कैवल्याष्टकम् Kaivalyashtakam or Kevalashtakam

मधुरं मधुरेभ्योऽपि मङ्गलेभ्योऽपि मङ्गलम् ।पावनं पावनेभ्योऽपि हरेर्नामैव केवलम् ॥ १॥

madhuraṃ madhurebhyo'pi maṅgalebhyo'pi maṅgalam |pāvanaṃ pāvanebhyo'pi harernāmaiva kevalam || 1||

आब्रह्मस्तम्बपर्यन्तं सर्वं मायामयं जगत् ।सत्यं सत्यं पुनः सत्यं हरेर्नामैव केवलम् ॥ २॥

ābrahmastambaparyantaṃ sarvaṃ māyāmayaṃ jagat |satyaṃ satyaṃ punaḥ satyaṃ harernāmaiva kevalam || 2||

स गुरुः स पिता चापि सा माता बान्धवोऽपि सः ।शिक्षयेच्चेत्सदा स्मर्तुं हरेर्नामैव केवलम् ॥ ३॥

sa guruḥ sa pitā cāpi sā mātā bāndhavo'pi saḥ |śikṣayeccetsadā smartuṃ harernāmaiva kevalam || 3||

निःश्वासे न हि विश्वासः कदा रुद्धो भविष्यति ।कीर्तनीयमतो बाल्याद्धरेर्नामैव केवलम् ॥ ४॥

niḥśvāse na hi viśvāsaḥ kadā ruddho bhaviṣyati |kīrtanīyamato bālyāddharernāmaiva kevalam || 4||

हरिः सदा वसेत्तत्र यत्र भागवता जनाः ।गायन्ति भक्तिभावेन हरेर्नामैव केवलम् ॥ ५॥

hariḥ sadā vasettatra yatra bhāgavatā janāḥ |gāyanti bhaktibhāvena harernāmaiva kevalam || 5||

अहो दुःखं महादुःखं दुःखाद्दुःखतरं यतः ।काचार्थं विस्मृतं रत्नं हरेर्नामैव केवलम् ॥ ६॥

aho duḥkhaṃ mahāduḥkhaṃ duḥkhādduḥkhataraṃ yataḥ |kācārthaṃ vismṛtaṃ ratnaṃ harernāmaiva kevalam || 6||

दीयतां दीयतां कर्णो नीयतां नीयतां वचः ।गीयतां गीयतां नित्यं हरेर्नामैव केवलम् ॥ ७॥

dīyatāṃ dīyatāṃ karṇo nīyatāṃ nīyatāṃ vacaḥ |gīyatāṃ gīyatāṃ nityaṃ harernāmaiva kevalam || 7||

तृणीकृत्य जगत्सर्वं राजते सकलोपरि ।चिदानन्दमयं शुद्धं हरेर्नामैव केवलम् ॥ ८॥

tṛṇīkṛtya jagatsarvaṃ rājate sakalopari |cidānandamayaṃ śuddhaṃ harernāmaiva kevalam || 8||

इति नीलकण्ठगोस्वामीविरचितं कैवल्याष्टकम्अथवा केवलाष्टकं सम्पूर्णम् ।श्रीकृष्णार्पणमस्तु ।

iti nīlakaṇṭhagosvāmīviracitaṃ kaivalyāṣṭakamathavā kevalāṣṭakaṃ sampūrṇam |śrīkṛṣṇārpaṇamastu |