कृष्णचैतन्यचन्द्रसहस्रनामस्तोत्रम् १ Shrikrishnachaitanyachandrasya Sahasranamastotram 1

नमस्तस्मै भगवते चैतन्याय महात्मने ।कलिकल्मषनाशाय भवाब्धितारणाय च ॥ १॥

namastasmai bhagavate caitanyāya mahātmane |kalikalmaṣanāśāya bhavābdhitāraṇāya ca || 1||

ब्रह्मणा हरिदासेन श्रीरूपाय प्रकाशितम् ।तत्सर्वं कथयिष्यामि सावधानं निशामय ॥ २॥

brahmaṇā haridāsena śrīrūpāya prakāśitam |tatsarvaṃ kathayiṣyāmi sāvadhānaṃ niśāmaya || 2||

श्रुत्वैवं वैष्णवाः सर्वे प्रहृष्टाः प्रेमविह्वलाः ।सादरं परिपप्रच्छुः प्रेमगद्गदया गिरा ॥ ३॥

śrutvaivaṃ vaiṣṇavāḥ sarve prahṛṣṭāḥ premavihvalāḥ |sādaraṃ paripapracchuḥ premagadgadayā girā || 3||

वैष्णवानां हि कृपया स्मृत्वा वाक्यं पितुस्तदा ।सणोन्त्य भगवद्रूपं नामानि कथयामि वै ॥ ४॥

vaiṣṇavānāṃ hi kṛpayā smṛtvā vākyaṃ pitustadā |saṇontya bhagavadrūpaṃ nāmāni kathayāmi vai || 4||

ध्यानम् ।ॐ अस्य श्रीकृष्णचैतन्यसहस्रनामस्तोत्रस्यनारायणः ऋषिः अनुष्टुप् छन्दः श्रीमद्भगवद्भक्तिर्देवताश्रीराधाकृष्णप्रीतये श्रीकृष्णचैतन्य नामसहस्रपथे विनियोगः ॥ॐ नमः प्रेमसमुच्चयाय गोपीजनवल्लभाय महात्मने ।ॐ विश्वम्भरः सदानन्दो विश्वजिद्विश्वभावनः ।महानुभावो विश्वात्मा गौराङ्गो गौरभावनः ॥ ५॥

dhyānam |oṃ asya śrīkṛṣṇacaitanyasahasranāmastotrasyanārāyaṇaḥ ṛṣiḥ anuṣṭup chandaḥ śrīmadbhagavadbhaktirdevatāśrīrādhākṛṣṇaprītaye śrīkṛṣṇacaitanya nāmasahasrapathe viniyogaḥ ||oṃ namaḥ premasamuccayāya gopījanavallabhāya mahātmane |oṃ viśvambharaḥ sadānando viśvajidviśvabhāvanaḥ |mahānubhāvo viśvātmā gaurāṅgo gaurabhāvanaḥ || 5||

हेमप्रभो दीर्घबाहुर्दीर्घग्रीवः शुचिर्वसुः ।चैतन्यश्चेतनश्चेतश्चित्तरूपी प्रभुः स्वयम् ॥ ६॥

hemaprabho dīrghabāhurdīrghagrīvaḥ śucirvasuḥ |caitanyaścetanaścetaścittarūpī prabhuḥ svayam || 6||

राधाङ्गी राधिकाभावो राधान्वेशी प्रियंवदः ।नीतिज्ञः सर्वधर्मज्ञो भक्तिमान् पुरुषोत्तमः ॥ ७॥

rādhāṅgī rādhikābhāvo rādhānveśī priyaṃvadaḥ |nītijñaḥ sarvadharmajño bhaktimān puruṣottamaḥ || 7||

अनुभावी महाधैर्यः शास्त्रज्ञो नित्यनूतनः ।प्रभावी भगवान् कृष्णश्चैतन्यो रसविग्रहः ॥ ८॥

anubhāvī mahādhairyaḥ śāstrajño nityanūtanaḥ |prabhāvī bhagavān kṛṣṇaścaitanyo rasavigrahaḥ || 8||

अनादिनिधनो धाता धरणीमन्दनः शुचिः ।वराङ्गश्चञ्चलो दक्षः प्रतापी साधुसङ्गतः ॥ ९॥

anādinidhano dhātā dharaṇīmandanaḥ śuciḥ |varāṅgaścañcalo dakṣaḥ pratāpī sādhusaṅgataḥ || 9||

उन्मादी उन्मदो वीरो धीरग्राणी रसप्रियः ।रक्ताम्बरो दण्डधरः संन्यासी यतिभूषणः ॥ १०॥

unmādī unmado vīro dhīragrāṇī rasapriyaḥ |raktāmbaro daṇḍadharaḥ saṃnyāsī yatibhūṣaṇaḥ || 10||

दण्डी छत्री चक्रपाणिः कृपालुः सर्वदर्शनः ।निरायुधः सर्वशास्ता कलिदोषप्रनाशनः ॥ ११॥

daṇḍī chatrī cakrapāṇiḥ kṛpāluḥ sarvadarśanaḥ |nirāyudhaḥ sarvaśāstā kalidoṣapranāśanaḥ || 11||

गुरुवर्यः कृपासिन्धुर्विक्रमी च जनार्दनः ।म्लेच्छग्राही कुनीतिघ्नो दुष्टहारी कृपाकुलः ॥ १२॥

guruvaryaḥ kṛpāsindhurvikramī ca janārdanaḥ |mlecchagrāhī kunītighno duṣṭahārī kṛpākulaḥ || 12||

ब्रह्मचारी यतिवरो ब्रह्मण्यो ब्राह्मणः सुधीः ।द्विजराजश्चक्रवर्ती कविः कृपणवत्सलः ॥ १३॥

brahmacārī yativaro brahmaṇyo brāhmaṇaḥ sudhīḥ |dvijarājaścakravartī kaviḥ kṛpaṇavatsalaḥ || 13||

निरीहः पावकोऽर्थज्ञो निर्धूमः पावकोपमः ।नारवन्द्यो हराकारो भविष्णुर्नरनायकः ॥ १४॥

nirīhaḥ pāvako'rthajño nirdhūmaḥ pāvakopamaḥ |nāravandyo harākāro bhaviṣṇurnaranāyakaḥ || 14||

दानवीरो युद्धवीरो दयावीरो वृकोदरः ।ज्ञानवीरो महावीरः शान्तिवीरः प्रतापनः ॥ १५॥

dānavīro yuddhavīro dayāvīro vṛkodaraḥ |jñānavīro mahāvīraḥ śāntivīraḥ pratāpanaḥ || 15||

श्रीजिष्णुर्भ्रमिको जिष्णुः सहिष्णुश्चारुदर्शनः ।नरो वरीयान् दुर्दर्शो नवद्वीपसुधाकरः ॥ १६॥

śrījiṣṇurbhramiko jiṣṇuḥ sahiṣṇuścārudarśanaḥ |naro varīyān durdarśo navadvīpasudhākaraḥ || 16||

चन्द्रहास्यश्चन्द्रनखो बलिमदुदरो बली ।सूर्यप्रभः सूर्यकांशुः सूर्याङ्गो मणिभूषणः ॥ १७॥

candrahāsyaścandranakho balimadudaro balī |sūryaprabhaḥ sūryakāṃśuḥ sūryāṅgo maṇibhūṣaṇaḥ || 17||

कम्भुकण्ठः कपोलश्रीर्निम्ननाभिः सुलोचनः ।जगन्नाथसुतो विप्रो रत्नाङ्गो रत्नभूषणः ॥ १८॥

kambhukaṇṭhaḥ kapolaśrīrnimnanābhiḥ sulocanaḥ |jagannāthasuto vipro ratnāṅgo ratnabhūṣaṇaḥ || 18||

तीर्थार्थी तीर्थदस्तीर्थस्तीर्थाङ्गस्तीर्थसाधकः ।तीर्थास्पदस्तीर्थवासस्तीर्थसेवी निराश्रयः ॥ १९॥

tīrthārthī tīrthadastīrthastīrthāṅgastīrthasādhakaḥ |tīrthāspadastīrthavāsastīrthasevī nirāśrayaḥ || 19||

तीर्थालादी तीर्थप्रदो ब्राह्मको ब्रह्मणो भ्रमी ।श्रीवासपण्डितानन्दो रामानन्दप्रियङ्करः ॥ २०॥

tīrthālādī tīrthaprado brāhmako brahmaṇo bhramī |śrīvāsapaṇḍitānando rāmānandapriyaṅkaraḥ || 20||

गदाधरप्रियो दासो विक्रमी शङ्करप्रियः ।योगी योगप्रदो योगो योगकारी त्रियोगकृत् ॥ २१॥

gadādharapriyo dāso vikramī śaṅkarapriyaḥ |yogī yogaprado yogo yogakārī triyogakṛt || 21||

सर्वः सर्वस्वदो भूमा सर्वाङ्गः सर्वसम्भवः ।वाणिर्बाणायुधो वादी वाचस्पतिरयोनिजः ॥ २२॥

sarvaḥ sarvasvado bhūmā sarvāṅgaḥ sarvasambhavaḥ |vāṇirbāṇāyudho vādī vācaspatirayonijaḥ || 22||

बुद्धिः सत्यं बलं तेजो धृतिमान् जङ्गमकृतिः ।मुरारिर्वर्धनो धाता नृहरिः मानवर्धनः ॥ २३॥

buddhiḥ satyaṃ balaṃ tejo dhṛtimān jaṅgamakṛtiḥ |murārirvardhano dhātā nṛhariḥ mānavardhanaḥ || 23||

निष्कर्मा कर्मदो नाथः कर्मज्ञः कर्मनाशकः ।अनर्घः कारकः कर्म क्रियार्हः कर्मबाधकः ॥ २४॥

niṣkarmā karmado nāthaḥ karmajñaḥ karmanāśakaḥ |anarghaḥ kārakaḥ karma kriyārhaḥ karmabādhakaḥ || 24||

निर्गुणो गुणवानीशो विधाता सामगोऽजितः ।जितश्वासो जितप्राणो जितानङ्गो जितेन्द्रियः ॥ २५॥

nirguṇo guṇavānīśo vidhātā sāmago'jitaḥ |jitaśvāso jitaprāṇo jitānaṅgo jitendriyaḥ || 25||

कृष्णभावी कृष्णनामी कृष्णात्मा कृष्णनायकः ।अद्वैतो द्वैतसाहित्यो द्विभावः पालको वशी ॥ २६॥

kṛṣṇabhāvī kṛṣṇanāmī kṛṣṇātmā kṛṣṇanāyakaḥ |advaito dvaitasāhityo dvibhāvaḥ pālako vaśī || 26||

श्रीवासः श्रीधराहव्यो हलनायकसारवित् ।विश्वरूपानुजश्चन्द्रो वरीयान् माधवोऽच्युतः ॥ २७॥

śrīvāsaḥ śrīdharāhavyo halanāyakasāravit |viśvarūpānujaścandro varīyān mādhavo'cyutaḥ || 27||

रूपासक्तः सदाचारो गुणज्ञो बहुभावकः ।गुणहीनो गुणातीतो गुणग्राही गुणार्णवः ॥ २८॥

rūpāsaktaḥ sadācāro guṇajño bahubhāvakaḥ |guṇahīno guṇātīto guṇagrāhī guṇārṇavaḥ || 28||

ब्रह्मानन्दो नित्यानन्दः प्रेमानन्दोऽतिनन्दकः ।निन्द्यहारी निन्द्यवर्जी निन्द्यघ्नः परितोषकः ॥ २९॥

brahmānando nityānandaḥ premānando'tinandakaḥ |nindyahārī nindyavarjī nindyaghnaḥ paritoṣakaḥ || 29||

यज्ञबाहुर्विनीतात्मा नामयज्ञप्रचारकः ।कलिवर्यः सुचिनांशुः पर्यांसुः पावकोपमः ॥ ३०॥

yajñabāhurvinītātmā nāmayajñapracārakaḥ |kalivaryaḥ sucināṃśuḥ paryāṃsuḥ pāvakopamaḥ || 30||

हिरण्यगर्भः सूक्ष्मात्मा वैराज्यो विरजापतिः ।विलासी प्रभावी स्वांशी परावस्थः शिरोमणिः ॥ ३१॥

hiraṇyagarbhaḥ sūkṣmātmā vairājyo virajāpatiḥ |vilāsī prabhāvī svāṃśī parāvasthaḥ śiromaṇiḥ || 31||

मायाघ्नो मायिको मायी मायावादी विचक्षणः ।कृष्णाच्छादी कृष्णजल्पी विषयघ्नो निराकृतिः ॥ ३२॥

māyāghno māyiko māyī māyāvādī vicakṣaṇaḥ |kṛṣṇācchādī kṛṣṇajalpī viṣayaghno nirākṛtiḥ || 32||

सङ्कल्पशून्यो मायीशो मायाद्वेशी व्रजप्रियः ।व्रजाधीशो व्रजपतिर्गोपगोकुलनन्दनः ॥ ३३॥

saṅkalpaśūnyo māyīśo māyādveśī vrajapriyaḥ |vrajādhīśo vrajapatirgopagokulanandanaḥ || 33||

व्रजवासी व्रजभावो व्रजनायकसत्तमः ।गुप्तप्रियो गुप्तभावो वाञ्छितः सत्कुलाश्रयः ॥ ३४॥

vrajavāsī vrajabhāvo vrajanāyakasattamaḥ |guptapriyo guptabhāvo vāñchitaḥ satkulāśrayaḥ || 34||

रागानुगो रागसिन्धू रागात्मा रागवर्धनः ।रागोद्गतः प्रेमसाक्षी भट्टनाथः सनातनः ॥ ३५॥

rāgānugo rāgasindhū rāgātmā rāgavardhanaḥ |rāgodgataḥ premasākṣī bhaṭṭanāthaḥ sanātanaḥ || 35||

गोपालभट्टगः प्रीतो लोकनाथप्रियः पटुः ।द्विभुजः षड्भुजो रूपी राजदर्पविनाशनः ॥ ३६॥

gopālabhaṭṭagaḥ prīto lokanāthapriyaḥ paṭuḥ |dvibhujaḥ ṣaḍbhujo rūpī rājadarpavināśanaḥ || 36||

काशिमिश्रप्रियो वन्द्यो वन्दनीयः शचिप्रसूः ।मिश्रपुरन्दराधिसो रघुनाथप्रियो रयः ॥ ३७॥

kāśimiśrapriyo vandyo vandanīyaḥ śaciprasūḥ |miśrapurandarādhiso raghunāthapriyo rayaḥ || 37||

सार्वभौमदर्पहारी अमोघारिर्वसुप्रियः ।सहजः सहजाधीशः शाश्वतः प्रणयातुरः ॥ ३८॥

sārvabhaumadarpahārī amoghārirvasupriyaḥ |sahajaḥ sahajādhīśaḥ śāśvataḥ praṇayāturaḥ || 38||

किलकिञ्चिदभावार्तः पाण्डुगण्डः शुचातुरः ।प्रलापी बहुवाक् शुद्धः ऋजुर्वक्रगतिः शिवः ॥ ३९॥

kilakiñcidabhāvārtaḥ pāṇḍugaṇḍaḥ śucāturaḥ |pralāpī bahuvāk śuddhaḥ ṛjurvakragatiḥ śivaḥ || 39||

घत्तायितोऽरविन्दाक्षः प्रेमवैचित्यलक्षकः ।प्रियाभिमानी चतुरः प्रियावर्ती प्रियोन्मुखः ॥ ४०॥

ghattāyito'ravindākṣaḥ premavaicityalakṣakaḥ |priyābhimānī caturaḥ priyāvartī priyonmukhaḥ || 40||

लोमाञ्चितः कम्पधरः अश्रुमुखो विशोकहा ।हास्यप्रियो हास्यकारी हास्ययुग् हास्यनागरः ॥ ४१॥

lomāñcitaḥ kampadharaḥ aśrumukho viśokahā |hāsyapriyo hāsyakārī hāsyayug hāsyanāgaraḥ || 41||

हास्यग्रामी हास्यकरस्त्रिभङ्गी नर्तनाकुलः ।ऊर्ध्वलोमा ऊर्ध्वहस्त ऊर्ध्वरावी विकारवान् ॥ ४२॥

hāsyagrāmī hāsyakarastribhaṅgī nartanākulaḥ |ūrdhvalomā ūrdhvahasta ūrdhvarāvī vikāravān || 42||

भवोल्लासी धीरशान्तो धीरङ्गो धीरनायकः ।देवास्पदो देवधामा देवदेवो मनोभवः ॥ ४३॥

bhavollāsī dhīraśānto dhīraṅgo dhīranāyakaḥ |devāspado devadhāmā devadevo manobhavaḥ || 43||

हेमाद्रिर्हेमलावण्यः सुमेरुर्ब्रह्मसादनः ।ऐरावतस्वर्णकान्तिः शरघ्नो वाञ्छितप्रदः ॥ ४४॥

hemādrirhemalāvaṇyaḥ sumerurbrahmasādanaḥ |airāvatasvarṇakāntiḥ śaraghno vāñchitapradaḥ || 44||

करोभोरूः सुदीर्घाक्षः कम्पभ्रूचक्षुनासिकः ।नामग्रन्थी नामसङ्ख्या भावबद्धस्तृषाहरः ॥ ४५॥

karobhorūḥ sudīrghākṣaḥ kampabhrūcakṣunāsikaḥ |nāmagranthī nāmasaṅkhyā bhāvabaddhastṛṣāharaḥ || 45||

पापाकर्षी पापहारी पापघ्नः पापशोधकः ।दर्पहा धनदोऽरिघ्नो मानहा रिपुहा मधुः ॥ ४६॥

pāpākarṣī pāpahārī pāpaghnaḥ pāpaśodhakaḥ |darpahā dhanado'righno mānahā ripuhā madhuḥ || 46||

रूपहा वेशहा दिव्यो दीनबन्धुः कृपामयः ।सुधक्षरः सुधास्वादी सुधामा कमनीयकः ॥ ४७॥

rūpahā veśahā divyo dīnabandhuḥ kṛpāmayaḥ |sudhakṣaraḥ sudhāsvādī sudhāmā kamanīyakaḥ || 47||

निर्मुक्तो मुक्तिदो मुक्तो मुक्ताख्यो मुक्तिबाधकः ।निःशङ्को निरहङ्कारो निर्वैरो विपदापहः ॥ ४८॥

nirmukto muktido mukto muktākhyo muktibādhakaḥ |niḥśaṅko nirahaṅkāro nirvairo vipadāpahaḥ || 48||

विदग्धो नवलावण्यो नवद्वीपद्विज प्रभुः ।निरङ्कुशो देववन्द्यः सुराचार्यः सुरारिहा ॥ ४९॥

vidagdho navalāvaṇyo navadvīpadvija prabhuḥ |niraṅkuśo devavandyaḥ surācāryaḥ surārihā || 49||

सुरवर्यो निन्द्यहारी वादघ्नः परितोषकः ।सुप्रकाशो बृहद्बाहुर्मित्रज्ञः कविभूषणः ॥ ५०॥

suravaryo nindyahārī vādaghnaḥ paritoṣakaḥ |suprakāśo bṛhadbāhurmitrajñaḥ kavibhūṣaṇaḥ || 50||

वरप्रदो वरपाङ्गो वरयुग् वरनायकः ।पुष्पहासः पद्मगन्धिः पद्मरागः प्रजागरः ॥ ५१॥

varaprado varapāṅgo varayug varanāyakaḥ |puṣpahāsaḥ padmagandhiḥ padmarāgaḥ prajāgaraḥ || 51||

ऊर्ध्वगः सत्पथाचारी प्राणद ऊर्ध्वगायकः ।जनप्रियो जनाह्लादो जनकऋषि जनस्पृहः ॥ ५२॥

ūrdhvagaḥ satpathācārī prāṇada ūrdhvagāyakaḥ |janapriyo janāhlādo janakaṛṣi janaspṛhaḥ || 52||

अजन्मा जन्मनिलयो जनानदो जनार्द्रधीः ।जगन्नाथो जगद्बन्धुर्जगद्देवो जगत्पतिः ॥ ५३॥

ajanmā janmanilayo janānado janārdradhīḥ |jagannātho jagadbandhurjagaddevo jagatpatiḥ || 53||

जनकारी जनामोदो जनकानन्दसाग्रहः ।कलिप्रियः कलिश्लाघ्यः कलिमानविवर्धनः ॥ ५४॥

janakārī janāmodo janakānandasāgrahaḥ |kalipriyaḥ kaliślāghyaḥ kalimānavivardhanaḥ || 54||

कलिवर्यः सदानन्दः कलिकृत् कलिधन्यमान् ।वर्धामनः श्रुतिधरः वर्धनो वृद्धिदायकः ॥ ५५॥

kalivaryaḥ sadānandaḥ kalikṛt kalidhanyamān |vardhāmanaḥ śrutidharaḥ vardhano vṛddhidāyakaḥ || 55||

सम्पदः शारणो दक्षो घृणाङ्गी कलिरक्षकः ।कलिधन्यः समयज्ञः कलिपुण्यप्रकाशकः ॥ ५६॥

sampadaḥ śāraṇo dakṣo ghṛṇāṅgī kalirakṣakaḥ |kalidhanyaḥ samayajñaḥ kalipuṇyaprakāśakaḥ || 56||

निश्चिन्तो धीरललितो धीरवाक् प्रेयसीप्रियः ।वामास्पर्शी वामभावो वामरूपो मनोहरः ॥ ५७॥

niścinto dhīralalito dhīravāk preyasīpriyaḥ |vāmāsparśī vāmabhāvo vāmarūpo manoharaḥ || 57||

अतीन्द्रियः सुराध्यक्षो लोकाध्यक्षः कृतकृतः ।युगादिकृद् युगकरो युगज्ञो युगनायकः ॥ ५८॥

atīndriyaḥ surādhyakṣo lokādhyakṣaḥ kṛtakṛtaḥ |yugādikṛd yugakaro yugajño yuganāyakaḥ || 58||

युगावर्तो युगासीमः कालवान् कालशक्तिधृक् ।प्रणयः शाश्वतो हृष्टो विश्वजिद् बुद्धिमोहनः ॥ ५९॥

yugāvarto yugāsīmaḥ kālavān kālaśaktidhṛk |praṇayaḥ śāśvato hṛṣṭo viśvajid buddhimohanaḥ || 59||

सन्ध्याता ध्यानकृद् ध्यानी ध्यानमङ्गलसन्धिमान् ।विस्रुतात्मा हृदिस्थिरो ग्रामनियप्रग्राहकः ॥ ६०॥

sandhyātā dhyānakṛd dhyānī dhyānamaṅgalasandhimān |visrutātmā hṛdisthiro grāmaniyapragrāhakaḥ || 60||

स्वरमूर्च्छी स्वरालापी स्वरमूर्तिविभूषणः ।गानग्राही गानलुब्धो गायको गानवर्धनः ॥ ६१॥

svaramūrcchī svarālāpī svaramūrtivibhūṣaṇaḥ |gānagrāhī gānalubdho gāyako gānavardhanaḥ || 61||

गानमान्यो ह्यप्रमेयः सत्कर्ता विश्वधृक् सहः ।क्षीराब्धिकमथाकारः प्रेमगर्भझषाकृतिः ॥ ६२॥

gānamānyo hyaprameyaḥ satkartā viśvadhṛk sahaḥ |kṣīrābdhikamathākāraḥ premagarbhajhaṣākṛtiḥ || 62||

बीभत्सुर्भावहृदयः अदृश्यो बर्हिदर्शकः ।ज्ञानरुद्धो धीरबुद्धिरखिलात्मप्रियः सुधीः ॥ ६३॥

bībhatsurbhāvahṛdayaḥ adṛśyo barhidarśakaḥ |jñānaruddho dhīrabuddhirakhilātmapriyaḥ sudhīḥ || 63||

अमेयः सर्वविद्भानुर्बभ्रूर्बहुशिरो रुचिः ।उरुश्रवाः महादीर्घो वृषकर्मा वृषाकृतिः ॥ ६४॥

ameyaḥ sarvavidbhānurbabhrūrbahuśiro ruciḥ |uruśravāḥ mahādīrgho vṛṣakarmā vṛṣākṛtiḥ || 64||

श्रुतिस्मृतिधरो वेदः श्रुतिज्ञः श्रुतिबाधकः ।हृदिस्पृश आस आत्मा श्रुतिसारो विचक्षणः ॥ ६५॥

śrutismṛtidharo vedaḥ śrutijñaḥ śrutibādhakaḥ |hṛdispṛśa āsa ātmā śrutisāro vicakṣaṇaḥ || 65||

कलापी निरनुग्राही वैद्यविद्याप्रचारकः ।मीमांसकारिर्वेदाङ्ग वेदार्थप्रभवो गतिः ॥ ६६॥

kalāpī niranugrāhī vaidyavidyāpracārakaḥ |mīmāṃsakārirvedāṅga vedārthaprabhavo gatiḥ || 66||

परावरज्ञो दुष्पारो विरहाङ्गी सतां गतिः ।असङ्ख्येयोऽप्रमेयात्मा सिद्धिदः सिद्धिसाधनः ॥ ६७॥

parāvarajño duṣpāro virahāṅgī satāṃ gatiḥ |asaṅkhyeyo'prameyātmā siddhidaḥ siddhisādhanaḥ || 67||

धर्मसेतुर्धर्मपरो धर्मात्मा धर्मभावनः ।उदीर्णसंशयच्छिन्नो विभूतिः शाश्वतः स्थिरः ॥ ६८॥

dharmaseturdharmaparo dharmātmā dharmabhāvanaḥ |udīrṇasaṃśayacchinno vibhūtiḥ śāśvataḥ sthiraḥ || 68||

शुद्धात्मा शोभनोत्कण्ठोऽनिर्देश्यः साधनप्रियः ।ग्रन्थप्रियो ग्रन्थमयः शास्त्रयोनिर्महाशयः ॥ ६९॥

śuddhātmā śobhanotkaṇṭho'nirdeśyaḥ sādhanapriyaḥ |granthapriyo granthamayaḥ śāstrayonirmahāśayaḥ || 69||

अवर्णो वर्णनिलयो नाश्रमी चतुराश्रमः ।अविप्र विप्रकृत् स्तुत्यो राजन्यो राज्यनाशकः ॥ ७०॥

avarṇo varṇanilayo nāśramī caturāśramaḥ |avipra viprakṛt stutyo rājanyo rājyanāśakaḥ || 70||

अवश्यो वश्यताधीनः श्रीभक्तिव्यवसायकः ।मनोजवः पुरयिता भक्तिकीर्तिरनामयः ॥ ७१॥

avaśyo vaśyatādhīnaḥ śrībhaktivyavasāyakaḥ |manojavaḥ purayitā bhaktikīrtiranāmayaḥ || 71||

निधिवर्जी भक्तिनिधिर्दुर्लभो दुर्गभावकृत् ।कर्तनीः कीर्तिरतुलः अमृतो मुरजप्रियः ॥ ७२॥

nidhivarjī bhaktinidhirdurlabho durgabhāvakṛt |kartanīḥ kīrtiratulaḥ amṛto murajapriyaḥ || 72||

शृङ्गारः पञ्चमो भावो भावयोनिरनन्तरः ।भक्तिजित् प्रेमभोजी च नवभक्तिप्रचारकः ॥ ७३॥

śṛṅgāraḥ pañcamo bhāvo bhāvayoniranantaraḥ |bhaktijit premabhojī ca navabhaktipracārakaḥ || 73||

त्रिगर्तस्त्रिगुणामोदस्त्रिवाञ्छी प्रीतिवर्धनः ।नियन्ता श्रमगोऽतीतः पोषणो विगतज्वरः ॥ ७४॥

trigartastriguṇāmodastrivāñchī prītivardhanaḥ |niyantā śramago'tītaḥ poṣaṇo vigatajvaraḥ || 74||

प्रेमज्वरो विमानार्हः अर्थहा स्वप्ननाशनः ।उत्तारणो नामपुण्यः पापपुण्यविवर्जितः ॥ ७५॥

premajvaro vimānārhaḥ arthahā svapnanāśanaḥ |uttāraṇo nāmapuṇyaḥ pāpapuṇyavivarjitaḥ || 75||

अपराधहरः पाल्यः स्वस्तिदः स्वस्तिभूषणः ।पूतात्मा पूतगः पूतः पूतभावो महास्वनः ॥ ७६॥

aparādhaharaḥ pālyaḥ svastidaḥ svastibhūṣaṇaḥ |pūtātmā pūtagaḥ pūtaḥ pūtabhāvo mahāsvanaḥ || 76||

क्षेत्रज्ञः क्षेत्रविजयी क्षेत्रवासो जगत्प्रसूः ।भयहा भयदो भास्वान् गौणभावसमन्वितः ॥ ७७॥

kṣetrajñaḥ kṣetravijayī kṣetravāso jagatprasūḥ |bhayahā bhayado bhāsvān gauṇabhāvasamanvitaḥ || 77||

मण्डितो मण्डलकरो वैजयन्तीपवित्रकः ।चित्राङ्गश्चित्रितश्चित्रो भक्तचित्तप्रकाशकः ॥ ७८॥

maṇḍito maṇḍalakaro vaijayantīpavitrakaḥ |citrāṅgaścitritaścitro bhaktacittaprakāśakaḥ || 78||

बुद्धिगो बुद्धिदो बुद्धिर्बुद्धिधृग् बुद्धिवर्धनः ।प्रेमाद्रिधृक् प्रेमवहो रतिवोढ रतिस्पृशः ॥ ७९॥

buddhigo buddhido buddhirbuddhidhṛg buddhivardhanaḥ |premādridhṛk premavaho rativoḍha ratispṛśaḥ || 79||

प्रेमचक्षुः प्रेमगह्नः प्रेमहृत् प्रेमपूरकः ।गम्भीरगो बहिर्वासो भावानुष्ठितगो पतिः ॥ ८०॥

premacakṣuḥ premagahnaḥ premahṛt premapūrakaḥ |gambhīrago bahirvāso bhāvānuṣṭhitago patiḥ || 80||

नैकरूपो नैकभावो नैकात्मा नैकरूपधृक् ।श्लथसन्धिः क्षीणधर्मस्त्यक्तपाप उरुश्रवः ॥ ८१॥

naikarūpo naikabhāvo naikātmā naikarūpadhṛk |ślathasandhiḥ kṣīṇadharmastyaktapāpa uruśravaḥ || 81||

उरुगाय उरुग्रीव उरुभाव उरुक्रमः ।निर्धूतो निर्मलो भावो निरीहो निरनुग्रहः ॥ ८२॥

urugāya urugrīva urubhāva urukramaḥ |nirdhūto nirmalo bhāvo nirīho niranugrahaḥ || 82||

निर्धूमोऽग्निः सुप्रतापस्तीव्रतापो हुताशनः ।एको महद्भूतव्यापी पृथग्भूतः अनेकशः ॥ ८३॥

nirdhūmo'gniḥ supratāpastīvratāpo hutāśanaḥ |eko mahadbhūtavyāpī pṛthagbhūtaḥ anekaśaḥ || 83||

निर्णयी निरनुज्ञातो दुष्टग्रामनिवर्तकः ।विप्रबन्धुः प्रियो रुच्यो रोचकाङ्गो नराधिपः ॥ ८४॥

nirṇayī niranujñāto duṣṭagrāmanivartakaḥ |viprabandhuḥ priyo rucyo rocakāṅgo narādhipaḥ || 84||

लोकाध्यक्षः सुवर्णाभः कनकाब्जः शिखामणिः ।हेमकुम्भो धर्मसेतुर्लोकनाथो जगद्गुरुः ॥ ८५॥

lokādhyakṣaḥ suvarṇābhaḥ kanakābjaḥ śikhāmaṇiḥ |hemakumbho dharmaseturlokanātho jagadguruḥ || 85||

लोहिताक्षो नामकर्मा भावस्थो हृद्गुहाशयः ।रसप्राणो रतिज्येष्ठो रसाब्धिरतिराकुलः ॥ ८६॥

lohitākṣo nāmakarmā bhāvastho hṛdguhāśayaḥ |rasaprāṇo ratijyeṣṭho rasābdhiratirākulaḥ || 86||

भावसिन्धुर्भक्तिमेघो रसवर्षी जनाकुलः ।पीताब्जो नीलपीताभो रतिभोक्ता रसायनः ॥ ८७॥

bhāvasindhurbhaktimegho rasavarṣī janākulaḥ |pītābjo nīlapītābho ratibhoktā rasāyanaḥ || 87||

अव्यक्तः स्वर्णराजीवो विवर्णी साधुदर्शनः ।अमृत्युः मृत्युदोऽरुद्धः सन्धाता मृत्युवञ्चकः ॥ ८८॥

avyaktaḥ svarṇarājīvo vivarṇī sādhudarśanaḥ |amṛtyuḥ mṛtyudo'ruddhaḥ sandhātā mṛtyuvañcakaḥ || 88||

प्रेमोन्मत्तः कीर्तनर्त्तः सङ्कीर्तनपिता सुरः ।भक्तिग्रामः सुसिद्धार्थः सिद्धिदः सिद्धिसाधनः ॥ ८९॥

premonmattaḥ kīrtanarttaḥ saṅkīrtanapitā suraḥ |bhaktigrāmaḥ susiddhārthaḥ siddhidaḥ siddhisādhanaḥ || 89||

प्रेमोदरः प्रेमवाहू लोकभर्ता दिशाम्पतिः ।अन्तः कृष्णो बहिर्गौरो दर्शको रतिविस्तरः ॥ ९०॥

premodaraḥ premavāhū lokabhartā diśāmpatiḥ |antaḥ kṛṣṇo bahirgauro darśako rativistaraḥ || 90||

सङ्कल्पसिद्धो वाञ्छात्मा अतुलः सच्छरीरभृत् ।ऋड्धार्थः करुणापाङ्गो नदकृद् भक्तवत्सलः ॥ ९१॥

saṅkalpasiddho vāñchātmā atulaḥ saccharīrabhṛt |ṛḍdhārthaḥ karuṇāpāṅgo nadakṛd bhaktavatsalaḥ || 91||

अमत्सरः परानन्दः कौपीनी भक्तिपोषकः ।अकैतवो नाममाली वेगवान् पूर्णलक्षणः ॥ ९२॥

amatsaraḥ parānandaḥ kaupīnī bhaktipoṣakaḥ |akaitavo nāmamālī vegavān pūrṇalakṣaṇaḥ || 92||

मिताशनो विवर्ताक्षो व्यवसाया व्यवस्थितः ।रतिस्थानो रतिवनः पश्चात्तुष्टः शमाकुलः ॥ ९३॥

mitāśano vivartākṣo vyavasāyā vyavasthitaḥ |ratisthāno rativanaḥ paścāttuṣṭaḥ śamākulaḥ || 93||

क्षोभणो विरभो मार्गो मार्गधृग् वर्त्मदर्शकः ।नीचाश्रमी नीचमानी विस्तारो बीजमव्ययः ॥ ९४॥

kṣobhaṇo virabho mārgo mārgadhṛg vartmadarśakaḥ |nīcāśramī nīcamānī vistāro bījamavyayaḥ || 94||

मोहकायः सूक्ष्मगतिर्महेज्यः सत्त्रवर्धनः ।सुमुखः स्वापनोऽनादिः सुकृत् पापविदारणः ॥ ९५॥

mohakāyaḥ sūkṣmagatirmahejyaḥ sattravardhanaḥ |sumukhaḥ svāpano'nādiḥ sukṛt pāpavidāraṇaḥ || 95||

श्रीनिवासो गभीरात्मा शृङ्गारकनकादृतः ।गभीरो गहनो वेधा साङ्गोपाङ्गो वृषप्रियः ॥ ९६॥

śrīnivāso gabhīrātmā śṛṅgārakanakādṛtaḥ |gabhīro gahano vedhā sāṅgopāṅgo vṛṣapriyaḥ || 96||

उदीर्णरागो वैचित्री श्रीकरः स्तवनार्हकः ।अश्रुचक्षुर्जलाब्यङ्ग पूरितो रतिपूरकः ॥ ९७॥

udīrṇarāgo vaicitrī śrīkaraḥ stavanārhakaḥ |aśrucakṣurjalābyaṅga pūrito ratipūrakaḥ || 97||

स्तोत्रायणः स्तवाध्यक्षः स्तवनीयः स्तवाकुलः ।ऊर्ध्वरेतः सन्निवासः प्रेममूर्तिः शतानलः ॥ ९८॥

stotrāyaṇaḥ stavādhyakṣaḥ stavanīyaḥ stavākulaḥ |ūrdhvaretaḥ sannivāsaḥ premamūrtiḥ śatānalaḥ || 98||

भक्तबन्धुर्लोकबन्धुः प्रेमबन्धुः शताकुलः ।सत्यमेधा श्रुतिधरः सर्वशस्त्रभृतांवरः ॥ ९९॥

bhaktabandhurlokabandhuḥ premabandhuḥ śatākulaḥ |satyamedhā śrutidharaḥ sarvaśastrabhṛtāṃvaraḥ || 99||

भक्तिद्वारो भक्तिगृहः प्रेमागारो निरोधहा ।उद्घूर्णो घूर्णितमना आघूर्नितकलेवरः ॥ १००॥

bhaktidvāro bhaktigṛhaḥ premāgāro nirodhahā |udghūrṇo ghūrṇitamanā āghūrnitakalevaraḥ || 100||

भवभ्रान्तिजसन्देहः प्रेमराशिः शुचापहः ।कृपाचार्यः प्रेमसङ्गो वयुनः स्थिरयौवनः ॥ १०१॥

bhavabhrāntijasandehaḥ premarāśiḥ śucāpahaḥ |kṛpācāryaḥ premasaṅgo vayunaḥ sthirayauvanaḥ || 101||

सिन्धुगः प्रेमसङ्गाहः प्रेमवश्यो विचक्षणः ।पद्मकिञ्जल्कसङ्काशः प्रेमादारो नियामकः ॥ १०२॥

sindhugaḥ premasaṅgāhaḥ premavaśyo vicakṣaṇaḥ |padmakiñjalkasaṅkāśaḥ premādāro niyāmakaḥ || 102||

विरक्तो विगतारातिर्नापेक्षो नारददृतः ।नतस्थो दक्षिणः क्षामः शठजीवप्रतारकः ॥ १०३॥

virakto vigatārātirnāpekṣo nāradadṛtaḥ |natastho dakṣiṇaḥ kṣāmaḥ śaṭhajīvapratārakaḥ || 103||

नामप्रवर्तकोऽनर्थो धर्मोगुर्वादिपुरुषः ।न्यग्रोधो जनको जातो वैनत्यो भक्तिपादपः ॥ १०४॥

nāmapravartako'nartho dharmogurvādipuruṣaḥ |nyagrodho janako jāto vainatyo bhaktipādapaḥ || 104||

आत्ममोहः प्रेमलीधः आत्मभावानुगो विराट् ।माधुर्यवत् स्वात्मरतो गौरख्यो विप्ररूपधृक् ॥ १०५॥

ātmamohaḥ premalīdhaḥ ātmabhāvānugo virāṭ |mādhuryavat svātmarato gaurakhyo viprarūpadhṛk || 105||

राधारूपी महाभावी राध्यो राधनतत्परः ।गोपीनाथात्मकोऽदृश्यः स्वाधिकारप्रसाधकः ॥ १०६॥

rādhārūpī mahābhāvī rādhyo rādhanatatparaḥ |gopīnāthātmako'dṛśyaḥ svādhikāraprasādhakaḥ || 106||

नित्यास्पदो नित्यरूपी नित्यभावप्रकाशकः ।सुस्थभावश्चपलधीः स्वच्छगो भक्तिपोषकः ॥ १०७॥

nityāspado nityarūpī nityabhāvaprakāśakaḥ |susthabhāvaścapaladhīḥ svacchago bhaktipoṣakaḥ || 107||

सर्वत्रगस्तीर्थभूतो हृदिस्थः कमलासनः ।सर्वभावानुगाधीशः सर्वमङ्गलकारकः ॥ १०८॥

sarvatragastīrthabhūto hṛdisthaḥ kamalāsanaḥ |sarvabhāvānugādhīśaḥ sarvamaṅgalakārakaḥ || 108||

इत्येतत्कथितं नित्यं साहस्रं नामसुन्दरम् ।गोलोकवासिनो विष्णोर्गौररूपस्य शार्ङ्गिनः ॥ १०९॥

ityetatkathitaṃ nityaṃ sāhasraṃ nāmasundaram |golokavāsino viṣṇorgaurarūpasya śārṅginaḥ || 109||

इदं गौरसहस्राख्याम् आमयघ्नं शुचापहम् ।प्रेमभक्तिप्रदं नृणां गोविन्दाकर्षकं परम् ॥ ११०॥

idaṃ gaurasahasrākhyām āmayaghnaṃ śucāpaham |premabhaktipradaṃ nṛṇāṃ govindākarṣakaṃ param || 110||

प्रातःकाले च मध्याह्ने सन्ध्यायां मध्यरात्रिके ।यः पठेत्प्रयतो भक्त्या चैतन्ये लभते रतिम् ॥ १११॥

prātaḥkāle ca madhyāhne sandhyāyāṃ madhyarātrike |yaḥ paṭhetprayato bhaktyā caitanye labhate ratim || 111||

नामात्मको गौरदेवो यस्य चेतसि वर्तते ।स सर्वं विषयं त्यक्त्वा भावानन्दो भवेद्ध्रुवम् ॥ ११२॥

nāmātmako gauradevo yasya cetasi vartate |sa sarvaṃ viṣayaṃ tyaktvā bhāvānando bhaveddhruvam || 112||

यस्मै कस्मै न दातव्यम् दाने तु भक्तिहा भवेत् ।विनीताय प्रशान्ताय गौरभक्ताय धीमते ॥ ११३॥

yasmai kasmai na dātavyam dāne tu bhaktihā bhavet |vinītāya praśāntāya gaurabhaktāya dhīmate || 113||

तस्मै देयं ततो ग्राह्यमिति वैष्णवशासनम् ॥इति श्रीकविकर्णपूरविरचितम् श्रीकृष्णचैतन्यचन्द्रस्यसहस्रनामस्तोत्रं १ सम्पूर्णम् ॥

tasmai deyaṃ tato grāhyamiti vaiṣṇavaśāsanam ||iti śrīkavikarṇapūraviracitam śrīkṛṣṇacaitanyacandrasyasahasranāmastotraṃ 1 sampūrṇam ||