हनुमद्रक्षास्तोत्रम् Shrihanumadrakshastotram

वामे करे वैरिभिदं वहन्तं शैलं परे शृङ्खलहारटङ्कम् ।ददानमच्छाच्छसुवर्णवर्णं भजे ज्वलत्कुण्डलमाञ्जनेयम् ॥ १॥

vāme kare vairibhidaṃ vahantaṃ śailaṃ pare śṛṅkhalahāraṭaṅkam |dadānamacchācchasuvarṇavarṇaṃ bhaje jvalatkuṇḍalamāñjaneyam || 1||

पद्मरागमणिकुण्डलत्विषा पाटलीकृतकपोलमस्तकम् ।दिव्यहेमकदलीवनान्तरे भावयामि पवमाननन्दनम् ॥ २॥

padmarāgamaṇikuṇḍalatviṣā pāṭalīkṛtakapolamastakam |divyahemakadalīvanāntare bhāvayāmi pavamānanandanam || 2||

उद्यदादित्यसङ्काशमुदारभुजविक्रमम् ।कन्दर्पकोटिलावण्यं सर्वविद्याविशारदम् ॥ ३॥

udyadādityasaṅkāśamudārabhujavikramam |kandarpakoṭilāvaṇyaṃ sarvavidyāviśāradam || 3||

श्रीरामहृदयानन्दं भक्तकल्पमहीरुहम् ।अभयं वरदं दोर्भ्यां कलये मारुतात्मजम् ॥ ४॥

śrīrāmahṛdayānandaṃ bhaktakalpamahīruham |abhayaṃ varadaṃ dorbhyāṃ kalaye mārutātmajam || 4||

वामहस्ते महाकृच्छ्रदशास्यकरमर्दनम् ।उद्यद्वीक्षणकोदण्डं हनूमन्तं विचिन्तयेत् ॥ ५॥

vāmahaste mahākṛcchradaśāsyakaramardanam |udyadvīkṣaṇakodaṇḍaṃ hanūmantaṃ vicintayet || 5||

स्फटिकाभं स्वर्णकान्तिं द्विभुजं च कृताञ्जलिम् ।कुण्डलद्वयसंशोभिमुखाम्भोजं हरिं भजे ॥ ६॥

sphaṭikābhaṃ svarṇakāntiṃ dvibhujaṃ ca kṛtāñjalim |kuṇḍaladvayasaṃśobhimukhāmbhojaṃ hariṃ bhaje || 6||

इति श्रीहनुमद्रक्षास्तोत्रं सम्पूर्णम् ।

iti śrīhanumadrakṣāstotraṃ sampūrṇam |