महालक्ष्मीकवचम् Shri Mahalakshmi kavacham

श्री गणेशाय नमः ।अस्य श्रीमहालक्ष्मीकवचमन्त्रस्य ब्रह्मा ऋषिः गायत्री छन्दःमहालक्ष्मीर्देवता महालक्ष्मीप्रीत्यर्थं जपे विनियोगः ।इन्द्र उवाच ।समस्तकवचानां तु तेजस्वि कवचोत्तमम् ।आत्मरक्षणमारोग्यं सत्यं त्वं ब्रूहि गीष्पते ॥ १॥

śrī gaṇeśāya namaḥ |asya śrīmahālakṣmīkavacamantrasya brahmā ṛṣiḥ gāyatrī chandaḥmahālakṣmīrdevatā mahālakṣmīprītyarthaṃ jape viniyogaḥ |indra uvāca |samastakavacānāṃ tu tejasvi kavacottamam |ātmarakṣaṇamārogyaṃ satyaṃ tvaṃ brūhi gīṣpate || 1||

श्रीगुरुरुवाच ।महालक्ष्म्यास्तु कवचं प्रवक्ष्यामि समासतः ।चतुर्दशसु लोकेषु रहस्यं ब्रह्मणोदितम् ॥ २॥

śrīgururuvāca |mahālakṣmyāstu kavacaṃ pravakṣyāmi samāsataḥ |caturdaśasu lokeṣu rahasyaṃ brahmaṇoditam || 2||

ब्रह्मोवाच ।शिरो मे विष्णुपत्नी च ललाटममृतोद्भवा ।चक्षुषी सुविशालाक्षी श्रवणे सागराम्बुजा ॥ ३॥

brahmovāca |śiro me viṣṇupatnī ca lalāṭamamṛtodbhavā |cakṣuṣī suviśālākṣī śravaṇe sāgarāmbujā || 3||

घ्राणं पातु वरारोहा जिह्वामाम्नायरूपिणी ।मुखं पातु महालक्ष्मीः कण्ठं वैकुण्ठवासिनी ॥ ४॥

ghrāṇaṃ pātu varārohā jihvāmāmnāyarūpiṇī |mukhaṃ pātu mahālakṣmīḥ kaṇṭhaṃ vaikuṇṭhavāsinī || 4||

स्कन्धौ मे जानकी पातु भुजौ भार्गवनन्दिनी ।बाहू द्वौ द्रविणी पातु करौ हरिवराङ्गना ॥ ५॥

skandhau me jānakī pātu bhujau bhārgavanandinī |bāhū dvau draviṇī pātu karau harivarāṅganā || 5||

वक्षः पातु च श्रीर्देवी हृदयं हरिसुन्दरी ।कुक्षिं च वैष्णवी पातु नाभिं भुवनमातृका ॥ ६॥

vakṣaḥ pātu ca śrīrdevī hṛdayaṃ harisundarī |kukṣiṃ ca vaiṣṇavī pātu nābhiṃ bhuvanamātṛkā || 6||

कटिं च पातु वाराही सक्थिनी देवदेवता ।ऊरू नारायणी पातु जानुनी चन्द्रसोदरी ॥ ७॥

kaṭiṃ ca pātu vārāhī sakthinī devadevatā |ūrū nārāyaṇī pātu jānunī candrasodarī || 7||

इन्दिरा पातु जङ्घे मे पादौ भक्तनमस्कृता ।नखान् तेजस्विनी पातु सर्वाङ्गं करुणामयी ॥ ८॥

indirā pātu jaṅghe me pādau bhaktanamaskṛtā |nakhān tejasvinī pātu sarvāṅgaṃ karuṇāmayī || 8||

(फलश्रुतिः)ब्रह्मणा लोकरक्षार्थं निर्मितं कवचं श्रियः ।ये पठन्ति महात्मानस्ते च धन्या जगत्त्रये ॥ ९॥

(phalaśrutiḥ)brahmaṇā lokarakṣārthaṃ nirmitaṃ kavacaṃ śriyaḥ |ye paṭhanti mahātmānaste ca dhanyā jagattraye || 9||

कवचेनावृताङ्गानां जनानां जयदा सदा ।मातेव सर्वसुखदा भव त्वममरेश्वरी ॥ १०॥

kavacenāvṛtāṅgānāṃ janānāṃ jayadā sadā |māteva sarvasukhadā bhava tvamamareśvarī || 10||

भूयः सिद्धिमवाप्नोति पूर्वोक्तं ब्रह्मणा स्वयम् ।लक्ष्मीर्हरिप्रिया पद्मा एतन्नामत्रयं स्मरन् ॥ ११॥

bhūyaḥ siddhimavāpnoti pūrvoktaṃ brahmaṇā svayam |lakṣmīrharipriyā padmā etannāmatrayaṃ smaran || 11||

नामत्रयमिदं जप्त्वा स याति परमां श्रियम् ।यः पठेत्स च धर्मात्मा सर्वान्कामानवाप्नुयात् ॥ १२॥

nāmatrayamidaṃ japtvā sa yāti paramāṃ śriyam |yaḥ paṭhetsa ca dharmātmā sarvānkāmānavāpnuyāt || 12||

॥ इति श्रीब्रह्मपुराणे इन्द्रोपदिष्टं महालक्ष्मीकवचं सम्पूर्णम् ॥

|| iti śrībrahmapurāṇe indropadiṣṭaṃ mahālakṣmīkavacaṃ sampūrṇam ||