कावेर्यष्टकम् ३ अथवा सह्यकन्यकाष्टकम् Kaveryashtakam Sahyakanyakashtakam

सरोजसम्भवाच्युतत्रिनेत्रभावनामयींकवेरराजकन्यकां च कामितार्थदायिनीम् ।अगस्त्यकुण्डिकान्तरप्रविष्टवारिरूपिणींभजामि सह्यकन्यकां भजामि सह्यकन्यकाम् ॥ १॥

sarojasambhavācyutatrinetrabhāvanāmayīṃkaverarājakanyakāṃ ca kāmitārthadāyinīm |agastyakuṇḍikāntarapraviṣṭavārirūpiṇīṃbhajāmi sahyakanyakāṃ bhajāmi sahyakanyakām || 1||

पवित्रधात्रिवृक्षरूपविष्णुपादसङ्गमांपतत्रिरूपधारिविघ्नराजचुञ्चुचुम्बिताम् ।भवाब्धितारकात्रिसूनुपादुकापवित्रितांभजामि सह्यकन्यकां भजामि सह्यकन्यकाम् ॥ २॥

pavitradhātrivṛkṣarūpaviṣṇupādasaṅgamāṃpatatrirūpadhārivighnarājacuñcucumbitām |bhavābdhitārakātrisūnupādukāpavitritāṃbhajāmi sahyakanyakāṃ bhajāmi sahyakanyakām || 2||

अनेककोटिपुण्यतीर्थसङ्गमेन पूरितांअनोकहप्रकीर्णपुष्पपल्लवैः परिष्कृताम् ।निनादपूर्णचारुवीचिकीर्णरत्नमौक्तिकांभजामि सह्यकन्यकां भजामि सह्यकन्यकाम् ॥ ३॥

anekakoṭipuṇyatīrthasaṅgamena pūritāṃanokahaprakīrṇapuṣpapallavaiḥ pariṣkṛtām |ninādapūrṇacāruvīcikīrṇaratnamauktikāṃbhajāmi sahyakanyakāṃ bhajāmi sahyakanyakām || 3||

तटद्वयेपि शम्भुविष्णुमन्दिरैर्विराजितांतटिल्लतासमानदेवसुन्दरीभिराश्रिताम् ।वटादिवृक्षमूलवासिमौनिवृन्दभावितांभजामि सह्यकन्यकां भजामि सह्यकन्यकाम् ॥ ४॥

taṭadvayepi śambhuviṣṇumandirairvirājitāṃtaṭillatāsamānadevasundarībhirāśritām |vaṭādivṛkṣamūlavāsimaunivṛndabhāvitāṃbhajāmi sahyakanyakāṃ bhajāmi sahyakanyakām || 4||

तरङ्गचारुमेखलां विलोलमीनलोचनांप्रवाळमौक्तिकोज्ज्वलां प्रफुल्लपुष्पमालिकाम् ।कुचायिताब्जकुड्मलां च कुङ्कुमादिपाटलांभजामि सह्यकन्यकां भजामि सह्यकन्यकाम् ॥ ५॥

taraṅgacārumekhalāṃ vilolamīnalocanāṃpravāḷamauktikojjvalāṃ praphullapuṣpamālikām |kucāyitābjakuḍmalāṃ ca kuṅkumādipāṭalāṃbhajāmi sahyakanyakāṃ bhajāmi sahyakanyakām || 5||

भुजङ्गशायिरङ्गनाथपादसेवनाशयाभुजद्वयं प्रसार्य निःसृतामिव स्थितां मुदा ।गजेन्द्रकेळिवर्धिनीं द्विजेन्द्रहर्षदायिनींभजामि सह्यकन्यकां भजामि सह्यकन्यकाम् ॥ ६॥

bhujaṅgaśāyiraṅganāthapādasevanāśayābhujadvayaṃ prasārya niḥsṛtāmiva sthitāṃ mudā |gajendrakeḷivardhinīṃ dvijendraharṣadāyinīṃbhajāmi sahyakanyakāṃ bhajāmi sahyakanyakām || 6||

किरीटिरामशन्तनुप्रभृत्यनेकपार्थिवैःप्रपूजितां च धर्मवर्मराजदाल्भ्यकीर्तिताम् ।धरातलैकभूषणां सुरादिसर्वजीवनांभजामि सह्यकन्यकां भजामि सह्यकन्यकाम् ॥ ७॥

kirīṭirāmaśantanuprabhṛtyanekapārthivaiḥprapūjitāṃ ca dharmavarmarājadālbhyakīrtitām |dharātalaikabhūṣaṇāṃ surādisarvajīvanāṃbhajāmi sahyakanyakāṃ bhajāmi sahyakanyakām || 7||

प्रनष्टपञ्चपातकां प्रकृष्टपुण्यदायिकांसहर्षदिव्यकेळिकां समुद्रराजनायिकाम् ।सहस्रपत्रमालिकां सरोजपत्रदोळिकांभजामि सह्यकन्यकां भजामि सह्यकन्यकाम् ॥ ८॥

pranaṣṭapañcapātakāṃ prakṛṣṭapuṇyadāyikāṃsaharṣadivyakeḷikāṃ samudrarājanāyikām |sahasrapatramālikāṃ sarojapatradoḷikāṃbhajāmi sahyakanyakāṃ bhajāmi sahyakanyakām || 8||

सह्यकन्याष्टकमिदं पुण्यं प्रेमिकेन प्रकीर्तितम् ।श्रद्धया कीर्तयन्नित्यं सर्वमङ्गळमाप्नुयात् ॥ ९॥

sahyakanyāṣṭakamidaṃ puṇyaṃ premikena prakīrtitam |śraddhayā kīrtayannityaṃ sarvamaṅgaḷamāpnuyāt || 9||

इति कावेर्याष्टकं अथवा सह्यकन्यकाष्टकं सम्पूर्णम् ।

iti kāveryāṣṭakaṃ athavā sahyakanyakāṣṭakaṃ sampūrṇam |