रामकृष्णमङ्गलाशासनम् Shri Ramakrishna mangalashasanam

मङ्गलं देशिकेन्द्राय यमिनां चक्रवर्तिने ।पराशक्तिस्वरूपिण्यै देव्यै भवतु मङ्गलम् ॥ १॥

maṅgalaṃ deśikendrāya yamināṃ cakravartine |parāśaktisvarūpiṇyai devyai bhavatu maṅgalam || 1||

सत्यसन्धस्य भक्तस्य क्षुदिरामस्य सूनवे ।गदाधराय मेदिन्यामवतीर्णाय मङ्गलम् ॥ २॥

satyasandhasya bhaktasya kṣudirāmasya sūnave |gadādharāya medinyāmavatīrṇāya maṅgalam || 2||

गदाधरसुनाम्ने च भक्त्यावेष्टितचेतसे ।अनादृतान्यविद्याय मङ्गलं ब्रह्मचारिणे ॥ ३॥

gadādharasunāmne ca bhaktyāveṣṭitacetase |anādṛtānyavidyāya maṅgalaṃ brahmacāriṇe || 3||

भवतारणदक्षायाः सन्निधौ दक्षिणेश्वरे ।अपूर्व कालिका पूजा निरतायास्तु मङ्गलम् ॥ ४॥

bhavatāraṇadakṣāyāḥ sannidhau dakṣiṇeśvare |apūrva kālikā pūjā niratāyāstu maṅgalam || 4||

मथुरानाथविश्वास सेवानिर्वृतचेतसे ।तपश्चरणशीलाय योगीशायास्तु मङ्गलम् ॥ ५॥

mathurānāthaviśvāsa sevānirvṛtacetase |tapaścaraṇaśīlāya yogīśāyāstu maṅgalam || 5||

साधकव्याजसन्दिष्ट सर्वाम्नाय सुवर्त्मने ।सर्वतन्त्रस्वतन्त्राय नित्यसिद्धाय मङ्गलम् ॥ ६॥

sādhakavyājasandiṣṭa sarvāmnāya suvartmane |sarvatantrasvatantrāya nityasiddhāya maṅgalam || 6||

तपसि ब्रह्मचर्ये च या स्वस्य सहधर्मिणी ।तस्याः श्री शारदादेव्या भर्त्रे भवतु मङ्गलम् ॥ ७॥

tapasi brahmacarye ca yā svasya sahadharmiṇī |tasyāḥ śrī śāradādevyā bhartre bhavatu maṅgalam || 7||

तोतापुरीयती प्राप्त चरमाश्रमहेतुके ।समाधौ निर्विकल्पाख्ये सुदीर्घस्थाय मङ्गलम् ॥ ८॥

totāpurīyatī prāpta caramāśramahetuke |samādhau nirvikalpākhye sudīrghasthāya maṅgalam || 8||

स्थिताय मातुरादेशात् जगदुद्धारकारणात् ।पूर्णाऽन्तस्थितौ भावमुखे भवतु मङ्गलम् ॥ ९॥

sthitāya māturādeśāt jagaduddhārakāraṇāt |pūrṇā'ntasthitau bhāvamukhe bhavatu maṅgalam || 9||

पश्यते मातरं स्त्रीषु मृत्पिण्डं काञ्चनं तथा ।सर्वभूतेषु च ब्रह्म मायातीताय मङ्गलम् ॥ १०॥

paśyate mātaraṃ strīṣu mṛtpiṇḍaṃ kāñcanaṃ tathā |sarvabhūteṣu ca brahma māyātītāya maṅgalam || 10||

सदारोऽपि विरक्तानां यतीनां पुरतस्तु यः ।सदाशिवस्वरूपाय तस्मै भवतु मङ्गलम् ॥ ११॥

sadāro'pi viraktānāṃ yatīnāṃ puratastu yaḥ |sadāśivasvarūpāya tasmai bhavatu maṅgalam || 11||

ब्रह्मानन्दादिसच्छिष्य गणपूज्यपदाय ते ।तेषु दीप्तात्मबोधाय परमहंसाय मङ्गलम् ॥ १२॥

brahmānandādisacchiṣya gaṇapūjyapadāya te |teṣu dīptātmabodhāya paramahaṃsāya maṅgalam || 12||

गर्जद्वेदान्तसिंहेन विवेकानन्दरूपिणा ।अपास्तनिद्रा भूर्येण कारिताऽस्मै च मङ्गलम् ॥ १३॥

garjadvedāntasiṃhena vivekānandarūpiṇā |apāstanidrā bhūryeṇa kāritā'smai ca maṅgalam || 13||

संसारसागरोत्तार सेतु भूताङ्घ्रि रेणवे ।गुरवे सर्वलोकानां रामकृष्णाय मङ्गलम् ॥ १४॥

saṃsārasāgarottāra setu bhūtāṅghri reṇave |gurave sarvalokānāṃ rāmakṛṣṇāya maṅgalam || 14||

ॐ स्थापकाय च धर्मस्य सर्वधर्मस्वरूपिणे ।अवतारवरिष्ठाय रामकृष्णाय मङ्गलम् ॥ १५॥

oṃ sthāpakāya ca dharmasya sarvadharmasvarūpiṇe |avatāravariṣṭhāya rāmakṛṣṇāya maṅgalam || 15||

मङ्गलं गुरुदेवाय देव्यै मात्रे च मङ्गलम् ।मङ्गलं भक्तवृन्देभ्यः सर्वलोकाय मङ्गलम् ॥ १६॥

maṅgalaṃ gurudevāya devyai mātre ca maṅgalam |maṅgalaṃ bhaktavṛndebhyaḥ sarvalokāya maṅgalam || 16||

इति स्वामिअचलानन्दसरस्वतीविरचितंश्रीरामकृष्णमङ्गलाशासनम् सम्पूर्णम् ।

iti svāmiacalānandasarasvatīviracitaṃśrīrāmakṛṣṇamaṅgalāśāsanam sampūrṇam |