गुरुपादुकापुष्पमाला Shri Guru Paduka Pushpa Mala

ॐ श्रीगुरवे नमः ।मद्धृत्स्थं सुभगाकारं सर्वसौख्यकरं परम् ।भवतापहरं शूरं वरेण्यं विदुषां मतम् ॥ १॥

oṃ śrīgurave namaḥ |maddhṛtsthaṃ subhagākāraṃ sarvasaukhyakaraṃ param |bhavatāpaharaṃ śūraṃ vareṇyaṃ viduṣāṃ matam || 1||

महनीयाकृतिं देवं श्रीगुरुं परमं विभुम् ।लक्ष्मणं लक्षणैर्युक्तं प्रणौमि सर्वदं सदा ॥ २॥ (युगलकं)

mahanīyākṛtiṃ devaṃ śrīguruṃ paramaṃ vibhum |lakṣmaṇaṃ lakṣaṇairyuktaṃ praṇaumi sarvadaṃ sadā || 2|| (yugalakaṃ)

दासोऽहमस्मि मूढोऽहं त्वद्दयावञ्चितः खलु ।कृपाकटाक्षपूरैस्त्वं पूरय विरसं मनः ॥ ३॥

dāso'hamasmi mūḍho'haṃ tvaddayāvañcitaḥ khalu |kṛpākaṭākṣapūraistvaṃ pūraya virasaṃ manaḥ || 3||

दर्श दर्श भवद्रूपं तृण्मदीया न शाम्यति ।श्रावं श्रावं भवत्कीर्ति शुश्रूषा नापक्षीयते ॥ ४॥

darśa darśa bhavadrūpaṃ tṛṇmadīyā na śāmyati |śrāvaṃ śrāvaṃ bhavatkīrti śuśrūṣā nāpakṣīyate || 4||

स्मारं स्मारं भवन्नाम जिगीषा नापचीयते ।पायं पायं भवद्वाक्यं मत्पिपासा प्रवर्धते ॥ ५॥

smāraṃ smāraṃ bhavannāma jigīṣā nāpacīyate |pāyaṃ pāyaṃ bhavadvākyaṃ matpipāsā pravardhate || 5||

कौलाख्ये शैवशास्त्रे यः विग्रहीव कलौ युगे ।सन्तारयति ज्ञानस्य पोतेन शरणागतान् ॥ ६॥

kaulākhye śaivaśāstre yaḥ vigrahīva kalau yuge |santārayati jñānasya potena śaraṇāgatān || 6||

अवाप्तुकामो भवदाश्रयं हि विषण्णचेता विभवाब्धिमग्नः ।त्वत्पूतपादाब्जपरागकाङ्क्षी द्वारे तव प्राञ्जलिरागतोऽस्मि ॥ ७॥

avāptukāmo bhavadāśrayaṃ hi viṣaṇṇacetā vibhavābdhimagnaḥ |tvatpūtapādābjaparāgakāṅkṣī dvāre tava prāñjalirāgato'smi || 7||

धुनोति वायुर्हि यथा महीरुहान् इयं तथा दुष्प्रकृतिर्मनुष्यान् ।परं भवद्दर्शनवातपालितान् नरान् समर्थोऽस्ति न कोऽपि धर्षितुम् ॥ ८॥

dhunoti vāyurhi yathā mahīruhān iyaṃ tathā duṣprakṛtirmanuṣyān |paraṃ bhavaddarśanavātapālitān narān samartho'sti na ko'pi dharṣitum || 8||

अल्पज्ञान् कुजनान् धीमान् कौलाचारविवर्जितान् ।नवाभिनवकैर्भावैः प्रपूरयति मद्गुरुः ॥ ९॥

alpajñān kujanān dhīmān kaulācāravivarjitān |navābhinavakairbhāvaiḥ prapūrayati madguruḥ || 9||

त्वद्वाक्यतन्त्र्योद्यत रम्यनादैः मनोज्ञभावैः रसपूरितं सत् ।स्वान्तं मदीयं रसभावहीनं प्राप्नोत्यनाख्यां स्थितिमद्वितीयाम् ॥ १०॥

tvadvākyatantryodyata ramyanādaiḥ manojñabhāvaiḥ rasapūritaṃ sat |svāntaṃ madīyaṃ rasabhāvahīnaṃ prāpnotyanākhyāṃ sthitimadvitīyām || 10||

भवत्पदाब्जेन मनाक् स्पृष्टे मलन्त्रिधा द्रागपयाति कुत्र ।जाने न भो कौलिकदेशिकेन्द्र ! एतद्धि सत्यं न मृषाब्रवीमि ॥ ११॥

bhavatpadābjena manāk spṛṣṭe malantridhā drāgapayāti kutra |jāne na bho kaulikadeśikendra ! etaddhi satyaṃ na mṛṣābravīmi || 11||

पूतं विविक्तं दशरागवर्जितं सत्त्वे सुनिष्ठं नयनामृतं परम् ।स्वतन्त्रविद्वज्जनवृन्दवन्दितं गुरुं दयाद्रं प्रणमामि नित्यम् ॥ १२॥

pūtaṃ viviktaṃ daśarāgavarjitaṃ sattve suniṣṭhaṃ nayanāmṛtaṃ param |svatantravidvajjanavṛndavanditaṃ guruṃ dayādraṃ praṇamāmi nityam || 12||

स्मृतौ निमग्नः विरहातुरस्त्वहं लेभे न शान्ति न सुखं न निद्राम् ।निकामपानीययुतां न कोऽपि हित्वा नदीं सञ्जति तृष्णिकायाम् ॥ १३॥

smṛtau nimagnaḥ virahāturastvahaṃ lebhe na śānti na sukhaṃ na nidrām |nikāmapānīyayutāṃ na ko'pi hitvā nadīṃ sañjati tṛṣṇikāyām || 13||

तव भक्तिसुधाहीना दशा न मां सुखावहा ।मधुकुम्भे महालब्धे द्राक्षेहा नोपजायते ॥ १४॥

tava bhaktisudhāhīnā daśā na māṃ sukhāvahā |madhukumbhe mahālabdhe drākṣehā nopajāyate || 14||

न भोगविभवं काङ्क्षे न सुखं नार्थसञ्चयः ।परमेका भवद्भक्तिरस्तु मे सर्वसौख्यदा ॥ १५॥

na bhogavibhavaṃ kāṅkṣe na sukhaṃ nārthasañcayaḥ |paramekā bhavadbhaktirastu me sarvasaukhyadā || 15||

सुदर्शनः सदास्तु मामनन्तानन्दवर्धकः ।संविन्मार्गो भवत्प्राप्तिसाधकः त्रिगुणात्मकः ॥ १६॥

sudarśanaḥ sadāstu māmanantānandavardhakaḥ |saṃvinmārgo bhavatprāptisādhakaḥ triguṇātmakaḥ || 16||

नासीनस्य न सुप्तस्य भ्रमतो नोत्थितस्य न ।त्वामन्तराशमोनास्ति दिवा रात्रौ च जाग्रतः ॥ १७॥

nāsīnasya na suptasya bhramato notthitasya na |tvāmantarāśamonāsti divā rātrau ca jāgrataḥ || 17||

कठोरः कोमलाङ्गोऽसि दुर्धषः सुलभोऽसि त्वम् ।उग्रः शान्तस्वभावोऽसि दाने रतोऽसि निर्मदः ॥ १८॥

kaṭhoraḥ komalāṅgo'si durdhaṣaḥ sulabho'si tvam |ugraḥ śāntasvabhāvo'si dāne rato'si nirmadaḥ || 18||

बभर्ति भक्तान् स्वस्नेहधारया जहर्ति दुष्टान् भवभक्तिबाधकान् ।विभूतिसुसिद्धिसमृद्धियुक्तान् चकर्ति लोकान् स्वकृपाकटाक्षैः ॥ १९॥

babharti bhaktān svasnehadhārayā jaharti duṣṭān bhavabhaktibādhakān |vibhūtisusiddhisamṛddhiyuktān cakarti lokān svakṛpākaṭākṣaiḥ || 19||

समानभावेन समानप्रीत्या समत्वयोगी समताप्रचारकः ।सर्वान् शरण्य शरणागताञ्च कारुण्यभावेन समीक्षसे त्वम् ॥ २०॥

samānabhāvena samānaprītyā samatvayogī samatāpracārakaḥ |sarvān śaraṇya śaraṇāgatāñca kāruṇyabhāvena samīkṣase tvam || 20||

त्वग् मज्जास्थि हृदि व्याप्तं जन्मान्तरैरुपार्जितम् ।तत्सर्वं नाशयत्वीश ! यदघौघं मया कृतम् ॥ २१॥

tvag majjāsthi hṛdi vyāptaṃ janmāntarairupārjitam |tatsarvaṃ nāśayatvīśa ! yadaghaughaṃ mayā kṛtam || 21||

एकविंशतिपुष्पाणां कोकिलेन कृता मया ।माला श्रीगुरुदेवस्य लक्ष्मणस्य प्रसादये ॥इति श्रीमखनलालकोकिलविरचिता श्रीपादुकापुष्पमाला ।इति शिवं

ekaviṃśatipuṣpāṇāṃ kokilena kṛtā mayā |mālā śrīgurudevasya lakṣmaṇasya prasādaye ||iti śrīmakhanalālakokilaviracitā śrīpādukāpuṣpamālā |iti śivaṃ