गणेशापराधक्षमापणस्तोत्रम् Shri Ganesha Aparadhaxamapanastotram

श्रीगणेशाय नमः ।सुमुखो मखभुङ्मुखार्चितः सुखवृद्ध्यै निखिलार्तिशान्तये।अखिलश्रुतिशीर्षवर्णितः सकलाद्यः स सदाऽस्तु मे हृदि ॥ १॥

śrīgaṇeśāya namaḥ |sumukho makhabhuṅmukhārcitaḥ sukhavṛddhyai nikhilārtiśāntaye|akhilaśrutiśīrṣavarṇitaḥ sakalādyaḥ sa sadā'stu me hṛdi || 1||

प्रणवाकृतिमस्तके नयः प्रणवो वेदमुखावसानयोः।अयमेव विभाति सुस्फुटं ह्यवतारः प्रथमः परस्य सः ॥ २॥

praṇavākṛtimastake nayaḥ praṇavo vedamukhāvasānayoḥ|ayameva vibhāti susphuṭaṃ hyavatāraḥ prathamaḥ parasya saḥ || 2||

प्रथमं गुणनायको बभौ त्रिगुणानां सुनियन्त्रणाय यः।जगदुद्भवपालनात्ययेष्वजविष्ण्वीशसुरप्रणोदकः ॥ ३॥

prathamaṃ guṇanāyako babhau triguṇānāṃ suniyantraṇāya yaḥ|jagadudbhavapālanātyayeṣvajaviṣṇvīśasurapraṇodakaḥ || 3||

विधिविष्णुहरेन्द्रदेवतादिगणानां परिपालनाद्विभुः।अपि चेन्द्रियपुञ्जचालनाद्गणनाथः प्रथितोऽर्थतः स्फुटम् ॥ ४॥

vidhiviṣṇuharendradevatādigaṇānāṃ paripālanādvibhuḥ|api cendriyapuñjacālanādgaṇanāthaḥ prathito'rthataḥ sphuṭam || 4||

अणिमामुखसिद्धिनायका भजतः साधयतीष्टकामनाः।अपवर्गमपि प्रभुर्धियो निजदासस्य तमो विहृत्य यः ॥ ५॥

aṇimāmukhasiddhināyakā bhajataḥ sādhayatīṣṭakāmanāḥ|apavargamapi prabhurdhiyo nijadāsasya tamo vihṛtya yaḥ || 5||

जननीजनकः सुखप्रदो निखिलानिष्टहरोऽखिलेष्टदः।गणनायक एव मामवेद्रदपाशाङ्कुशमोदकान् दधत् ॥ ६॥

jananījanakaḥ sukhaprado nikhilāniṣṭaharo'khileṣṭadaḥ|gaṇanāyaka eva māmavedradapāśāṅkuśamodakān dadhat || 6||

शरणं करुणार्णवः स मे शरणं रक्ततनुश्चतुर्भुजः।शरणं भजकान्तरायहा शरणं मङ्गलमूर्तिरस्तु मे ॥ ७॥

śaraṇaṃ karuṇārṇavaḥ sa me śaraṇaṃ raktatanuścaturbhujaḥ|śaraṇaṃ bhajakāntarāyahā śaraṇaṃ maṅgalamūrtirastu me || 7||

सततं गणनायकं भजे नवनीताधिककोमलान्तरम्।भजनाद्भवभीतिभञ्जनं स्मरणाद्विघ्ननिवारणक्षमम् ॥ ८॥

satataṃ gaṇanāyakaṃ bhaje navanītādhikakomalāntaram|bhajanādbhavabhītibhañjanaṃ smaraṇādvighnanivāraṇakṣamam || 8||

अरुणारुणवर्णराजितं तरुणादित्यसमप्रभं प्रभुम्।वरुणायुधमोदकावहं करुणामूर्तिमहं प्रणौमि तम् ॥ ९॥

aruṇāruṇavarṇarājitaṃ taruṇādityasamaprabhaṃ prabhum|varuṇāyudhamodakāvahaṃ karuṇāmūrtimahaṃ praṇaumi tam || 9||

क्व नु मूषकवाहनं प्रभुं मृगये त्वज्ञतमोऽवनीतले।विबुधास्तु पितामहादयस्त्रिषु लोकेष्वपि यं न लेभिरे ॥ १०॥

kva nu mūṣakavāhanaṃ prabhuṃ mṛgaye tvajñatamo'vanītale|vibudhāstu pitāmahādayastriṣu lokeṣvapi yaṃ na lebhire || 10||

शरणागतपालनोत्सुकं परमानन्दमजं गणेश्वरम्।वरदानपटुं कृपानिधिं हृदयाब्जे निदधामि सर्वदा ॥ ११॥

śaraṇāgatapālanotsukaṃ paramānandamajaṃ gaṇeśvaram|varadānapaṭuṃ kṛpānidhiṃ hṛdayābje nidadhāmi sarvadā || 11||

सुमुखे विमुखे सति प्रभौ न महेन्द्रादपि रक्षणं कदा।त्वयि हस्तिमुखे प्रसन्नताऽभिमुखेनापि यमाद्भयं भवेत् ॥ १२॥

sumukhe vimukhe sati prabhau na mahendrādapi rakṣaṇaṃ kadā|tvayi hastimukhe prasannatā'bhimukhenāpi yamādbhayaṃ bhavet || 12||

सुतरां हि जडोऽपि पण्डितः खलु मूकोऽप्यतिवाक्पतिर्भवेत्।गणराजदयार्द्रवीक्षणादपि चाज्ञः सकलज्ञातामियात् ॥ १३॥

sutarāṃ hi jaḍo'pi paṇḍitaḥ khalu mūko'pyativākpatirbhavet|gaṇarājadayārdravīkṣaṇādapi cājñaḥ sakalajñātāmiyāt || 13||

अमृतं तु विषं विषं सुधा परमाणुस्तु नगो नगोऽप्यणुः।कुलिशं तु तृणं तृणं पविर्गणनाथाशु तवेच्छया भवेत् ॥ १४॥

amṛtaṃ tu viṣaṃ viṣaṃ sudhā paramāṇustu nago nago'pyaṇuḥ|kuliśaṃ tu tṛṇaṃ tṛṇaṃ pavirgaṇanāthāśu tavecchayā bhavet || 14||

गतोऽसि विभो विहाय मां ननु सर्वज्ञ न वेत्सि मां कथम्।किमु पश्यसि विश्वदृङ् न मां न दया किमपि ते दयानिधे ॥ १५॥

gato'si vibho vihāya māṃ nanu sarvajña na vetsi māṃ katham|kimu paśyasi viśvadṛṅ na māṃ na dayā kimapi te dayānidhe || 15||

अयि दीनदयासरित्पते मयि नैष्ठुर्यमिदं कुतः कृतम्।निजभक्तिसुधालवोऽपि यन्न हि दत्तो जनिमृत्युमोचकः ॥ १६॥

ayi dīnadayāsaritpate mayi naiṣṭhuryamidaṃ kutaḥ kṛtam|nijabhaktisudhālavo'pi yanna hi datto janimṛtyumocakaḥ || 16||

नितरां विषयोपभोगतः क्षपितं त्वायुरमूल्यमेनसा।अहहाज्ञतमस्य साहसं सहनीयं कृपया त्वया विभो ॥ १७॥

nitarāṃ viṣayopabhogataḥ kṣapitaṃ tvāyuramūlyamenasā|ahahājñatamasya sāhasaṃ sahanīyaṃ kṛpayā tvayā vibho || 17||

भगवन्नहि तारकस्य ते वत मन्त्रस्य जपः कृतस्तथा।न कदैकधियापि चिन्तनं तव मूर्तेस्तु मयातिपाप्मना ॥ १८॥

bhagavannahi tārakasya te vata mantrasya japaḥ kṛtastathā|na kadaikadhiyāpi cintanaṃ tava mūrtestu mayātipāpmanā || 18||

भजनं न कृतं समर्चनं तव नामस्मरणं न दर्शनम्।हवनं प्रियमोदकार्पणं नवदूर्वा न समर्पिता मया ॥ १९॥

bhajanaṃ na kṛtaṃ samarcanaṃ tava nāmasmaraṇaṃ na darśanam|havanaṃ priyamodakārpaṇaṃ navadūrvā na samarpitā mayā || 19||

नच साधुसमागमः कृतस्तव भक्ताश्च मया न सत्कृताः।द्विजभोजनमप्यकारि नो वत दौरात्म्यमिदं क्षमस्व मे ॥ २०॥

naca sādhusamāgamaḥ kṛtastava bhaktāśca mayā na satkṛtāḥ|dvijabhojanamapyakāri no vata daurātmyamidaṃ kṣamasva me || 20||

न विधिं तव सेवनस्य वा नच जाने स्तवनं मनुं तथा।करयुग्मशिरःसुयोजनं तव भूयाद्गणनाथपूजनम् ॥ २१॥

na vidhiṃ tava sevanasya vā naca jāne stavanaṃ manuṃ tathā|karayugmaśiraḥsuyojanaṃ tava bhūyādgaṇanāthapūjanam || 21||

अथ का गणनाथ मे गतिर्नहि जाने पतितस्य भाविनी।इति तप्ततनुं सदाऽव मामनुकम्पार्द्रकटाक्षवीक्षणैः ॥ २२॥

atha kā gaṇanātha me gatirnahi jāne patitasya bhāvinī|iti taptatanuṃ sadā'va māmanukampārdrakaṭākṣavīkṣaṇaiḥ || 22||

इह दण्डधरस्य सङ्गमेऽखिलधैर्यच्यवने भयङ्करे।अविता गणराज को नु मां तनुपातावसरे त्वया विना ॥ २३॥

iha daṇḍadharasya saṅgame'khiladhairyacyavane bhayaṅkare|avitā gaṇarāja ko nu māṃ tanupātāvasare tvayā vinā || 23||

वद कं भवतोऽन्यमिष्टदाच्छरणं यामि दयाधनादृते।अवनाय भवाग्निभर्जितो गतिहीनः सुखलेशवर्जितः ॥ २४॥

vada kaṃ bhavato'nyamiṣṭadāccharaṇaṃ yāmi dayādhanādṛte|avanāya bhavāgnibharjito gatihīnaḥ sukhaleśavarjitaḥ || 24||

श्रुतिमृग्यपथस्य चिन्तनं किमु वाचोऽविषयस्य संस्तुतिम्।किमु पूजनमप्यनाकृतेरसमर्थो रचयामि देवते ॥ २५॥

śrutimṛgyapathasya cintanaṃ kimu vāco'viṣayasya saṃstutim|kimu pūjanamapyanākṛterasamartho racayāmi devate || 25||

किमु मद्विकलात्स्वसेवनं किमु रङ्कादुपचारवैभवम्।जडवाङ्मतितो निजस्तुतिं गणनाथेच्छसि वा दयानिधे ॥ २६॥

kimu madvikalātsvasevanaṃ kimu raṅkādupacāravaibhavam|jaḍavāṅmatito nijastutiṃ gaṇanāthecchasi vā dayānidhe || 26||

अधुनापि च किं दया न ते मम पापातिशयादितीश चेत्।हृदये नवनीतकोमले न हि काठिन्यनिवेशसम्भवः ॥ २७॥

adhunāpi ca kiṃ dayā na te mama pāpātiśayāditīśa cet|hṛdaye navanītakomale na hi kāṭhinyaniveśasambhavaḥ || 27||

व्यसनार्दितसेवकस्य मे प्रणतस्याशु गणेश पादयोः।अभयप्रदहस्तपङ्कजं कृपया मूर्ध्नि कुरुष्व तावकम् ॥ २८॥

vyasanārditasevakasya me praṇatasyāśu gaṇeśa pādayoḥ|abhayapradahastapaṅkajaṃ kṛpayā mūrdhni kuruṣva tāvakam || 28||

जननीतनयस्य दृक्पथं मुहुरेति प्रसभं दयार्द्रधीः।मम दृग्विषयस्तथैव भो गणनाथाशु भवनुकम्पया ॥ २९॥

jananītanayasya dṛkpathaṃ muhureti prasabhaṃ dayārdradhīḥ|mama dṛgviṣayastathaiva bho gaṇanāthāśu bhavanukampayā || 29||

गजराजमुखाय ते नमो मृगराजोत्तमवाहनाय ते।द्विजराजकलाभृते नमो गणराजाय सदा नमोऽस्तु ते ॥ ३०॥

gajarājamukhāya te namo mṛgarājottamavāhanāya te|dvijarājakalābhṛte namo gaṇarājāya sadā namo'stu te || 30||

गणनाथ गणेश विघ्नराट् शिवसूनो जगदेकसद्गुरो।सुरमानुषगीतमद्यशः प्रणतं मामव संसृतेर्भयात् ॥ ३१॥

gaṇanātha gaṇeśa vighnarāṭ śivasūno jagadekasadguro|suramānuṣagītamadyaśaḥ praṇataṃ māmava saṃsṛterbhayāt || 31||

जय सिद्धिपते महामते जय बुद्धीश जडार्तसद्गते।जय योगिसमूहसद्गुरो जय सेवारत कल्पनातरो ॥ ३२॥

jaya siddhipate mahāmate jaya buddhīśa jaḍārtasadgate|jaya yogisamūhasadguro jaya sevārata kalpanātaro || 32||

तनुवाग् हृदयैरसच्च सद्यदनस्थात्रितये कृतं मया।जगदीश करिष्यमाणमप्यखिलं कर्म गणेश तेऽर्पितम् ॥ ३३॥

tanuvāg hṛdayairasacca sadyadanasthātritaye kṛtaṃ mayā|jagadīśa kariṣyamāṇamapyakhilaṃ karma gaṇeśa te'rpitam || 33||

इति कृष्णमुखोद्गतं स्तवं गणराजस्य पुरः पठेन्नरः।सकलाधिविवर्जितो भवेत्सुतदारादिसुखी स मुक्तिभाक् ॥ ३४॥

iti kṛṣṇamukhodgataṃ stavaṃ gaṇarājasya puraḥ paṭhennaraḥ|sakalādhivivarjito bhavetsutadārādisukhī sa muktibhāk || 34||

इति मुद्गलपुराणन्तर्वर्ति श्रीगणेशापराधक्षमापणस्तोत्रं सम्पूर्णम् ।

iti mudgalapurāṇantarvarti śrīgaṇeśāparādhakṣamāpaṇastotraṃ sampūrṇam |