सिद्धिविनायकस्तोत्रम् Shri Siddhivinayaka Stotram

जयोऽस्तु ते गणपते देहि मे विपुलां मतिम् ।स्तवनम् ते सदा कर्तुं स्फूर्ति यच्छममानिशम् ॥ १॥

jayo'stu te gaṇapate dehi me vipulāṃ matim |stavanam te sadā kartuṃ sphūrti yacchamamāniśam || 1||

प्रभुं मंगलमूर्तिं त्वां चन्द्रेन्द्रावपि ध्यायतः ।यजतस्त्वां विष्णुशिवौ ध्यायतश्चाव्ययं सदा ॥ २॥

prabhuṃ maṃgalamūrtiṃ tvāṃ candrendrāvapi dhyāyataḥ |yajatastvāṃ viṣṇuśivau dhyāyataścāvyayaṃ sadā || 2||

विनायकं च प्राहुस्त्वां गजास्यं शुभदायकम् ।त्वन्नाम्ना विलयं यान्ति दोषाः कलिमलान्तक ॥ ३॥

vināyakaṃ ca prāhustvāṃ gajāsyaṃ śubhadāyakam |tvannāmnā vilayaṃ yānti doṣāḥ kalimalāntaka || 3||

त्वत्पदाब्जाङ्कितश्चाहं नमामि चरणौ तव ।देवेशस्त्वं चैकदन्तो मद्विज्ञप्तिं शृणु प्रभो ॥ ४॥

tvatpadābjāṅkitaścāhaṃ namāmi caraṇau tava |deveśastvaṃ caikadanto madvijñaptiṃ śṛṇu prabho || 4||

कुरु त्वं मयि वात्सल्यं रक्ष मां सकलानिव ।विघ्नेभ्यो रक्ष मां नित्यं कुरु मे चाखिलाः क्रियाः ॥ ५॥

kuru tvaṃ mayi vātsalyaṃ rakṣa māṃ sakalāniva |vighnebhyo rakṣa māṃ nityaṃ kuru me cākhilāḥ kriyāḥ || 5||

गौरिसुतस्त्वं गणेशः शॄणु विज्ञापनं मम ।त्वत्पादयोरनन्यार्थी याचे सर्वार्थ रक्षणम् ॥ ६॥

gaurisutastvaṃ gaṇeśaḥ śṝṇu vijñāpanaṃ mama |tvatpādayorananyārthī yāce sarvārtha rakṣaṇam || 6||

त्वमेव माता च पिता देवस्त्वं च ममाव्ययः ।अनाथनाथस्त्वं देहि विभो मे वांछितं फलम् ॥ ७॥

tvameva mātā ca pitā devastvaṃ ca mamāvyayaḥ |anāthanāthastvaṃ dehi vibho me vāṃchitaṃ phalam || 7||

लम्बोदरस्वम् गजास्यो विभुः सिद्धिविनायकः ।हेरम्बः शिवपुत्रस्त्वं विघ्नेशोऽनाथबांधवः ॥ ८॥

lambodarasvam gajāsyo vibhuḥ siddhivināyakaḥ |herambaḥ śivaputrastvaṃ vighneśo'nāthabāṃdhavaḥ || 8||

नागाननो भक्तपालो वरदस्त्वं दयां कुरु ।सिन्दूरवर्णः परशुहस्तस्त्वं विघ्ननाशकः ॥ ९॥

nāgānano bhaktapālo varadastvaṃ dayāṃ kuru |sindūravarṇaḥ paraśuhastastvaṃ vighnanāśakaḥ || 9||

विश्वास्यं मङ्गलाधीशं विघ्नेशं परशूधरम् ।दुरितारिं दीनबन्धूं सर्वेशं त्वां जना जगुः ॥ १०॥

viśvāsyaṃ maṅgalādhīśaṃ vighneśaṃ paraśūdharam |duritāriṃ dīnabandhūṃ sarveśaṃ tvāṃ janā jaguḥ || 10||

नमामि विघ्नहर्तारं वन्दे श्रीप्रमथाधिपम् ।नमामि एकदन्तं च दीनबन्धू नमाम्यहम् ॥ ११॥

namāmi vighnahartāraṃ vande śrīpramathādhipam |namāmi ekadantaṃ ca dīnabandhū namāmyaham || 11||

नमनं शम्भुतनयं नमनं करुणालयम् ।नमस्तेऽस्तु गणेशाय स्वामिने च नमोऽस्तु ते ॥ १२॥

namanaṃ śambhutanayaṃ namanaṃ karuṇālayam |namaste'stu gaṇeśāya svāmine ca namo'stu te || 12||

नमोऽस्तु देवराजाय वन्दे गौरीसुतं पुनः ।नमामि चरणौ भक्त्या भालचन्द्रगणेशयोः ॥ १३॥

namo'stu devarājāya vande gaurīsutaṃ punaḥ |namāmi caraṇau bhaktyā bhālacandragaṇeśayoḥ || 13||

नैवास्त्याशा च मच्चित्ते त्वद्भक्तेस्तवनस्यच ।भवेत्येव तु मच्चित्ते ह्याशा च तव दर्शने ॥ १४॥

naivāstyāśā ca maccitte tvadbhaktestavanasyaca |bhavetyeva tu maccitte hyāśā ca tava darśane || 14||

अज्ञानश्चैव मूढोऽहं ध्यायामि चरणौ तव ।दर्शनं देहि मे शीघ्रं जगदीश कृपां कुरु ॥ १५॥

ajñānaścaiva mūḍho'haṃ dhyāyāmi caraṇau tava |darśanaṃ dehi me śīghraṃ jagadīśa kṛpāṃ kuru || 15||

बालकश्चाहमल्पज्ञः सर्वेषामसि चेश्वरः ।पालकः सर्वभक्तानां भवसि त्वं गजानन ॥ १६॥

bālakaścāhamalpajñaḥ sarveṣāmasi ceśvaraḥ |pālakaḥ sarvabhaktānāṃ bhavasi tvaṃ gajānana || 16||

दरिद्रोऽहं भाग्यहीनः मच्चित्तं तेऽस्तु पादयोः ।शरण्यं मामनन्यं ते कृपालो देहि दर्शनम् ॥ १७॥

daridro'haṃ bhāgyahīnaḥ maccittaṃ te'stu pādayoḥ |śaraṇyaṃ māmananyaṃ te kṛpālo dehi darśanam || 17||

इदं गणपतेस्तोत्रं यः पठेत्सुसमाहितः ।गणेशकृपया ज्ञानसिध्धिं स लभते धनम् ॥ १८॥

idaṃ gaṇapatestotraṃ yaḥ paṭhetsusamāhitaḥ |gaṇeśakṛpayā jñānasidhdhiṃ sa labhate dhanam || 18||

पठेद्यः सिद्धिदं स्तोत्रं देवं सम्पूज्य भक्तिमान् ।कदापि बाध्यते भूतप्रेतादीनां न पीडया ॥ १९॥

paṭhedyaḥ siddhidaṃ stotraṃ devaṃ sampūjya bhaktimān |kadāpi bādhyate bhūtapretādīnāṃ na pīḍayā || 19||

पठित्वा स्तौति यः स्तोत्रमिदं सिद्धिविनायकम् ।षण्मासैः सिद्धिमाप्नोति न भवेदनृतं वचःगणेशचरणौ नत्वा ब्रूते भक्तो दिवाकरः ॥ २०॥

paṭhitvā stauti yaḥ stotramidaṃ siddhivināyakam |ṣaṇmāsaiḥ siddhimāpnoti na bhavedanṛtaṃ vacaḥgaṇeśacaraṇau natvā brūte bhakto divākaraḥ || 20||

इति श्री सिद्धिविनायक स्तोत्रम् ।

iti śrī siddhivināyaka stotram |