गणेशस्तोत्रम् Devaih Kritam Ganesha Stotram

देवा ऊचुः ।यः सर्वकार्येषु सदा सुराणामपीशविष्ण्वम्बुजसम्भवानाम् ।पूज्यो नमस्यः परिचिन्तनीयस्तं विघ्नराजं शरणं व्रजामः ॥ ६॥

devā ūcuḥ |yaḥ sarvakāryeṣu sadā surāṇāmapīśaviṣṇvambujasambhavānām |pūjyo namasyaḥ paricintanīyastaṃ vighnarājaṃ śaraṇaṃ vrajāmaḥ || 6||

न विघ्नराजेन समोऽस्ति कश्चिद्देवो मनोवाञ्छितसम्प्रदाता ।निश्चित्य चैतत्त्रिपुरान्तकोऽपि तं पूजयामास वधे पुराणाम् ॥ ७॥

na vighnarājena samo'sti kaściddevo manovāñchitasampradātā |niścitya caitattripurāntako'pi taṃ pūjayāmāsa vadhe purāṇām || 7||

करोतु सोऽस्माकमविघ्नमस्मिन्महाक्रतौ सत्वरमाम्बिकेयः ।ध्यातेन येनाखिलदेहभाजां पूर्णा भविष्यन्ति मनोभिलाषाः ॥ ८॥

karotu so'smākamavighnamasminmahākratau satvaramāmbikeyaḥ |dhyātena yenākhiladehabhājāṃ pūrṇā bhaviṣyanti manobhilāṣāḥ || 8||

महोत्सवोऽभूदखिलस्य देव्या जातः सुतश्चिन्तितमात्र एव ।अतोऽवदन्सुरसङ्घाः कृतार्थाः सद्योजातं विघ्नराजं नमन्तः ॥ ९॥

mahotsavo'bhūdakhilasya devyā jātaḥ sutaścintitamātra eva |ato'vadansurasaṅghāḥ kṛtārthāḥ sadyojātaṃ vighnarājaṃ namantaḥ || 9||

यो मातुरुत्सङ्गगतोऽथ मात्रा निवार्यमाणोऽपि बलाच्च चन्द्रम् ।सङ्गोपयामास पितुर्जटासु गणाधिनाथस्य विनोद एषः ॥ १०॥

yo māturutsaṅgagato'tha mātrā nivāryamāṇo'pi balācca candram |saṅgopayāmāsa piturjaṭāsu gaṇādhināthasya vinoda eṣaḥ || 10||

पपौ स्तनं मातुरथापि तृप्तो यो भ्रातृमात्सर्यकषायबुद्धिः ।लम्बोदरस्त्वं भव विघ्नराजो लम्बोदरं नाम चकार शम्भुः ॥ ११॥

papau stanaṃ māturathāpi tṛpto yo bhrātṛmātsaryakaṣāyabuddhiḥ |lambodarastvaṃ bhava vighnarājo lambodaraṃ nāma cakāra śambhuḥ || 11||

संवेष्टितो देवगणैर्महेशः प्रवर्ततां नृत्यमितीत्युवाच ।सन्तोषितो नूपुररावमात्राद्गणेश्वरत्वेऽभिषिषेच पुत्रम् ॥ १२॥

saṃveṣṭito devagaṇairmaheśaḥ pravartatāṃ nṛtyamitītyuvāca |santoṣito nūpurarāvamātrādgaṇeśvaratve'bhiṣiṣeca putram || 12||

यो विघ्नपाशं च करेण बिभ्रत्स्कन्धे कुठारं च तथा परेण ।अपूजितो विघ्नमथोऽपि मातुः करोति को विघ्नपतेः समोऽन्यः ॥ १३॥

yo vighnapāśaṃ ca kareṇa bibhratskandhe kuṭhāraṃ ca tathā pareṇa |apūjito vighnamatho'pi mātuḥ karoti ko vighnapateḥ samo'nyaḥ || 13||

धर्मार्थकामादिषु पूर्वपूज्यो देवासुरैः पूज्यत एव नित्यम् ।यस्यार्चनं नैव विनाशमस्ति तं पूर्वपूज्यं प्रथमं नमामि ॥ १४॥

dharmārthakāmādiṣu pūrvapūjyo devāsuraiḥ pūjyata eva nityam |yasyārcanaṃ naiva vināśamasti taṃ pūrvapūjyaṃ prathamaṃ namāmi || 14||

यस्यार्चनात्प्रार्थनयाऽनुरूपां दृष्ट्वा तु सर्वस्य फलस्य सिद्धिम् ।स्वतन्त्रसामर्थ्यकृतातिगर्वं भ्रातृप्रियं त्वाखुरथं तमीडे ॥ १५॥

yasyārcanātprārthanayā'nurūpāṃ dṛṣṭvā tu sarvasya phalasya siddhim |svatantrasāmarthyakṛtātigarvaṃ bhrātṛpriyaṃ tvākhurathaṃ tamīḍe || 15||

यो मातरं सरसैर्नृत्यगीतैस्तथाऽभिलाषैरखिलैर्विनोदैः ।सन्तोषयामास तदाऽतितुष्टं तं श्रीगणेशं शरणं प्रपद्ये ॥ १६॥

yo mātaraṃ sarasairnṛtyagītaistathā'bhilāṣairakhilairvinodaiḥ |santoṣayāmāsa tadā'tituṣṭaṃ taṃ śrīgaṇeśaṃ śaraṇaṃ prapadye || 16||

सुरोपकारैरसुरैश्च युद्धैः स्तोत्रैर्नमस्कारपरैश्च मन्त्रैः ।पितृप्रसादेन सदा समृद्धं तं श्रीगणेशं शरणं प्रपद्ये ॥ १७॥

suropakārairasuraiśca yuddhaiḥ stotrairnamaskāraparaiśca mantraiḥ |pitṛprasādena sadā samṛddhaṃ taṃ śrīgaṇeśaṃ śaraṇaṃ prapadye || 17||

जये पुराणामकरोत्प्रतीपं पित्राऽपि हर्षात्प्रतिपूजितो यः ।निर्विघ्नतां चापि पुनश्चकार तस्मै गणेशाय नमस्करोमि ॥ १८॥

jaye purāṇāmakarotpratīpaṃ pitrā'pi harṣātpratipūjito yaḥ |nirvighnatāṃ cāpi punaścakāra tasmai gaṇeśāya namaskaromi || 18||

इति ब्रह्मपुराणे चतुर्दशाधिकशततमाध्यायान्तर्गतंदेवैः कृतं गणेशस्तोत्रं समाप्तम् ।ब्रह्मपुराण । अध्याय ११४/६१८॥ब्रह्मपुराण । अध्याय ११४/६-१८॥

iti brahmapurāṇe caturdaśādhikaśatatamādhyāyāntargataṃdevaiḥ kṛtaṃ gaṇeśastotraṃ samāptam |brahmapurāṇa | adhyāya 114/618||brahmapurāṇa | adhyāya 114/6-18||