ।पातु श्रीर्मम कङ्कालं बाहुयुग्मं च ते नमः ॥ १२॥

oṃ hrīṃ śrīṃ padmālayāyai svāhā vakṣaḥ sadā'vatu |pātu śrīrmama kaṅkālaṃ bāhuyugmaṃ ca te namaḥ || 12||

ॐ ह्रीं श्रीं लक्ष्म्यै नमः पादौ पातु मे सन्ततं चिरम् ।ॐ ह्रीं श्रीं नमः पद्मायै स्वाहा पातु नितम्बकम् ॥ १३॥

oṃ hrīṃ śrīṃ lakṣmyai namaḥ pādau pātu me santataṃ ciram |oṃ hrīṃ śrīṃ namaḥ padmāyai svāhā pātu nitambakam || 13||

ॐ श्रीं महालक्ष्म्यै स्वाहा सर्वाङ्गं पातु मे सदा ।ॐ ह्रीं श्रीं क्लीं महालक्ष्म्यै स्वाहा मां पातु सर्वतः ॥ १४॥

oṃ śrīṃ mahālakṣmyai svāhā sarvāṅgaṃ pātu me sadā |oṃ hrīṃ śrīṃ klīṃ mahālakṣmyai svāhā māṃ pātu sarvataḥ || 14||

इति ते कथितं वत्स सर्वसम्पत्करं परम् ।सर्वैश्वर्यप्रदं नाम कवचं परमाद्भुतम् ॥ १५॥

iti te kathitaṃ vatsa sarvasampatkaraṃ param |sarvaiśvaryapradaṃ nāma kavacaṃ paramādbhutam || 15||

गुरुमभ्यर्च्य विधिवत्कवचं धारयेत्तु यः ।कण्ठे वा दक्षिणे बाहौ स सर्वविजयी भवेत् ॥ १६॥

gurumabhyarcya vidhivatkavacaṃ dhārayettu yaḥ |kaṇṭhe vā dakṣiṇe bāhau sa sarvavijayī bhavet || 16||

महालक्ष्मीर्गृहं तस्य न जहाति कदाचन ।तस्यच्छायेव सततं सा च जन्मनि जन्मनि ॥ १७॥

mahālakṣmīrgṛhaṃ tasya na jahāti kadācana |tasyacchāyeva satataṃ sā ca janmani janmani || 17||

इदं कवचमज्ञात्वा भजेल्लक्ष्मीं स मन्दधीः ।शतलक्षप्रजापेऽपि न मन्त्रः सिद्धिदायकः ॥ १८॥

idaṃ kavacamajñātvā bhajellakṣmīṃ sa mandadhīḥ |śatalakṣaprajāpe'pi na mantraḥ siddhidāyakaḥ || 18||

नारायण उवाच ।दत्त्वा तस्मै च कवचं मन्त्रं वै षोडशाक्षरम् ।सन्तुष्टश्च जगन्नाथो जगतां हितकारणम् ॥ १९॥

nārāyaṇa uvāca |dattvā tasmai ca kavacaṃ mantraṃ vai ṣoḍaśākṣaram |santuṣṭaśca jagannātho jagatāṃ hitakāraṇam || 19||

ॐ ह्रीं श्रीं क्लीं नमो महालक्ष्म्यै स्वाहा ।ददौ तस्मै च कृपया चेन्द्राय च महामुने ॥ २०॥

oṃ hrīṃ śrīṃ klīṃ namo mahālakṣmyai svāhā |dadau tasmai ca kṛpayā cendrāya ca mahāmune || 20||

ध्यानं च सामवेदोक्तं गोपनीयं सुदुर्लभम् ।सिद्धैर्मुनीन्द्रैर्दुष्प्राप्यं ध्रुवं सिद्धिप्रदं शुभम् ॥ २१॥

dhyānaṃ ca sāmavedoktaṃ gopanīyaṃ sudurlabham |siddhairmunīndrairduṣprāpyaṃ dhruvaṃ siddhipradaṃ śubham || 21||

श्वेतचम्पकवर्णाभां शतचन्द्रसमप्रभाम् ।वह्निशुद्धांशुकाधानां रत्नभूषणभूषिताम् ॥ २२॥

śvetacampakavarṇābhāṃ śatacandrasamaprabhām |vahniśuddhāṃśukādhānāṃ ratnabhūṣaṇabhūṣitām || 22||

ईषद्धास्यप्रसन्नास्यां भक्तानुग्रहकारिकाम् ।कस्तूरीबिन्दुमध्यस्थं सिन्दूरं भूषणं तथा ॥ २३॥

īṣaddhāsyaprasannāsyāṃ bhaktānugrahakārikām |kastūrībindumadhyasthaṃ sindūraṃ bhūṣaṇaṃ tathā || 23||

अमूल्यरत्नरचितकुण्डलोज्ज्वलभूषणम् ।बिम्रती कबरीभारं मालतीमाल्यशोभितम् ॥ २४॥

amūlyaratnaracitakuṇḍalojjvalabhūṣaṇam |bimratī kabarībhāraṃ mālatīmālyaśobhitam || 24||

सहस्रदलपद्मस्थां स्वस्थां च सुमनोहराम् ।शान्तां च श्रीहरेः कान्तां तां भजेज्जगतां प्रसूम् ॥ २५॥

sahasradalapadmasthāṃ svasthāṃ ca sumanoharām |śāntāṃ ca śrīhareḥ kāntāṃ tāṃ bhajejjagatāṃ prasūm || 25||

ध्यानेनानेन देवेन्द्रो ध्यात्वा लक्ष्मीं मनोहराम् ।भक्त्या सम्पूज्य तस्यै च चोपचारांस्तु षोडश ॥ २६॥

dhyānenānena devendro dhyātvā lakṣmīṃ manoharām |bhaktyā sampūjya tasyai ca copacārāṃstu ṣoḍaśa || 26||

स्तुत्वाऽनेन स्तवेनैव वक्ष्यमाणेन वासव ।नत्वा वरं गृहीत्वा च लभिष्यसि च निर्वृतिम् ॥ २७॥

stutvā'nena stavenaiva vakṣyamāṇena vāsava |natvā varaṃ gṛhītvā ca labhiṣyasi ca nirvṛtim || 27||

स्तवनं शृणु देवेन्द्र महालक्ष्म्याः सुखप्रदम् ।कथयामि सुगोप्यं च त्रिषु लोकेषु दुर्लभम् ॥ २८॥

stavanaṃ śṛṇu devendra mahālakṣmyāḥ sukhapradam |kathayāmi sugopyaṃ ca triṣu lokeṣu durlabham || 28||

नारायण उवाच ।देवि त्वां स्तोतुमिच्छामि न क्षमाः स्तोतुमीश्वराः ।बुद्धेरगोचरां सूक्ष्मां तेजोरूपां सनातनीम् ।अत्यनिर्वचनीयां च को वा निर्वक्तुमीश्वरः ॥ २९॥

nārāyaṇa uvāca |devi tvāṃ stotumicchāmi na kṣamāḥ stotumīśvarāḥ |buddheragocarāṃ sūkṣmāṃ tejorūpāṃ sanātanīm |atyanirvacanīyāṃ ca ko vā nirvaktumīśvaraḥ || 29||

स्वेच्छामयीं निराकारां भक्तानुग्रहविग्रहाम् ।स्तौमि वाङ्मनसोः पारां किंवाऽहं जगदम्बिके ॥ ३०॥

svecchāmayīṃ nirākārāṃ bhaktānugrahavigrahām |staumi vāṅmanasoḥ pārāṃ kiṃvā'haṃ jagadambike || 30||

परां चतुर्णां वेदानां पारबीजं भवार्णवे ।सर्वसस्याधिदेवीं च सर्वासामपि सम्पदाम् ॥ ३१॥

parāṃ caturṇāṃ vedānāṃ pārabījaṃ bhavārṇave |sarvasasyādhidevīṃ ca sarvāsāmapi sampadām || 31||

योगिनां चैव योगानां ज्ञानानां ज्ञानिनां तथा ।वेदानां वै वेदविदां जननीं वर्णयामि किम् ॥ ३२॥

yogināṃ caiva yogānāṃ jñānānāṃ jñānināṃ tathā |vedānāṃ vai vedavidāṃ jananīṃ varṇayāmi kim || 32||

यया विना जगत्सर्वमबीजं निष्फलं ध्रुवम् ।यथा स्तनन्धयानां च विना मात्रा सुखं भवेत् ॥ ३३॥

yayā vinā jagatsarvamabījaṃ niṣphalaṃ dhruvam |yathā stanandhayānāṃ ca vinā mātrā sukhaṃ bhavet || 33||

प्रसीद जगतां माता रक्षास्मानतिकातरान् ।वयं त्वच्चरणाम्भोजे प्रपन्नाः शरणं गताः ॥ ३४॥

prasīda jagatāṃ mātā rakṣāsmānatikātarān |vayaṃ tvaccaraṇāmbhoje prapannāḥ śaraṇaṃ gatāḥ || 34||

नमः शक्तिस्वरूपायै जगन्मात्रे नमो नमः ।ज्ञानदायै बुद्धिदायै सर्वदायै नमो नमः ॥ ३५॥

namaḥ śaktisvarūpāyai jaganmātre namo namaḥ |jñānadāyai buddhidāyai sarvadāyai namo namaḥ || 35||

हरिभक्तिप्रदायिन्यै मुक्तिदायै नमो नमः ।सर्वज्ञायै सर्वदायै महालक्ष्म्यै नमो नमः ॥ ३६॥

haribhaktipradāyinyai muktidāyai namo namaḥ |sarvajñāyai sarvadāyai mahālakṣmyai namo namaḥ || 36||

कुपुत्राः कुत्रचित्सन्ति न कुत्रापि कुमातरः ।कुत्र माता पुत्रदोषं तं विहाय च गच्छति ॥ ३७॥

kuputrāḥ kutracitsanti na kutrāpi kumātaraḥ |kutra mātā putradoṣaṃ taṃ vihāya ca gacchati || 37||

स्तनन्धयेभ्य इव मे हे मातर्देहि दर्शनम् ।कृपां कुरु कृपासिन्धो त्वमस्मान्भक्तवत्सले ॥ ३८॥

stanandhayebhya iva me he mātardehi darśanam |kṛpāṃ kuru kṛpāsindho tvamasmānbhaktavatsale || 38||

इत्येवं कथितं वत्स पद्मायाश्च शुभावहम् ।सुखदं मोक्षदं सारं शुभदं सम्पदः प्रदम् ॥ ३९॥

ityevaṃ kathitaṃ vatsa padmāyāśca śubhāvaham |sukhadaṃ mokṣadaṃ sāraṃ śubhadaṃ sampadaḥ pradam || 39||

इदं स्तोत्रं महापुण्यं पूजाकाले च यः पठेत् ।महालक्ष्मीर्गृहं तस्य न जहाति कदाचन ॥ ४०॥

idaṃ stotraṃ mahāpuṇyaṃ pūjākāle ca yaḥ paṭhet |mahālakṣmīrgṛhaṃ tasya na jahāti kadācana || 40||

इत्युक्त्वा श्रीहरिस्तं च तत्रैवान्तरधीयत ।देवो जगाम क्षीरोदं सुरैः सार्धं तदाज्ञया ॥ ४१॥

ityuktvā śrīharistaṃ ca tatraivāntaradhīyata |devo jagāma kṣīrodaṃ suraiḥ sārdhaṃ tadājñayā || 41||

॥ इति श्रीब्रह्मवैवर्तमहापुराणे गणपतिखण्डेनारदनारायणसंवादे लक्ष्मीस्तवकवचपूजाकथनंनाम द्वाविंशोऽध्यायः ॥ २२॥

|| iti śrībrahmavaivartamahāpurāṇe gaṇapatikhaṇḍenāradanārāyaṇasaṃvāde lakṣmīstavakavacapūjākathanaṃnāma dvāviṃśo'dhyāyaḥ || 22||