हनुमत्स्तोत्रम् Shrivibhishanakritam Hanumatstotram

श्रीगणेशाय नमः ।नमो हनुमते तुभ्यं नमो मारुतसूनवे ।नमः श्रीरामभक्ताय श्यामास्याय च ते नमः ॥ १॥

śrīgaṇeśāya namaḥ |namo hanumate tubhyaṃ namo mārutasūnave |namaḥ śrīrāmabhaktāya śyāmāsyāya ca te namaḥ || 1||

नमो वानरवीराय सुग्रीवसख्यकारिणे ।लङ्काविदाहनार्थाय हेलासागरतारिणे ॥ २॥

namo vānaravīrāya sugrīvasakhyakāriṇe |laṅkāvidāhanārthāya helāsāgaratāriṇe || 2||

सीताशोकविनाशाय राममुद्राधराय च ।रावणान्तकुलच्छेदकारिणे ते नमो नमः ॥ ३॥

sītāśokavināśāya rāmamudrādharāya ca |rāvaṇāntakulacchedakāriṇe te namo namaḥ || 3||

मेघनादमखध्वंसकारिणे ते नमो नमः ।अशोकवनविध्वंसकारिणे भयहारिणे ॥ ४॥

meghanādamakhadhvaṃsakāriṇe te namo namaḥ |aśokavanavidhvaṃsakāriṇe bhayahāriṇe || 4||

वायुपुत्राय वीराय आकाशोदरगामिने ।वनपालशिरश्छेदलङ्काप्रासादभञ्जिने ॥ ५॥

vāyuputrāya vīrāya ākāśodaragāmine |vanapālaśiraśchedalaṅkāprāsādabhañjine || 5||

ज्वलत्कनकवर्णाय दीर्घलाङ्गूलधारिणे ।सौमित्रिजयदात्रे च रामदूताय ते नमः ॥ ६॥

jvalatkanakavarṇāya dīrghalāṅgūladhāriṇe |saumitrijayadātre ca rāmadūtāya te namaḥ || 6||

अक्षस्य वधकर्त्रे च ब्रह्मपाशनिवारिणे ।लक्ष्मणाङ्गमहाशक्तिघातक्षतविनाशिने ॥ ७॥

akṣasya vadhakartre ca brahmapāśanivāriṇe |lakṣmaṇāṅgamahāśaktighātakṣatavināśine || 7||

रक्षोघ्नाय रिपुघ्नाय भूतघ्नाय च ते नमः ।ऋक्षवानरवीरौघप्राणदाय नमो नमः ॥ ८॥

rakṣoghnāya ripughnāya bhūtaghnāya ca te namaḥ |ṛkṣavānaravīraughaprāṇadāya namo namaḥ || 8||

परसैन्यबलघ्नाय शस्त्रास्त्रघ्नाय ते नमः ।विषघ्नाय द्विषघ्नाय ज्वरघ्नाय च ते नमः ॥ ९॥

parasainyabalaghnāya śastrāstraghnāya te namaḥ |viṣaghnāya dviṣaghnāya jvaraghnāya ca te namaḥ || 9||

महाभयरिपुघ्नाय भक्तत्राणैककारिणे ।परप्रेरितमन्त्राणां यन्त्राणां स्तम्भकारिणे ॥ १०॥

mahābhayaripughnāya bhaktatrāṇaikakāriṇe |parapreritamantrāṇāṃ yantrāṇāṃ stambhakāriṇe || 10||

पयःपाषाणतरणकारणाय नमो नमः ।बालार्कमण्डलग्रासकारिणे भवतारिणे ॥ ११॥

payaḥpāṣāṇataraṇakāraṇāya namo namaḥ |bālārkamaṇḍalagrāsakāriṇe bhavatāriṇe || 11||

नखायुधाय भीमाय दन्तायुधधराय च ।रिपुमायाविनाशाय रामाज्ञालोकरक्षिणे ॥ १२॥

nakhāyudhāya bhīmāya dantāyudhadharāya ca |ripumāyāvināśāya rāmājñālokarakṣiṇe || 12||

प्रतिग्रामस्थितायाथ रक्षोभूतवधार्थिने ।करालशैलशस्त्राय द्रुमशस्त्राय ते नमः ॥ १३॥

pratigrāmasthitāyātha rakṣobhūtavadhārthine |karālaśailaśastrāya drumaśastrāya te namaḥ || 13||

बालैकब्रह्मचर्याय रुद्रमूर्तिधराय च ।विहङ्गमाय सर्वाय वज्रदेहाय ते नमः ॥ १४॥

bālaikabrahmacaryāya rudramūrtidharāya ca |vihaṅgamāya sarvāya vajradehāya te namaḥ || 14||

कौपीनवाससे तुभ्यं रामभक्तिरताय च ।दक्षिणाशाभास्कराय शतचन्द्रोदयात्मने ॥ १५॥

kaupīnavāsase tubhyaṃ rāmabhaktiratāya ca |dakṣiṇāśābhāskarāya śatacandrodayātmane || 15||

कृत्याक्षतव्यथाघ्नाय सर्वक्लेशहराय च ।स्वाम्याज्ञापार्थसङ्ग्रामसङ्ख्ये सञ्जयधारिणे ॥ १६॥

kṛtyākṣatavyathāghnāya sarvakleśaharāya ca |svāmyājñāpārthasaṅgrāmasaṅkhye sañjayadhāriṇe || 16||

भक्तान्तदिव्यवादेषु सङ्ग्रामे जयदायिने ।किल्किलाबुबुकोच्चारघोरशब्दकराय च ॥ १७॥

bhaktāntadivyavādeṣu saṅgrāme jayadāyine |kilkilābubukoccāraghoraśabdakarāya ca || 17||

सर्पाग्निव्याधिसंस्तम्भकारिणे वनचारिणे ।सदा वनफलाहारसन्तृप्ताय विशेषतः ॥ १८॥

sarpāgnivyādhisaṃstambhakāriṇe vanacāriṇe |sadā vanaphalāhārasantṛptāya viśeṣataḥ || 18||

महार्णवशिलाबद्धसेतुबन्धाय ते नमः ।वादे विवादे सङ्ग्रामे भये घोरे महावने ॥ १९॥

mahārṇavaśilābaddhasetubandhāya te namaḥ |vāde vivāde saṅgrāme bhaye ghore mahāvane || 19||

सिंहव्याघ्रादिचौरेभ्यः स्तोत्रपाठाद् भयं न हि ।दिव्ये भूतभये व्याधौ विषे स्थावरजङ्गमे ॥ २०॥

siṃhavyāghrādicaurebhyaḥ stotrapāṭhād bhayaṃ na hi |divye bhūtabhaye vyādhau viṣe sthāvarajaṅgame || 20||

राजशस्त्रभये चोग्रे तथा ग्रहभयेषु च ।जले सर्वे महावृष्टौ दुर्भिक्षे प्राणसम्प्लवे ॥ २१॥

rājaśastrabhaye cogre tathā grahabhayeṣu ca |jale sarve mahāvṛṣṭau durbhikṣe prāṇasamplave || 21||

पठेत् स्तोत्रं प्रमुच्येत भयेभ्यः सर्वतो नरः ।तस्य क्वापि भयं नास्ति हनुमत्स्तवपाठतः ॥ २२॥

paṭhet stotraṃ pramucyeta bhayebhyaḥ sarvato naraḥ |tasya kvāpi bhayaṃ nāsti hanumatstavapāṭhataḥ || 22||

सर्वदा वै त्रिकालं च पठनीयमिदं स्तवम् ।सर्वान् कामानवाप्नोति नात्र कार्या विचारणा ॥ २३॥

sarvadā vai trikālaṃ ca paṭhanīyamidaṃ stavam |sarvān kāmānavāpnoti nātra kāryā vicāraṇā || 23||

विभीषणकृतं स्तोत्रं तार्क्ष्येण समुदीरितम् ।ये पठिष्यन्ति भक्त्या वै सिद्ध्यस्तत्करे स्थिताः ॥ २४॥

vibhīṣaṇakṛtaṃ stotraṃ tārkṣyeṇa samudīritam |ye paṭhiṣyanti bhaktyā vai siddhyastatkare sthitāḥ || 24||

इति श्रीसुदर्शनसंहितायां विभीषणगरुडसंवादेविभीषणकृतं हनुमत्स्तोत्रं सम्पूर्णम् ॥

iti śrīsudarśanasaṃhitāyāṃ vibhīṣaṇagaruḍasaṃvādevibhīṣaṇakṛtaṃ hanumatstotraṃ sampūrṇam ||