वासुदेवस्तुतिः (मत्स्यपुराणान्तर्गतं एवं विष्णुधर्मोपपुराणान्तर्गता अदितिकृता नमः सर्वार्तिनाशाय) Aditikrita Vasudeva Stutih

अदितिरुवाचनमः सर्वार्तिनाशाय नमः पुष्करमालिने ।नमः परमकल्याणकल्याणायादिवेधसे ॥ १॥

aditiruvācanamaḥ sarvārtināśāya namaḥ puṣkaramāline |namaḥ paramakalyāṇakalyāṇāyādivedhase || 1||

नमः पङ्कजनेत्राय नमः पङ्कजनाभये ।श्रियः कान्ताय दान्ताय दान्तदृश्याय चक्रिणे ॥ २॥

namaḥ paṅkajanetrāya namaḥ paṅkajanābhaye |śriyaḥ kāntāya dāntāya dāntadṛśyāya cakriṇe || 2||

नमः पङ्कजसम्भूतिसम्भवायात्मयोनये ।नमः शङ्खासिहस्ताय नमः कनकरेतसे ॥ ३॥

namaḥ paṅkajasambhūtisambhavāyātmayonaye |namaḥ śaṅkhāsihastāya namaḥ kanakaretase || 3||

तथात्मज्ञानविज्ञान योगिचिन्त्यात्मयोगिने ।निर्गुणायाविशेषाय हरये ब्रह्मरूपिणे ॥ ४॥

tathātmajñānavijñāna yogicintyātmayogine |nirguṇāyāviśeṣāya haraye brahmarūpiṇe || 4||

जगत्प्रतिष्ठितं यत्र जगता यो न दृश्यते ।नमः स्थूलातिसूक्ष्माय तस्मै देवाय शङ्खिने ॥ ५॥

jagatpratiṣṭhitaṃ yatra jagatā yo na dṛśyate |namaḥ sthūlātisūkṣmāya tasmai devāya śaṅkhine || 5||

यं न पश्यन्ति पश्यन्तो जगदप्यखिलं नराः ।अपश्यद्भिर्जगत्यत्र न देवो हृदि संस्थितः ॥ ६॥

yaṃ na paśyanti paśyanto jagadapyakhilaṃ narāḥ |apaśyadbhirjagatyatra na devo hṛdi saṃsthitaḥ || 6||

यस्मिन्नेव विनश्येत यस्यैतदखिलं जगत् ।तस्मै समस्तजगतामाधाराय नमो नमः ॥ ७॥

yasminneva vinaśyeta yasyaitadakhilaṃ jagat |tasmai samastajagatāmādhārāya namo namaḥ || 7||

आद्यः प्रजापतिपतिर्यः प्रभूणां पतिः परः ।पतिः सुराणां यस्तस्मै नमः कृष्णाय वेधसे ॥ ८॥

ādyaḥ prajāpatipatiryaḥ prabhūṇāṃ patiḥ paraḥ |patiḥ surāṇāṃ yastasmai namaḥ kṛṣṇāya vedhase || 8||

यः प्रवृत्तौ निवृत्तौ च इज्यते कर्मभिः स्वकैः ।स्वर्गापवर्गफलदो नमस्तस्मै गदाभृते ॥ ९॥

yaḥ pravṛttau nivṛttau ca ijyate karmabhiḥ svakaiḥ |svargāpavargaphalado namastasmai gadābhṛte || 9||

यश्चिन्त्यमानो मनसा सद्यः पापं व्यपोहति ।नमस्तस्मै विशुद्धाय पराय हरिवेधसे ॥ १०॥

yaścintyamāno manasā sadyaḥ pāpaṃ vyapohati |namastasmai viśuddhāya parāya harivedhase || 10||

यं बुद्ध्वा सर्वभूतानि देवदेवेशमव्ययम् ।न पुनर्जन्ममरणे प्राप्नुवन्ति नमामि तम् ॥ ११॥

yaṃ buddhvā sarvabhūtāni devadeveśamavyayam |na punarjanmamaraṇe prāpnuvanti namāmi tam || 11||

यो यज्ञे यज्ञपरमैरिज्यते यज्ञसंज्ञितः ।तं यज्ञपुरुषं विष्णुं नमामि प्रभुमीश्वरम् ॥ १२॥

yo yajñe yajñaparamairijyate yajñasaṃjñitaḥ |taṃ yajñapuruṣaṃ viṣṇuṃ namāmi prabhumīśvaram || 12||

गीयते सर्वदेवेषु वेदविद्भिर्विदां पतिः ।यस्तस्मै वेदवेद्याय विष्णवे जिष्णवे नमः ॥ १३॥

gīyate sarvadeveṣu vedavidbhirvidāṃ patiḥ |yastasmai vedavedyāya viṣṇave jiṣṇave namaḥ || 13||

यतो विश्वं समुत्पन्नं यस्मिंश्च लयमेष्यति ।विश्वागम प्रतिष्ठाय नमस्तस्मै महात्मने ॥ १४॥

yato viśvaṃ samutpannaṃ yasmiṃśca layameṣyati |viśvāgama pratiṣṭhāya namastasmai mahātmane || 14||

ब्रह्मादि स्तम्बपर्यन्तं येन विश्वमिदं ततम् ।मायाजालं समुत्तर्तुं तमुपेन्द्रं नमाम्यहम् ॥ १५॥

brahmādi stambaparyantaṃ yena viśvamidaṃ tatam |māyājālaṃ samuttartuṃ tamupendraṃ namāmyaham || 15||

यस्तु तोयस्वरूपस्थो बिभर्त्यखिलमीश्वरः ।विश्वं विश्वपतिं विष्णुं तं नमामि प्रजापतिम् ॥ १६॥

yastu toyasvarūpastho bibhartyakhilamīśvaraḥ |viśvaṃ viśvapatiṃ viṣṇuṃ taṃ namāmi prajāpatim || 16||

यमाराध्य विशुद्धेन मनसा कर्मणा गिरा ।तरन्त्यविद्यामखिलां तमुपेन्द्रं नमाम्यहम् ॥ १७॥

yamārādhya viśuddhena manasā karmaṇā girā |tarantyavidyāmakhilāṃ tamupendraṃ namāmyaham || 17||

विषादतोषरोषाद्यैःर्योऽजस्रं सुखदुःखजैः ।नृत्यत्यखिलभूतस्थस्तमुपेन्द्रं नमाम्यहम् ॥ १८॥

viṣādatoṣaroṣādyaiḥryo'jasraṃ sukhaduḥkhajaiḥ |nṛtyatyakhilabhūtasthastamupendraṃ namāmyaham || 18||

मूर्तं तमोऽसुरमयं तद्वधाद्विनिहन्ति यः ।रात्रिजं सूर्यरूपीव तमुपेन्द्रं नमाम्यहम् ॥ १९॥

mūrtaṃ tamo'suramayaṃ tadvadhādvinihanti yaḥ |rātrijaṃ sūryarūpīva tamupendraṃ namāmyaham || 19||

कपिलादिस्वरूपस्थो यश्चाज्ञानमयं तमः ।हन्ति ज्ञानप्रदानेन तमुपेन्द्रं नमाम्यहम् ॥ २०॥

kapilādisvarūpastho yaścājñānamayaṃ tamaḥ |hanti jñānapradānena tamupendraṃ namāmyaham || 20||

यस्याक्षिणी चन्द्रसूर्यौ सर्वलोकशुभाशुभम् ।पश्यतः कर्म सततमुपेन्द्रं तं नमाम्यहम् ॥ २१॥

yasyākṣiṇī candrasūryau sarvalokaśubhāśubham |paśyataḥ karma satatamupendraṃ taṃ namāmyaham || 21||

यस्मिन् सर्वेश्वरे सर्वं सत्यमेतन्मयोदितम् ।नानृतं तमजं विष्णुं नमामि प्रभवाप्ययम् ॥ २२॥

yasmin sarveśvare sarvaṃ satyametanmayoditam |nānṛtaṃ tamajaṃ viṣṇuṃ namāmi prabhavāpyayam || 22||

यच्च तत्सत्यमुक्तं मे भूयांश्चातो जनार्दनः ।सत्येन तेन सकलाः पूर्यन्तां मे मनोरथाः ॥ २३॥

yacca tatsatyamuktaṃ me bhūyāṃścāto janārdanaḥ |satyena tena sakalāḥ pūryantāṃ me manorathāḥ || 23||

एवं स्तुतः स भगवान् वासुदेव उवाच ताम् ।अदृश्यः सर्वभूतानां तस्याः सन्दर्शने स्थितः ॥ २४॥

evaṃ stutaḥ sa bhagavān vāsudeva uvāca tām |adṛśyaḥ sarvabhūtānāṃ tasyāḥ sandarśane sthitaḥ || 24||

मनोरथां स्त्वमदिते यानिच्छस्यभिवाङ्छितान् ।तांस्त्वं प्राप्स्यसि धर्मज्ञे मत्प्रसादान्न संशयः ॥ २५॥

manorathāṃ stvamadite yānicchasyabhivāṅchitān |tāṃstvaṃ prāpsyasi dharmajñe matprasādānna saṃśayaḥ || 25||

शृणुष्व सुमहाभागे वरो यस्ते हृदि स्थितः ।तमाशु व्रियतां कामं श्रेयस्ते सम्भविष्यति ।मद्दर्शनं हि विफलं न कदाचिद्भविष्यति ॥ २६॥

śṛṇuṣva sumahābhāge varo yaste hṛdi sthitaḥ |tamāśu vriyatāṃ kāmaṃ śreyaste sambhaviṣyati |maddarśanaṃ hi viphalaṃ na kadācidbhaviṣyati || 26||

इति मत्स्यपुराणे अदितिकृता वासुदेवस्तुतिः समाप्ता ।इति विष्णुधर्मेषु पञ्चसप्तत्याध्यायान्तर्गतं अदितिकृतं विष्णुस्तोत्रं सम्पूर्णम्मत्स्यपुराण अध्याय २४४ श्लोकाः १२-३७आल्सो इन् विष्णुधर्म उपपुराणम् अध्याय ७५ श्लोकाः ११-३१

iti matsyapurāṇe aditikṛtā vāsudevastutiḥ samāptā |iti viṣṇudharmeṣu pañcasaptatyādhyāyāntargataṃ aditikṛtaṃ viṣṇustotraṃ sampūrṇammatsyapurāṇa adhyāya 244 ślokāḥ 12-37ālso in viṣṇudharma upapurāṇam adhyāya 75 ślokāḥ 11-31